Я. Худай позының ағырчатхан нымысчыларынаңар сағыссырапча. Худайға киртістіг полған на кізідеңер Библияда піди чоохталча: «Ағырып чатчатса, Иегова ағаа хабазар» (Псалом 41:3). Сірернің хроническай ағырығ полза, пу ӱс чӧп сірерге полыс пирер:

1.   Кӱс сурынып, пазырыңар. Сірерге «кізі сағызы чит полбас Худайның амыры» пирілер. Анзы иртіре сағыссырабасха полызар паза кӱс кирер (Филипптегілерге 4:6, 7).

2.   Кӧңніңерні тӱзірбеңер. Библияда чоохталча: «Ӧрчіліг полғаны хазыхха туза. Мӧңіс чӧргені кізіні ағырин ӧдірче» (Притчи 17:22, Good News Translation). Хормачы поларға ӱгреніңер. Анзы аар кӱннерні ниик арах идер паза хазығыңарны тыыдар.

3.   Ізеніс чідірбеңер. Ізеніс сірерге, хроническай ағырығнаң ағырчатсар даа, ӧрініс чідірбеске полызар (Римдегілерге 12:12). Библияда «пірдеезі мин ағырчам тібес» тус килер тіп чоохталча (Исаия 33:24). Ол тус читсе, пӱӱн наука имнеп полбинчатхан ағырығларны Худай чох идібізер. Кӧзідімге, Библияда кирі кізі чиит полып одырарынаңар піди чоохталча: «Аның иді-сӧӧгі чииттегізінеңӧк артых ползын, аның чиит кӱзі нандыра айланзын» (Иов 33:25).

 Сизіндіріг. Иегованың киречілері Худайға ізенчетселер дее, хроническай ағырығларны имнирге кирек тіп санапчалар, аннаңар имненчелер (Марк 2:17). Че піс кізее хайдағ оңдайнаң имненерге чоохтабинчабыс. Андағ сурығларны кізі позы пӧгерге кирек тіп санапчабыс.