Піс, Иегованың киречілері, сӧбірелерібісті паза чағыннарыбыстың сӧбірелерін тыыдарға кӱстенчебіс. Сӧбірені Худай тӧстеп салған тіп санапчабыс (Бытие 2:21—24; Ефестегілерге 3:14, 15). Худай Библия пастыра прай чир ӱстӱндегі кізілерні сӧбіре тӧстирге паза сӧбірелерге пик, часкалығ поларға полысчатхан принциптерге ӱгретче.

 Піс Библияның чӧптерінҷе тудынарға кӱстенчебіс. Анзы піске сӧбіреде чахсы арах ирлер, ипчілер паза іҷе-пабалар поларға полысча (Притчи 31:10—31; Ефестегілерге 5:22—6:4; 1 Тимофейге 5:8). Библияның хыйғазы, сӧбіредегілер ікі пасха религияны тудынчатсалар даа, оларға часкалығ поларға полысча (1 Петрның 3:1, 2). Кӧріңер, ирі алай ипчізі Иегованың киречізі пол парған кізілер ниме чоохтапчалар. Олар постары Иегованың киречізі ниместер:

•   «Чуртап салған соонда, пастағы алты чыл піс сыбыра таласчаң паза хылыхтанҷаң полғабыс. Че Ивети Иегованың киречізі пол парған соонда, хыныстығ паза тыстаныстығ арах пол сыххан. Аның іди алысханы сӧбірені арачылап алған» (Клауир, Бразилия).

•   «Минің ирім, Чанса, Иегованың киречілерінең Библияны ӱгрен сыхханда, мин тоғыр полғам. Олар сӧбірені сайбапчалар тіп санаам. Че соонаң мин піліп алғам: Библия пістің сӧбірені пик арах ит салған» (Агнесс, Замбия).

 Худай Сӧзін искірчетсебіс, Библиядағы хыйға принциптернең тузаланғаны хайди аймах-пасха киректерде полысчатханын кӧзітчебіс. Кӧзідімге:

•   Ирні алай ипчіні хыйға таллирға

•   Хоных хонған соонда, пастағы чыл чарылыс парбасха

•   Хасты-хазинезінең ынағ чуртирға

•   Ахча тудып оңнирға

•   Таласпиныбызарға

•   Пыро тастирға ӱгреніп аларға

•   Палаларны ӧскірерге

 Чоохтирға кирек, пірееде андағ кирек пол парча. Кӧзідімге, 1998 чылда, социологическай істезіглер апарчатхан Sofres тіп компанияның отчедында ирепчілернің пірсі Иегованың киречізі пол парған соонда, 20 сӧбіренің 1 сӧбірезінде улуғ сидіктер пол сыххан тіп чоохталған.

 Иисус аның соонҷа парчатханнарның сӧбірелерінде сидіктер полар тіп ухаанҷылаан (Матфей 10:32—36). Тархынҷы Вил Дюрант Римскай империяда «христианствоны сӧбірені сайбапча тіп пыролааннар» a тіп чоохтаан. Амғы туста Иегованың киречілерін ідӧк пыролапчалар. Че сынында Иегованың киречілері пыролығлар ба?

 Иегованың киречілері сӧбірелерні сайбапча тіп пыролаан сурыға пӧгін алғанда, «Европейский суд по правам человека» удаа сидіктер Иегованың киречізі полбинчатхан ирнің алай ипчінің ӱчӱн полчалар, «олар постарының туғаннарына позының религиязында поларға паза аның хоостыра тудынарға чаратпинчалар паза оларның кӧрістерін улуғлабинчалар» тіп пас салған. Ідӧк ол суд хоза пас салған: «Андағ киректер ікі пасха религиознай кӧрістіг сӧбірелерде удаа полчалар. Иегованың киречілерінің сӧбірелерінде дее андағ ниме пол парча» b. Иегованың киречілері, оларның религиязын хырт кӧрчетселер дее, Библияның пу чӧбі хоостыра тудынарға кӱстенчелер: «Чабалға чабалнаң нандырбаңар... Оңдайларың пар полза, прай кізілернең амыр чуртирға кӱстеніңер» (Римдегілерге 12:17, 18).

 Иегованың киречілері Библияда пазылған устағ хоостыра тудынчалар. Анда «Хан-пигдегі кізінең», пасха сӧстернең чоохтаза, пір киртіністіг кізінең, хоных хонарға кирек тіп пазылча (1 Коринфтегілерге 7:39). Ол хыйға устағ. Кӧзідімге, 2010 чылда сӧбіренің паза хоныхтың сурығларын чарытчатхан журналда «пір религияны, пір кибірлерні тудынчатхан паза пір киртіністіг ирепчілернің» палғалыстары пик арах полчалар тіп чоохталған c.

 Че Иегованың киречілері постарының организациязындағыларны Киречі нимес ирлерін алай ипчілерін тастирға кӧӧктірбинчелер. Библияда чоохталча: «Пірее харындастың ипчізі киртініс чох полза паза ол ипчі харындазыбыснаң чуртирға хынчатхан полза, ол кізі аны халғыспасха кирек. Киртініс чох ирліг ипчі дее, хонғаны аннаң хада чуртирға хынчатса, аны халғыспасха кирек» (1 Коринфтегілерге 7:12, 13). Иегованың киречілері пу устағ хоостыра тудынчалар.