Чох. Библияда ахча ол хомай ниме паза ол сидіктер ағылча тіп чоохталбинча. «Ахча — чабал ниме» теені, Библияның сӧстерін алыстырып, чоохтааны полча. Сынында Библияда піди пазылча: «Тооза чабал нименің ӧзені ахчаа сабылғаны полча» (1 Тимофейге 6:10).

•  Библияда ахчадаңар ниме чоохталча?

•  Ноға Библия ахчаа сабылбасха чӧп пирче?

•  Ахчадаңар Библиядағы чӧптер піске хайди полыс поларлар?

•  Ахчадаңар Библиядағы стихтар

 Библияда, ахчаа орта хайза, ол чуртаста полысча паза арачыланыс пирче тіп чоохталча (Экклезиаст 7:12). Библия ідӧк ахчаа харанминчатхан, сыйҷы кізілерні махтапча (Притчи 11:25).

 Олох туста Библия ахча чуртазыбыста пастағы орында полбазын тіп сизіндірче. Анда чоохталча: «Ахчаа сабылбаңар, пар нимее чӧпсініңер» (Еврейлерге 13:5). Пу стихтаң кӧрінче: ахчаа орта хайарға ӱгренерге паза пайирға кӱстенмеске кирек. Піске пар нимее — чииске, кип-азахха паза чуртха — чӧпсінерге кирек (1 Тимофейге 6:8).

 Харам кізі мӧгі чуртирға оңдай чідір салча (Ефестегілерге 5:5). Ноға? Библияда піди пазылча: «Чабдыланыс ол чой худайларға пазырынғаны полча» (Колосстағыларға 3:5). Ағаа хоза, харам кізі позының хынығыстарын толдырар ӱчӱн, нравственнай принциптерні дее сайбапча. Притчи 28:20-де чоохталча: «Пайирға маңзырапчатхан кізі, тізең, пыро чох халбас». Хайдағ пыродаңар мында чоохталча? Харам кізі ахчаның ӱчӱн аймах-пасха сайбағлар идерге айабас, кӧзідімге: кізіні хорғыдып, ахча хызарға, алаахтырарға, кізілерні оғырлап, оларның ӱчӱн ахча хызарға паза ӧдірерге.

 Ахчаа хынчатхан кізі андағ сайбағлар итпезе дее, ахчаа хынғаны пасха даа хомай салтарларға ағыларға айабас. Библияда чоохталча: «Пайирға кӱстенчеткен кізі хыҷаланысха пирінче. Ол чабал, тузазы чох, ӱреге кирчеткен хынығыстар хахпанына хаптырча» (1 Тимофейге 6:9).

 Ахчаның ӱчӱн нравственнай нормаларны паза духовнай кӧнігістерібісті сайбабазабыс, піс позыбысты улуғлирбыс, ідӧк Худайның кӧңніне кірербіс паза ол піске хабазар. Позының чуртазынаң Худайны ӧріндірерге хынчатхан кізілерге ол мындағ молҷағ пирче: «Сині халғыспаспын, сині тастабаспын» (Еврейлерге 13:5, 6). Ідӧк Худай ағаа «киртістіг кізі кӧп алғастар алар» тіпче (Притчи 28:20).