Кем тигірзер парча?
Библия хоостыра нандырығ
Худай ағаа киртістіг христианнарның аразында кічіг группаны таллап алған. Олар ӱреен соонда тигірдегі чуртасха тірілерлер (1 Петрның 1:3, 4). Оларны таллап алған соонда, ол христианнарның киртіністері паза тудыныстары кӧӧгерге турыстығ поларға кирек. Андағ полбаза, олар тигірдегі ӱлӱстерін ал полбастар (Ефестегілерге 5:5; Филипптегілерге 3:12—14).
Ноға піреелері тигірзер парчалар?
Олар Иисус Христоснаң хада 1 000 чыл ханнар паза абыстар поларлар (Азых чоох 5:9, 10; 20:6). Олар «наа чирнең», алай кізілернең, устир «наа тигірнің», алай тигірдегі ӱлгӱнің, чардығы поларлар. Олар, тигірдең устап, чирде сын тудыныс турғызарға паза чирні Худайның сағызына килізер иде алыстырарға полыс пирерлер (Исайя 65:17; 2 Петрның 3:13).
Нинҷе кізі тигірде чуртирға тірілер?
Библия хоостыра, тигірде чуртирға 144 000 кізі тірілер (Азых чоох 7:4). Азых чоох 14:1—3-те Иоанн илҷі: «Хурағанның Сион тағда турчатханын кӧр салғам. Аннаң хада 144 муң кізі полған», — тіп пасча. Пу кӧспекте Хураған тірілген Иисус Христосты таныхтапча (Иоанн 1:29; 1 Петрның 1:19). Сион тағ Иисустың паза аннаң хада тигірде устапчатхан 144 000 кізінің пӧзік орнын таныхтапча (Псалом 2:6; Еврейлерге 12:22).
Тигірдегі Хан-ӱлгӱде Христоснаң хада устир «аның хығырған паза таллап алған» кізілері Библияда «кічіг хой ӧӧрі» тіп адалча (Азых чоох 17:14; Лука 12:32). Анзы олар Иисус Христостың прай хойларының хыринда кӧп нимес саннығ поларын таныхтапча (Иоанн 10:16).
Тигірзер парчатханнардаңар саба сағыстар
Саба сағыс: Прай чахсы кізілер тигірзер парчалар.
Сынында: Чахсы кізілернің кӧбізіне Худай чирде мӧгі чуртас молҷапча (Псалом 37:11, 29, 34).
Иисус теен: «Тигірде ниме парын кӧрерге пір дее кізі андар сыхпаан» (Иоанн 3:13). Христостың алында чуртаан чахсы кізілер, кӧзідімге, Авраам, Моисей, Иов паза Давид тигірзер парбааннар (Илҷілернің 2:29, 34). Олар чирде чуртирға тірілерге ізенгеннер (Иов 14:13—15).
Тигірде чуртирға тіріліс Библияда «пастағы тіріліс» тіп адалча (Азых чоох 20:6). Анзы пасха тіріліс, чирдегі чуртасха тіріліс, поларын кӧзітче.
Библияда Худайның Хан-ӱлгӱзі устапчатса, «ӧлім... чох пол парар» тіп пазылча (Азых чоох 21:3, 4). Ол молҷағ чирде толар, тигірде ӧлім хаҷан даа полбаан нооза.
Саба сағыс: Хайда чуртирға — тигірде алай чирде — полған на кізі позы таллапча.
Сынында: Киртістіг христианнарның санынаң тигірзер кем парарын Худай пӧкче (Филипптегілерге 3:14). Худайның пӧгіні кізінің хынығыстарынаң паза кӧкеесім сағыстарынаң палғалыстығ нимес (Матфей 20:20—23).
Саба сағыс: Тигірде чуртирға турыстығ нимес кізілер ле чирде мӧгі чуртирлар.
Сынында: Чирде мӧгі чуртир кізілерні Худай «минің чоным», «мин таллап алғаннар» паза «Иегова алғастаан тӧл» тіп адапча (Исайя 65:21—23). Олар Худайның пастағызынаң сығара сағынған сағызын толдырарлар. Ол сағыс хоостыра кізілер хатап чазых чох, толдыра кізілер пол парарлар паза чир ӱстӱндегі райда мӧгі чуртирлар (Бытие 1:28; Псалом 115:16; Исайя 45:18).
Саба сағыс: Азых чоохтағы 144 000 — ол символическай сан.
Сынында: Азых чоохта символическай саннар учурапчатсалар даа, пірее саннар — буквальнай саннар. Кӧзідімге, «Хурағанның он ікі илҷізінің аттары» (Азых чоох 21:14). Мына 144 000 буквальнай сан полчатханына нинҷе-де киречілес.
Азых чоох 7:4-те чоохталча: «Мин іди таңмалатханнарның [тигірде чуртирға таллалғаннарның] санын ис салғам . Оларның саны 144 муң кізі полған». Че нинҷе-де стих пазынаң пасха группадаңар чоохталча — «санап тоосча чох кӧп чоннаңар». Оларға Худай ідӧк арачыланыс пирче (Азых чоох 7:9, 10). 144 000 символическай сан полған полза, ікінҷі группазы «санап тоосча чох кӧп чон» тіп пазылбасчых. a
Ағаа хоза, 144 000-наңар «тун палалары» тіп пазылча ( Азых чоох 14:4). «Тун палалары» теені кічиҷек группаны кӧзітче. Олар Христоснаң хада тигірдең чирдегі «санап тоосча чох кӧп чоннаң» устирлар (Азых чоох 5:10).
a Библеист Роберт Томас Азых чоох 7:4-гі 144 000-наңар піди чоохтаан: «144 000 7:9-ғы „санап тоосча чох кӧп чонға“ тоғыр турғызылча. Пу санны символическай тіп саназа, пу киндеде пір дее санны буквальнай тіп санирға чарабас» (Revelation 1-7: An Exegetical Commentary, 474 страница).
Сірерге хынығ полар, арса
БИБЛИЯНЫҢ ААРЛЫҒ ӰГРЕДІГЛЕРІ
Худайның Хан-ӱлгӱзі нимедір ол?
Чахсы хабарны искірчеткенде, Иисус Христос Худайның Хан-ӱлгӱзінеңер иң удаа чоохтаҷаң. Ол Хан-ӱлгӱ килзін тіп, Иисустың ӱгренҷілері нинҷе-нинҷе чӱс чыллар пазырчалар.
БИБЛИЯНЫҢ ӰГРЕДІГЛЕРІ
Библейскай курста ӱгрен кӧріңер
Сірерні ӱгретчінең хада иртірілчеткен библейскай курс сағыпча. Ахча тӧлирге кирек чоғыл.