Иегованың киречілері тӧреен кӱнні ӱлӱкӱннеені Худайның кӧңніне кірбинче тіп санапчалар, аннаңар ол кӱнні таныхтабинчалар. Библияда тӧреен кӱнні ӱлӱкӱннирге чарабас тіп кӧні чоохталбинча. Че Библия ол ӱлӱкӱнде полчатхан киректерні кӧзітче паза ол ӱлӱкӱнге Худайның кӧрізін піліп аларға полысча. Пу ӱлӱкӱнні тӧрт саринаң кӧр кӧреелер паза пу сурығнаң палғалыстығ библейскай принциптернең танызып алаалар.

1.   Тӧреен кӱнні ӱлӱкӱннеені язычниктердең килген. Пір киндеде пу кибір тӧреен кӱнінде кізіні «чабал хуттар паза кӱстер абылапчалар», че ол кӱнде «нанҷыларының аннаң хада полғаны паза аны алғыстааны аны арачылапча тіп киртіністе тӧстелче» тіп пазылча (Funk & Wagnalls Standard Dictionary of Folklore, Mythology, and Legend). Пасха кинде хоостыра, «пурунғыда, тӧреен кӱнге тӧстеніп, гороскоптар пасчаңнар, аннаңар кізінің ноо кӱнде тӧреенін хап-орта пас саларға кӱстенҷеңнер». Гороскоптар, тізең, «астрологияның мистическай ӱгредиинің» чардығы полғаннар (The Lore of Birthdays). Олох киндеде «тӧреен кӱнде тамысчатхан свечалар кізінің кӧңнін толдырчатхан магическай кӱстіг пол парчатханына чон киртінҷең» тіп пазылча.

    Че Библия магияны, тӧлке салғанын, спиритизмні паза «андағох пасха нимелерні» хырт кӧрче (Второзаконие 18:14; Галат чиріндегілерге 5:19—21). Пурунғы Вавилонны Худай аның кӧп чазыхтарының ӱчӱн чох идібізерге чарғылабысхан. Ол чазыхтарның аразында астрология — тӧлке салғанының пір оңдайы полған (Исайя 47:11—15). Иегованың киречілері полған на ӱлӱкӱннің алай кибірнің хайдаң сыхханын істес чӧрбинчелер. Че Ызых Пічікте хайдағ-да сурыға Худайның кӧрізі іле кӧрінчетсе, ол кӧріске хайди даа хайығ салчалар.

2.   Пастағы христианнар тӧреен кӱнні таныхтабаҷаңнар. «Уорлд бук» тіп энциклопедияда «пастағы христианнар ноо даа кізінің тӧреен кӱнін ӱлӱкӱннеенін языческай кибірге санааннар» тіп пазылча. Библия кӧзітче: Иисустың илҷілері паза Иисус ӱгреткен пасха даа кізілер прай христианнарға хайди тудынарға кӧзідім артыс салғаннар (2 Фессалониктегілерге 3:6).

3.   Христианнарға пір ле ӱлӱкӱнні таныхтирға кирек. Ол ӱлӱкӱн тӧреен кӱн нимес, че Иисустың ӱреен кӱні (Лука 22:17—20). Анзы хайхастығ нимес, Библияда «кізінің ӱреен кӱні... тӧреен кӱнінең артых» тіп чоохталча (Экклезиаст 7:1). Иисус чирдегі чуртазының халғанҷы кӱннеріне Худайның хараанда позына чахсы ат идіп алған, аннаңар аның ӱреен кӱні тӧреен кӱнінең артых (Еврейлерге 1:4).

4.   Библияда Худайның нымысчыларының аразында кем-де тӧреен кӱнін таныхтаанынаңар чоохталбинча. Че анда Худайға нымысчыланмаан ікі кізі тӧреен кӱннерін таныхтаанынаңар чоохталча. Ол ӱлӱкӱннерде ікізінде дее уғаа хомай киректер пол парғаннар (Бытие 40:20—22; Марк 6:21—29).

 Прай даа іҷе-пабалар палаларына хынчалар. Иегованың киречілері ідӧк палаларына хынчатханнарын сыбыра кӧзітчелер. Палалары сағыбаан туста сыйыхтар сыйлапчалар паза оларнаң хада тус хынығ иртірчелер. Іди олар Худайға кӧӧкчелер. Худай, тізең, позының палаларына ноо даа туста чахсы киректер итче (Матфей 7:11). Иегованың киречілерінің палаларының хомзынминчатханнары оларның чоохтарынаң кӧрінче. Кӧріңер, олар ниме тіпчелер:

•   «Сағыбаан туста сыйых аларға хай-хай ӧріністіг» (Тэмми, 12 час).

•   «Тӧреен кӱннерде мағаа сыйыхтар сыйлабинчалар. Че іҷе-пабам пасха кӱннерде сыйыхтар сыйлапчалар. Сағыбаан туста сыйыхтар аларға мағаа хай-хай ӧріністіг» (Грегори, 11 час).

•   «Он минут, нинҷе-де кекс паза сарын — ол сынап ӱлӱкӱн тіп сағынчазар ба? Піссер киліңер, сын ӱлӱкӱн хайдағ полчатханын кӧріп аларзар!» (Эрик, 6 час).