Я, Дьявол сынап пар. Ол «чир-чалбахтың кнезі», чабал пол парған, Худайдаң тоғыр пар сыххан духовнай чайаах (Иоанн 14:30; Ефестегілерге 6:11, 12). Библия Дьяволны, аның хылиин кӧзітчеткен аймах-пасха аттарнаң адапча:

•   Сайтан — «ыырҷы» (Иов 1:6).

•   Дьявол — хопчы (Азых чоох 12:9).

•   Библияда чылан тіп сӧс Дьяволның пасхаларын алаахтырчатханын таныхтапча (2 Коринфтегілерге 11:3).

•   «Хыҷыхтандырчатхан» (Матфей 4:3).

•   «Чой» (Иоанн 8:44).

Чабал ла ниме нимес

 Піреелері Сайтан Дьяволны кізілернің істіндегі чабал хылии тіп сағынчалар. Че Библияда Худай Сайтаннаң чоохтасхан тіп пазылча. Худай ах арығ, аннаңар аның істінде чабал ниме чоғыл. Чох нименең, тізең, ол чоохтас полбасчых (Второзаконие 32:4; Иов 2:1—6). Ідӧк Сайтан чазых чох Иисусты хыҷыхтандырған (Матфей 4:8—10; 1 Иоанның 3:5). Библиядаң піліп алчабыс: Дьявол сынап пар — ол кізінің істіндегі чабал хылых нимес.

 Кӧп кізі Дьявол парына киртінминче. Анзына хайхирға кирек пе? Чох. Библия сизіндірче: Сайтан позының кӧстеглеріне чидіп алар ӱчӱн, пасхаларын алаахтырча (2 Фессалониктегілерге 2:9, 10). Аның алаахтырҷаң оңдайларының пірсі — кізілерні ол чох полчатханына киртіндіргені (2 Коринфтегілерге 4:4).

  Алҷаас: Люцифер Дьяволның аттарының пірсі.

 Сынында: «Чарыпчатхан» тіп еврей сӧзі Библияның пірее тілбестеглерінде «Люцифер» тіп тілбестелче (Исайя 14:12). Контекст хоостыра, «Люцифер» — ол Вавилондағы Худай чабаратхан поғдаархас ханнар (Исайя 14:4, 13—20). Библияда «чарыпчатхан» тіп сӧснең Вавилонның ханнарының династиязы тоозыларына кӱлчеткені кӧзіділче.

  Алҷаас: Сайтан Худайға кізілерні чарғылирға полысча.

 Сынында: Дьявол — Худайның ыырҷызы, аның нымысчызы нимес. Сайтан Дьявол Худайның нымысчыларына тоғырланча, оларны, чой чоохтар чоохтап, пыролапча (1 Петрның 5:8; Азых чоох 12:10).