Библияны Иегованың киречілері аймах-пасха тілбестеглернең тузаланып ӱгренчелер. Че олар «Ызых Пічік — Наа тилекей тілбестеен» (оларның тіліне тілбестелген полза) иң аарлыға санапчалар. Ол хап-орта, пілдістіг тілбестег паза анда Худайның ады пазылча.

•   Худайның ады. Библияны сығарчатхан кізілернің піреелері кем сынап алғысха турыстығ аны алғыстабинчалар. Кӧзідімге, пір тілбестегде аны сығарарында араласхан 70 азыра кізінің ады пазыл парған. Че олох туста, ол Библияда аның Авторының, Иегова Худайның, ады пір дее чоғыл!

   «Ызых Пічік — Наа тилекей тілбестеенде», тізең, Худайның ады муңар хати пазылча. Ол ат оригиналның текстінде хайда турған, прай ол орыннарда турча, че пір дее тілбестегҷінің ады анда чоғыл.

•   Хап-орта. Кӧп тілбестеглер оригиналның смыслын орта читірбинчелер. Пір тілбестегде Матфей 7:13-те піди пазылча: «Ніскеҷек хаалхаларҷа кіріңер, адсар апарчатхан хаалхалар чалбах паза андар апарчатхан чол алғым». Че оригиналда пу стихта «ад» нимес, «ӧлім» тіп пазылча. Тілбестегҷілер хомай кізілер адта мӧгі тус ирееленерлер тіп киртінген поларлар, аннаңар «ад» тіп сӧс пас салған поларлар. Че ол ӱгредіг Библияда тӧстелбинче. «Наа тилекей тілбестеенде» пу стих хап-орта пазылча: «Ніскеҷек хаалхаларҷа кіріңер, чалбах хаалхалар паза алғым чол ӧлімзер апарчалар».

•   Пілдістіг. Чахсы тілбестег хап-орта ла нимес, пілдістіг поларға кирек. Кӧзідім кӧр кӧреелер. Павел илҷі Римдегілерге 12:11-де «хутнаң хайнирға» тіп сӧстернең тузаланча. Амғы тустағы кізілер аны піл полбастар, аннаңар «Наа тилекей тілбестеенде» «хутнаң хайнирға» тіп сӧстер «кӧңніңер чалбыразын» тіп пілдістіг иде тілбестелген.

 «Наа тилекей тілбестее» хап-орта, пілдістіг паза анда Худайның ады пазылча. Ағаа хоза, аны тикке алып аларға чарир. Аннаңар Библияны аларға ахча чох таа полза, миллионнар постарының тілінең аны хығыр полчалар.