Ибдегі хоосхалар уғаа арығ тудынчалар паза сыбыра чазанчалар. Олар узубинчатхан тустың тӧртінҷі чардығын чуунып иртірчелер. Оларның чазанарға уғаа килістіре тиріг пар — тіл.

Хайығ айландырыңар. Хоосханың тілінде 290 кічиҷек сосок алай кізі тырғағы осхас хатығ ілгіс. Полған на ілгіс нандыра, хоосханың ӧӧзінзер кӧрче, олар кӧп нимес тӱріл парған чіли кӧрінчелер. Хоосханың тілі ахсынзар кір парзох, андағы оймахтарға сілегей тол парча. Хоосха позын чалғапчатса, ол ілгістер тӱктерні чара-чара итчелер. Аннаңар, сілегейі аның теерін ӧллепче.

Пір кӱнге хоосха тееріне 48 миллилитрҷе сілегей сӱрт салча. Аның сілегейінде кірні изілдірҷең нимелер пар, аннаңар ол аны уғаа чахсы арығлапча. Паза сілегей, кондиционер чіли, тоғынча. Сілегей хурғапчатса, хоосханың иді соопча. Хоосханың тирлеҷең железалары асхынах, аннаңар анзы ағаа уғаа кирек.

Ол ілгістер пазыл парған тӱкке урунзалар, олар тӱк аразына тирең арах кірчелер. Іди пазыл парған тӱкті часчалар. Ағаа хоза, хоосха чалғанчатса, ол ілгістернің пастарынаң позына массаж итче. Учёнайлар хоосха тіліне тӧӧй щётка идіп алғаннар. Ол щётка олаңай тарғахтаң хай-хай артых: таранчатса, аны тың пазарға кирек чоғыл, аны арығлирға оой арах, пазыл парған састы чахсы чарча. Учёнайлар хоосханың тілінің пӱдізіне тӧӧй нимелер идіп алза, тӱктіг нимелерні арығлирға оой арах полар тіп ізенчелер. Ідӧк хоосханың тіліне тӧӧй ниме тӱктіг теерге лосьоннар паза кремнер сӱртерге оой арах полар тіпчелер.

Хайди сағынчазар? Хоосханың тілін эволюция иткен алай аны уғаа хыйға Инженер сағын таап алған?