Я, пасхазы пар. Библияда Худайның кӧңніне кірбинчеткен религиялардаңар кӧп чоохталча. Андағ религияларны ікі категорияа чарарға чарир.

1-ғы категория: кізілер чой худайларға пазырчалар

 Библияда чой худайларға пазырғаны ол «чох ниме», «тик паза пір дее туза чох ниме» тіп чоохталча (Иеремия 10:3—5, 16:19, 20, Синод тілбестее). Пурунғыда Иегова a Худай Израиль чонына чахығ пирген: «Синің миннең пасха худай полбасха кирек» (Исход 20:3, 23; 23:24). Израильтяннар пасха худайларға пазырзалар, Иегова оларға тарынҷаң (Числа 25:3; Левит 20:2; Судей 2:13, 14).

 Сын Худайның пасха «худайларға» кӧрізі алыспаан (1 Коринфтегілерге 8:5, 6; Галат чиріндегілерге 4:8). Ағаа пазырарға хынчатханнарға Худай чой религиядағы кізілернең паза ынархаспасха чахығ пирче. Ол тіпче: «Олардаң чарылып, парыбызыңар» (2 Коринфтегілерге 6:14—17). Прай религиялар чахсы ползалар паза Худайзар апарчатсалар, ноға ол андағ чахығ пирген?

2-ҷі категория: кізілер сын Худайға аның кӧңніне кірбес иде пазырчалар

 Пірееде израильтяннар сын Худайға пасха чоннарның киртіністері паза кибірлері хоостыра пазырҷаңнар. Че сын пазырысты чой пазырыснаң аралыстырғанын Иегова хырт кӧрче (Исход 32:8; Второзаконие 12:2—4). Иисус пастағы вектегі религиознай устағҷыларны Худайға хайди пазырғаннарының ӱчӱн пыролаан. Олар Худайға киртінеечік полғаннар, че сынында «Моисей Чахииның иң ӧӧн ӱгредиин — чарғыны, ӧлҷейні паза киртіністі постарынаң хыйа тастааннар» (Матфей 23:23).

 Амғы туста ідӧк: кізілерні Худайзар сынға ла ӱгретчеткен религия ағыл полар. Ол сынны Библияда таап аларға чарир (Иоанн 4:24; 17:17; 2 Тимофейге 3:16, 17). Религияларның Библияа тоғырланчатхан ӱгредіглері кізілерні Худайдаң хыйа апарчалар. Кізілер Троицадаңар, ӧлбинчеткен сӱрнідеңер паза а́дта кӧйчеткен оттаңар ӱгредіглер Библияда тӧстелгеннер тіп сағынчалар, че сынында ол ӱгредіглер чой худайларға пазырчатхан религиялардаң килгеннер. Чой религиялар, Худайның чахығларын санға албин, постарының кибірлерін тудынарға ӱгретчелер, че андағ ӱгредіглернең палғалыстығ пазырыс тик ле пазырыс (Марк 7:7, 8).

 Худай чойырхос религияларны хырт кӧрче (Титке 1:16). Кізілерге Худайға чағдирға полысчатхан религия кибірлерде ле тӧстенминче, ол кізілернің чуртазына теелерге кирек. Ідӧк Библияда чоохталча: «Худайға орта пазырчам тіп сағынып ала, олох туста тіліңе сыданминчатсаң, син позың позыңны алаахтырчазың паза синің пазырғаның пір дее нимее турбинча. Худай Пабабысха арығ, пырозы чох пазырғаны — ол ӧкістердеңер паза чалғыс чарым халған ипчілердеңер сағыссырааны паза посты пу чуртастың хынығыстарынаң хайраллааны» (Иаковтың 1:26, 27). Елизаветинскай Библияда пуох стихтарда андағ «киртініс... арығ паза чиркістіг нимес» тіп пазылча.