•   Пасхалары хырызынчатсалар, ниме чувствовать полчазың?

  •  Анзында пір дее хомай ниме чоғыл. Кирегім дее халбинча.

  •  Ол сӧстер уғаа хомай истілчелер, че пір дее ниме ит полбас.

  •  Уғаа чиркестіг. Мин анзына хаҷан даа кӧнік полбассым.

•   Син хайди удаа хырызынчазың?

  •  Хаҷан даа хырызынминчам

  •  Пірееде хырызынчам

  •  Удаа хырызынчам

•   Хайди сағынчазың, хырызынғаны сынап хомай ниме бе?

  •  Тың даа хомай нимес

  •  Уғаа хомай

 Син хырызынғанын уғаа хомай ниме тіп санапчазың ма? Арса, син піди тирзің: «Тың даа хомай ниме нимес. Чир ӱстӱнде аннаң даа аар сидіктер пар. Ағаа хоза, ибіре прайлары хырызынчалар!» Анзы андағ ба?

 Сағаа хайхастығ полар, арса, че кӧп кізілер хырызынминчалар. Оларға хырызынмасха аарлығ сылтағлар пар. Ол сылтағлар парын кӧбізі пілбиндеече. Мына оларның піреелері:

•  Хырызынғаны — ол сӧстер ле нимес. Синің чооғың синнеңер кӧп ниме чоохтапча. Хырызынып, син пасха кізілернің чувстволарын санға албинчатханыңны кӧзітчезің. Син сынап андағ кізізің ме?

   Библияда чоохталча: «Кізінің ахсынаң аның чӱреенде пар ниме сыхча» (Матфей 15:18, НТ).

•  Хырызынчатханыңның ӱчӱн синнеңер хомай сағынарлар. Хырызынысты чарытчатхан киндеде піди пазылча: «Ниме паза хайди чоохтанчатханыбыснаң кӧп ниме палғалыстығ: кем пістің нанҷыларыбыс полар, сӧбіреде паза тоғыста пісті улуғлирлар ба, ибіркі кізілернең хайдағ палғалыс полар, олар пісті нимее саларлар ба, тоғысха кір поларбыс па паза тоғыста кӧдіріл поларбыс па. Ідӧк таныс нимес кізілер піске хайди хайарлар» (Cuss Control). Ідӧк анда пазылча: «Позыңардаң сурыбызыңар: „Хырызынмин сыхсам, пасхаларынаң палғалыс чахсы арах пол парарҷых па?“»

   Библияда чоохталча: «Ӧкпеленістең... сӧклестең... позып алыңар» (Ефестегілерге 4:31, НТ).

•  Хырызынғаны сині хандыра кізі итпинче. Доктор Алекс Пакер позының киндезінде пасча: «Сыбыра хырызынчатхан кізілерні истіп ле майых парчазың». Ідӧк ол уйадыстығ сӧстер тол парған чоох «кізінің нимені тирең пілчеткенін, чітіг сағызын, хыйғазын паза паарсазын кӧзітпинче. Сірернің чооғыңар уйан, пай нимес полза паза путхалчатса, сағыстарың даа андағ полар» тіп пасча (How Rude!).

   Библияда чоохталча: «Ахсыңардаң пір дее чызығ сӧс сыхпазын» (Ефестегілерге 4:29, НТ).

•  Кӧстег турғыс сал. Пір ай алай аннаң даа асхынах туста хырызынмин чоохтас кӧр. Чидіглеріңні календарьда алай таблицада пас саларға чарир. Че пу сағысты тастабыспас ӱчӱн, піди ит кӧр:

•  Хырызыныстарны сыбыра испес ӱчӱн, ӱтертістерні чахсы талла. Библияда чоохталча: «Хомай кізілернең нанҷыласханы чахсы хылыхтарны ардатча» (1 Коринфтегілерге 15:33, НТ). «Нанҷыласханына» кізілерлер ле нимес, че ӱтертістер дее кірчелер: син кӧрчеткен фильмнер, син ойнапчатхан видеоойыннар, син исчеткен сарыннар. 17 частығ Кеннет піди тіпче: «Кӧңніңе кірчеткен сарын ис салзаңох, сарнап сыхчазың. Анда хомай уйадыстығ сӧстер парынаңар сағынминчазың даа».

•  Улуғ кізі чіли тудын. Піреелері, улуғ кізілерге тӧӧй полар ӱчӱн, хырызынчалар. Че сынында анзы андағ ниме нимес. Улуғ кізілер чахсыны чабалдаң талластыр пілчелер (Еврейлерге 5:14). Олар пасхаларын хайхадар ӱчӱн, оорли ла пол чӧрбинчелер.

 Сынында хырызыныс синің сағызыңны паза синің ибіркі кізілернің сағыстарын ардатча. Чир-чалбахта хырызыныс таа чох хомай ниме толдыра. Ӱстӱнде чоохталған киндеде хырызыныстаңар піди чоохталча: «Чиркестіг сӧстер паза чох ползын! Пу чир-чалбахты сала арығ ит салаалар: кірліг сӧстернең тузаланмаалар. Андада сірерге дее чахсы полар, пасха даа кізілер сірерні улуғлирлар» (Cuss Control).