Худайның Хан-ӱлгӱзі кізінің чӱреенде бе?
Библия хоостыра нандырығ
Чох. Худайның Хан-ӱлгӱзі христианиннің чӱреенде нимес a. Библия Худайның Хан-ӱлгӱзін «Тигір хан-ӱлгӱзі» тіп адапча, анзы хан-ӱлгӱ сынап хайда полчатханын кӧзітче (Матфей 4:17). Библия хоостыра, ол тигірдең устапчатхан ӱлгӱ сынап пар.
Худайның Хан-ӱлгӱзінде устағҷылар, аның кізілері паза чахығлар пар. Аның Худайның кӧңнін тигірде паза чирде турғызарға ӱлгӱзі пар (Матфей 6:10; Азых чоох 5:10).
Худайның Хан-ӱлгӱзі чирдегі «прай чоннарнаң, тӧллернең паза аймах-пасха тіллернең чоохтасчатханнарнаң» устир (Даниил 7:13, 14). Ағаа кізілер нимес, Худай ӱлгӱ пирче (Псалом 2:4—6; Исайя 9:7).
Иисус позының киртістіг илҷілеріне олар аннаң хада тигірде «ӱлгӱ сіреелерінде одырарлар» теен (Лука 22:28, 30).
Хан-ӱлгӱнің ыырҷылары пар, че ол оларны чох идібізер (Псалом 2:1, 2, 8, 9; 110:1, 2; 1 Коринфтегілерге 15:25, 26).
Библия Хан-ӱлгӱ кізінің чӱрее пастыра устап, кізінің істінде полчатханнаңар ӱгретпинче. Че Библия «Тигір хан-чирінеңер сӧс» алай «Тигір хан-чирінеңер Чахсы Хабар» кізінің чӱреене теңерге кирек тіп ӱгретче (Матфей 13:19; 24:14).
«Худай хан-ӱлгӱзі сірернің істіңерде» теені ниме таныхтапча?
Пірее тілбестеглер Лука 17:21 хайди тілбестелген ӱчӱн Хан-ӱлгӱ хайда полчатханын піліп аларға сидік. Кӧзідімге, «Синод тілбестеенде» «Худай хан-ӱлгӱзі сірернің істіңерде» тіп пазылча. Пу стихты орта піліп алар ӱчӱн, контекст кӧрерге кирек.
Худайның Хан-ӱлгӱзі Иисусты ӧдірібізерге хынған поғдархос ыырҷыларның чӱректерінде полбаан.
Пу сӧстерні Иисус ағаа тоғырланған паза аны ӧлімге ысхан религиознай устағҷыларға, фарисейлерге чоохтаан (Матфей 12:14; Лука 17:20). Хан-ӱлгӱ оларның поғдархос чӱректерінде полған тіп полар ба? Иисус оларға чоохтаан: «Сірер... істіңерде чойырхоссар паза сайбағҷызар» (Матфей 23:27, 28).
Иисустың Лука 17:21-гі сӧстері пасха тілбестеглерде орта арах пазыл парғаннар: «Худайның ӱлгӱзі — сірернің араңарда» (курсив пістии.— Ред.; Восстановительный перевод). «Худайның Хан-ӱлгӱзі сірернің араңарда» (Наа тилекей тілбестее). Олар чоохтасчатхан туста Иисус, Худай турғысхан Хан, оларның алнында турған, аннаңар Тигірдегі Хан-ӱлгӱ фарисейлернің аразында полған тирге чарир (Лука 1:32, 33).
a Кӧп христианскай конфессиялар Худайның Хан-ӱлгӱзі кізінің істінде, алай чӱреенде, тіп ӱгретчелер. Кӧзідімге, «Православнай энциклопедияда» чоохталча: «Худайның Хан-ӱлгӱзін кӧр салғаны Худай пістің істібісте устапчатханын кӧр салғанын таныхтапча». Ідӧк Папа Римский Бенедикт XVІ позының «Иисус из Назарета» тіп киндезінде пасхан: «Худайның ӱлгӱзі хыйға чӱрек пастыра килче».
Сірерге хынығ полар, арса
ESSENTIAL BIBLE TEACHINGS
Худайның Хан-ӱлгӱзі нимедір ол?
Чахсы хабарны искірчеткенде, Иисус Христос Худайның Хан-ӱлгӱзінеңер иң удаа чоохтаҷаң. Ол Хан-ӱлгӱ килзін тіп, Иисустың ӱгренҷілері нинҷе-нинҷе чӱс чыллар пазырчалар.
БИБЛИЯНЫҢ ӰГРЕДІГЛЕРІ
Библейскай курста ӱгрен кӧріңер
Сірерні ӱгретчінең хада иртірілчеткен библейскай курс сағыпча. Ахча тӧлирге кирек чоғыл.