35-زەرتتەۋ ماقالاسى
ادال قاريالار — اسىل قازىنامىز
«اق شاش — اسەم ٴتاج» (ناق. س. 16:31).
138-ٵن «اق شاش — اسەم ٴتاج»
اڭداتپا *
1، 2. ا) ناقىل سوزدەر 16:31 گە ساي، ادال قارت باۋىرلاستارىمىزعا قالاي قاراۋىمىز كەرەك؟ ٵ) بۇل ماقالادا قانداي سۇراقتاردىڭ جاۋابىن الامىز؟
اركانزاس شتاتىنداعى (اقش) ٴبىر ساياباققا كەلۋشىلەر جەردە جاتقان الماستاردى كورە الادى. ٴبىراق بۇل الماستار وڭدەۋدەن وتپەگەندىكتەن، كەيبىرەۋلەر ولاردى جاي عانا تاس دەپ ويلاپ قاسىنان ٶتىپ كەتۋى مۇمكىن.
2 ٴبىزدىڭ ادال قارت باۋىرلاستارىمىز وسى الماستارعا ۇقسايدى، ولار وتە قۇندى. قۇداي سوزىندە اق شاش اسەم تاجگە تەڭەلگەن (ناقىل سوزدەر 16:31 وقىڭىز؛ 20:29). دەسە دە بۇل اسىل قازىنالار كوزىمىزدەن تاسا قالۋى مۇمكىن. جاستاۋ باۋىرلاستار سول قارت باۋىرلاستاردىڭ قانشالىقتى قۇندى ەكەنىن تۇسىنگەندە، ولاردان كوپ نارسەگە ۇيرەنە الادى، ٵرى ولاردان ۇيرەنگەندەرى كەز كەلگەن بايلىقتان دا ارتىق. بۇل ماقالادا ٷش سۇراقتىڭ جاۋابىن الامىز: نەلىكتەن ەحوبا ادال قارت باۋىرلاستارىمىزدى قازىناعا بالايدى؟ ەحوبا بۇل باۋىرلاستارعا ٶز ۇيىمىنان قانداي ورىن بەردى؟ ولاردىڭ تاجىريبەسىنىڭ تولىق پايداسىن كورۋ ٷشىن ٴبىز نە ىستەي الامىز؟
نەلىكتەن ەحوبا قارت باۋىرلاستاردى قازىناعا بالايدى؟
3. ٴزابۇر 92:12—15-تارماقتارعا ساي، ەحوبا ادال قارت باۋىرلاستارىمىزدى نە ٷشىن باعالايدى؟
3 ەحوبا قۇداي ادال قارت باۋىرلاستاردى باعالايدى. ويتكەنى ەحوبا ولاردىڭ جان دۇنيەلەرىن كورەدى، قانداي كەرەمەت قاسيەتتەرى بار ەكەنىن بىلەدى. قارت باۋىرلاستار ٶمىر بويى ادال قىزمەت ەتىپ جيناعان دانالىقتارىمەن بولىسكەندە، ەحوبا قاتتى قۋانادى (ٵيۇپ 12:12؛ ناق. س. 1:1—4). ەحوبا ولاردىڭ تاباندىلىقتارىن دا باعالايدى (مالح. 3:16). ولار ومىردە قانداي قيىندىققا كەزىكسە دە سەنىمدەرىنەن تايماي، ەحوباعا ادال بولىپ قالدى. قازىر ولاردىڭ بولاشاققا دەگەن ۇمىتتەرى شىندىقتى العاش بىلگەن كەزدەرىنەن الدەقايدا جارقىن. ولار «جاستارى ۇلعايسا دا»، ەحوبانىڭ ەسىمىن جاريالاپ ٴجۇر، سوندىقتان ەحوبا ولاردى سۇيەدى (ٴزابۇر 92:12—15 وقىڭىز).
4. قانداي ويلار قارت باۋىرلاستارىمىزعا جىگەر بەرەدى؟
4 جىل وتكەن سايىن جاسىڭىز ۇلعايىپ جاتسا، مىنانى ۇمىتپاڭىز: ەحوبا ٴسىزدىڭ بۇرىن اتقارعان قىزمەتىڭىزدى ەشقاشان جادىنان شىعارمايدى (ەۆر. 6:10). ٴسىز ۋاعىز ىسىنە بار ىنتاڭىزبەن ۇلەس قوسىپ كەلەسىز، بۇل كوكتەگى اكەڭىزدى قۋانتادى. ٴسىز كوپتەگەن قيىندىقتارعا، ٴتىپتى وتە اۋىر سىناققا كەزىككەندە دە ەحوبانىڭ ٵدىل تالاپتارىنان تايماي كەلەسىز. ونىڭ تاپسىرعان مىندەتىن جاۋاپكەرشىلىكپەن اتقارىپ، وزگەلەردى ۇيرەتەسىز. سونىمەن قاتار ەحوبانىڭ ۇيىمىندا بولعان كوپتەگەن وزگەرىستەرگە بەيىمدەلدىڭىز. تولىق ۋاقىتتى قىزمەت اتقارىپ جۇرگەن باۋىرلاستاردى قولداپ، جىگەرلەندىرەسىز. ەحوبا ٴسىزدى ادالدىعىڭىز ٷشىن جاقسى كورەدى. ول «ادال قىزمەتشىلەرىن ەشقاشان تاستامايدى» (ٴزاب. 37:28). ول سىزگە «شاشتارىڭ اعارعاندا دا، سەندەردى قولىما الىپ جۇرەمىن» دەپ ۋادە بەرەدى (يشايا 46:4). سوندىقتان «جاسىم ۇلعايدى، ەندى ەحوبانىڭ ۇيىمىندا ماڭىزدى ٴرول اتقارمايمىن» دەپ ويلاماڭىز. ٴسىزدىڭ ەحوبانىڭ ۇيىمىندا ويىپ الار ورنىڭىز بار!
قارت باۋىرلاستاردىڭ قۇداي سيلاعان ورنى
5. قارت باۋىرلاستار نەنى ەستە ۇستاۋلارى قاجەت؟
5 قارت باۋىرلاستارىمىزدىڭ جاس كەزدەرىندەگىدەي كۇش-قۋاتى بولماسا دا، ولار ەحوبانىڭ ۇيىمىندا كوپ ەڭبەك اتقارا الادى. ويتكەنى ولاردىڭ جىلدار بويى جيناعان مول تاجىريبەلەرى بار. ەحوبا ادال قارت قىزمەتشىلەرىن ٴتۇرلى جولمەن قولدانادى. بۇعان دالەل رەتىندە قازىر ەحوبانىڭ ەجەلدەگى جانە بۇگىندەگى قىزمەتشىلەرىنىڭ مىسالىن قاراستىرايىق.
6، 7. كيەلى كىتاپتاعى ادالدىقتارى ٷشىن جارىلقانعان قارت كىسىلەردىڭ مىسالىن ايتىپ بەرىڭىز.
6 كيەلى كىتاپتا قارتايعان شاقتارىندا دا ەحوباعا ادالدىقپەن قىزمەت ەتە بەرگەن ادامداردىڭ مىسالدارى بار. مىسالى، ەحوبا مۇسانى پايعامبارى ٵرى يسرايل حالقىنىڭ جەتەكشىسى ەتىپ تاڭداعاندا، ونىڭ جاسى سەكسەندەردە ەدى. دانيالدىڭ جاسى شامامەن توقساننان اسىپ
كەتسە دە، ەحوبا ونى پايعامبارى رەتىندە قولدانا بەردى. ەلشى جوحان دا كيەلى رۋحتىڭ جەتەلەۋىمەن ايان كىتابىن جازعاندا، جاسى توقساننان اسىپ كەتكەن بولسا كەرەك.7 سونداي-اق كيەلى كىتاپتا اسا تانىمال ەمەس ادال قارت كىسىلەردىڭ دە مىسالى كوپ. ادامدار ولاردى بايقاماعان دا بولۋى مۇمكىن. دەسە دە ولار ەحوبانىڭ كوزىنەن تاسا قالمادى، ٵرى ادالدىق تانىتقاندارى ٷشىن ەحوبا ولارعا باتاسىن بەردى. مىسالى، كيەلى كىتاپتا «ٵدىل، قۇدايدى قاستەرلەيتىن جانە كيەلى رۋح قونعان» شيمون دەگەن كىسى جايلى قىسقاشا مالىمەت بار. ەحوبا ونىڭ قانداي ادام ەكەنىن جاقسى ٴبىلدى، ٵرى وعان ٴسابي يسانى كورۋ، يسا جايلى جانە ونىڭ اناسى جايلى پايعامبارلىق ەتۋ مارتەبەسىن سيلادى (لۇقا 2:22، 25—35). سونداي-اق جەسىر قالعان اننا ەسىمدى پايعامبار ايەلدىڭ مىسالىن الايىق. جاسى سەكسەن تورتتە بولسا دا، ول «ۇنەمى عيباداتحانادا بولاتىن». اننا جۇيەلى تۇردە عيباداتحاناعا بارىپ تۇرعانى ٷشىن ەحوبا ونى مولىنان جارىلقاپ، ٴسابي يسانى كورۋ مارتەبەسىن سيلادى. شيمون دا، اننا دا ەحوبا ٷشىن قىمبات جاندار ەدى (لۇقا 2:36—38).
8، 9. جەسىر قالعان ايەل باۋىرلاستار نە ىستەۋدى دوعارمايدى؟
8 بۇگىندە دە كوپ ادال قارت باۋىرلاستارىمىز جاستارعا جاقسى ۇلگى بولىپ ٴجۇر. بۇعان لويەس ديدەر دەگەن ايەل باۋىرلاسىمىزدىڭ مىسالى دالەل. ول نەبارى 21 جاسىندا كانادادا ارنايى ٸزاشار بولىپ قىزمەت ەتە باستاعان. كەيىن كۇيەۋى دجونمەن بىرگە ٴبىراز جىلدار بويى ارالاۋشى باقىلاۋشى بولىپ قىزمەت ەتكەن. ال كەيىن ولار 20-جىلدان استام ۋاقىت بويى كانادا بەتەلىندە قىزمەت ەتتى. لويەس ەلۋ سەگىزدە بولعاندا كۇيەۋى دجون ەكەۋى ۋكراينادا قىزمەت ەتۋگە شاقىرىلدى. سوندا ولار نە ىستەدى؟ جاس ەمەسپىز دەپ بۇل قىزمەتتەن باس تارتتى ما؟ جوق، ولار شاقىرۋدى قابىلدادى، ٴسۇيتىپ، دجون باۋىرلاس فيليال كوميتەتىنىڭ مۇشەسى بولىپ قىزمەت ەتە باستادى. جەتى جىلدان سوڭ دجون باۋىرلاس قايتىس بولعاننان كەيىن دە، لويەس سول جەردەگى قىزمەتىندە قالۋدى شەشتى. قازىر لويەس باۋىرلاسىمىزدىڭ جاسى سەكسەن بىردە. ول ٵلى دە ۋكراينا بەتەلىندە ايانباي ەڭبەك ەتىپ ٴجۇر. بەتەل وتباسى لويەستى وتە جاقسى كورەدى.
9 قازىر باۋىرلاستار لويەس سياقتى جەسىر قالعان قاريالارعا كۇيەۋى ٴتىرى كەزىندەگىدەي كوڭىل بولمەيتىن شىعار. ٴبىراق ولاردىڭ جەسىر قالعانى قادىرى كەتتى دەگەندى بىلدىرمەيدى. جىلدار بويى كۇيەۋلەرىنە قولداۋ كورسەتكەن، قازىر ەحوباعا ادال قىزمەت ەتىپ جۇرگەن بۇنداي ايەل باۋىرلاستاردى ەحوبا اسىلعا بالايدى (ٴتىم.1-ح. 5:3). ونىڭ ۇستىنە بۇنداي باۋىرلاستار جاس باۋىرلاستار ٷشىن جىگەردىڭ كوزى بولا الادى.
10. توني باۋىرلاس قانداي ۇلگى كورسەتىپ ٴجۇر؟
10 دەنساۋلىقتارىنا بايلانىستى ۇيلەرىنەن شىعا الماي قالعان ادال قارت باۋىرلاستارىمىز دا رۋحاني اسىل قازىنامىز. مىسالى، قارتتارعا كۇتىم
كورسەتىلەتىن جەردە تۇراتىن توني ەسىمدى باۋىرلاسىمىزدى الايىق. توني 1942-جىلى تامىز ايىندا پەنسيلۆانيادا شومىلدىرۋ راسىمىنەن ٶتتى، ول كەزدە ونىڭ جاسى جيىرمادا ەدى. كەيىن بەيتاراپتىق ساقتاعانى ٷشىن ەكى جارىم جىلعا تۇرمەگە قامالدى. ول ايەلى حيلدا ەكەۋى ەكى بالاسىن شىندىقتا تاربيەلەدى. توني باۋىرلاس جىلدار بويى ٷش قاۋىمدا توراعالىق ەتۋشى باقىلاۋشى (قازىرگى اتاۋى — اقساقالدار كەڭەسىنىڭ ۇيلەستىرۋشىسى) بولىپ قىزمەت ەتتى، ٵرى اۋداندىق كونگرەستىڭ باقىلاۋشىسى بولدى. سونداي-اق ول قاۋىم كەزدەسۋلەرىن جۇرگىزگەن، تۇرمەگە بارىپ زەرتتەۋ ساباقتارىن وتكىزگەن. قازىر ونىڭ جاسى توقسان سەگىزدە. ول قاۋىمىمەن يىق تىرەسە قىزمەتتەسىپ، ەحوباعا بار جاقسىسىن بەرىپ ٴجۇر.11. ۇيلەرىنەن شىعا الماي قالعان قارت باۋىرلاستارىمىزدى باعالايتىنىمىزدى قالاي كورسەتەمىز؟
11 ۇيلەرىنەن شىعا الماي قالعان قارت باۋىرلاستارعا قالاي قۇرمەت تانىتساق بولادى؟ اقساقالدار ولاردى بارىنشا قاۋىم ىستەرىنە جۇمىلدىرا الادى. ال ٴبىز ولاردى كورۋگە بارىپ قايتساق، ۆيدەو ارقىلى حابارلاسساق بولادى. بايقامپاز بولماساق، بۇنداي باۋىرلاستار نازارىمىزدان شەت قالىپ كەتۋى مۇمكىن. ولاردىڭ كوبىسى وزدەرى جايلى ايتۋعا قىسىلادى نەمەسە ايتۋدىڭ قاجەتى جوق دەپ ويلايدى. ٴبىراق ۋاقىت تاۋىپ، ولاردى اڭگىمەگە تارتايىق ٵرى مۇقيات تىڭدايىق. ولار ەحوبانىڭ ۇيىمىندا قانداي باتالارعا كەنەلگەنىن ايتىپ بەرگەندە، بۇنىڭ زور پايداسىن كورەمىز.
12. قاۋىمىڭىزدا رۋحاني قازىناعا باي قانداي باۋىرلاستار بار؟
12 ٶز قاۋىمىمىزداعى قارت باۋىرلاستارمەن جاقىنىراق تانىسىپ، ولاردىڭ قالاي ادالدىق تانىتقاندارىن بىلگەندە، تاڭعالىپ قالۋىمىز مۇمكىن. مىسالى، نيۋ-دجەرسيدەگى قاۋىمىندا ونداعان جىلدار بويى ادال قىزمەت ەتكەن حاريەت باۋىرلاسىمىزدى الايىق. كەيىن ول قىزىنىڭ قاسىنا كوشىپ بارعاندىقتان، جاڭا قاۋىمعا اۋىسادى. بۇل قاۋىمنىڭ ەر باۋىرلاستارى حاريەت باۋىرلاسپەن جاقىنىراق تانىسا كەلە، ونىڭ رۋحاني قازىناعا باي ادام ەكەنىن تۇسىنەدى. حاريەت باۋىرلاس شىندىقتى 1920-جىلدارى ەستىگەن ەكەن. ول سول جىلدارى قىزمەتتە بولعان قىزىقتى وقيعالاردى ايتىپ باۋىرلاستاردى جىگەرلەندىرىپ تاستايدى. ول كەز كەلگەن ساتتە تۇتقىنعا الىنۋى مۇمكىن ەكەنىن بىلگەندىكتەن، ۋاعىزعا شىققان سايىن وزىمەن بىرگە ٴتىس شەتكاسىن الىپ جۇرگەن ەكەن. 1933-جىلى ول ٴبىر-ٴبىر اپتادان ەكى مارتە تۇرمەدە وتىرادى. سول ٴبىر قيىن كەزدەرى ونىڭ كىشكەنتاي ٷش بالاسىنا كۋاگەر ەمەس كۇيەۋى قارايدى. حاريەت سياقتى ادال قارت باۋىرلاستارىمىز سي-قۇرمەتكە ابدەن لايىق!
13. ەحوبانىڭ ۇيىمىندا قارت باۋىرلاستاردىڭ ٴرولى قانداي؟
13 قارت باۋىرلاستار ەحوبانىڭ ۇيىمىندا وتە ماڭىزدى ٴرول اتقارادى. ولار ەحوبانىڭ ۇيىمىنا جانە جەكە ولارعا قالاي باتاسىن توككەنىنە سان مارتە كۋا بولعان. سونىمەن قاتار ولار ٶز قاتەلىكتەرىنەن دە كوپ ساباق العان. سوندىقتان ولارعا «دانالىقتىڭ كوزى» دەپ قاراپ، اقىل كەڭەستەرىنەن سۋسىنداڭىز (ناق. س. 18:4). ولارمەن ارالاسۋعا ۋاقىت بولسەڭىز، ٶز سەنىمىڭىزدى نىعايتاسىز جانە ٶزىڭىز ٷشىن كوپتەگەن پايدالى ويلاردى ٴتۇيىپ الاسىز.
جاسى ۇلكەن باۋىرلاستاردان بارىنشا ۇيرەنىڭىز
14. مۇسانىڭ 5-جازباسى 32:7 جاس باۋىرلاستاردى نە ىستەۋگە تالپىندىرادى؟
14 قارت باۋىرلاستارمەن ٴبىرىنشى بولىپ اڭگىمە باستاۋعا ىقىلاستى بولىڭىز (مۇسانىڭ 5-جازباسى 32:7 وقىڭىز). ولاردىڭ كوزدەرى بۇرىنعىداي انىق كورمەگەنىمەن، باياۋ ٴجۇرىپ، باياۋ سويلەگەنىمەن جۇرەكتەرى جاس ەكەنىن جانە ەحوبانىڭ الدىندا «جاقساتقا» يە ەكەندەرىن ۇمىتپايىق (ۋاع 7:1). ەحوبا ولاردى نە ٷشىن باعالايتىنىن ەستە ۇستاپ، سي-قۇرمەت كورسەتە بەرىڭىز. ەلىشەدەن ۇلگى الىڭىز. ٸلياس پايعامبارمەن بىرگە بولعان سوڭعى كۇنى ول ودان ٴبىر ەلى اجىرامادى. ول ٷش رەت: «مەن ٴسىزدى تاستامايمىن!»— دەپ، ٸلياس پايعامبارمەن بىرگە ٴجۇردى (پات. 2-ج. 2:2، 4، 6).
15. قارت باۋىرلاستارعا قانداي سۇراقتار قويساق بولادى؟
15 جاسى ۇلكەن باۋىرلاستارعا شىنايى كوڭىل ٴبولىپ، ىزەتتىلىكپەن سۇراقتار قويىڭىز (ناق. س. 1:5؛ 20:5؛ ٴتىم.1-ح. 5:1، 2). مىسالى، بىلاي دەپ سۇراساڭىز بولادى: «شىندىقتى تاپقانىڭىزعا كەزىندە نە نارسە كوزىڭىزدى جەتكىزدى؟ باسىڭىزدان وتكەن قانداي جاعدايلار ٴسىزدى ەحوباعا جاقىنداتا ٴتۇستى؟ ەحوباعا قۋانىشپەن قىزمەت ەتۋدىڭ سىرى نەدە دەپ ويلايسىز؟» (ٴتىم.1-ح. 6:6—8). وسى سۇراقتارعا جاۋاپ بەرىپ جاتقاندا، باۋىرلاستى دەن قويىپ تىڭداڭىز.
16. ٴبىر-بىرىمەن ارالاسقاندارى جاسى ۇلكەندەر ٷشىن دە، جاسى كىشىلەر ٷشىن دە قاي جاعىنان پايدالى؟
16 ٶزارا ارالاسقاندارى جاسى ۇلكەندەر ٷشىن دە، جاسى كىشىلەر ٷشىن دە وتە پايدالى (ريم. 1:12). مىسالى، جاسى كىشىلەر ەحوبا ادال قىزمەتشىلەرىنىڭ قامىن ويلايتىنىنا ودان سايىن كوزدەرى جەتەدى. ال جاسى ۇلكەندەر كىشىلەرمەن ارالاسقاننان سۇيىسپەنشىلىك پەن قۇرمەتكە بولەنەدى. ەحوبادان قانداي باتالار العاندارىن ايتىپ بەرگەندە، بۇدان قارت باۋىرلاستاردىڭ وزدەرى دە جىگەرلەنىپ قالادى.
17. قالايشا ٴبىزدىڭ ادال قارت باۋىرلاستارىمىز جىل وتكەن سايىن كوركەيىپ جاتىر؟
17 جىل ٶتىپ، جاس كەلگەن سايىن، ادامنىڭ سىرتقى كوركى كەتە باستايدى. ٴبىراق ەحوباعا ادال جاندار جىل وتكەن سايىن كوركەيە بەرەدى (سال. 1-ح. 1:2، 3). ويتكەنى قۇدايدىڭ رۋحى جىلدار بويى ولاردىڭ بولمىستارىن قالىپتاستىرعان، ادەمى قاسيەتتەر دامىتۋعا كومەكتەسكەن. وسى اياۋلى قارت باۋىرلاستارىمىزدى جاقىننان تانىپ، ۇيرەنىپ، ولارعا قۇرمەت كورسەتكەن سايىن، ولاردى ودان سايىن باعالاي تۇسەمىز.
18. كەلەسى ماقالا نە جايىندا بولماق؟
18 قاۋىم مىقتى بولۋ ٷشىن، جاسى كىشىلەر ۇلكەندەردى قۇرمەتتەۋمەن قاتار، جاسى ۇلكەندەر دە كىشىلەردى باعالاۋلارى كەرەك. ال باعالايتىندارىن قالاي كورسەتە الادى؟ بۇل جايىندا كەلەسى ماقالادا قاراستىرامىز.
144-ٵن زور سيعا نازار تىگەيىك
^ 5-ابزاس ادال قارت باۋىرلاستارىمىز — اسىل قازىنامىز. اياۋلى قارت باۋىرلاستارىمىزعا قالاي تەرەڭ قۇرمەت تانىتا الامىز؟ ولاردىڭ دانالىعى مەن تاجىريبەسىنەن نە نارسەگە ۇيرەنسەك بولادى؟ ولار ەحوبانىڭ ۇيىمىندا قانداي ٴرول اتقارادى؟ بۇل ماقالادا وسى سۇراقتاردىڭ جاۋابىن الامىز.