Кіреске тӱзіп, Иегованың киречізі пол парған, че ӱр тус искіріг тоғызында араласпиныбысхан алай ӧмедегі харындас-пиҷелернең палғалыспин сыххан кізілердең піс оортах тудынминчабыс. Піс оларнаң палғалызарға кӱстенчебіс паза оларны духовнай киректернең айғазарға кӧӧктірчебіс.

 Піс кізіні, ол кізі аар чазых ит салзох, ӧмедең сығарыбыспинчабыс. Че кіреске тӱскен Иегованың киречізі, піле тура, Библиядағы нравственнай нормаларны сайбапчатса паза анзында пыросынминчатса, аны ӧмедең сығарыбысчабыс. Библияда чоохталча: «Оңдайлары ардааннарны пос аразынаң хыйа идерге кирек» (1 Коринфтегілерге 5:13).

 Сӧбіре пазы ӧмедең сығардырыбысса, че ипчізі паза палалары Иегованың киречілері ползалар чи? Олар аннаң андар пір сӧбіре полчалар, че олар, мының алнындағы чіли, аннаң хада духовнай киректернең айғаспастар. Кізі ӧмедең сығардырыбысса даа, ирі паза пабазы полча. Аннаңар олар аннаң андар сӧбіренең палғалыстығ киректернең айғазарлар.

 Ӧмедең сығардырыбысхан кізее ӧме чыылығларына чӧрерге чарадылча. Ол хынза, ах сағаллар ағаа духовнай полызығ пирерлер. Ол полызығның кӧстии — ӧмедең сығардырыбысхан кізее хатап Иегованың киречізі тіп аданарға турыстығ поларға полыс пирерге. Ӧмедең сығардырыбысхан кізілер чарабас тудыныстаң хыйа тудынчатсалар паза библейскай нормаларҷа чуртирға прай кӱстерін салчатсалар, оларға ӧмезер нандыра айланарға оңдай пар.