Худай прай ниме кӧрче паза хайда хынча, анда ниме хынза, анзын итче (Притчи 15:3; Еврейлерге 4:13). Че Библия Худай пір саңай полған на чирде, ноо даа нимеде полча тіп ӱгретпинче. Библия хоостыра Худай — личность паза аның чуртапчатхан орны пар.

•   Худайның иді-ханы. Худай — хут (Иоанн 4:24). Ол кізі харағына кӧрінминче (Иоанн 1:18). Библиядағы кӧспектерде Худай хайдағ-да пір орында кӧрінче. Ол пір саңай прай чирде полча тіп хаҷан даа пазылбинча (Исаия 6:1, 2; Азых чоох 4:2, 3, 8).

•   Худайның чуртапчатхан орны. Худай физическай законнар тоғынчатхан орында нимес, че духовнай сферада чуртапча. Ол сферада, тигірде, Худайның чуртапчатхан орны пар (1 Царей 8:30). Библияда пірсінде прай духовнай чайаахтар Иегованың a алнынзар килгеннеңер пазылча. Анзынаң Худайның хайдағ-да орында чуртапчатханы кӧрінче (Иов 1:6).

Худай пір саңай прай чирде полбинчатса, ол мағаа полыс полар ба?

 Я. Худай кізілердеңер сағыссырапча. Ол духовнай сферада чуртапчатса даа, ағаа прай чӱректерінең нымысчыланарға хынчатхан кізілерзер хайығ айландырча паза оларға полысча (1 Царей 8:39; 2 Летопись 16:9). Ағаа прай чӱректерінең киртістіг кізілердеңер Иегова хайди сағыссырапчатханын кӧр кӧреелер.

•   Пазырчатсабыс. Иегова пістің пазырыстарыбысты ағаа пазырчатхан тустох исче (2 Летопись 18:31).

•   Чобалчатсабыс. «Иегова чӱректерінде чобалланчатханнарға чағын, чобаға пастыр салғаннарны ол арачылапча» (Псалом 34:18).

•   Хайди поларын пілбинчетсебіс. Иегова піске піліс пирерге паза пісті позының Сӧзінің, Библияның, хоостыра ӱгредерге тимде (Псалом 32:8).

Худай пір саңай прай чирде полчатханнаңар саба чоохтар

 Саба чоох. Псалом 139:8-те Худай пір саңай прай чирде полча тіп чоохталча. Анда пазылча: «Мин тигірзер ӧрлеен ползам, син анда поларҷыхсың, мин шеолда тӧзек тӧзеп алған ползам, — син андох поларҷыхсың».

 Сынында. Пу стихта Худайның чуртапчатхан орнынаңар пазылбинча. Пу стихта Худай чит полбас чир чоғыл тіп пазылча паза ол піске, піс хайда даа ползабыс, полыс поларын кӧзітче.