سەرگەك بولىڭدار!
بەيبىت تۇرعىنداردى كىم قۇتقارماق؟ كيەلى كىتاپتا نە دەلىنگەن؟
بىرىككەن ۇلتتار ۇيىمى بىلاي دەپ مالىمدەيدى:
2023-جىلدىڭ 7—23-قازان ارالىعىندا يزرايل مەن گازا اراسىنداعى قاندى قاقتىعىستا 6400 ادام مەرت بولدى، ال 200 15 ادام جاراقاتتاندى. ولاردىڭ باسىم بولىگى — بەيبىت تۇرعىندار. سوعىستىڭ كەسىرىنەن جۇزدەگەن مىڭ ادام ٷيىن تاستاپ كەتۋگە ٴماجبۇر بولدى.
2023-جىلدىڭ 24 قىركۇيەگىنە دەيىن رەسەي مەن ۋكراينا اراسىنداعى سوعىستان ۋكراينانىڭ 9701 بەيبىت تۇرعىنى قازا تاپسا، 748 17-ٴى جاراقات الدى.
زۇلمات سوعىستان جاپا شەگىپ جۇرگەندەرگە كيەلى كىتاپ قانداي ٷمىت سيلايدى؟
ۇمىتتەنۋگە قازىقتاي نەگىز بار
كيەلى كىتاپتا قۇدايدىڭ «كۇللى جەرجۇزىندەگى سوعىستاردى توقتاتاتىنى» الدىن الا ايتىلعان (ٴزابۇر 46:9). ول جەردەگى بارلىق ۇكىمەتتەردىڭ ورنىنا ٶزىنىڭ كوكتەگى ۇكىمەتىن ورناتادى (دانيال 2:44). سوندا قۇداي ٶز ۇكىمەتى، ياعني پاتشالىعى ارقىلى ادامزاتتى قۇتقارادى.
قۇداي پاتشالىعىنىڭ پاتشاسى يسا ٴماسىح نە ىستەيتىنىنە نازار اۋدارىڭىز:
«پاتشا كومەك سۇراعان جارلى-جاقىبايدى، ەشبىر كومەكشىسى جوقتار مەن بەيشارالاردى دا قۇتقارادى. بەيشارا مەن كەدەيگە جانى اشيدى، جارلىلاردىڭ ٶمىرىن امان ساقتايدى. قاناۋشى مەن زۇلىم بيلەۋشىدەن قۇندارىن وتەپ الادى» (ٴزابۇر 72:12—14).
قۇداي ٶز پاتشالىعى ارقىلى ادامزاتتى سوعىس پەن قاتىگەزدىك اكەلگەن قايعى-قاسىرەتتەن تولىقتاي ازات ەتەدى.
«قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى. بۇرىنعى جايتتار قۇرىپ جوق بولدى» (ايان 21:4).
جۋىردا قۇداي پاتشالىعى جەر بەتىندە ايتارلىقتاي وزگەرىستەر جاسايدى. كيەلى كىتاپتا «جاقىن ماڭداعى جانە الىستاعى سوعىستار تۋرالى ەستيتىنىمىز» باياعىدا ايتىلىپ كەتكەن (ماتاي 24:6). سوعىستار مەن باسقا دا بولىپ جاتقان وقيعالار ٴبىزدىڭ ادامدار بيلەپ وتىرعان زاماننىڭ «سوڭعى كۇندەرىندە» ٶمىر ٴسۇرىپ جاتقانىمىزدى دالەلدەيدى (تىموتەگە 2-حات 3:1).