Иисус Христостың кӧрімі хайдағ полған?
Библия хоостыра нандырығ
Библияда Иисустың кӧрімінеңер пір дее ниме чоохталбинча, аннаңар хайди ол кӧрінгенін пірдеезі пілбинче. Анзына кӧп хайығ саларға кирек чоғыл. Че Ызых Пічікте аннаңар кӧмес пазылча.
Омазы: Иисустың іҷезі еврей чонынаң полған, аннаңар Иисус еврейлерге тӧӧй полған полар (Еврейлерге 7:14). Аның сырайы олаңай полған полар. Пірсінде Иисус Галилей чирінең Иерусалимзер чазынып ала килгенде, аны пірдеезі таныбаан (Иоанн 7:10, 11). Иң чағын ӱгренҷілерінің хыринда ол артых кӧрінмеен. Иуда Искариотха, Иисусты тудып алар ӱчӱн, чааҷыларға Иисусты кӧзідерге киліскен (Матфей 26:47—49).
Сазының узуны: Библияда пазылча: «Ир кізее сас ӧскірерге улуғ уйат», аннаңар Иисус узун састығ полбаан полар (1 Коринфтегілерге 11:14).
Сағалы: Иисус иудейлернің чахығларынҷа чуртаан, аннаңар ол сағаллығ полған полар. Чахығда пазылча: «Сағалларыңны хыплап ардатпаңар» (Левит 19:27; Галат чиріндегілерге 4:4). Ағаа хоза, Иисустың иреелерінеңер ухаанҷыласта ол сағаллығ полған тіп пазыл парған (Исайя 50:6).
Ит-сӧӧгі: Иисус пик сындырлығ кізі полған полар. Нымысчыланып, ол кӧп чазағ чӧрген (Матфей 9:35). Ол, «ахча орнастырҷаңнарның столларын тӱңдерібізіп», иудейлернің храмын ікі хати арығлаан. Пірсінде, арғамҷыдаң хамҷы идіп, малларны храмнаң сығара сӱрібіскен (Лука 19:45, 46; Иоанн 2:14, 15). Макклинтоктың паза Стронгтың энциклопедиязында чоохталча: «Чахсы Хабардаң [Иисус] пик хазыхтығ паза кӱстіг кізі полғаны кӧрінче» (IV. Т. 884 С.).
Сырайы: Иисустың паарсах паза айаачы кізі полғаны аның сырайында кӧрінген (Матфей 11:28, 29). Аймах-пасха кізілер Иисуста часхарыс паза полызығ тілееннер (Лука 5:12, 13; 7:37, 38). Палалар даа андар тартылҷаңнар (Матфей 19:13—15; Марк 9:35—37).
Иисустың кӧрімінеңер саба кӧрістер
Саба сағыс: Азых чоох тіп киндеде Иисустың састары тӱкнең, азахтары, тізең, «ізіг песте хайылдырып урылған холанаң» тиңнестірілчелер, аннаңар піреелері Иисус негроиднай расадаң полған тіп санапчалар (Азых чоох 1:14, 15).
Сынында: Азых чоох тіп кинде символларнаң пазылған (Азых чоох 1:1). Кӧзідімге, Иисустың сазы паза азахтары хайдағ полғаннаңар символическай саринаң пазылча. Анзы аның тірілген соондағы качестволарын кӧзітче. Че іди пазылғаны, Иисус чирде чуртаанда, аның омазы хайдағ полғанын кӧзітпинче. Азых чоох 1:14-те: «Аның састары ах тӱк паза хар осхас ахтар» тіп чоохталча. Мында састың пӱдізінеңер нимес, че аның сырынаңар пазылча. Ах алай хыр сас аның хыйғазын кӧзітче (Азых чоох 3:14). Пу стихта Иисустың сазының пӱдізінеңер чоохталбинча, ол тӱкнең не нимес, че харнаң даа тиңнестірілче нооза.
Кӧспекте Иисустың азахтары «ізіг песте хайылдырып урылған хола осхас» полғаннар (Азых чоох 1:15). Ідӧк анда «аның сырайы кӱнӧрткідегі кӱн чіли чалтырапча» тіп чоохталча (Азых чоох 1:16). Андағ сырайлығ раса чоғыл, аннаңар пу кӧспекті символическай саринаң оңнирға кирек: ол Иисустың «чағдап полбас чарыхта орныхчатханын» кӧзітче (1 Тимофейге 6:16).
Саба сағыс: Иисус уйан, ағырығ кізі полған.
Сынында: Иисус уйан кізі полбаан. Кӧзідімге, аны тудып аларға килген чонға позы удур сыххан (Иоанн 18:4—8). Ідӧк кӱзі чох кізі полған полза, ол ағас узы полып тоғын полбасчых (Марк 6:3).
Ноға андағда Иисус позының ирееленҷең столбазын апар полбаан? Ноға ол аннаң хада хазатырт салған кізілердең пурун ӱреп парған? (Лука 23:26; Иоанн 19:31—33). Столбаа хазатыртар алнында, ол, иреелеттіріп, кӧп кӱс чідір салған. Ол, тың сағыссырап, хараа тооза узубаан (Лука 22:42—44). Олох хараа иудейлер аны иреелееннер, иртен, тізең, ол римдегілерге сохтырған (Матфей 26:67, 68; Иоанн 19:1—3). Аннаңар ол табырах ӱреп парған полар.
Саба сағыс: Иисус сыбыра мӧңіс чӧрҷең.
Сынында: Иисус тигірдегі пабазының, Иегованың, качестволарын, пір дее алыстырбин, кӧзіткен. Иегова, тізең, — часкалығ Худай (1 Тимофейге 1:11, Синод тілбестее; Иоанн 14:9). Ағаа хоза, Иисус пасхаларын часкалығ поларға ӱгреткен (Матфей 5:3—9; Лука 11:28). Аннаңар аның часкалығ полғаны Иисустың сырайында кӧрінген тирге чарир.
Сірерге хынығ полар, арса
ESSENTIAL BIBLE TEACHINGS
Библия сын полчатханнаңар хайдаң пілчебіс?
Библияның авторы Худай полза, чир ӱстӱнде ағаа тӧӧй кинде чох поларға кирек.
ПІСТЕҢЕР
Сірерзер килзіннер тіп сурынып алыңар
Сірерге хынығ библейскай сурығны ӱзӱрібізіңер алай Иегованың киречілерінеңер кӧп арах піліп алыңар.