Иисус Христостың ӧлімін сағысха кирҷең Иирдегі азыранысты пасха оңдайнаң «вечеря Господня», «Тайная Вечеря» алай «Ужин Господа» тіп адапчалар (1 Коринфтегілерге 11:20, Синод тілбестее). Иегованың киречілері ол Иирдегі азыранысты, Библияда хайди пазылған, сах іди таныхтапчалар. Пасха религиялар, тізең, пу ӱлӱкӱнні таныхтапчатсалар, Библияда тӧстелбинчеткен кӧп кибірлернең тузаланчалар.

 Иирдегі азыраныста піс Иисус Христосты сағысха кирчебіс паза аны ол пирген тайығның ӱчӱн алғыстапчабыс (Матфей 20:28; 1 Коринфтегілерге 11:24). Ол, пісті толып алар ӱчӱн, чуртазын пирібіскен нооза. Ол ӱлӱкӱн хайдағ-да чазыт алай Худайның алғазын читірчеткен паза чазых позытчатхан кибір нимес a. Библия хоостыра, чазых хайдағ-да кибір пастыра нимес, че Иисус Христосха киртінчеткен ӱчӱн тасталча (Римдегілерге 3:25; 1 Иоанның 2:1, 2).

 Иисус Христос Иирдегі азыранысты таныхтирға чахаан, че хайди удаа анзын идерге чоохтабаан (Лука 22:19). Піреелері айда пір хати таныхтирға кирек тіпчелер, кем-де неделя сай, кем-де кӱннің сай, піреелері кӱнде нинҷе-де хати, пасхалары, тізең, кӧңнілері ле полза, таныхтапчалар. Че пу сағыстарны санға аларға кирек.

 Иисус Иирдегі азыранысты еврейлер Пасхазы таныхталчатхан кӱнде турғыс салған. Соонаң ол олох кӱнде ӧл парған (Матфей 26:1, 2). Анзы тиктең не полбаан. Ызых Пічікте Иисус пирген тайығ Пасханың хурағанынаң тиңнестірілче (1 Коринфтегілерге 5:7, 8). Пасханы чылда пір хати ӱлӱкӱннеҷеңнер (Исход 12:1—6; Левит 23:5). Пастағы христианнар Иисус Христостың ӧлімін сағысха кирҷең Иирдегі азыранысты ідӧк чылда пір хати таныхтаҷаңнар b. Иегованың киречілері ідӧк итчелер.

 Иисустың пастағы Иирдегі азыранысты хайди иртіргені піске хайди удаа иртірерге ле нимес, че хайдағ туста иртірерге кирек полчатханын даа піліп аларға полысча. Иисус ол ӱлӱкӱнні кӱн хонған соонда турғыс салған. Библейскай календарь хоостыра, андада пістің эраның 33 чылы, 14 нисан полған (Матфей 26:18—20, 26). Піс тее, пастағы христианнар чіли, Иирдегі азыранысты чыл сай ол кӱнде таныхтапчабыс c.

 П. э. 33 чылда 14 нисан пятницада полған. Че ол кӱн чыл сай неделяның пасха-пасха кӱннеріне киліс парча. Піс 14 нисан хаҷан полчатханын піліп алар ӱчӱн, чыл сай Иисустың тузында тузаланған оңдайнаң тузаланчабыс. Амғы еврейлернің календарьларында кӱннер пасха оңдайнаң саналчалар d.

 Иисус наа ӱлӱкӱн тӧстепчеткенде, Пасханаң халған ачытпаан халаснаң паза хызыл арағанаң тузаланған (Матфей 26:26—28). Піс, олох оңдайнаң, Иирдегі азыраныста ачытпаан халаснаң тузаланчабыс. Ідӧк, пір дее ниме, сахар даа, пасха даа специялар хоспаан олаңай хызыл арағанаң тузаланчабыс.

 Пірее религиялар ачытхан халаснаң тузаланчалар, че Библияда ачытхы чазыхты алай ардап парған нимені таныхтапча (Лука 12:1; 1 Коринфтегілерге 5:6—8; Галат чиріндегілерге 5:7—9). Аннаңар Иисус Христостың ит-сӧӧгін ачытпаан паза пір дее ниме хоспаан халас ла таныхтап полар (1 Петрның 2:22). Библия араға пол парбаан виноград согынаң тузаланарға ідӧк чаратпинча. Пірее религиялар, араға ізерге чарадылбинчатхан ӱчӱн, араға пол парбаан виноград согынаң тузаланчалар, че Библия араға ізерге чарабас тіп ӱгретпинче (1 Тимофейге 5:23).

 Ачытпаан халас паза хызыл араға Иирдегі азыраныста Иисус Христостың ит-сӧӧгін паза ханын таныхтапчалар. Піреелері халасты паза хызыл арағаны хайдағ-да хайхастығ оңдайнаң ит-сӧӧкке паза ханға айлан парча алай оларнаң аралас парча тіп санапчалар. Ноға андағ сағыстар Библияа киліспинчелер?

•   Худайның чахии хан ізерге чаратпинча (Бытие 9:4; Илҷілернің 15:28, 29). Аннаңар, Иисус ӱгренҷілеріне позының ханын ізерге чоохтаан полза, ол Худайның чахиин сайбирға ӱгредерҷік. Иисус аны сайбирға хаҷан даа ӱгретпесчік (Иоанн 8:28, 29). Худайның чахии хоостыра, хан ызых ниме.

•   Илҷілер сынап Иисустың ханын іскен ползалар, ол оларға минің ханым, тайығ полып, тӧгілер тібесчік (Матфей 26:28).

•   Иисус позының чуртазын пір ле хати тайыға салған (Еврейлерге 9:25, 26). Иирдегі азыраныс тузында халас паза хызыл араға аның ит-сӧӧгіне паза ханына айлан парчатса, ол символларны амзапчатхан кізілер аның чуртазын хатап-хатап тайыға салчалар тирге чарир.

•   «Мині сағысха киріп, підӧк итчедіңер»,— теенде, Иисус аны хатап тайыға саларға нимес, че аны позын ундутпасха чоохтаан (1 Коринфтегілерге 11:24).

 Халаснаң хызыл араға сынап Иисустың ит-сӧӧгі паза ханы пол парчатханына киртінчеткен кізілер, ідӧк, Библияның хайдағ-да стихтарына тӧстенчелер. Кӧзідімге, Библияның кӧп тілбестеглерінде Иисустың сӧстері піди пазылчалар: «Пу минің ханым» (Матфей 26:28, Синод тілбестее). Че ол сӧстерні ідӧк «Пу минің ханымны таныхтапча» алай «Пу минің ханымның символы полча» тіп тілбестирге чарир. Иисус кӧп хати метафораларнаң тузаланҷаң, мында даа ол метафоранаң тузаланча (Матфей 13:34, 35).

 Иегованың киречілері Иирдегі азыранысты ӱлӱкӱннепчетселер, асхынах кізі халасты паза арағаны амзапча. Ноға?

 Иисустың тӧгілген ханына тӧстеніп, Иегова Худай наа чӧптезіг турғыс салған. Ол чӧптезіг Израиль чонынаң Худайның аразында турғызылған чӧптезігнің орнына турғызылған (Еврейлерге 8:10—13). Иирдегі азыраныста символларны ол чӧптезіге кірчеткен кізілерге ле амзирға чарир. Ол чӧптезіге прай христианнар кірбинчелер, Худай хығырған на кізілер кірчелер (Еврейлерге 9:15; Лука 22:20). Олар Иисус Христоснаң хада тигірде устирлар, Библия хоостыра, оларның саны 144 000 на (Лука 22:28—30; Азых чоох 5:9, 10; 14:1, 3).

 Пістің кӧбізі Христоснаң хада тигірде устир «кічіг ӧрінің» санына нимес, че чирде мӧгі чуртир, «санап тоосча чох чонның» санына кіріп аларға ізенче (Лука 12:32; Азых чоох 7:9, 10). Чирде чуртирға ізенчеткеннер, символларны амзабинчатсалар даа, Иирдегі азыранысха киліп, Иисус Христос пістің чазыхтарыбыс тасталзын тіп, пирген тайығның ӱчӱн, алғыстарын читірчелер (1 Иоанның 2:2).