Учуғыбызар алнында хубағанға ханаттарын хыймыратчатхан мышцаларын кӱнге чылыдып аларға кирек. Че пулуттығ кӱннерде капуста хубағаны пасха хубағаннардаң пурун учуғыбысча. Ноға?

Хайығ айландырыңар. Аймах-пасха хубағаннар учуғыбызар алнында кӱнге сістенчелер. Ол туста оларның ханаттары чабых полчалар, чіке турчалар алай чатчалар. Капуста хубағаны, тізең, ханаттарын латинскай V буква кӧрімніг тутча. Істезіглер хоостыра чахсы иде чылынып алар ӱчӱн, хубағанға ханаттарын чіке осьтың 17 градусча тударға кирек. Андада кӱннің энергиязы хубағанның кӧксіндегі мышцаларын кӧні чылытча. Іди ханаттарын хыймыратчатхан мышцалар учуғар алнында табырах чылып парчалар.

Англиядағы Эксетерскай университеттің істезігҷілері солнечнай панельлерні, хубағанының V кӧрімніг ханаттары чіли, турғыс салза, олар кӧп арах энергия пирерлер бе тіп сыныхтааннар. Іди турғысхан панельлер 50 процентке чағын кӧп энергия пир сыхханнар.

Істезігҷілер хубағанның ханаттарының ӱстӱ кӱн сустарын чахсы отражать полчатханнарын сизін салғаннар. Хубағанның V кӧрімніг паза кӱн сустарын чахсы отражать полчатхан ханаттарына кӧӧгіп, учёнайлар ниик арах панельлер идіп алғаннар паза олар кӧп арах энергия пир сыхханнар. Профессор Ричард Ффренч-Констэнт, істезігҷілернің пірсі, капуста хубағанын «кӱннең энергия алҷаң специалист» тіп адап салған.

Хайди сағынчазар? Капуста хубағанының ханаттары эволюция хоостыра V кӧрімніг пол парғаннар ба алай оларны хыйға Чайаачы іди чайап салған ма?