ЧИИТТЕРНІҢ СУРЫҒЛАРЫ
Гомосексуализм — ол хомай ниме бе?
«Улуғ арах пол сыххамда, мин ир кізілерге тартыл сыххам. Анзынаң харбазарға уғаа сидік полған. Пола-пола ол ниме ирт парыбызар тіп сағынғам. Че мин ам даа ир кізілерге тартылчам» (Дейвид, 23 чыл).
Дейвид — Худайның кӧңніне кірерге хынчатхан христианин. Ол, ир кізілерге тартылчатса, Худайның кӧңніне кір полар ба? Худай гомосексуализмге хайди хайча?
Гомосексуализмнеңер Библияда ниме чоохталча?
Гомосексуализмге кӧріс кӧбізін культуранаң, хайдағ туста чуртапчатханнаң палғалыстығ. Че христианнар кӧбізінің кӧрізіне сабылбинчалар паза «хайдағ ла полза ӱгредіг чиліне хаптыр парыбыспинчалар» (Ефестегілерге 4:14). Гомосексуализмге паза пасха даа тудыныстарға оларның кӧрістері библейскай нормаларда тӧстелчелер.
Гомосексуализмге Библиядағы кӧріс пілдістіг. Худай Сӧзінде чоохталча:
«Ир кізінең, ипчі кізінең чіли, чатпа» (Левит 18:22).
«Оларның чӱректерінің хыҷыхтаныстары тохтабааннар. Аннаңар Худай оларны постарының чазыхтарына артыс салған... Худай оларны чиркестіг хынығыстарға пир салған: ипчілері чир-салылғанни ирлерінең хонмин, сан-тискер хыныс сыхханнар» (Римдегілерге 1:24, 26).
«Пос посты алаахтырбаңар. Сайбахтарға даа, кізі холынаң иділгенге пазырчатханнарға даа, чӧреечі кізілерге дее, ир ирнең хонысчатханнарға даа, оғырларға даа, азымахчыларға даа, іскіҷілерге дее, чабал чоохтығларға даа, кӱҷӱрлерге дее Худай хан-чирі пирілбес» (1 Коринфтегілерге 6:9, 10).
Худайның нормалары олаңай даа кізее, гомосексуалист тее кізее пирілгеннер. Аннаңар полған на кізее Худайның кӧңніне кірбинчеткен хынығыстарны тобырарға паза посты холда тударға кирек (Колосстағыларға 3:5).
Анзы...
Анзы Библия гомосексуалисттерні хырт кӧрерге кӧӧктірчеткенін таныхтапча ба?
Чох. Библия пірдеезін, гомосексуалисттерні дее, пасха кізілерні дее, хырт кӧрерге кӧӧктірбинче. Библия «прайзынаң хада ынағ чуртирға» кӧӧктірче (Еврейлерге 12:14). Аннаңар гомосексуалисттерні иреелирге, хырт кӧрерге, оларға хыҷанарға паза оларнаң хазыр тудынарға чарабас.
Анзы христианнар ир кізі ир кізінең, ипчі кізі ипчі кізінең хоных хонарға чаратчатхан законнарға тоғырланарға кирек полчатханын таныхтапча ба?
Библия кӧзітче: Худайның сағызы хоостыра пір ир кізі пір ипчі кізінең хоных хонарға кирек (Матфей 19:4—6). Гомосексуалисттер хонығынаңар законнар ибіре таластар, кӧбізін моральнаң нимес, политиканаң палғалыстығлар. Библия христианнарға политикада пірдеезінің саринзар сабылбасха чоохтапча (Иоанн 18:36). Аннаңар христианнар гомосексуалисттернің хоныхтарынаң паза тудыныстарынаң палғалыстығ законнардаң тоғыр даа, оларның сарина даа турбинчалар.
Че...
Че гомосексуалист кізі алыс полар ба?
Я. Анзын пастағы векте чуртаан кізілернің кӧзідімнері кӧзітчелер. Гомосексуалисттерге «Худай хан-чирі пирілбес» тіп сӧстер соонда, Библияда піди чоохталча: «Сірернің аразында андағлар полғаннар» (1 Коринфтегілерге 6:11).
Анзы ол кізілер иргі чуртасха пір дее нандыра тартылбааннарын таныхтапча ба? Чох. Библияда чоохталча: «Пу наа кізі, Худайны пілгені пастыра нааҷыланып, позының Чайаачызының омазына тӧӧй полып одырча» (Колосстағыларға 3:10). Алызарға сыбыра кӱстенерге кирек.
Че, кізі Худайның нормаларынҷа чуртирға кӱстенчетсе дее, гомосексуальнай чуртасха тартылчатса чи?
Кізі хынығыстарына, оларның санында, гомосексуальнай хынығыстарына, сабыларға ба алай чох па позы пӧкче. Библияда піди пазылча: «Худай Худы хоостыра итчедіңер, андада постарыңның хыҷыхтарыңа салынмассар» (Галат чиріндегілерге 5:16).
Кӧріңер, пу стихта кізі хаҷан даа хыҷаланмас тіп чоохталбинча. Андағ хыҷаланыстарға тоғырлан полар ӱчӱн, кізее Библия ӱгренерге, Худайға пазырарға кирек.
Статья алнында чоохталған Дейвид пу сӧстер сын полчатханын позының чуртазында кӧрген. Ол іҷе-пабазына ол сидіктеңер чоохтап пирген, анзы ағаа уғаа тың полыс пирген. Ол піди тіпче: «Миннең аар чӱк тӱс парған тіп пілдірген. Іҷе-пабама аннаңар мының алнындох чоохтаан ползам, саарбах тузым хай-хай часкалығ поларҷых».
Сынында піс, Иегованың нормаларынҷа чуртапчатсабыс, хай-хай часкалығбыс. Піс ікінҷілебинчебіс: «Иегованың устағлары сын, чӱректі ӧріндірчелер» паза «оларның хоостыра тудынчатханнар илбек сыйых аларлар» (Псалом 19:8, 11).
