Библияда Левит 19:28-те ле татуировкалардаңар чоохталча. Анда пазылча: «Татуировкалар итпеңер». Пу чахығны Худай израильтяннарға, оларның ибіре чуртапчатхан чоннарға тӧӧй полбазыннар, тіп пирген. Ол чоннар худайларның аттарынаң паза танығларынаң татуировкалар ит салҷаңнар (Второзаконие 14:2). Пӱӱн христианнарға Израиль чонына пирілген Чахығны толдырарға кирек полбаза даа, ол Чахығда тӧстелчеткен принциптерге хайығ саларға кирек.

Христианнарға татуировка алай боди-арт идерге чарир ба?

 Мында пирілген библейскай стихтар пу сурығдаңар сағынып аларға полыс пирерлер.

•   «Ипчілер, уйат чох кізілер чіли нимес... иптіг тонанзыннар тіп хынчам» (1 Тимофейге 2:9, НТ). Пу приципнең ир кізілерге дее тудынарға кирек. Піске пасха кізілернің чувстволарын санға аларға паза посха иртіре кӧп хайығ тартпасха кирек.

•   Піреелері татуировка идіп, постарының хараанда постарын кӧдірчелер паза постарының ит-сӧӧктерінің ээзі полчатханнарын кӧзітчелер. Че Библия христианнарға чоохтапча: «Постарыңны Худайға пир салыңар. Худайның кӧңніне чарас тіріг, ах-арығ тайығ иткені ползын ол. Анзы Худайға орта пазырғаны полар» (Римдегілерге 12:1). Сағын кӧріңер, ноға сірер татуировка идерге хынчазар? Мода алай пірее группаның кізізі полчатханын кӧзідер ӱчӱн идерге хынчатсар, ундутпаңар, чувстволарың ирт парар, татуировка, тізең, халар. Ноға татуировка идерге хынчатханнарыңнаңар сағынып алғаны хыйға пӧгін аларға полызар (Притчи 4:7).

•   «Кӱстенҷік кізінің планнары маңнанысха ағылчалар, полған на маңзыраах кізі хызылар» (Притчи 21:5). Удаа татуировканы, чахсы сағынып албин, итчелер, че аның салтарлары ӱӱр тусха. Ағаа хоза, татуировканы чох иткені уғаа ағырсыныстығ паза аарлығ процедура. Істезіглер паза ӧңненчеткен татуировкалар чох итчеткен бизнес кӧзітче: татуировкалар иткен кізілер соонаң анзында ачырғанчалар.