Чох. Библияда Худайға ла Иисус Христос пастыра пазырарға кирек тіп чоохталча. Иисус ӱгренҷілеріне теен: «Сірер, тізең, піди пазырыңар: Тигірдегі Пабабыс! Синің Адың сабланзын» (Матфей 6:9). Ол Худайға пазырар орнына ах-арығларға, ангеллерге алай пасха даа нимее пазырарға хаҷан даа ӱгретпеен.

 Ідӧк Иисус ӱгренҷілеріне теен: «Чол, Сын паза чуртас — Минмін. Мағаа киртінчеткен кізі ле Пабамзар пар полар, Мин чох пірдеезі пар полбас» (Иоанн 14:6). Худай Иисусты ла «пістеңер Худайдаң сурынарға» турғыс салған (Еврейлерге 7:25).

Мин Худайға даа, ах-арығларға даа пазырчатсам чи?

 Он чахығның пірсінде Худай чоохтапча: «Мин Хан Худай, синің Худайыңмын, кӱннегҷі Худайбын» (Исход 20:5, Орыс Синод тілбестеенінең тілбестелген). Ноға Худай кӱннегҷі тіп адалча? Лопухиннің «Толковай Библиязында» пу стихха мындағ комментарий пирілче: «Худай, ағаа ла пазырзыннар тіп правоны, кӱннегҷі чіли, хайраллапча». Худай, ағаа ла пазырзыннар тіп, киректепче (Исаия 48:11).

 Піс аннаң пасха кемге-де, ах-арығларға даа, ангеллерге дее, пазырчатсабыс, Худайны хомзындырчабыс. Иоанн илҷі ангелге пазырарға иткенде, анзы аны, піди чоохтап, тохтадыбысхан: «Мыны идерге чарабас! Мин дее синӧк осхас паза Иисустың киречілері полчатхан харындастар осхас Худайның нымысчызыбын. Худайға пазыр!» (Азых чоох 19:10)