6-زەرتتەۋ ماقالاسى
اكەمىز ەحوبا ٴبىزدى قاتتى جاقسى كورەدى
«سوندىقتان مىنا ىسپەتتى دۇعا ەتىڭدەر: «كوكتەگى اكەمىز» (مات. 6:9).
135-ٵن ەحوبانىڭ شاقىرۋى: «اقىلدى بول، بالام»
اڭداتپا *
1. ەگەر الدەكىم پەرسيا پاتشاسىمەن كەزدەسكىسى كەلسە، الدىمەن نە ىستەۋ كەرەك ەدى؟
ٴسىز وسىدان 2500 جىل بۇرىن پەرسيادا ٶمىر ٴسۇرىپ جاتىرسىز دەلىك. قانداي دا ٴبىر ماسەلە بويىنشا پاتشامەن سويلەسكىڭىز كەلىپ، سۋزى قالاسىنا جول تارتتىڭىز. ٴبىراق پاتشامەن كەزدەسۋ ٷشىن الدىمەن ونىڭ رۇقساتىن الۋىڭىز كەرەك. ايتپەسە ومىرىڭىزبەن قوش ايتىساسىز! (ەست. 4:11).
2. ەحوبامەن سويلەسۋگە قاتىستى قانداي ويدا بولساق بولادى؟
2 ەحوبانىڭ پەرسيا پاتشاسىنا ۇقسامايتىنىنا قانشالىقتى ريزامىز دەسەڭىزشى! ەحوبا ادامي بيلەۋشىنىڭ قاي قايسىسىنان دا اناعۇرلىم قۇدىرەتتى ٵرى دارەجەلى. ايتسە دە ٴبىز ونىمەن كەز كەلگەن ۋاقىتتا سويلەسە الامىز. ول ٴبىزدىڭ وزىمەن ەركىن سويلەسكەنىمىزدى قالايدى. ەحوبا ۇلى جاراتۋشى، قۇدىرەتى شەكسىز قۇداي، الەمنىڭ ٵمىرشىسى سياقتى وتە جوعارى لاۋازىمدارعا يە بولسا دا، ونى «اكە» دەگەن جىلى سوزبەن اتاعانىمىزدى قالايدى (مات. 6:9). ەحوبانىڭ ٴبىزدىڭ وزىنە جاقىن بولعانىمىزدى قالايتىنى جۇرەگىمىزدى ەلجىرەتەدى!
3. نەگە ەحوبانى «اكە» دەپ اتاي الامىز جانە بۇل ماقالادان نە بىلەمىز؟
3 ەحوبانى «اكە» دەپ اتاعانىمىز وتە ورىندى، ويتكەنى ول — ٶمىرىمىزدىڭ قاينار كوزى (ٴزاب. 36:9). اكەمىز بولعاندىقتان، ٴبىز ونىڭ ٴتىلىن الۋىمىز كەرەك. ەگەر ونىڭ ايتقانىن ىستەسەك، مول باتاعا كەنەلەمىز (ەۆر. 12:9). بۇل باتالارعا ماڭگىلىك ٶمىر دە جاتادى، كوكتەگى دە، جەردەگى دە. سونداي-اق قازىردىڭ وزىندە كوپ باتالارعا كەنەلەمىز. بۇل ماقالادان ەحوبانىڭ ٴبىزدىڭ اكەمىز ەكەنىن نە دالەلدەيتىنىن جانە الداعى ۋاقىتتا ونىڭ ٴبىزدى ەشقاشان تاستامايتىنىنا نەگە سەنىمدى بولا الاتىنىمىزدى بىلەمىز. ٴبىراق اۋەلى كوكتەگى اكەمىز ٴبىزدى قاتتى جاقسى كورەتىنىنە جانە قامقورلايتىنىنا نەگە ەش كۇماندانباساق بولاتىنىن قاراستىرايىق.
ەحوبا — ٴسۇيۋشى ٵرى قامقور اكە
قامقور اكەنىڭ بالاسىنا جاقىن بولعىسى كەلەتىنى سياقتى، ەحوبا دا بىزگە جاقىن بولعىسى كەلەدى (4-ابزاستى قاراڭىز)
4. كەيبىرەۋلەرگە ەحوباعا اكەسى رەتىندە قاراۋ نەگە قيىن؟
4 قۇدايعا اكەڭىز رەتىندە قاراۋ سىزگە قيىن با؟ كەي ادامدار وزدەرىن ەحوبامەن سالىستىرعاندا كىپ-كىشكەنتاي ٵرى ەش ماڭىزسىز سەزىنەدى. ولار قۇدىرەتى شەكسىز قۇدايدىڭ ٵر ادامنىڭ قامىن ويلايتىنىنا ٴشۇبالانادى. ٴبىراق ٴسۇيۋشى اكەمىز ٴبىزدىڭ بۇلاي سەزىنگەنىمىزدى قالامايدى. ول بىزگە ٶمىر بەردى جانە ونىمەن جاقىن قارىم-قاتىناستا بولعانىمىزدى قالايدى. وسى شىندىقتى ايتقاننان كەيىن ەلشى پاۋىل افيناداعى ادامدارعا ەحوبانىڭ «ٵرقايسىسىمىزدان الىس ەمەس» ەكەنىن ٴتۇسىندىردى (ەل. ٸس. 17:24—29). بالا مەيىرىمدى ٵرى قامقور اكەسىمەن سويلەسۋگە اسىق بولاتىنىنداي، ەحوبا دا ٵرقايسىسىمىزدىڭ ونىمەن سويلەسۋگە اسىق بولعانىمىزدى قالايدى.
5. ٴبىر ايەل باۋىرلاستىڭ مىسالىنان نە بىلەمىز؟
5 ال باسقالارى بولسا ٶز اكەلەرىنەن مەيىرىم مەن سۇيىسپەنشىلىكتى از كورگەن نە مۇلدەم كورمەگەن. سوندىقتان ولارعا ەحوباعا اكەسىندەي قاراۋ قيىن بولۋى مۇمكىن. ٴبىر ايەل باۋىرلاس بىلاي دەيدى: «تۋعان اكەم ماعان قورلىق سوزدەر ايتاتىن. كيەلى كىتاپتى زەرتتەي باستاعاندا ٶزىمدى كوكتەگى اكەمە جاقىن سەزىنۋ قيىن بولدى. ٴبىراق ەحوبانى تاني كەلە ٴبارى وزگەردى». بۇنداي سەزىم سىزگە دە تانىس پا؟ وندا ەش قامىقپاڭىز. ۋاقىت وتە ەحوبانىڭ ەڭ جاقسى اكە ەكەنىنە ٴسىزدىڭ دە كوزىڭىز جەتەدى.
6. ماتاي 11:27 گە ساي، ەحوبا وزىنە ٴسۇيۋشى اكە دەپ قاراي الۋىمىز ٷشىن نە ىستەدى؟
6 ەحوبانى ٴسۇيۋشى اكە رەتىندە تاني الۋىمىز ٷشىن، ول يسانىڭ سوزدەرى مەن ىستەرىن كيەلى كىتاپقا جازدىردى (ماتاي 11:27 وقىڭىز). يسا اكەسىنىڭ بولمىسىن اينا قاتەسىز تانىتقانى سونشا: «مەنى كورگەن ادامنىڭ اكەنى دە كورگەنى»،— دەي العان (جوح. 14:9). يسا ٴجيى ەحوبانىڭ اكە رەتىندەگى ٴرولى جايلى ايتقان. ٴتورت ىزگى حاباردىڭ وزىندە يسا ەحوبانى 165 رەت «اكە» دەپ اتاعان. نەگە ول ەحوبانىڭ اكە ەكەنىن كوپ ايتقان؟ مۇنىڭ ٴبىر سەبەبى — ەحوبانىڭ سۇيىسپەنشىلىگى مول قۇداي ەكەنىنە ادامداردىڭ كوزدەرىن جەتكىزۋ بولدى (جوح. 17:25، 26).
7. ەحوبانىڭ يساعا قالاي قاراعانىنان ول جايلى نە بىلەمىز؟
7 ەحوبانىڭ ٶز ۇلى يساعا قالاي قاراعانىنان ول جايلى نە بىلەمىز؟ ەحوبا يسانىڭ دۇعالارىن ٵردايىم تىڭداعان. تىڭداپ قانا قويماي، جاۋاپ تا بەرگەن (جوح. 11:41، 42). يسا قانداي سىناققا كەزىكسە دە، اكەسىنىڭ سۇيىسپەنشىلىگى مەن قولداۋىن سەزىپ وتىرعان (لۇقا 22:42، 43).
8. ەحوبا يسانى قاي جاعىنان قامتاماسىز ەتتى؟
8 يسا ٶمىرىنىڭ قاينار كوزى اكەسى ەكەنىن مويىنداپ: «اكەمنىڭ ارقاسىندا ٶمىر ٴسۇرىپ جاتىرمىن»،— دەگەن (جوح. 6:57). يسا اكەسىنە تولىقتاي ارقا سۇيەگەن، ال ەحوبا وعان ٶمىر سۇرۋگە قاجەتتى نارسەلەردى بەرگەن. ەڭ باستىسى — ەحوبا يسانىڭ رۋحاني قاجەتتىلىگىن قامدادى (مات. 4:4).
9. ەحوبا يسانى جاقسى كورەتىنىن ٵرى قامقور اكە ەكەنىن قالاي كورسەتتى؟
9 ٴسۇيۋشى اكە بولعاندىقتان، ەحوبا يسانىڭ ۇنەمى ارقا سۇيەر اسقار تاۋى بار ەكەنىن ٴبىلىپ جۇرگەنىن قالادى (مات. 26:53؛ جوح. 8:16). ەحوبا ونى بارلىق جاماندىقتان قورعاماسا دا، وعان قيىندىققا توزۋگە كومەكتەستى. يسا كەز كەلگەن سىناقتىڭ ۋاقىتشا ەكەنىن بىلگەن (ەۆر. 12:2). ەحوبا يسانى جاقسى كورەتىنىن ونى تىڭداۋىمەن، قاجەتىن قامداۋىمەن، ۇيرەتۋىمەن، قولداۋ كورسەتۋىمەن دالەلدەدى (جوح. 5:20؛ 8:28). كوكتەگى اكەمىز ٴبىزدى دە ٴدال وسىلاي قامقورلايدى. قازىر سونى قاراستىرايىق.
ٴسۇيۋشى اكەمىز ٴبىزدى قالاي قامقورلايدى؟
قامقور اكە بالاسىن 1) تىڭدايدى، 2) قاجەتىمەن قامتاماسىز ەتەدى، 3) ٴتالىم-تاربيە بەرەدى جانە 4) قورعايدى. كوكتەگى ٴسۇيۋشى اكەمىز دە ٴدال سولاي ٴبىزدىڭ قامىمىزدى ويلايدى (10—15 ابزاستاردى قاراڭىز) *
10. ٴزابۇر 66:19، 20 عا ساي، ەحوبا ٴبىزدى جاقسى كورەتىنىن قالاي كورسەتەدى؟
10 ەحوبا دۇعالارىمىزدى تىڭدايدى (ٴزابۇر 66:19، 20 وقىڭىز). ول دۇعالارىمىزدى شەكتەگەنىمىزدى قالامايدى، كەرىسىنشە، ۇدايى دۇعا ەتۋگە شاقىرادى (سال. 1-ح. 5:17). قايدا جۇرسەك تە، كەز كەلگەن ۋاقىتتا قۇدايىمىزعا دۇعا ەتە الامىز. ول ۋاقىتى بولماي، ٴبىزدى تىڭداماي قويمايدى. قايتا، دۇعالارىمىزعا ۇنەمى قۇلاق تۇرەدى. دۇعالارىمىزدى تىڭدايتىنىن باعالاساق، ەحوباعا جاقىنداي تۇسەمىز. ٴزابۇر جىرشىسى: «مەن ەحوبانى جاقسى كورەمىن، ويتكەنى ول... ٷنىمدى ەستيدى»،— دەگەن (ٴزاب. 116:1).
11. ەحوبا دۇعالارىمىزعا قالاي جاۋاپ بەرەدى؟
11 اكەمىز دۇعالارىمىزدى تىڭداپ قانا قويمايدى، سونداي-اق ولارعا جاۋاپ بەرەدى. ەلشى جوحان: «ونىڭ ەركىنە ساي نە سۇراساق تا، قۇداي بىزگە قۇلاق اسادى»،— دەگەن (جوح. 1-ح. 5:14، 15). الايدا ەحوبا دۇعالارىمىزعا ٴبىز قالاعانداي جاۋاپ بەرمەۋى مۇمكىن. ول ٴبىز ٷشىن نەنىڭ جاقسى ەكەنىن بىلەدى، سوندىقتان كەيدە «جوق» دەپ جاۋاپ بەرەدى نەمەسە كۇتە تۇرعانىمىزدى قالايدى (قور. 2-ح. 12:7—9).
12، 13. كوكتەگى اكەمىز ٴبىزدى قاي جاعىنان قامتاماسىز ەتەدى؟
12 ەحوبا قاجەتىمىزبەن قامتاماسىز ەتەدى. ول بارلىق اكەلەردەن نەنى تالاپ ەتسە، ٶزى دە سونى ىستەيدى (ٴتىم. 1-ح. 5:8). ول بالالارىن قاجەتتى نارسەلەرمەن قامتاماسىز ەتەدى. ول ٴبىزدىڭ تاماق، كيىم-كەشەك پەن باسپانانى ويلاپ ۋايىمداعانىمىزدى قالامايدى (مات. 6:32، 33؛ 7:11). ٴبىزدى سۇيەتىندىكتەن، ەحوبا اكەمىز بولاشاعىمىزدىڭ دا قامىن جاساپ قويدى.
13 ەڭ ماڭىزدىسى — ەحوبا ٴبىزدىڭ رۋحاني قاجەتتىلىگىمىزدى قامدايدى. ٴسوزى ارقىلى ول ٶزى جايلى، نيەتى جايلى، ٶمىردىڭ ٴمانى جانە بولاشاق جايلى شىندىقتاردى اشتى. اتا-انامىز نە باسقا ادام ارقىلى ٶزى تۋرالى بىلۋگە كومەكتەستى، وسىلايشا شىندىقتى العاش بىلگەندە، بىزگە جەكە كوڭىل ٴبولدى. سونداي-اق قاۋىمداعى قامقور اقساقالدار مەن رۋحاني تولىسقان باۋىرلاستار ارقىلى بىزگە كومەك بەرۋىن جالعاستىرىپ كەلەدى. سونىمەن قاتار كەزدەسۋلەردە باۋىرلاستارمەن بىرگە ەحوبادان ٴتالىم الامىز. وسى جانە باسقا دا جولدارمەن ەحوبا اكە رەتىندە ٵرقايسىسىمىزدىڭ قامىمىزدى ويلايتىنىن كورسەتۋدە (ٴزاب. 32:8).
14. نەگە ەحوبا بىزگە ٴتالىم-تاربيە بەرەدى جانە ول مۇنى قالاي ىستەيدى؟
14 ەحوبا بىزگە ٴتالىم-تاربيە بەرەدى. يسادان ەرەكشەلىگىمىز، ٴبىز كەمەلسىز پەندەمىز. سوندىقتان ٴسۇيۋشى اكەمىز بىزگە ٴتالىم-تاربيە بەرىپ، قاجەت كەزدە جونگە سالادى. ونىڭ سوزىندە: «ەحوبا كىمدى جاقسى كورسە، سونى جونگە سالادى»،— دەلىنگەن (ەۆر. 12:6، 7). ەحوبا ٴبىزدى ٴتۇرلى جولدارمەن جونگە سالادى. مىسالى، ونىڭ سوزىنەن وقىعاندارىمىز بەن كەزدەسۋلەردە ەستىگەندەرىمىز ٴبىزدى تۇزەتۋى مۇمكىن. يا بولماسا قاجەتتى كومەك اقساقالداردان كەلۋى مۇمكىن. ەحوبا ٴبىزدى قالاي جونگە سالسا دا، بۇلاي ەتۋگە ونى سۇيىسپەنشىلىك تالپىندىرادى (ەرم. 30:11).
15. ەحوبا ٴبىزدى قاي جاعىنان قورعايدى؟
15 ەحوبا قيىن شاقتاردا قولداۋ كورسەتەدى. قامقور اكەنىڭ قيىن شاقتا بالاسىنىڭ قاسىنان تابىلاتىنى سياقتى، كوكتەگى اكەمىز دە قيىن كەزدەرى ٴبىزدى قولداپ-قۋاتتايدى. ول كيەلى رۋحى ارقىلى ٴبىزدى رۋحاني جاعىنان قورعايدى (لۇقا 11:13). سونداي-اق ەحوبا ٴبىزدى ەموسيالىق جاعىنان دا قورعايدى. ماسەلەن، ول بىزگە كەرەمەت ٷمىت سيلادى. بولاشاققا دەگەن ٷمىتىمىز قيىندىقتاردى ەڭسەرۋگە كومەكتەسەدى. ويلاپ كورىڭىزشى: قانداي جامان جاعدايعا ۇشىراساق تا، ٴسۇيۋشى اكەمىز كەز كەلگەن جان جارامىزدى تولىعىمەن جازادى. ٴبىز كەزىگىپ جۇرگەن قيىندىقتىڭ ٴبارى ۋاقىتشا، ال ەحوبانىڭ بەرەتىن باتالارى ماڭگىلىك (قور. 2-ح. 4:16—18).
اكەمىز ٴبىزدى ەشقاشان تاستامايدى
16. ادام ٴسۇيۋشى اكەسىنە مويىنسۇنباعاندا قانداي جاعداي ورىن الدى؟
16 جەردەگى وتباسىندا العاش رەت پروبلەمالار تۋىنداعان كەزدە ەحوبانىڭ قالاي ارەكەت ەتكەنى ونىڭ ٴبىزدى سۇيەتىنىن دالەلدەيدى. ادام اتا كوكتەگى اكەسىنە مويىنسۇنباي، ەحوبانىڭ باقىتتى وتباسىنداعى ٶز ورنىن جوعالتتى، ٴسۇيتىپ، ٶزى دە، ۇرپاقتارى دا ەحوبانىڭ وتباسىنا جاتپايتىن بولدى (ريم. 5:12؛ 7:14). الايدا ەحوبا ادامنىڭ ۇرپاقتارىنا كومەك قولىن سوزىپ، ٴبىر شارا جاسادى.
17. ادام اتانىڭ بۇلىگىنەن كەيىن ەحوبا بىردەن نە ىستەدى؟
17 ەحوبا ادام اتانى جازاعا تارتتى، ٴبىراق ونىڭ ٵلى تۋىلماعان ۇرپاقتارىن ٷمىتسىز قالدىرمادى. ەحوبا بىردەن ٴتىلالعىش ادامداردى ٶز وتباسىنا قايتاراتىنىن ۋادە ەتتى (مۇس. 1-ج. 3:15؛ ريم. 8:20، 21). ول بۇنى سۇيىكتى ۇلى يسانىڭ تولەم قۇرباندىعىنىڭ نەگىزىندە مۇمكىن ەتتى. ۇلىن ٴبىز ٷشىن قيۋىمەن، ەحوبا ٴبىزدى قاتتى جاقسى كورەتىنىن دالەلدەدى (جوح. 3:16).
ەگەر قۇدايدان الشاقتاپ كەتىپ، ٴبىراق مۇنىمىزعا وكىنسەك، كوكتەگى مەيىرىمدى اكەمىز ەحوبا ٴبىزدى قايتادان قۇشاق جايا قارسى الۋعا دايىن (18-ابزاستى قاراڭىز)
18. ٴتىپتى ودان الشاقتاپ كەتسەك تە، ەحوبا ونىڭ بالالارى بولعانىمىزدى قالايتىنىنا نەگە سەنىمدى بولا الامىز؟
18 كەمەلسىز بولساق تا، ەحوبا ٴبىزدىڭ ٶزىنىڭ وتباسىندا بولعانىمىزدى قالايدى جانە ول ٴبىزدى ەشقاشان ماسىل دەپ ەسەپتەمەيدى. ٴبىز ەحوبانىڭ كوڭىلىن قالدىرۋىمىز نە ٴبىرشاما ۋاقىتقا ودان الىستاپ كەتۋىمىز مۇمكىن، سوندا دا ول بىزدەن ەش ٷمىت ۇزبەيدى. يسا ەحوبانىڭ اكەلىك سۇيىسپەنشىلىگى قانشالىقتى ىستىق ەكەنىن سيپاتتاۋ ٷشىن اداسقان ۇل تۋرالى مىسالدى ايتىپ بەردى (لۇقا 15:11—32). سول مىسالداعى اكە ۇلىنىڭ قايتىپ كەلەتىنىنەن ەش كۇدەر ۇزبەدى. ال ۇلى قايتا ورالعاندا قۇشاق جايا قارسى الدى. ەحوبادان الشاقتاپ كەتىپ، ٴبىراق مۇنىمىزعا وكىنسەك، ٴسۇيۋشى اكەمىز ٴبىزدى قايتا قابىلداۋعا دايىن ەكەنىنە سەنىمدى بولساق بولادى.
19. ەحوبا ادام اتانىڭ كەسىرىنەن بولعان زالالدىڭ ورنىن قالاي تولتىرادى؟
19 اكەمىز ەحوبا ادام اتانىڭ كەسىرىنەن بولعان بارلىق زالالدىڭ ورنىن تولتىرادى. ادام اتانىڭ بۇلىگىنەن كەيىن ەحوبا ادامداردىڭ اراسىنان 144000 جاندى تاڭداپ الۋدى شەشتى. ولار كوكتە يسامەن بىرگە پاتشا ٵرى ٴدىني قىزمەتكەر بولادى. يسا مەن سول بيلەۋشىلەر جاڭا دۇنيەدە ٴتىلالعىش ادامزاتقا كەمەلدىلىككە جەتۋگە كومەكتەسەدى. ادامزاتتىڭ مويىنسۇنۋشىلىعى سوڭعى رەت سىنالعاننان كەيىن قۇداي ولارعا ماڭگىلىك ٶمىر سيلايدى. سول كەزدە جەر بەتى كەمەلدى ۇل-قىزدارىنا تولعانىن كورىپ، اكەمىزدىڭ ٴجۇزى بال-بۇل جاينايدى. بۇل نەتكەن ٴسان-سالتاناتقا تولى كەز بولماق دەسەڭىزشى!
20. ەحوبانىڭ ٴبىزدى قاتتى جاقسى كورەتىنى نەدەن كورىنەدى جانە كەلەسى ماقالادا نە قاراستىرامىز؟
20 ەحوبا ٴبىزدى قاتتى جاقسى كورەتىنىن ۇنەمى كورسەتىپ كەلەدى. ول — الەمدەگى ەڭ تاماشا اكە. ول دۇعالارىمىزدى تىڭدايدى، ماتەريالدىق تا، رۋحاني دا قاجەتتىلىكتەرىمىزدى قامدايدى. ول بىزگە ٴتالىم-تاربيە بەرەدى جانە قولداپ-قۋاتتايدى. سونداي-اق بولاشاقتا ٴبىز ٷشىن كەرەمەت ىستەر ىستەمەك. اكەمىزدىڭ ٴبىزدى جاقسى كورەتىنىن جانە قامقورلايتىنىن بىلگەنىمىز جانىمىزعا جىلۋ بەرەدى! كەلەسى ماقالادا بالالارى رەتىندە ونىڭ سۇيىسپەنشىلىگىن باعالايتىنىمىزدى قالاي كورسەتە الاتىنىمىزدى قاراستىرامىز.
108-ٵن قۇدايدىڭ اينىماس سۇيىسپەنشىلىگى
^ 5-ابزاس ٴبىز ادەتتە ەحوبانى جاراتۋشى ٵرى الەمنىڭ ٵمىرشىسى دەپ بىلەمىز. ايتسە دە ونى ٴسۇيۋشى ٵرى قامقور اكەمىز دەۋگە سەبەپ كوپ. بۇل سەبەپتەردى وسى ماقالادان بىلەمىز. سونداي-اق ەحوبا ٴبىزدى ەشقاشان تاستامايتىنىنا نەگە سەنىمدى بولا الاتىنىمىزدى دا قاراستىرامىز.
^ 59-ابزاس سۋرەتتەر سيپاتتاماسى: ٴتورت سۋرەتتە دە اكە مەن بالا بەينەلەنگەن: 1) ۇلىن مۇقيات تىڭداپ تۇرعان اكە، 2) قىزىنىڭ قاجەتىن قامداپ جاتقان اكە، 3) ۇلىنا ٴتالىم-تاربيە بەرىپ جاتقان اكە، 4) ۇلىن جۇباتىپ جاتقان اكە. وسى سۋرەتتەردىڭ ارتىندا تۇرعان ەحوبانىڭ قولى ونىڭ ٴبىزدى دە وسىنداي جولدارمەن قامقورلايتىنىن ەسىمىزگە سالادى.
