Америкада сурған кізілернің 80 проценті сыбыра пазырча, пазырчатханнарның чарымы ла кӱннің сай пазырча. Оларның піреелері мындағ сурығ турғысча поларлар: «Пазырыс — ол психологическай прием алай хай-хай аарлығ ниме бе?».

•  Пазырыс. Нимедір ол?

•  Худай пазырыстарны исче бе?

•  Нимедеңер мағаа пазырарға чарир?

•  Пасха саарбахтар ниме тіпчелер

 Пазырыс — ол Чайаачынаң сынап чоохтасханы. Сағын на кӧр, ниме анзы таныхтапча! Иегова кізілердең хай-хай пӧзік, олох туста «ол пістің полғаныбыстаң на тың даа ырах нимес» (Илҷілернің 17:27). Ағаа хоза, Библияда хығырығ пар: «Худайға чағдаңар — сірерге Ол чағдирох» (Иаковтың 4:8).

 Худайға хайди чағдирға?

•   Пастағызын, пазырыс пастыра — іди син Худайнаң чоохтасчазың.

•   Ікінҷізін, Библияны ӱгренгені пастыра — іди Худай синнең «чоохтасча».

 Іди удур-тӧдір чоохтасханы — пазырыс паза Библия ӱгредии пастыра — Худайнаң ынархазыңарны тыыдар.

 «Иегованаң чоохтазарға — Ӧӧркі Чайаачынаң сағыстарыңнаң ӱлезерге — кізілерге пирілген иң улуғ аарлас» (Джереми).

 «Иеговаа пазырыста мині сағыссыратчатхан нимелерні прай чоохтапчатсам, мин ағаа чағын полчатханымны сизінчем» (Миранда).

 Худайға киртінчетсең дее, ағаа пазырчатсаң даа, ол пазырыстарны сынап исчеткеніне киртінерге аар полча. Библия Иегованы «пазырыстарны исчеткен Худай» тіп адапча (Псалом 65:2). Ідӧк ол «прай сағыссырастарыңны Ағаа салдырыбызарға» хығырча. Ноға? «Худай сірердеңер сағынча» (1 Петрның 5:7).

 Нимедеңер сағынып аларға кирек. Чағын нанҷыларнаң чоохтазып аларға сыбыра тус таапча поларзың? Худайнаң ідӧк чоохтазарға чарир, аның Иегова тіп адын адап, андар сыбыра айлан тур (Псалом 86:5—7; 88:9). Сынында Библия сині сыбыра пазырарға хығырча (1 Фессалониктегілерге 5:17).

 «Пазырыс — ол Тигірдегі Пабамнаң, прай чӱреемні азып, чоохтасханы» (Мойзе́с).

 «Мин Иеговаа, чағын нанҷыма алай іҷемее чіли, прай ниме чоохтапчам» (Карен).

 Библияда чоохталча: «Че пазырчатсаңар, сурынчатсаңар, кӧңніңерні алғыстаснаң Худайға ас пир турыңар» (Филипптегілерге 4:6).

 Пазырыста прай сидіктерібістеңер чоохтирға чарир ба? Я, чарир! Библия хығырча: «Чӱгіңні Иеговаа артыбыс. Ол сағаа хабазар» (Псалом 55:22).

 Че Худайға пазырчатсабыс, позыбыстың сидіктерібістеңер ле чоохтирға чарабас. Чиит ипчі, Шантель чоохтапча: «Иеговадаң полызығ ла сурынчатсабыс, анзы сын нанҷыласханына тӧӧй нимес. Мин сағынчам, пурун Худайны алғыстирға кирек, минің, тізең, аны алғыстаҷаң сылтағлар кӧп».

 Нимедеңер сағынып аларға кирек. Худайны нименің ӱчӱн алғыстирға хынчазың? Иегованы алғыстастаҷаң ӱс сылтағ пӱӱн таап поларзың ма?

 «Иегованы пазырыста олаңай даа нименің ӱчӱн алғыстирға чарир. Кӧзідімге, сіліг чахайах кӧр салған ӱчӱн» (Анита).

 «Худайның чайаахтарында сині ниме иң тың хайхатчатхан нимедеңер алай Библиядағы чӱрееңе теңен стихтаңар сағын кӧр паза аның ӱчӱн Иегованы алғыста» (Брайан).