Чох, Чир хаҷан даа чох иділбес, отта кӧй парбас паза аның орнына пасха планета турғызылбас. Библия Худай чирні кізілер анда мӧгі тус чуртазыннар тіп чайап салғанына ӱгретче.

•   «Арығ чӱректіглер чирні ӱлӱске аларлар паза анда мӧгі чуртирлар» (Псалом 37:29).

•   «Чирні ол [Худай] пик тӧстегде турғыс салған. Чир хаҷан даа иңзеріл парбас» (Псалом 104:5).

•   «Чир, тізең, мӧгі тус турча» (Экклезиаст 1:4).

•   «Тигірні чайаан сын Худай, чирні пик турғыс салған Чайаачы, чирні тик ле чайабаан, аны анда чуртазыннар тіп чайап салған» (Исайя 45:18).

 Худай кізілерге, олар чааласчатсалар даа, чир-чайаанны кірлепчетселер дее, Чирге аймах-пасха оңдайнаң ӱрег ағылчатсалар даа, Чирні чох идерге чаратпас. Ол «Чирні чох итчеткен кізілерні чох идерге» сӧс пирче (Азых чоох 11:18). Хайди ол пу сӧстерні толдырар?

 Кізілер турғысхан ӱлгӱлер Чирні арачылап полбинчалар, аннаңар оларның орнына Худай тигірдегі Хан-ӱлгӱні турғыс салар (Даниил 2:44; Матфей 6:9, 10). Ол Хан-ӱлгӱнең Худайның оолғы, Иисус Христос, устир (Исайя 9:6, 7). Иисус, чирде чуртаанда, хайхастығ оңдайнаң хазыр чилні тохтатхан (Марк 4:35—41). Худайның Хан-ӱлгӱзінің ханы полып, Иисус Чирнең паза чир-чайаанның кӱстерінең толдыразынаң устир. Ол прай чир ӱстӱн Эдем садха тӧӧй ит салар (Матфей 19:28; Лука 23:43).

 Чох. Андағ саба сағыс удаа 2 Петрның 3:7-ні саба пілгенінең сыхча. Анда чоохталча: «Пӱӱнгі тигірнең чир от-чалыннаң чох иділер ӱчӱн хайраллалча». Пу сӧстерні орта піліп алар ӱчӱн, ікі сағыс кӧр кӧреелер

1.   Библияда «тигір», «чир» паза «от» тіп сӧстер пір ле танығлығ сӧстер нимес. Кӧзідімге Бытие 11:1-де чоохталча: «Ол туста прай чир пір тілнең паза пір сӧстернең чоохтасхан». Чир мында кізілерні таныхтапча.

2.   Тигірнің, чирнің паза оттың ниме таныхтапчатханын 2 Петрның 3:7-нің контексті кӧзітче. 5-ҷі паза 6-ҷы стихтарда тӱгенҷі кӱннер Нойның тузындағы Чайыхнаң тиңнестірілчелер. Ол Чайыхта пурунғы чир-чалбах чох иділ парған, че Чир пір дее хайди полбаан. Чайых Чирні чох итпеен, че андағы ардап парған кізілерні хырыбысхан (Бытие 6:11). Ідӧк «тигір» алай ол туста устаан кізілер хырыл парғаннар. Хайди кӧрчебіс, Чир чох иділбеен, че чабал кізілер чох иділгеннер. Ной сӧбірезінең хада, ол тустағы чир-чалбах хырылғанда, тіріг халып, Чайых соонда чирде чуртап сыххан (Бытие 8:15—18).

 Чайых суғлары Чирні чох итпеен, ідӧк 2 Петрның 3:7-де чоохталчатхан «от-чалын» Чирні нимес, че чабал чир-чалбахты чох идер. Худай «наа тигірні паза наа чирні» турғызарға молҷапча. «Анда прай кізілер Худайның оңдайынҷа чуртирлар» (2 Петрның 3:13). «Наа чирнең» алай наа кізілернең «наа тигір» алай наа ӱлгӱ — Худайның Хан-ӱлгӱзі — устир. Ол Хан-ӱлгӱнің холында чир уғаа сіліг рай пол парар, анда прайзы ынағ чуртир (Азых чоох 21:1—4).