Михаил, алай пірее религияларда «ызых архангел Михаил», — ол Иисус Христос полар. Иисус ол атты чирзер килер алнында ал чӧрген паза тигірзер парыбысхан соонда олох атты ал чӧрче a. Михаил Моисей ӱреен соонда Сайтаннаң таласхан, ідӧк пір ангелге Даниил ухаанҷаа Худайның сӧстерін читірерге полыс пирген (Даниил 10:13, 21; Иуданың 9). Михаил аттың тании «Кем Худайға тӧӧй?». Худайның Хан-ӱлгӱзінің алнына турып, паза Худайның ыырҷыларынаң харбазып, ол позының адына килістіре тудынча (Даниил 12:1; Азых чоох 12:7).

 Ноға Иисусты архангел Михаил тіп санирға чарир?

•   Михаил — архангел, алай ӧӧн ангел (Иуданың 9). «Архангел», алай «ӧӧн ангел», тіп титул Библияда ікі стихта ла учурапча. «Архангел» тіп сӧс хаҷан даа кӧп саннығ полбинча, аннаңар андағ титуллығ пір ле ангел. 1 Фессалониктегілерге 4:16-да пазылча: «Архангел ӱні истіл парза паза Худайның пырғызы тапсабысса, Хан-пигібіс [Иисус Христос] Позы даа тигірдең тӱс килер». Иисус позы архангел Михаил, аннаңар ол «архангел ӱнінең» тигірдең тӱзер.

•   Михаил ангеллернің армиязынаң устапча. «Михаил паза аның ангеллері» сыр чыланнаң, Сайтаннаң, тоғыр чааласханнар (Азых чоох 12:7). Тигірде хуттарның аразында Михаилнің ӱлгӱзі уғаа илбек: ол «ӧӧн кнестернің пірсі» паза «илбек кнес» тіп адалча (Даниил 10:13, 21; 12:1). Пу титуллар Михаил «ангеллернің армиязының ӧӧн устағҷызы» полчатханын кӧзітчелер. Библеист Дейвид Он аны іди адаан.

   Библияда ангеллернің армиязынаң устапчатхан паза пір ат пазылча. Анда: «Хан-пигібіс Иисус, тигірдең киліп... Позының кӱстіг ангеллерінең хада... ӧс алар»,— тіп пазылча (2 Фессалониктегілерге 1:7, 8; Матфей 16:27). «Иисус Христос Худайның оң холында одырча. Хаҷан Ол тигірзер ӧӧрлебіскенде, Аның чооғын ангеллер паза ӱлгӱлер паза кӱстер ис сыхханнар» (1 Петрның 3:21, 22). Худай ызых ангеллернең устирға ікі устағҷыны, Иисусты паза Михаилні, турғыспасчых. Ікі устағҷы удур-тӧдір марығлас сығарҷых. Че пу ікі атнаң пір личность адалча тирге орта полар.

•   Михаил хаҷан даа полбаан «аар туста» «кӧдірілер» (Даниил 12:1). Даниилнің киндезінде «кӧдірілерге» тіп глагол удаа ниме-де идерге сағынчатхан ханны кӧзітче (Даниил 11:2—4, 21). Иисус Христос — «Худай Сӧзі», «Ханнарның Ханы» полып, кӧдірілер: Худайның ыырҷыларын прай хырыбызып, аның чонын арачылап алар (Азых чоох 19:11—16). Ол кирек «чир пӱткеннең сығара амға теере хаҷан даа полбаан паза хаҷан даа полбас илбек чобағ» тузында полар (Матфей 24:21, 42).