Иисус, толығ полып, Худайға киртістіг нымысчыларына арачыланып аларға оңдай пирген (Матфей 20:28). Библияда Иисус «чир ӱстӱндегі кізілерні арачылирға» килген тіп чоохталча (1 Иоанның 4:14). Ідӧк анда пазылча: «Кізілерге, позыбысты арачыланарыбыс ӱчӱн, пу чир ӱстӱнде Аннаң пасха пірдеезінің ады адалбаан» (Илҷілернің 4:12).

 Иисус ағаа киртінчеткеннернің «прайзының ӱчӱн ӧлген» (Еврейлерге 2:9; Иоанн 3:16). Анаң «Худай Аны ӧліглер аразынаң тірілдірген». Соонаң ол тигірзер, духовнай личность пол парып, айланған (Илҷілернің 3:15). Тигірде ол Худайзар «Позының пастыра килчеткеннерні хаҷан даа арачылап полар. Иисус, олардаңар Худайдаң сурынары ӱчӱн, тӱгенмес хоныхтығ полар» (Еврейлерге 7:25).

Ноға Иисусха пістің ӱчӱн Худайдаң сурынарға кирек?

 Піс прайзыбыс чазых итчебіс (Римдегілерге 3:23). Чазых пісті Худайдаң хыйа итче; «чазыхтың тӧлее ӧлім, нооза» (Римдегілерге 6:23). Иисус Христос «Худай Пабазының алнында» аның толығ полчатхан тайиина киртінчеткеннернің ӱчӱн сурынча (1 Иоанның 2:1). Ол Худайдаң пістің пазырыстарыбысты иссін тіп паза аның толии пастыра чазыхтарыбысты тастазын тіп сурынча (Матфей 1:21; Римдегілерге 8:34). Иисустың сурыныстары Худайның кӧңніне кірчелер, аннаңар Иегова ол сурыныстарны исче. Худай Иисусты чирзер «прай кізілерні арачылирға ысхан» (Иоанн 3:17).

Кізі Христосха киртінзе ле, арачылан полар ба?

 Чох. Арачыланыс алар ӱчӱн, Христосха киртінерге кирек, че ағаа ла киртінгені асхынах (Илҷілернің 16:30, 31). Библияда чоохталча: «Тыны чох ит-сӧӧк ӧліг ниме. Киректері чох киртініс тее ідӧк ӧліг» (Иаковтың 2:26). Арачыланып алар ӱчӱн:

•   Иисустаңар паза аның Пабазынаңар пілістер аларға кирек (Иоанн 17:3).

•   Иеговаа паза Иисусха киртініс тыыдарға кирек (Иоанн 12:44; 14:1).

•   Худайның паза Христостың чахығларынҷа чуртап, киртіністі киректернең кӧзідерге кирек (Лука 6:46; 1 Иоанның 2:17). Иисус «Хан-пигім! Хан-пигім! тіпчеткен полған на кізі нимес», че Пабазының «кӧңнін не толдырчатхан» кізі арачылан полар тіп ӱгреткен (Матфей 7:21).

•   Сидіктер полза даа, Худайға киртістіг халарға. Иисус теен: «Тоозазын сыдас парыбысхан на кізі арачылан халар» (Матфей 24:13).