ٴبىزدىڭ مۇراعاتتان
قارجىلاي قيىندىق قىزمەتىڭە كەدەرگى بولماسىن
كوپتەگەن ەلدەردە قىمباتشىلىقتىڭ كەسىرىنەن كۇن كورۋ وتە قيىن. بۇل قيىندىق ەحوبا كۋاگەرلەرىن دە اينالىپ وتپەيدى. الايدا ولار ۋايىمعا سالىنۋدىڭ ورنىنا، ەحوبا «ەشقاشان تاستامايتىنىنا» سەنەدى جانە ودان جۇبانىش ىزدەيدى (ەۆرەيلەرگە 13:5). ەحوبا ٶز ۋادەسىندە تۇراتىنىن قانشاما رەت دالەلدەپ كەلگەن. مىسالى، ەلدىڭ باسىم بولىگى كەدەي ٶمىر سۇرەتىن ٴفيليپپيندى الايىق. 1970—1980-جىلدارى بۇل ەلدە جاعداي اسىرەسە قيىن بولعان.
ۆيكي a دەگەن ايەل باۋىرلاسىمىز بىلاي دەپ ەسىنە الدى: «كەيدە جەيتىن ەش نارسە بولماعاندىقتان كوڭىلىم ٴتۇسىپ، جىلايتىنمىن. داستارقانىمىزدا كۇرىش، تۇز، سۋدان باسقا ەش نارسە بولماعان كۇندەر بولدى». ال جۇمىس تاپپاي قينالعان فلورەنسيو دەگەن ەر باۋىرلاس: «مەندە ٷش جەيدە مەن ٷش شالبار عانا بولاتىن، ولاردى كونگرەستەر مەن جينالىستارعا كەزەك-كەزەك كيەتىنمىن»،— دەپ ٴبولىستى. ەحوبانىڭ حالقى وسى قيىن كەزەڭدى قالاي وتكەردى؟ ولارعا رۋحاني مىقتى بولىپ قالۋعا نە كومەكتەستى؟ ٴبىز ولاردىڭ ۇلگىلەرىنەن نە نارسەگە ۇيرەنە الامىز؟
ولار ەحوباعا سەنىم ارتتى
فيليپپيندەگى باۋىرلاستارىمىز قيىن ۋاقىتتارى ەحوبا ولاردى قامقورلايتىنىنا ەش كۇماندانبادى (ەۆرەيلەرگە 13:6). ەحوبا كوپ جاعدايلاردا كۇتپەگەن جولدارمەن ارەكەت ەتەتىن. مىسالى، سەسيل دەگەن باۋىرلاسىمىزدىڭ جاعدايىن الايىق. ول بىلاي دەيدى: «ٴبىز وتباسىمىزدا ٴتورت ادامبىز. ٴبىر كۇنى تاڭعى اسقا سوڭعى ٴبىر كەسە كۇرىشىمىزدى پىسىردىك. بۇدان باسقا جەيتىن ەشنارسەمىز جوق ەدى. ٴسۇيتىپ، ٴبىز ەحوباعا بۇگىنگى كۇنگە قاجەتىمىزدى بەرە كورشى دەپ دۇعا ەتتىك. ٵلى تاڭعى اس ٸشىپ وتىرعاندا، ۇيىمىزگە ٴبىر ەر باۋىرلاس كەلدى. ونىڭ قولىندا 5 كيلوگرامم كۇرىشى بار ەكەن! مۇنى كورگەندە، جۇرەگىمىز ريزاشىلىققا تولىپ، كوزىمىزگە جاس الدىق. بۇل جالعىز عانا جاعداي ەمەس ەدى. ەحوبانىڭ قولىن كورگەن كەزدەر وتە كوپ بولدى».
سونداي-اق قۇداي حالقى كيەلى كىتاپتاعى اقىل-كەڭەستەردى قولدانادى (ناقىل سوزدەر 2:6، 7). مىسالى، جاڭادان شومىلدىرۋ راسىمىنەن وتكەن ارسەليتانى الايىق. سول كەزدەرى ول بويداق بولاتىن. اقشادان قاتتى قينالعاندا، ول جۇرەگىن اقتارىپ، ەحوباعا دۇعا ەتەتىن. ٴبىر كۇنى ول ناقىل سوزدەر 10:4 تە جازىلعان سوزدەر جايلى وي جۇگىرتەدى. وندا: «جالقاۋدىڭ قولى جوقشىلىققا جەتكىزەر، ىنتالىنىڭ قولى داۋلەتكە كەنەلتەر»،— دەلىنگەن. سودان وسى سوزدەرگە ساي ارەكەت ەتىپ، جەمىس-جيدەك ٶسىرۋدى شەشەدى. ول بىلاي دەيدى: «ەحوبا ەڭبەگىمە باتاسىن بەردى. باقشادا وسىرگەن جەمىس-جيدەكتەر مەن ٷشىن ازىق تا بولدى، جولكىرەمدى دە جاپتى».
ولار جينالىستاردى قالدىرمادى
باۋىرلاستاردىڭ جەر ساتىپ الىپ، پاتشالىق سارايىن سوعۋعا قاراجاتتارى بولمادى. ٴبىراق بۇل ولارعا بىرگە جينالىپ، ٴبىر-ٴبىرىن جىگەرلەندىرۋگە كەدەرگى ەتپەدى (ەۆرەيلەرگە 10:24، 25). پاتشالىق سارايلارى بولماسا دا، ولار بەيىمدەلە ٴبىلدى. مىسالى، دەبورا دەگەن ٴبىر ايەل باۋىرلاس بىلاي دەپ ەسىنە الدى: «ٸزاشار سەرىگىم ەكەۋمىز كىشىگىرىم كۇركە سوقتىق. ول جەردە ٴبىز التى ادام بولىپ، قاۋىم كەزدەسۋىن وتكىزەتىنبىز. ٴبىز نيپا پالما اعاشىنىڭ جاپىراقتارىنان شاتىر جاسادىق، كوكوس پالماسىنىڭ جاپىراقتارىنان قابىرعالار ىستەدىك، ال ورىندىق رەتىندە پالمانىڭ دىڭگەكتەرىن قولداندىق».
كوپ جاعدايدا باۋىرلاستار قاۋىم كەزدەسۋلەرى ٶتۋ ٷشىن ٶز ۇيلەرىن ۇسىناتىن. ۆيردجينيا ەسىمدى ايەل باۋىرلاس بىلاي دەيدى: «ٴبىزدىڭ كىشكەنتاي عانا ٷيىمىز ٴشوپ پەن بامبۋكتان جاسالعان. ٵر سەنبى سايىن كەلەسى كۇنى قاۋىم كەزدەسۋىن وتكىزۋ ٷشىن ٷيىمىزدى دايىندايتىنبىز». نوەل ەسىمدى ەر باۋىرلاس بىلاي دەپ ەسىنە الدى: «كەزدەسۋ وتەتىن تاعى ٴبىر ۇيدە، جاڭبىر جاۋعان كۇندەرى شاتىردان سۋ اعاتىن. ول سۋدى ٴبىز شەلەكپەن جينايتىنبىز. ٴبىراق مۇنىڭ ٴبارى ٴبىز ٷشىن تۇك تە ەمەس ەدى، ويتكەنى بىرگە جينالىپ، ەحوباعا عيبادات ەتۋ ودان دا ماڭىزدى ەدى».
ولار قۇلشىنا قىزمەت ەتە بەردى
باۋىرلاستاردىڭ ماتەريالدىق جاعدايى ٴماز بولماسا دا، قىزمەتكە دەگەن قۇلشىنىستارى وتتاي جانىپ تۇردى. نەگروس ارالىندا تۇراتىن ليندينا دەگەن ايەل باۋىرلاس بىلاي دەيدى: «مەن ۇلكەن وتباسىندا ٶستىم. ۇيدە اكەم عانا جۇمىس ىستەيتىن. كوبىنەسە ۋاعىزعا جاياۋ باراتىنبىز، ويتكەنى كولىكپەن بارۋعا اقشامىز بولمايتىن. ٴبىر وتباسى بولىپ ۋاعىزعا بارعان بىزگە قاتتى ۇنايتىن. ەڭ ماڭىزدىسى مۇنداي قۇرباندىقتارىمىز ەحوباعا ۇنامدى ەكەنىن بىلەتىنبىز».
قيىندىقتار كۋاگەرلەردىڭ قۇلشىنىسىن سوندىرە المادى
تاعى ٴبىر ۇلكەن قيىندىقتاردىڭ ٴبىرى — شالعاي، تاۋلى ايماقتاردا ۋاعىزداۋ. سەبەبى ول جاققا كولىك از نە مۇلدەم بارمايتىن. لۋسون ارالىندا تۇراتىن ەستەر ەسىمدى ايەل باۋىرلاس بىلاي دەيدى: «كەيدە 6، كەيدە 12 باۋىرلاسقا دەيىن الىس ايماققا ۋاعىزداۋعا باراتىنبىز. بىزگە كوپ شاقىرىم جاياۋ جۇرۋگە تۋرا كەلەتىن، سوندىقتان ۇيدەن ەرتە شىعاتىن ەدىك. كۇنى بويى ۋاعىزدا جۇرگەندىكتەن، تاماعىمىزدى ۇيدەن دايىنداپ الىپ، اعاشتاردىڭ كولەڭكەسىندە وتىرىپ جەيتىنبىز. كەيبىر باۋىرلاستاردىڭ جەيتىن تاماعى بولماسا دا، قىزمەت ەتۋ ٷشىن كەلەتىن. ٴبىز ولارعا: «ۋايىمداماڭدار، بارىمىزگە دە تاماق جەتەدى»،— دەپ كوڭىلدەرىن ورنىقتىراتىنبىز».
ەحوبا ولاردىڭ وسىنداي جانقيارلىق رۋحىنا مول باتاسىن جاۋدىردى. مىسالى، 1970-جىلى فيليپپيندە 789 54 جاريالاۋشى بولعان ەدى. 1989-جىلى ولاردىڭ سانى ەكى ەسەگە ٶسىپ، 102 487 گە جەتتى. ال 2023-جىلى فيليپپيندەگى جاريالاۋشىلاردىڭ سانى 876 253 بولدى.
«كەدەيشىلىك ەحوبانى جاقسى كورۋگە كەدەرگى ەمەس»
ەكونوميكالىق جاعدايلارى وتە اۋىر بولسا دا، باۋىرلاستاردىڭ قولدارى رۋحاني ىستەردەن بوسامادى. انتونيو ەسىمدى ەر باۋىرلاس بىلاي دەيدى: «كەدەيشىلىك ەحوبانى جاقسى كورۋگە كەدەرگى ەمەس». فە-اباد دەگەن باۋىرلاس بولسا بىلاي دەپ ٴبولىستى: «كۇيەۋىم ەكەۋىمىز قاتتى تارشىلىق كورگەندە، ەحوباعا ودان سايىن جاقىنداي تۇستىك. ٴبىز قاراپايىم ٶمىر ٴسۇرۋدىڭ قۋانىشىن سەزىندىك. سونىڭ ارقاسىندا بالالارىمىز دا ەحوباعا سەنىم ارتۋدى ۇيرەندى».
سامار ارالىندا تۇراتىن لۋسيلا ەسىمدى ايەل باۋىرلاس بىلاي دەيدى: «كەدەي بولساق تا، ەحوباعا بارىمىزدى سالىپ قىزمەت ەتە الامىز. قۇدايدى ٴبىرىنشى ورىنعا قويساق، بارعا قاناعات ەتىپ، وڭ كوزقاراس ساقتاي الامىز. زەرتتەۋشىلەرىمنىڭ ەحوباعا جاقىنداپ، كەيىن ٸزاشارلاردىڭ قاتارىنا قوسىلعانىن كورۋ قانداي قۋانىش!»
ەرتەڭگى كۇنى-اق جاعدايىمىز وزگەرىپ كەتۋى مۇمكىن. وسى ورايدا رودولفو ەسىمدى اقساقالدىڭ ايتقان سوزدەرىنە دەن قويايىق. ول بىلاي دەيدى: «1970—1980-جىلدارى ٶمىر وتە قيىن بولدى. سول كەزدەرى ەحوبانىڭ قولداۋى مەن سۇيىسپەنشىلىگىن كوردىم. جەيتىن نانىمدى ارەڭ تاۋىپ جۇرسەم دە، ٶزىمدى كەدەي سەزىنگەن ەمەسپىن، سەبەبى مەنى ەحوبا قامقورلاپ ٴجۇردى. قازىر ٶمىرىم جامان ەمەس، ٴبىراق مەن الداعى جۇماقتا «شىنايى ٶمىردىڭ» راقاتىن ماڭگى باقي كورەتىن بولامىن» (تىموتەگە 1-حات 6:19).
a كەيبىر ەسىمدەر وزگەرتىلگەن.