Худайға пазырар ӱчӱн, Иегованың киречілері постарының Залларында неделяда ікі хати чыылысчалар. Хайди чыылығлар иртчелер паза ноға ол чыылығларға чӧрерге кирек?

•  Иегованың киречілерінің залларында ниме полча?

•  Ноға христианскай чыылығларға чӧрерге кирек?

•  Пасха саарбахтар ниме тіпчелер

 Иегованың киречілерінің залында Библиядағы принциптернең тузаланарға ӱгретчелер. Христианскай чыылығларға чӧрзең, син:

•   Худайдаңар піліп аларзың;

•   ноға чир-чалбахта анҷа иреелер полчатханнаңар піліп аларзың;

•   чахсы качестволар тилідерзің;

•    сын нанҷылар таап аларзың.

 Пілчезің ме? Иегованың киречілерінің залларында удаа Худайның Хан-ӱлгӱзінеңер темалар ӱзӱрілчелер, аннаңар ол орыннар Иегованың адынаң адалчалар (Матфей 6:9, 10; 24:14; Лука 4:43).

 Иегованың киречілерінің залында син кӧп тузалығ нимелер піліп аларзың. Иегованың киречілерінің чыылығларында Библиядағы принциптер ӱзӱрілчелер, олар сағаа хыйға тудынарға полызарлар (Притчи 4:5). Библия сынап тузалығ кинде полчатханын піліп аларзың паза хыйға пӧгіннер аларға ӱгреніп аларзың. Ідӧк иң аарлығ сурығларға нандырығлар таап аларзың, кӧзідімге:

•   Чуртастың смыслы хайдағ?

•   Иреелерібісте Худай пыролығ ба?

•   Ӱреен соонда кізінең ниме полча?

 Тынағ кӱннерде Иегованың киречілерінің залларында мындағ темаларға Библияда тӧстелчеткен чоохтар чоохталчалар:

•   Ноға Библиянаң устанарға кирек?

•   Чобағда хайда полызығ таап аларға?

•   Амғы туста Худайның Хан-ӱлгӱзі піске ниме итче.

 «Пірсінде чыылыға миннең хада ӱгренчеткен оол килген. Ол пістің сӧбіребіснең хада одырыбысхан, піс ағаа Библия паза журнал пиргебіс. Чыылығ соонда ол минің кӧңніме чыылығның комментарий пирҷең чардығы иң тың кірген теен. Ағаа хоза, аның тигірибінде пірдеезі Библияны іди чахсы істеспинче теен» (Бренда).

 Пілчезің ме? Иегованың киречілерінің залынзар кірер ӱчӱн, ахча тӧлирге кирек чоғыл; анда ахча чығбинчалар.

 Мында чахсы, полызарға тимде кізілер чыылысчалар. Библияда христианнарға чоохтазарға паза удур-тӧдір хабазарға чыылызарға кирек тіп чоохталча (Еврейлерге 10:24, 25). Піс кӧбізін постарынаңар ла сағынчатхан кізілернің аразында чуртапчабыс. Аннаңар, постарынаңар ла сағынмин, Худайдаңар паза пасха кізілердеңер сағынчатхан кізілернің аразында ползабыс, кӧңнібіс кӧдірілер!

 «Пірееде иирге читіре минің пір дее кӱзім халбинча. Че Залзар килзем, анда кӱс алынып алчам! Мин ибзер часкалығ айланчам паза наа кӱнні удурлирға тимдезім» (Элайза).

 Пілчезің ме? Прай чир ӱстӱнде Иегованың киречілерінің 120 000 азыра ӧме. Олар 60 000 азыра Залда чыылысчалар. Чыылығларға чӧрчеткен кізілернің саны ӧсче, аннаңар чыл сай 1 500-че наа Заллар пӱдірілче a.