Армагеддонда Худай чирдегі ӱлгӱлернең халғанҷызын чаалазар. Ол ӱлгӱлер паза оларға хабасчатханнар, Худайның ӱлгӱзінде чуртирға хынмин, ағаа ам даа тоғырланчалар (Псалом 2:2). Армагеддонда кізілернің ӱлгӱлері прай чох иділерлер (Даниил 2:44).

 Библияда «Армагеддон» тіп сӧс пір ле хати Азых чоох 16:16-да учурапча. Пу киндедегі ухаанҷылас хоостыра, «Прай нимедең кӱстіг Худайның илбек кӱнінде полар чааға чир ӱстӱндегі прай ханнарны чыып аларлар». Ол чаа «еврей тілінде Армагеддон тіп адалчатхан орында» полар (Азых чоох 16:14).

 Армагеддонда кем чаалазар? Иисус Христос тигірдегі чааҷыларын Худайның ыырҷыларын чиңіп аларға апарар (Азых чоох 19:11—16, 19—21). Ол ыырҷыларның санына Худайның ӱлгӱзіне тоғырланчатханнар паза аны хырт кӧрчеткеннер кірчелер (Иезекииль 39:7).

 Армагеддон Чағын Іскеркіде полар ба? Чох. Армагеддон тіп чаа пір орында нимес, прай чир ӱстӱнде полар (Иеремия 25:32—34; Иезекииль 39:17—20).

 Армагеддон, пірееде «Хар-Магедон» (еврей тілінең Хар-Мегиддон) тіп тілбестелчеткен сӧс «Мегиддо тағны» таныхтапча. Мегиддо пурунғы Израиль чиріндегі саар полған. Ол саар хыринда кӧп танығлығ чаалар полғаннар, оларның піреелері Библияда пазыл парғаннар (Судей 5:19, 20; 2 Царей 9:27; 23:29). Че андағ даа полза, Армагеддон тіп чаа пурунғы Мегиддо саар хыринда полбас. Анда пӧзік тағ чоғыл паза ағаа чағын Изреель тіп ойымда Худайдаң тоғыр парчатханнар прайлары сыңмастар. Армагеддонда прай чоннар чыылызып, Худайның Хан-ӱлгӱзінең тоғыр чаалазарға халғанҷызын сығарлар.

 Армагеддон тузында ниме полар? Худай кӱзінең хайди тузаланарын пілбинчебіс. Че мының алнындох тузаланған тиріглер аның холында пар, кӧзідімге: миндір, чир тітірезі, уғаа хазыр наңмыр, от паза сера, чалыннар паза ағырығлар (Иов 38:22, 23; Иезекииль 38:19, 22; Аввакум 3:10, 11; Захария 14:12). Худайның ыырҷыларының піреелері, алаң ас парып, удур-тӧдір ӧдірізерлер, че соонаң Худай олардаң тоғыр чааласчатханын піліп аларлар (Иезекииль 38:21, 23; Захария 14:13).

 Армагеддонда чир-чалбах чох пол парар ба? Чир чох иділбес, ол хаҷан даа прай чоннарның ибі полар (Псалом 37:29; 96:10; Экклезиаст 1:4). Армагеддонда прай кізілер хырыл парбастар. Худайның «санап тоосча чох кӧп» нымысчылары арачылан халарлар (Азых чоох 7:9, 14; Псалом 37:34).

 Библияда «чир-чалбах» тіп сӧс чирні ле нимес, че Худайға тоғырланчатхан чабал кізілерні дее таныхтапча (1 Иоанның 2:15—17). Армагеддонда пу чабал чир-чалбах чох пол парар (Матфей 24:3).

 Армагеддон хаҷан полар? Иисус «илбек чобағ» Армагеддоннаң тоозыл парарынаңар чоохтаанда, ол піди теен: «Ол кӱннеңер, ол тустаңар пірдеезі, тигірдегі ангеллер дее пілбинчелер. Аны Пабам на чалғызан пілче» (Матфей 24:21, 36). Че Библияда Армагеддон Иисустың кӧрінминчеткен килген тузында полар тіп чоохталча. Ол тус 1914 чылдаң пастал сыххан (Матфей 24:37—39).