Библия хоостыра, Худай кізілер «чӧреес хылыхха пастырбазыннар» тіп хынча (1 Фессалониктегілерге 4:3). Библияда «чӧреес хылых» — ол хоных хонғанына киртістіг халбааны, гомосексуализм паза хоных хонмаан ир паза ипчі кізінің аразындағы секс.

•  Ноға Худайға ир паза ипчі кізі хоных хонған ма чох па аарлығ?

•  Ир паза ипчі кізі удур-тӧдір килісчелер бе піліп алар ӱчӱн, хоных хонар алнында, хада чуртап кӧрерге кирек пе?

•  Хоных пик ползын тіп ниме идерге кирек?

•   Хоныхты Худай тӧстеен. Ол Адамнаң Еваны хондыр салып, пастағы хоныхты тӧстеп салған (Бытие 2:22—24). Ир паза ипчі кізі, хоных хонмин, хада чуртазыннар тіп хынмаан.

•   Худай піске ниме иң чахсы полчатханын пілче. Худайның сағын салған сағызы хоостыра хоных — ол прай чуртасха пірігіс. Хоных сӧбіредегілерні арачылапча. Хайди инструкция мебельні орта чыыбызарға полысча, ідӧк Худайның устағлары сӧбірені пик идерге полысчалар. Худай чоохтаан ниме піске туза ла ағылча (Исайя 48:17, 18).

•   Хоных хонар алнындағы секс удаа хомай киректерге ағылча. Кӧзідімге, сурас пала пол парча, секс пастыра чухчатхан ағырығларнаң ағырыбысчалар паза эмоциональнай сидіктер полчалар a.

•   Секс наа чуртас пирерге кирек. Худайның хараанда чуртас ах-арығ паза пала тапханы — аның сыйии. Ол пісті ол сыйыхты аарлыға саназыннар паза хоныхтаңар чахығларын улуғлазыннар тіп хынча (Еврейлерге 13:4).

 Хоных хонар алнында хада чуртап кӧргені часкалығ сӧбіре тӧстирге полыспинча. Андағ кізілерні пір дее ниме тутпинча. Удур-тӧдір киртістіг паза сидіктерні хада тобырчатхан ікі кізінің аразындағы палғалыс пик полып одырча b. Хоных хончатса, сӧс пиргені ирін ипчізінең піріктірче (Матфей 19:6).

 Сидіктер чох хоных полбинча. Че ирі паза ипчізі Библияның чӧптерінҷе чуртапчатсалар, оларның хонығы сынап часкалығ полар. Мына нинҷе-де чӧп:

•   Ипчіңнің алай иріңнің кирексіністерін позыңның кирексіністеріңнең пӧзік турғыс (1 Коринфтегілерге 7:3—5; Филипптегілерге 2:3, 4).

•   Палғалызыңар хыныста паза улуғласта тӧстелзін (Ефестегілерге 5:25, 33).

•   Чоохтанар алнында, сағынып алыңар (Притчи 12:18).

•   Тыстаныстығ полыңар паза табырах пыро тастаңар (Колосстағыларға 3:13, 14).