Улуғ палалар постарының улуғланыбысхан іҷе-пабаларын кӧрерге киректер. Библияда оларға киртіністерін, постарының сӧбірелерін паза іҷе-пабаларын кӧріп, киректерінең кӧзідерге кирек тіп чоохталча. Анзы Худайның кӧңніне кірче (1 Тимофейге 5:4). Библияда іҷе-пабаларны улуғлирға чоохталча. Прай кӱстерін салып, іҷе-пабаларын кӧрчеткен кізілер ол чахығны толдырчалар (Ефестегілерге 6:2, 3).

 Библия киріп парған іҷе-пабаларны хайди кӧрерге кӧні устағлар пирбинче. Че анда Худайдаң хорыххан иреннер паза ипчілер улуғланыбысхан іҷе-пабаларын хайди кӧргеннерінеңер пазылча. Ідӧк анда улуғланыбысхан іҷе-пабаларын кӧрчеткен кізілерге тузалығ чӧптер таап аларға чарир.

•  Библияда чоохталчатхан кізілер хайди постарының улуғланыбысхан іҷе-пабаларын кӧргеннер?

•  Улуғланыбысхан іҷе-пабаларын кӧрчеткен кізілер Библияда хайдағ тузалығ чӧптер таап аларлар?

•  Библия улуғланыбысхан іҷе-пабаларны ибде кӧрерге кирек тіп чоохтапча ба?

 Олар анзын аймах-пасха оңдайнаң иткеннер.

•   Иосиф позының киріп парған пабазынаң, Иаковтаң, оортах чуртаан. Пабазын позынзар чағын ағылып аларға оңдай пол парғанда, ол аны ағылып алған. Иосиф пабазына чурт, чиис пирген паза аны арачылаан (Бытие 45:9—11; 47:11, 12).

•   Руфь хазинезінең хада хазинезі тӧреен чирінзер парыбысхан паза, аның прай ниме ползын тіп, матап тоғынған (Руфь 1:16; 2:2, 17, 18, 23).

•   Иисус, ӱрир алнында, ол тусха ӧкіс халған іҷезін кӧрерге позының нанҷызына чоохтаан (Иоанн 19:26, 27) a.

 Библиядағы принциптер улуғланыбысхан іҷе-пабаларын кӧрчеткен кізілерге физическай паза эмоциональнай саринаң полысчалар.

•   Іҷе-пабаңарны улуғлаңар

   Библейскай принцип: «Іҷе-пабаңны улуғла» (Исход 20:12).

   Пу чӧпнең хайди тузаланарға? Іҷе-пабаңар нинҷе постарына сыданчалар, оларға ол син постарының кирексіністерін толдырарға чарадыңар. Оларның сағыстары орында полза, оларға нинҷе полызығ кирек полчатханын постарына пӧгерге чарадыңар. Олох туста, нинҷе оңдай пар, ол син полыс турыңар. Іди тудынып, оларны улуғлапчатханнарыңны кӧзідерзер.

•   Піліп оңнаңар паза пыро тастаңар

   Библейскай принцип: «Кізіні піліп оңнапчатхан кізі ӧкпеленерге маңзырабинча, саба тудынысха хайығ салбинчатханы аны сіліг итче» (Притчи 19:11).

   Пу чӧпнең хайди тузаланарға? Пабаңар алай іҷеңер пірее хомзыныстығ ниме чоохтанчатса алай оларны кӧрчеткен ӱчӱн алғыстығ полбинча тіп пілдірчетсе, постарыңнаң сурыбызыңар: «Мин оларның орында полған ползам, минің хайдағ чувстволар поларҷых?» Оларны піліп оңназар паза пыроларын тастазар, прайзыңарға ниик арах полар.

•   Пасхаларынаң чӧптезіңер

   Библейскай принцип: «Чӧптеспин, сағынған сағысты толдыр полбас. Чӧпчілер кӧп полза, тізең, олар прай тол парарлар» (Притчи 15:22).

   Пу чӧпнең хайди тузаланарға? Іҷе-пабаңарның хазыхтарынаңар паза оларға хайди полызарға чарирынаңар кӧп арах піліп алыңар. Іҷе-пабаңарны иң чахсы оңдайнаң кӧрер ӱчӱн, сірер чуртапчатхан орында хайдағ полызығ пирілчеткенін піліп алыңар. Улуғланыбысхан іҷе-пабаларын кӧрчеткен кізілернең чоохтазып алыңар. Харындастарың алай пиҷелерің пар полза, чыылызып алып, хада ӱзӱрібізіңер: іҷе-пабаңарға хайдағ полызығ кирек, хайди оларны кӧрерге паза сірернің полғаныңар ниме ит полар.

•   Постарыңа иртіре кӧп алынмаңар

   Библейскай принцип: «Пӧзік сананмас кізілер, тізең, хыйғалар» (Притчи 11:2).

   Пу чӧпнең хайди тузаланарға? Пілінерге кирек: сірернің дее, прай кізілернің чіли, тузыңар паза кӱзіңер асхынах. Аннаңар іҷе-пабаңарға нинҷе хынчазар, ол син ит полбинчазар. Иртіре майых сыхсар, сӧбіредегілердең алай улуғланыбысхан кізілерні кӧрчеткен организациядаң полызығ сурыныңар.

•   Постарыңны хайраллаңар

   Библейскай принцип: «Позының ит-сӧӧгін пір дее кізі хырт кӧрбинче нооза, че... позын азырапча паза хайраллапча» (Ефестегілерге 5:29, НТ).

   Пу чӧпнең хайди тузаланарға? Сірерге іҷе-пабаңарны кӧрерге кирек, че, олох туста, постарыңның паза, хоных хонған ползар, сӧбіредегілеріңнің кирексіністерін толдырарға кирек. Чахсы азыраныңар, тосханҷа узуңар паза тынанарға тус таап турыңар (Экклезиаст 4:6). Оңдай пар полза, тынанып алар ӱчӱн, іҷе-пабаңарны кӧрерге пасха кізілерні сурынып ал турыңар. Іди сірер эмоциональнай паза психическай саринаң тынанып ал турарзар, андада іҷе-пабаңарны кӧрерге кӱзіңер полар.

 Пу сурығда Библия кӧні устағлар пирбинче. Пірее сӧбірелер киріп парған іҷе-пабаларын, кӱстері нинҷе читкенҷе, ибде кӧрерге пӧгін алчалар. Че хайдағ-да туста палалары іҷе-пабаларын улуғланыбысханнарны кӧрчеткен тураларда ибдегідең артых кӧрерлер тіп санап сыхчалар. Андағ сурығ кӧдірілчетсе, сӧбіредегілерге прайзына чыылызып алып, прайзына килісчеткен пӧгін аларға кирек (Галат чиріндегілерге 6:4, 5).