Пу сурығны турғысчатханнарның піреелерінің чағын кізізі ол туста ӱреен, аннаңар олар нандырығлар ла нимес, че часхарыс таап аларға хынчалар. Кӧп кізі холокостты кізілернің чабал киректерінің иң чабал кирегі тіп санапча, аннаңар оларға Худайға киртінерге уғаа аар.

  Алҷаас: Ноға Худай холокостты чаратхан тіп сурарға чарабас.

 Сынында: Киртіністері пик кізілер Худайдаң ноға ол чабал киректерні чаратча тіп сурарға хорыхпааннар. Кӧзідімге, Аввакум Худайға мындағ сурығ турғысхан: «Ноға син прай чирде кӱстегні, сайбағны, закон чох, хазыр тудынысты чаратчазың?» (Аввакум 1:3, Contemporary English Version). Худай Аввакумны пыролабаан, че аның сӧстерін, прайлары хығырып алзыннар тіп, Библияда пастыр салған.

  Алҷаас: Кізілернің иреелеріне Худайның кирегі халбинча.

 Сынында: Худай чабал киректерні паза олар ағылчатхан иреелерні пу харахнаң кӧрбинче (Притчи 6:16—19). Нойның тузында чир ӱстӱне кӱстег тол парғанын кӧріп, Худайның «чӱрее тың ағырыбысхан» (Бытие 6:5, 6). Ікінҷілес чоғыл, холокостты кӧріп, Худайның чӱрее ідӧк ағырған (Малахия 3:6).

  Алҷаас: Холокостнаң Худай еврейлерні хатығлаан.

 Сынында: Худай пастағы векте римляннарға Иерусалимні иңзерібізерге сынап чаратхан (Матфей 23:37—24:2). Че ол тустаң сығара Худай хайдағ-да чонны хатығлабаан паза пасха чоннардаң артых турғыспаан. Худайға «иудей бе, иудей нимес пе, пасхазы чоғыл» (Римдегілерге 10:12).

  Алҷаас: Хыныстығ паза Прай ниме ит полчатхан Худай пар полған полза, ол холокостты тохтат саларҷых.

 Сынында: Худай пірдеезін иреелебинче, че ол иреелерні пірееде чаратча (Иаковтың 1:13; 5:11).

 Худай холокостты паза прай иреелерні пір сылтағнаң чаратхан: хас-хаҷаннаң кӧдірілген талластығ сурығларны пӧгіп алар ӱчӱн. Библиядаң іле кӧрінче: ам чир-чалбахнаң Худай нимес, че Дьявол устапча (Лука 4:1, 2, 6; Иоанн 12:31). Ноға Худай холокостты чаратханын піліп алар ӱчӱн, Библиядағы ікі сағысха хайығ сал кӧреелер.

1.   Худай кізілерге постарына пӧгін аларға оңдай пирген. Худай Адамнаң Еваа, пастағы кізілерге, олардаң ниме киректепчеткенін чоохтаан, че аның сӧзін истерге кӱстебеен. Пастағы кізілер нимедір андағ чахсы, нимедір андағ хомай постары пӧгін аларға сағыныбысханнар. Оларның саба пӧгін алғаны — пасха даа кізілернің саба пӧгін алғаннары — прай чир ӱстӱне кӧп чобағ паза ирее ағылған (Бытие 2:17; 3:6; Римдегілерге 5:12). Анзы «Объяснение основ консервативного иудаизма» тіп киндеде пазылған нимее тӧӧй: «Чир-чалбахтағы иреелернің кӧбізі піске сыйыхха пирілген пос чуртаснаң саба тузаланған ӱчӱн полча» (Statement of Principles of Conservative Judaism). Худай пісті пӧгін алар оңдай чох артыспаан. Аның орнына кізілерге Худай чох чуртап кӧрерге тус пирген.

2.   Холокост ағылған ӱрегні чох идерге Худайның кӱзі пар паза ол аны хайди даа чох идібізер. Худай ӱреен миллионнарны тірілдірібізерге молҷапча, оларның санында холокостта даа ӱрееннер полар. Ідӧк, Худай ол туста полған киректерні паза «сағысха даа, чӱрекке дее килбес» ит салар (Исайя 65:17; Илҷілернің 24:15). Худай кізілерге хынча, аннаңар молҷағларын хайди даа толдыр салар (Иоанн 3:16).

 Холокостта ӧл халғаннарның паза тіріг халғаннарның санынаң кӧп кізі, ноға Худай чабал киректерні чаратчатханын паза холокосттың салтарларын чох идібізерін пілген ӱчӱн, чуртаста смысл таап алғаннар паза Худайға киртіністі чідір салбааннар.