Библия пос кӧңнінең паза прай чӱрекнең сыйлирға кӧӧктірче. Андада сыйых алчатхан кізі дее, сыйҷы даа часкалығ полар (Притчи 11:25; Лука 6:38). Иисус Христос теен: «Пирчеткені алчатханынаң часкалығ» (Илҷілернің 20:35).

•  Худайның кӧңніне кірер ӱчӱн, сыйҷы поларға ниме кӧӧктірерге кирек?

•  Сыйҷы хаҷан Худайны ачырғандырча?

•  Сыйҷы поларынаңар Библиядағы стихтар

 Позына нандыра пір дее ниме сағыбин, сыйлааны Худайның кӧңніне кірче. Библияда чоохталча: «Полған на кізі чӱрее хоостыра пирзін. Кӧңні чарабин, ирік чохтаң пирбезін. Худай пар-чох кӧңнінең пирчеткеннерге хынча нооза» (2 Коринфтегілерге 9:7).

 «Арығ, пырозы чох пазырғаны» кізілерні сыйҷы поларға ӱгретче (Иаковтың 1:27). Пасхаларына полысчатхан кізі Худайнаң хада тоғынча тирге чарир. Худай позын андағ кізее ӧдіске кір парған тіп санапча (Притчи 19:17). Библияда сыйҷы кізілерні Худай хайди даа сыйыхтир тіп пазылча (Лука 14:12—14).

 Пірее ниме сыйлап, кізі позына пірее ниме алып аларға хынчатса. Кӧзідімге:

•   пасхаларын хайхадарға хынчатса (Матфей 6:2);

•   нандыра пірее ниме алып аларға хынчатса (Лука 14:12—14);

•   арачыланып аларға хынчатса (Псалом 49:6, 7).

 Кізі, сыйҷы полып, Худайның кӧңніне кірбинчеткен тудынысха алай кӧнігіске хабасчатса. Кӧзідімге, азартнай ойыннарға, тамкаа паза наркотиктерге ахча хоратчатхан кізее ахча пирчетсе (1 Коринфтегілерге 6:9, 10; 2 Коринфтегілерге 7:1). Тоғынарға хынминчатхан кізее ахча пирерге саба полар (2 Фессалониктегілерге 3:10).

 Кізі Худай пирген обязанностьтарын толдырбинчатса. Библия хоостыра, сӧбіре пазы сӧбірезінің кирексіністерін толдырарға кирек (1 Тимофейге 5:8). Сӧбірезінің кирексіністерін толдырбин, пасха кізілерге полысчатса, ол саба тудынча. Иисус Христос, улуғланыбысхан іҷе-пабаларын кӧрбин, «сірерге пирерін Худайға пир салдым» теен кізілерні чарғылаан (Марк 7:9—13).