Библияда «аборттаңар», ипчі кізінің істіндегі паланы чох идерінеңер, пазылбинча. Че кізінің, ідӧк тӧреелек паланың, чуртазына Худайның кӧрізін кӧзітчеткен кӧп библейскай стихтар пар.

 Чуртас — Худайның сыйии (Бытие 9:6; Псалом 36:9). Ол хайдағ даа чуртасты, тӧреелек тее паланың чуртазын, аарлыға санапча. Тӧреелек паланы ӧнетін чох иткені кізі ӧдіргеніне саналча.

 Израиль чонына пирілген Худайның чахиинда піди пазылча: «Ир кізілер, тудысчадып, чоон чӧрчеткен ипчіні сабыссалар, ол ипчі, тізең, тӧрирге читкелек паланы таап алза, че ол пала тіріг халза, анзында пыролығ кізі кинен иткен ӱчӱн тӧлебізерге кирек. Ол ипчінің ирі нинҷе киректир, чарғыҷылар пастыра анҷох тӧлеп саларға кирек. Че ол ипчі алай аның палазы ӧл парза, анзында пыролығ кізі аның чуртазының ӱчӱн чуртазын пирібізерге кирек» (Исход 21:22, 23) a.

•  Хаҷан кізінің чуртазы пасталча?

•  Худай аборт иткен кізінің пырозын тастир ба?

•  Іҷезінің алай палазының чуртазына хорғыс полза, аборт идерге чарир ба?

 Худай ипчі кізінің істінде наа ла пӱткен паланы тіріг кізее санапча. Худайның Сӧзінде, Библияда, тӧреелек паладаңар личность чіли чоохталча. Худайның хараанда тӧреен пала паза тӧреелек пала пір тиңнер. Анзын кӧзітчеткен кӧзідімнер кӧр кӧреелер.

•   Давид хан, Худай худы устаанының хоостыра, Худайдаңар піди теен: «Синің харахтарың мині, іҷемнің істінде полғамдох, кӧргеннер» (Псалом 139:16). Худай Давидті, тӧреелеккӧк, личностьха санаан.

•   Худай, Иеремия ухаанҷы тӧреелеккӧк, ағаа тоғыс пирген. Худай ағаа теен: «Мин сині, іҷеңнің істінде пӱткелеккӧк, пілгем, син тӧреелеккӧк, сині таллап алғам. Сині чоннарға ухаанҷаа турғыс салғам» (Иеремия 1:5).

•   Чахсы хабарны пасхан Лука имҷі тӧреелек паза наа ла тӧреен паладаңар чоохтаанда, пір грек сӧзінең тузаланған (Лука 1:41; 2:12, 16).

 Мының алнында аборт иткен кізее Худай аның пырозын тастирына ізеніс пар. Андағ кізі чуртасха Худайның кӧрізінің чарасчатса, ағаа аборт иткен ӱчӱн, пыросынып, ирееленерге паза кирек чоғыл . «Иегова b паарсах паза айаачы... Хайди іскеркізі кидеркізінең ырах, ол чазыхтарыбысты пістең ідӧк оортах идібіскен» (Псалом 103:8—12). Иткен чазыхтарында, ідӧк аборт иткен ӱчӱн, прай чӱрекнең пыросынчатханнарның чазыхтарын Иегова тастир (Псалом 86:5).

 Тӧреелек паланың чуртазына Библияның кӧрізін санға алза, іҷенің алай палазының хазиина хорғыс пар тіп сағынчатсалар, аборт хайди даа идерге кирек тіп сағынарға саба полар.

 Пала таапчатхан туста ипчінің алай палазының чуртазына хорғыс полза, оларның хайзын ал халарға кирек? Пу киректе кемнің чуртазын ал халарға аның ӱчӱн нандырығлығ кізі пӧгін алар.