22-زەرتتەۋ ماقالاسى
جەكە زەرتتەۋدىڭ ساپاسىن جاقسارتىڭىز!
«نەنىڭ ماڭىزدىراق ەكەنىنە كوز جەتكىزىڭدەر» (ٴفىلىپ. 1:10).
35-ٵن «نەنىڭ ماڭىزدىراق ەكەنىنە كوز جەتكىزىڭدەر»
اڭداتپا *
1. نەگە كەيبىرەۋلەرگە زەرتتەۋ قيىنعا سوعادى؟
بۇگىندە كۇن كورۋ كىم-كىمگە دە وڭاي ەمەس. كوپ باۋىرلاستار وتباسىلارىن اسىراۋ ٷشىن بەل جازباي جۇمىس ىستەيدى. جۇمىسقا بارىپ كەلۋدىڭ وزىنە كوپ ۋاقىتتارى كەتەدى. ال كەيبىرەۋلەرى قارا جۇمىس ىستەيدى. كەشكە ولار مۇرىندارىنان شانشىلىپ، دىڭكەلەرى قۇرىپ ۇيلەرىنە كەلەدى. ٴسۇيتىپ، زەرتتەۋگە شامالارى بولمايدى.
2. ٴسىز قاي ۋاقىتتا زەرتتەيسىز؟
2 جاعدايىمىز قانداي بولماسىن قۇداي ٴسوزىن جانە وعان نەگىزدەلگەن ادەبيەتتەردى زەرتتەۋگە ۋاقىت تابۋىمىز قاجەت. ويتكەنى مۇنسىز ەحوباعا جاقىنداۋ جانە ماڭگى ومىرگە يە بولۋ مۇمكىن ەمەس! (ٴتىم. 1-ح. 4:15، 16). كەيبىرەۋلەرى تاڭەرتەڭ ميلارى تىنىعىپ تۇرعاندا زەرتتەگەندى ۇناتادى. بۇل كەزدە ۇيدەگىلەر ۇيىقتاپ جاتقاندىقتان، ٷي ٸشى تىنىش بولادى. باسقالارى بولسا جاتار الدىنداعى تىنىش ۋاقىتتى پايدالانىپ، رۋحاني استى قابىلدايدى. ولار بىرنەشە مينۋتتارىن ٴبولىپ، وي جۇگىرتەدى.
3، 4. رۋحاني اس-سۋدىڭ كولەمىنە قاتىستى قانداي وزگەرىستەر بولدى جانە نە ٷشىن؟
3 زەرتتەۋگە قالاي دا ۋاقىت تابۋ قاجەتتىگىن جاقسى تۇسىنەرمىز. ٴبىراق نەنى زەرتتەيمىز؟ «وقيتىن مالىمەت باستان اسادى. ٴبارىن وقىپ ۇلگەرۋ مۇمكىن ەمەس»،— دەرسىز. كەيبىر باۋىرلاستار رۋحاني اس-سۋدى تولىق قابىلداپ وتىرعانمەن، كوپشىلىگىنە بۇل قيىنعا سوعادى. باسقارۋشى كەڭەس تە بۇدان حاباردار. سول سەبەپتى باسپا جۇزىندەگى جانە سايتتا شىعاتىن مالىمەتتەردىڭ سانىن قىسقارتۋ جايىندا شەشىم قابىلداندى.
4 مىسالى، «ەحوبا كۋاگەرلەرىنىڭ جىلناماسى» بۇدان بىلاي باسىلمايتىن بولدى. ويتكەنى كۋاگەرلەرمەن بولعان قىزىقتى وقيعالار ®jw.org سايتى مەن اي سايىنعى ®JW Broadcasting باعدارلاماسىندا جارىق كورىپ تۇرادى. كوپشىلىككە ارنالعان «كۇزەت مۇناراسى» مەن «ويانىڭدار!» جۋرنالدارى بولسا جىلىنا ٷش-اق رەت شىعادى. بۇل وزگەرىستەر ٶز شارۋالارىمىزدى ٴبىتىرىپ الۋ ٷشىن ەمەس، «ماڭىزدىراق» ىستەرگە مۇقيات دەن قويۋ ٷشىن جاسالدى (ٴفىلىپ. 1:10). قازىر ماڭىزدىراق ىستەرگە باسىمدىق بەرۋ ٷشىن جانە جازبالاردى جەكە زەرتتەۋدىڭ بار پايداسىن كورۋ ٷشىن نە ىستەي الاتىنىمىزدى كورەيىك.
«نەنىڭ ماڭىزدىراق ەكەنىنە كوز جەتكىزەيىك»
5، 6. قانداي مالىمەتتەردى مۇقيات زەرتتەگەنىمىز ٴجون؟
5 ماڭىزدىراق ىستەرگە نە جاتادى؟ كۇن سايىن ۋاقىت ٴبولىپ، قۇداي ٴسوزىن زەرتتەۋ. بۇل وتە ماڭىزدى بولعاندىقتان، قاۋىمعا اپتا سايىن وقۋعا بەرىلەتىن كيەلى كىتاپ تاراۋلارى قىسقارتىلدى. وسىنىڭ ارقاسىندا تارماقتارعا وي جۇگىرتۋگە جانە قوسىمشا زەرتتەۋ جۇرگىزۋگە ۋاقىت جەتكىلىكتى. ٴبىز بەرىلگەن تاراۋلاردى تولىق وقىپ قانا قويماي، جازبالارداعى حاباردىڭ جۇرەگىمىزگە تەرەڭ بويلاعانىن ٵرى ەحوباعا جاقىنداتا تۇسكەنىن قالايمىز (ٴزاب. 19:14).
6 تاعى نەنى مۇقيات زەرتتەگەنىمىز ٴجون؟ ارينە، زەرتتەۋگە ارنالعان «كۇزەت مۇناراسىن» جانە قاۋىمدا كيەلى كىتاپتى زەرتتەۋ سياقتى «ماسىحشىلىك ٶمىرىمىز بەن قىزمەتىمىز» كەزدەسۋىنىڭ باسقا دا مالىمەتتەرىن. كوپشىلىككە ارنالعان «كۇزەت مۇناراسى» مەن «ويانىڭدار!» جۋرنالدارىن دا ەلەۋسىز قالدىرماعانىمىز ٴجون.
7. سايتىمىز بەن JW Broadcasting تەلەارناسىندا شىعاتىن مالىمەتتىڭ ٴبارىن وقىپ-كورىپ ۇلگەرمەسەك، نەگە ۋايىمداۋدىڭ قاجەتى جوق؟
7 ٴسىز: «جاقسى، ٴبىراق jw.org سايتى مەن JW Broadcasting تەلەارناسىنداعى مالىمەتتەر شە؟ ونىڭ بارىنە قايدان ۋاقىت تابامىن؟!»— دەيتىن شىعارسىز. مىنانداي مىسال كەلتىرەيىك. مەيرامحاناعا بارعانىڭىزدا، سىزگە ٴدامدى تاعامنىڭ ٴتۇر-ٴتۇرىن ۇسىنادى. ٴبىراق ونىڭ ٴبارىن جەۋ مۇمكىن ەمەس! سوندىقتان ٴسىز تاعامداردىڭ بىرنەشەۋىن عانا تاڭدايسىز. سول سياقتى، ەلەكتروندى تۇردە شىعاتىن مالىمەتتەردىڭ ٴبارىن وقىپ-كورىپ ۇلگەرمەي جاتساڭىز، ەش ۋايىمداماڭىز. شاماڭىز كەلگەنشە ۋاقىت ٴبولىڭىز. ال ەندى زەرتتەۋدى قالاي جۇرگىزۋگە بولاتىنىن جانە ونىڭ بار پايداسىن كورۋ ٷشىن نە ىستەۋ كەرەكتىگىن كورەيىك.
زەرتتەۋ دەگەن جاتقان ەڭبەك!
8. «كۇزەت مۇناراسىن» زەرتتەگەندە، قانداي قادامداردى ۇستانساق بولادى؟ نەگە بۇلاي ەتكەنىمىز دۇرىس؟
8 زەرتتەۋ دەپ ٴبىر ماقساتتى كوزدەي وتىرىپ مۇقيات وقۋدى ايتادى. بۇل — مالىمەتتى كوز جۇگىرتىپ وقىپ شىعىپ، جاۋاپتاردىڭ استىن سىزۋ عانا ەمەس. مىسالى، زەرتتەۋ ماقالاسىنا دايىندالعاندا، الدىمەن، ماقالانىڭ باسىنداعى اڭداتپانى وقىپ شىعىڭىز. سوسىن، تاقىرىبىنا، تاقىرىپشالارىنا جانە سوڭىنداعى قايتالاۋعا ارنالعان سۇراقتارعا نازار اۋدارىڭىز. بۇدان كەيىن ماقالانى وقۋعا كىرىسىڭىز. اسىقپاي، زەيىن قويىپ وقىڭىز. نەگىزگى سويلەمگە، ياعني ابزاستىڭ العاشقى سويلەمىنە كوڭىل اۋدارىڭىز. ويتكەنى نەگىزگى سويلەمدەر ابزاستاعى ويلاردىڭ قاي باعىتتا ٶربيتىنىن كورسەتەدى. ابزاستاردى وقىعاندا، ٵرقايسىسىنىڭ تاقىرىپشامەن قانداي بايلانىسى بار ەكەنىن، ماقالانىڭ تاقىرىبىن قالاي اشاتىنىن بايقاڭىز. بەيتانىس سوزدەردى نەمەسە تولىعىراق زەرتتەپ كورگىڭىز كەلگەن ويلاردى ٴتۇرتىپ وتىرىڭىز.
9. ا) «كۇزەت مۇناراسىن» زەرتتەگەندە نەگە تارماقتارعا ەرەكشە ٴمان بەرۋ كەرەك جانە مۇنى قالاي ىستەي الامىز؟ ٵ) ەشۋا 1:8 دە ايتىلعانداي، تارماقتاردى وقۋمەن قاتار تاعى نە ىستەۋىمىز كەرەك؟
9 «كۇزەت مۇناراسىن» زەرتتەگەندە كيەلى كىتاپتى تەرەڭىرەك بىلە تۇسەمىز. سوندىقتان تارماقتارعا، اسىرەسە كەزدەسۋدە وقىلاتىن تارماقتارعا ەرەكشە ٴمان بەرىڭىز. ونداعى نەگىزگى سوزدەر مەن تىركەستەردىڭ ابزاستاعى ويدى قالاي راستايتىنىن بايقاڭىز. ماقالادا كەلتىرىلگەن تارماقتاردى وقىعاندا، وي جۇگىرتۋگە ۋاقىت ٴبولىپ، ٶز جاعدايىڭىزدا قالاي قولدانا الاتىنىڭىز جونىندە ويلانىڭىز (ەشۋا 1:8 وقىڭىز).
اتا-انالار، بالالارىڭىزعا زەرتتەۋدى قالاي جۇرگىزۋ كەرەكتىگىن ۇيرەتىڭىزدەر (10-ابزاستى قاراڭىز) *
10. ەۆرەيلەرگە 5:14 كە ساي، اتا-انالار وتباسىلىق عيباداتتا بالالارىنا زەرتتەۋ مەن ىزدەنىس جاساۋدى نەگە ۇيرەتۋلەرى كەرەك؟
10 اتا-انالار وتباسىلىق عيباداتتىڭ بالالار اسىعا كۇتەتىن قىزىقتى ۋاقىت بولعانىن قالايدى. ارينە، اتا-انانىڭ وتباسىلىق عيباداتتا نە قاراستىراتىندارىن ناقتى بىلگەنى ٴجون. ٴبىراق اپتا سايىن كيەلى كىتاپقا نەگىزدەلگەن قويىلىمدار قويۋ سياقتى ەرەكشە نارسە ىستەۋدىڭ قاجەتى جوق. JW Broadcasting باعدارلاماسىن كورگەن، يا بولماسا نۇحتىڭ كەمەسىنىڭ ماكەتىن جاساعان جاقسى بولار، دەگەنمەن بالالارعا زەرتتەۋ جۇرگىزۋدى ۇيرەتكەن دە ٴجون، مىسالى، قاۋىم كەزدەسۋىنە دايىندالۋدى جانە مەكتەپتە تۋىنداعان جاعدايلار تۋرالى ىزدەنىس جاساۋدى (ەۆرەيلەرگە 5:14 وقىڭىز). ولار ۇيدە زەرتتەۋ جۇرگىزىپ ماشىقتانسا، كەزدەسۋلەر مەن كونگرەستەردە ايتىلىپ جاتقانداردى، ٴتىپتى ۆيدەولارى بولماسا دا، دەن قويىپ تىڭداي الاتىن بولادى. ارينە، وتباسىلىق عيباداتتىڭ ۇزاقتىعى بالالاردىڭ جاسى مەن قابىلەتىنە بايلانىستى.
11. كيەلى كىتاپتى زەرتتەيتىن ادامدارعا ٶز بەتتەرىنشە ىزدەنىس جاساۋدى ۇيرەتكەن نەگە ماڭىزدى؟
11 كيەلى كىتاپتى زەرتتەيتىن ادامدارعا دا جەكە زەرتتەۋدى ۇيرەتۋ قاجەت. ولار زەرتتەۋ ساباعىنا نە قاۋىم كەزدەسۋلەرىنە دايىندالعاندا، العاشىندا سۇراقتاردىڭ جاۋاپتارىن تاۋىپ، استىن سىزۋدان باستايدى. ٴبىراق ولارعا ٶز بەتتەرىنشە ىزدەنىس جۇرگىزىپ، ساپالى زەرتتەۋ جاساۋدى ۇيرەتكەنىمىز دۇرىس. سوندا ەرتەڭگى كۇنى قيىندىقتارعا كەزىگىپ جاتسا، بىردەن قاۋىمداعى باۋىرلاستارعا جۇگىنبەي، وزدەرى ادەبيەتتەرىمىزدىڭ كومەگىمەن ىزدەنىپ، ٴتيىمدى كەڭەستەر تابا الادى.
ٴبىر ماقساتتى كوزدەي وتىرىپ زەرتتەڭىز
12. زەرتتەگەندە، قانداي ماقساتتاردى كوزدەسەك بولادى؟
12 زەرتتەۋدى جانىڭىز سۇيمەسە شە؟ بۇل ەشقاشان قولىمنان كەلمەيدى دەپ ويلاۋعا اسىقپاڭىز. باسىندا زەرتتەۋگە كىشكەنە عانا ۋاقىت بولەرسىز. كەيىن بۇل ۋاقىتتى بىرتە-بىرتە ۇلعايتا بەرىڭىز. ماقساتىڭىزدى، ياعني نە نارسەگە قول جەتكىزگىڭىز كەلەتىنىن ويدا ۇستاڭىز. ارينە، ەڭ باستى ماقساتىمىز — ەحوباعا جاقىنداي ٴتۇسۋ. ال تەز ارادا جەتكىڭىز كەلەتىن ماقساتتار قويعىڭىز كەلسە، بىرەۋدىڭ قويعان ساۋالىنا جاۋاپ ىزدەسەڭىز نەمەسە ومىرىڭىزدە كەزىككەن كۇردەلى ماسەلە جايىندا ىزدەنسەڭىز بولادى.
13. ا) مەكتەپتە وقيتىن جەتكىنشەك ٶز سەنىمىن قورعاۋ ٷشىن نە ىستەسە بولادى؟ ٵ) قولوستىقتارعا 4:6 داعى كەڭەستى قالاي قولدانۋعا بولادى؟
13 ەگەر سەن مەكتەپتە وقيتىن بولساڭ، سىنىپتا ايتەۋىر بىرەۋدى تۋعان كۇنىمەن قۇتتىقتاپ جاتار. ولارعا تۋعان كۇندى نە ٷشىن تويلامايتىنىڭدى جازبالارمەن ٴتۇسىندىرىپ بەرگىڭ-اق كەلەر. ٴبىراق دۇرىس جەتكىزە الاتىنىڭا كۇمانداناتىن شىعارسىڭ. بۇل ورايدا جەكە زەرتتەۋدىڭ كومەگى زور! سەن ەكى ماقساتتى كوزدەسەڭ بولادى. بۇلار: تۋعان كۇندى تويلاۋ قۇدايعا نە ٷشىن ۇنامايتىنىنا ٶز كوزىڭدى جەتكىزۋ جانە وسى شىندىقتى باسقالارعا تۇسىندىرە ٴبىلۋ (مات. 14:6—11؛ پەت. 1-ح. 3:15). زەرتتەۋدى «نەگە سىنىپتاستارىم تۋعان كۇندى تويلاۋ كەرەك دەپ ويلايدى؟» دەگەن سۇراقتان باستاساڭ بولادى. سوسىن، ادەبيەتتەرىمىزدىڭ كومەگىمەن ىزدەنىس جۇرگىز. جازبالارداعى شىندىقتى قورعاۋ سەن ويلاعانداي قيىن بولماۋى مۇمكىن. كوپ ادام تۋعان كۇندى جۇرت تويلاعان سوڭ عانا تويلايدى. ىزدەنىس كەزىندە قاجەتتى ٴبىر-ەكى وي تاپساڭ، سونىڭ ٶزى شىنايى قىزىققان ادامعا قاناعاتتاندىرارلىق جاۋاپ بولا الادى (قولوستىقتارعا 4:6 وقىڭىز).
زەرتتەۋدىڭ قىزىعى
14—16. ا) جازبالارداعى اسا تانىس ەمەس كىتاپپەن قالايشا جاقسىراق تانىسا الاسىز؟ ٵ) ابزاستاردىڭ سوڭىندا كەلتىرىلگەن تارماقتاردان اموس كىتابى جايلى نە ٴبىلدىڭىز؟ (« جازبالارعا جان ٴبىتىر!» دەگەن قورشاۋدى قاراڭىز.)
14 مىنانداي جاعدايدى الايىق. كەلە جاتقان كەزدەسۋدە شاعىن پايعامبارلىق كىتاپتاردىڭ سىزگە اسا تانىس ەمەس بىرەۋى وقىلادى دەلىك. ەڭ الدىمەن، بويىمىزدا سول پايعامبار جازعان حابارعا دەگەن قىزىعۋشىلىق وياتقانىمىز دۇرىس. قالاي؟
15 بىرىنشىدەن، «بۇل كىتاپتى جازعان ادام تۋرالى نە بىلەمىن؟ ول قانداي ادام بولعان، قاي جەردە تۇرعان، نەمەن اينالىسقان؟» دەپ ويلانىڭىز. جازۋشىنىڭ قانداي ورتادان شىققانىن ٴبىلىپ الساق، ونىڭ جازۋ مانەرىن، كەي سوزدەر مەن مىسالداردى نە ٷشىن كەلتىرگەنىن تۇسىنەمىز. كىتاپتى وقۋ بارىسىندا جازۋشىنىڭ بولمىسىن اشا تۇسەتىن ويلارعا نازار اۋدارىڭىز.
16 ەكىنشىدەن، كىتاپتىڭ قاي ۋاقىتتا جازىلعانىن ٴبىلىڭىز. مۇنى «كيەلى جازبالار. جاڭا دۇنيە اۋدارماسىنىڭ» «كيەلى جازبالارعا ەنگەن كىتاپتار كەستەسىنەن» تابۋعا بولادى. سونداي-اق A6 قوسىمشاسىنداعى پايعامبارلار مەن پاتشالاردىڭ كەستەسىن قاراڭىز. ەگەر زەرتتەپ جاتقان كىتابىڭىز پايعامبارلىق كىتاپ بولسا، سول كىتاپ جازىلعان ۋاقىتتا حالىقتىڭ تىنىس-تىرشىلىگى قانداي بولعان؟ پايعامبار حالىققا نە ٷشىن جىبەرىلگەن؟ ول حالىقتىڭ قانداي جامان كوزقاراسىن، ٸسىن اشكەرەلەۋى كەرەك ەدى؟ ونىڭ زامانداستارى كىمدەر؟ سول ۋاقىتتاعى جاعدايدى جان-جاقتى كورە ٴبىلۋ ٷشىن، كيەلى كىتاپتىڭ باسقا دا كىتاپتارىنا جۇگىنەرسىز. مىسالى، اموس پايعامباردىڭ كەزىندە قانداي وقيعالار ورىن العانىن بىلگىڭىز كەلسە، پاتشالار تۋرالى 2-جازبا مەن شەجىرەلەر تۋرالى 2-جازباداعى ۇزىندىلەردى وقىساڭىز بولادى. ولار اموس 1:1 دىڭ توعىسپالى سىلتەمەلەرىندە كەلتىرىلگەن. وشيا پايعامباردىڭ جازعان كىتابىن وقۋدى دا ٴجون كورەرسىز. ويتكەنى ول اموستىڭ زامانداسى بولعان بولۋى مۇمكىن. وسىلاي ىزدەنگەنىڭىز اموس ٶمىر سۇرگەن زامانمەن كەڭىرەك تانىسۋعا كومەكتەسەدى (پات. 2-ج. 14:25—28؛ شەج. 2-ج. 26:1—15؛ وشيا 1:1—11؛ اموس 1:1).
ۇساق-تۇيەگىنە ٷڭىلىڭىز
17، 18. ۇساق-تۇيەك نارسەلەرگە ٴمان بەرۋ جەكە زەرتتەۋدى قالاي قىزىقتى ەتەدى؟ ابزاستارداعى مىسالداردى قولدانىڭىز نەمەسە ٶز مىسالىڭىزدى كەلتىرىڭىز.
17 كيەلى كىتاپتى اسقان ىجداعاتپەن وقۋىمىز كەرەك. ماسەلەن، ٴسىز زاكاريا كىتابىنىڭ 12-تاراۋىن، ٴماسىحتىڭ ٶلىمى جايلى پايعامبارلىقتى، وقىپ جاتىرسىز دەلىك (زاك. 12:10). 12-تارماققا كەلگەندە، ٴماسىح ولگەن كەزدە «ناتاننىڭ اۋلەتى» زار ەڭىرەپ جوقتايتىنىن وقيسىز. سول كەزدە ٴبىر ساتكە كىدىرىپ: «ناتاننىڭ اۋلەتى مەن ٴماسىحتىڭ قانداي بايلانىسى بار؟ بۇعان قاتىستى قوسىمشا مالىمەتتەر بار ما؟»— دەپ ويلاناسىز. ٴسۇيتىپ، بەينە ٴبىر تىڭشىداي ىزدەۋ جۇمىستارىن باستاپ كەتەسىز. توعىسپالى سىلتەمەنىڭ ٴبىرىنشىسى — سامۋيلدىڭ 2-جازباسى 5:13، 14. ول جەردەن ناتان ٴداۋىت پاتشانىڭ ۇلدارىنىڭ ٴبىرى بولعانىن بىلەسىز. سىلتەمەدەگى ەكىنشى تارماق لۇقا 3:23، 31 دەن يسانىڭ اناسى ٴماريام ناتاننان تاراعانىن كورەسىز *. ٴسىز بۇعان دەيىن يسانىڭ ٴداۋىتتىڭ ۇرپاعىنان شىعاتىنىن بىلگەنسىز (مات. 22:42). ال ٴداۋىتتىڭ 20 دان استام ۇلى بولعان عوي. ەندى ٴسىز زاكاريا ايتقان پايعامبارلىقتىڭ ارقاسىندا يسا ولگەندە ناتاننىڭ اۋلەتى نە ٷشىن زار ەڭىرەپ جىلايتىنىن ٴتۇسىندىڭىز.
18 باسقا ٴبىر مىسالدى قاراستىرايىق. لۇقا كىتابىنىڭ 1-تاراۋىندا جابىرەيىل پەرىشتەنىڭ ٴماريامعا كەلىپ، ونىڭ دۇنيەگە اكەلەتىن بالاسى تۋرالى بىلاي دەگەنىن وقيمىز: «ول اسا ۇلى بولادى، ٵرى قۇداي تاعالانىڭ ۇلى دەپ اتالادى. ەحوبا وعان ارعى اتاسى ٴداۋىتتىڭ تاعىن سيلايدى. ول جاقىپتىڭ اۋلەتىنە ماڭگىلىك بويى پاتشا رەتىندە بيلىك ەتەدى» (لۇقا 1:32، 33). ادەتتە ٴبىز وسى سوزدەردىڭ تەك ٴبىرىنشى جارتىسىنا، اتاپ ايتقاندا، يسا «قۇداي تاعالانىڭ ۇلى» دەگەن تۇسىنا نازار اۋدارامىز. ٴبىراق پەرىشتە يسانىڭ «پاتشا رەتىندە بيلىك ەتەتىنىن» دە ايتتى. ٴماريام وسى سوزدەردەن نە ٴتۇيدى ەكەن؟ يسا يرود پاتشانىڭ نەمەسە ودان كەيىن تاققا وتىراتىن مۇراگەرلەردىڭ ورنىن باسىپ، يسرايلگە بيلەۋشى بولادى دەپ ويلادى ما؟ يسا پاتشا تاعىنا وتىرسا، ٴماريام پاتشانىڭ اناسى بولىپ، ٷي ىشىمەن پاتشا سارايىندا تۇرماق. ٴبىراق جابىرەيىلمەن سويلەسكەندە، ونىڭ وسى جايلى ايتقاندىعى كيەلى كىتاپتا جازىلماعان. وندا ٴماريام يسانىڭ ەكى شاكىرتى سياقتى، پاتشالىقتا بەدەلدى ورىندا وتىرۋدى سۇراعانى جايلى دا ايتىلماعان (مات. 20:20—23). وسىلاي وي جۇگىرتكەنىمىز ٴماريامنىڭ وتە كىشىپەيىل جان بولعانىنا كوزىمىزدى جەتكىزە تۇسەدى!
19، 20. جاقىپ 1:22—25 جانە 4:8 دە ايتىلعانداي، جەكە زەرتتەگەندە، ٴبىز قانداي ماقساتتى كوزدەيمىز؟
19 قۇداي ٴسوزى مەن وعان نەگىزدەلگەن ادەبيەتتەردى زەرتتەۋدىڭ باستى ماقساتى ەحوباعا جاقىنداي ٴتۇسۋ ەكەنىن ەستە ۇستايىق. ٴبىز قانداي ادام ەكەنىمىزدى انىقتاپ، قۇدايعا ۇنامدى بولۋ ٷشىن قانداي وزگەرىستەر جاساۋىمىز كەرەكتىگىن دە بىلگىمىز كەلەدى (جاقىپ 1:22—25؛ 4:8 وقىڭىز). ٵربىر جەكە زەرتتەۋدىڭ الدىندا ەحوبادان كيەلى رۋح سۇرايىق. زەرتتەگەلى جاتقان مالىمەتتىڭ بارىنشا پايداسىن كورۋگە جانە جاقسارۋىمىز كەرەك تۇستارىمىزدى بايقاۋعا كومەك سۇراپ جالبارىنايىق.
20 ولاي بولسا، بارلىعىمىز ٴزابۇر جىرىندا ايتىلعان قۇدايدىڭ ادال قىزمەتشىسىنە ەلىكتەيىك. ول تۋرالى بىلاي دەلىنگەن: «ول ەحوبانىڭ زاڭىنان قۋانىش تابادى، ونىڭ زاڭىن كۇنى-ٴتۇنى كۇبىرلەپ وقيدى... ونىڭ ٵربىر ٸسى ٴساتتى بولادى» (ٴزابۇر 1:2، 3).
88-ٵن اق جولىڭنان تايمايىن
^ 5-ابزاس ەحوبا بىزگە كورۋگە، وقۋعا جانە زەرتتەۋگە بولاتىن مالىمەتتى كول-كوسىر ەتىپ بەرىپ جاتىر. بۇل ماقالادا نە زەرتتەۋگە بولاتىنىن جانە زەرتتەۋدىڭ بارىنشا پايداسىن كورۋ ٷشىن نە ىستەي الاتىنىمىزدى بىلەمىز.
^ 62-ابزاس سۋرەت سيپاتتاماسى: اتا-انالار بالالارىنا زەرتتەۋگە ارنالعان «كۇزەت مۇناراسىنا» دايىندالۋدى ۇيرەتىپ جاتىر.
^ 64-ابزاس سۋرەت سيپاتتاماسى: ەر باۋىرلاس اموس پايعامبار جايلى ىزدەنىس جۇرگىزۋدە. ول كيەلى كىتاپتا جازىلعانداردى وقىپ، وي جۇگىرتكەننىڭ ارقاسىندا اموستى كوز الدىنا ەلەستەتە الدى.
