جاقيا — قۋانىشى ورتايماعان جان
قاۋىمدا سىزگە ۇنايتىن، ٴبىراق قازىر اتقارا المايتىن قىزمەتتى اڭساپ ٴجۇرسىز بە؟ بالكىم، بۇل جاۋاپكەرشىلىكتى باسقا بىرەۋ اتقارىپ جۇرگەن شىعار. يا بولماسا بۇل ٴسىز بۇرىن اتقارعان قىزمەت شىعار. قازىر جاسىڭىزدىڭ ۇلعايۋى، دەنساۋلىقتىڭ ناشارلاۋى، قارجى تاپشىلىعى يا وتباسىلىق مىندەتتەرىڭىز مۇمكىندىك اياسىن شەكتەپ تاستاعان بولار. يا بولماسا ۇيىمداعى اۋىس-تۇيىستەردىڭ سالدارىنان ۇزاق جىل بويى اتقارعان قىزمەتىڭىزدى توقتاتۋعا تۋرا كەلگەن شىعار. سەبەبى قانداي بولماسىن، ٴسىز ەحوباعا ٶزىڭىز قالاعانداي قىزمەت ەتە الماي ٴجۇرمىن دەپ ويلايتىن شىعارسىز. سودان كوڭىلىڭىز ٴجيى-ٴجيى ٴتۇسىپ جۇرگەن دە بولار. بۇل تۇسىنىكتى دە. دەسە دە كوڭىلدىڭ تۇسۋىنە، جابىرقاۋ مەن رەنىشكە توسقاۋىل قويا الامىز با؟ مۇندايدا قۋانىشىڭىزدى قالاي ساقتاي الاسىز؟
قۋانىشىمىزدى جوعالتپاۋعا قاتىستى شومىلدىرۋ ٴراسىمىن جاساۋشى جاقيادان ۇيرەنەرىمىز كوپ. جاقيا وزىنە تاپسىرىلعان مارتەبەلى قىزمەتتى قۋانىشپەن اتقاردى. ٴبىراق ول الدا نە كۇتىپ تۇرعانىن بىلمەسە كەرەك. كوپ ۋاقىتتى قىزمەتتە ەمەس، تۇرمەدە وتكىزەتىنى ٴتىپتى ويىنا دا كىرىپ شىقپاعان شىعار. الايدا جاقيا قۋانىشىن جوعالتپاي، ومىرىنىڭ سوڭىنا دەيىن وڭ كوزقاراسىن ساقتاپ قالدى. جاقياعا نە كومەك بولدى؟ ٴبىر نارسەدەن كوڭىلىمىز قالعاندا، قۋانىشىمىزدى قالاي ساقتاي الامىز؟
قۋانىشقا تولى قىزمەت
ب. ز. 29-جىلىنىڭ كوكتەمىندە جاقيا ەحوبانىڭ تاپسىرماسىن ورىنداي باستادى. ول: «كۇنالارىڭا وكىنىڭدەر، ويتكەنى كوك پاتشالىعى تاياپ قالدى!»— دەپ، حالىقتى ٴماسىحتىڭ كەلۋىنە دايىنداۋ كەرەك ەدى (مات. 3:2؛ لۇقا 1:12—17). كوبىسى بۇل سوزدەرگە دەن قويدى. وسى حاباردى ەستۋ ٷشىن ادامدار الىستان اعىلىپ جاتتى. ولاردىڭ كوبىسى كۇنالارىنا وكىنىپ، شومىلدىرۋ راسىمىنەن ٶتتى. سونداي-اق جاقيا ادىلسىماق دىنباسىلار وزگەرمەسە، ولاردى قانداي جازا كۇتىپ تۇرعانىن قورىقپاستان ايتتى (مات. 3:5—12). ب. ز. 29-جىلىنىڭ كۇزىندە يسانى شومىلدىرۋ راسىمىنەن وتكىزىپ، جاقيا قىزمەتىندەگى ەڭ ماڭىزدى ٸستى اتقاردى. سودان باستاپ ول حالىقتى ۋادە ەتىلگەن ماسىحكە قاراي باعىتتاپ وتىردى (جوح. 1:32—37).
جاقيانىڭ ەرەكشە رولىنە مەڭزەپ، يسا: «ادام اتاۋلىنىڭ ىشىندە شومىلدىرۋ ٴراسىمىن جاساۋشى جاقيادان ۇلى ەشكىم بولعان ەمەس»،— دەدى (مات. 11:11). جاقيا ەحوبا ٷشىن اتقارعان بار قىزمەتى مەن قۇدايدان كورگەن باتالارىن قاتتى باعالاعانىندا كۇمان جوق. جاقيا سياقتى بۇگىندە ەحوباعا بار جۇرەكپەن قىزمەت ەتەتىن كوپتەگەن ماسىحشىلەر مولىنان جارىلقانىپ جاتىر. تەرري دەگەن باۋىرلاستىڭ ۇلگىسى — سوعان دالەل. تەرري مەن ايەلى ساندرا ومىرىنىڭ 50 جىلدان استام ۋاقىتىن تولىق ۋاقىتتى قىزمەتتە وتكىزگەن. ول بىلاي دەيدى: «مەن كوپتەگەن تاماشا قىزمەت اتقاردىم. تۇراقتى ٸزاشار بولدىم، بەتەلدىك، ارنايى ٸزاشار، سوسىن اۋداندىق جانە وبلىستىق باقىلاۋشى بولىپ قىزمەت ەتتىم. قازىر قايتادان ارنايى ٸزاشار بولىپ قىزمەت ەتەمىن». وسىنداي قىزمەت تۇرلەرىنە تاعايىندالعاندا، بۇل بىزگە ٴسوزسىز قۋانىش اكەلەدى. ٴبىراق جاقيانىڭ ۇلگىسىنەن ٴبىزدىڭ قۋانىشىمىز قانداي دا ٴبىر تاعايىندالۋىمىزعا بايلانىستى ەمەس ەكەنىن جانە قۋانىشىمىزدى قاشىرىپ الماۋ ٷشىن كۇش سالۋ كەرەكتىگىن ۇيرەنەمىز.
سارقىلماعان ريزاشىلىق
جاقيانىڭ قۋانىشتى بولۋىنىڭ قۇپياسى ونىڭ ريزاشىلىعىندا ەدى. ول تاپسىرىلعان مارتەبەلى ىستەرىنە العىسىن ەشقاشان جوعالتپاعان. سونىڭ ٴبىر مىسالىن كورەيىك. يسا شومىلدىرۋ راسىمىنەن وتكەننەن كەيىن ونىڭ شاكىرتتەرى كوبەيسە، جاقيانىكى ازايا باستادى. جاقيانىڭ شاكىرتتەرى ۋايىمداپ: «ۇستاز، قاراڭىزشى، يورداننىڭ ارعى جاعىندا سىزگە كەلگەن ادام شومىلدىرۋ ٴراسىمىن جاساپ ٴجۇر. جۇرتتىڭ ٴبارى سوعان بارىپ جاتىر»،— دەدى (جوح. 3:26). جاقيا بىلاي دەپ جاۋاپ بەردى: «قالىڭدىعى بار كىسى — كۇيەۋجىگىت قوي. ال قاسىندا تۇرعان دوسى ونىڭ داۋسىن ەستىپ، قاتتى قۋانادى. مەنىڭ دە قۋانىشىم قوينىما سيماي تۇر» (جوح. 3:29). جاقيا يسامەن باسەكەلەسكەن جوق، «يسانىڭ قىزمەتى ماڭىزدىراق، ال مەنىڭ قىزمەتىمنىڭ تۇك پايداسى بولعان جوق» دەپ تە ويلامادى. قايتا، ول كۇيەۋجىگىتتىڭ «دوسى» ەكەنىن باعالى تۇتىپ، قۋانىشىن جوعالتپادى.
جاقيانىڭ تاپسىرماسى وڭاي بولماعان. ٴبىراق ونىڭ دۇرىس كوزقاراسى وعان قۋانىشىن ساقتاۋعا كومەك بەردى. مىسالى، جاقيا تۋعانىنان نازير بولعان، سوندىقتان وعان شاراپ ىشۋگە بولمايتىن (لۇقا 1:15). ونىڭ تاقۋالىق ٶمىر سالتىنا نۇسقاپ يسا: «جاقيا وزگەلەردەي ٸشىپ-جەمەدى»،— دەدى. ال يسا مەن ونىڭ شاكىرتتەرى نازير انتىنىڭ شەكتەۋىندە بولماعان، سوندىقتان باسقالار سياقتى ٶمىر كەشكەن (مات. 11:18، 19). سونىمەن قاتار جاقيا كەرەمەتتەر جاساماعان، ال يسانىڭ شاكىرتتەرى كەرەمەتتەر جاسايتىن. اراسىندا جاقيانىڭ بۇرىنعى شاكىرتتەرى دە بولعان (مات. 10:1؛ جوح. 10:41). جاقيا ٶز شاكىرتتەرى مەن يسانىڭ شاكىرتتەرىنىڭ اراسىنداعى وسىنداي ايىرماشىلىقتاردى ويلاپ، ويعا باتقان جوق. ول بار ويىن ەحوبانىڭ بەرگەن تاپسىرماسىنا اۋدارىپ، سونى ورىنداۋدان باس المادى.
ٴبىز دە قازىر اتقارىپ جاتقان قىزمەتىمىزدى باعالاساق، قۋانىشىمىزدى كوزدىڭ قاراشىعىنداي ساقتاي الامىز. باسىندا ايتىلىپ كەتكەن تەرري بىلاي دەيدى: «مەن ٵر قىزمەتىمە دەن قويىپ كىرىسەتىنمىن». ارتتا قالعان جىلدارى جايلى ول: «مەنىڭ ەشقانداي وكىنىشىم جوق، سول جىلدار ادەمى ەستەلىك بولىپ ەسىمدە قالدى»،— دەيدى.
ٵر قىزمەتتى، ٵر جاۋاپكەرشىلىكتى نە نارسە ەرەكشە ەتەتىنىن ويلاپ تۇرعانىمىز دا قۋانىشىمىزدى ەسەلەي تۇسەدى. قۇدايمەن قىزمەتتەسۋ — ابىرويلى ٸس (قور. 1-ح. 3:9). قۇندى زاتتىڭ ادەمى كۇيىن ساقتاۋ ٷشىن ونى كۇتىپ ۇستاۋ كەرەك. سول سياقتى ەحوبامەن قىزمەتتەسۋ قانداي مارتەبە ەكەنىن ۇمىتپاي، وي جۇگىرتىپ وتىرساق، قۋانىشىمىز ەشقاشان ورتايمايدى. ٴبىز ٶز قۇرباندىعىمىزدى باسقالاردىكىمەن سالىستىرمايتىن بولامىز. ەحوبا بىزگە ماڭىزسىز، ال باسقالارعا ماڭىزدى ٸس تاپسىردى دەپ ويلامايمىز (عال. 6:4).
رۋحاني نارسەلەرگە كوز تىگىڭىز
جاقيا قىزمەتىنىڭ ۇزاققا جالعاسپايتىنىن بىلسە دە، كەنەتتەن ۇزىلەتىنىن ويلاماسا كەرەك (جوح. 3:30). ب. ز. 30-جىلى، يسانى شومىلدىرۋ راسىمىنەن وتكىزگەنىنە شامامەن التى اي وتكەن سوڭ، يرود پاتشا جاقيانى تۇرمەگە جابادى. تۇرمەدە دە جاقيا كۋالىك ەتۋىن دوعارمادى (مار. 6:17—20). وسىنداي قيىندىقتاردا وعان قۋانىشتى بولىپ جۇرۋگە نە كومەكتەستى؟ ونىڭ بار نازارى رۋحاني نارسەلەردە ەدى.
جاقيا تۇرمەدە جاتقاندا، يسانىڭ قىزمەتى جايلى حابارلار وعان جەتىپ جاتتى (مات. 11:2؛ لۇقا 7:18). جاقيا ونىڭ ٴماسىح ەكەنىنە سەنىمدى ەدى، ٴبىراق يسا جازبالارداعى ماسىحكە قاتىستى ايتىلعان بارلىق پايعامبارلىقتاردى قالاي ورىندايدى دەپ ٴدال بولعان شىعار. جاقيا ٴماسىحتىڭ پاتشا بولاتىنىن بىلگەندىكتەن، «يسا بيلىگىن جاقىندا باستاي ما، مەنى تۇرمەدەن بوساتا ما؟» دەگەن سۇراقتار تولعاندىرعان شىعار. يسانىڭ ٴرولى جايلى تۇسىنىگىن انىقتاي ٴتۇسۋ ٷشىن جاقيا ەكى شاكىرتىن جىبەرىپ، بىلاي دەپ سۇراتتى: «كەلەدى دەگەن كىسى ٴسىز بە، الدە باسقا بىرەۋدى كۇتۋىمىز كەرەك پە؟» (لۇقا 7:19). سوندا يسا: «زاعيپتار كورىپ، اقساقتار ٴجۇرىپ، الاپەستەر تازارىپ، ساڭىراۋلار ەستىپ، ولگەندەر قايتا ٴتىرىلىپ، كەدەي-كەپشىكتەرگە ىزگى حابار جاريالانىپ جاتىر»،— دەپ جاقياعا ايتۋدى بۇيىرادى (لۇقا 7:20—22). شاكىرتتەرى يسانىڭ ادامداردى كەرەمەت تۇردە ساۋىقتىرىپ جاتقانىن ايتىپ بەرىپ جاتقاندا، جاقيا ولاردى بار زەيىنىمەن تىڭداسا كەرەك.
شاكىرتتەرىنىڭ حابارى جاقيانى بەك نىعايتتى. يسانىڭ ماسىحكە قاتىستى پايعامبارلىقتاردى ورىنداپ جاتقانىنا كوزى جەتتى. يسا جاقيانى تۇرمەدەن قۇتقارماسا دا، جاقيا وزىنىڭ قىزمەتى بەكەر بولماعانىن بىلگەن. باسىنا تونگەن جاعدايلارىنا قاراماستان، ول قۋانىشىن جوعالتقان جوق.
دۇنيەجۇزى بويىنشا ٴجۇرىپ جاتقان ۋاعىز ىسىنە نازار اۋدارساق، قۋانىشىمىزدى جوعالتپايمىز
جاقياعا ۇقساپ ٴبىز دە رۋحاني نارسەلەرگە كوز تىكسەك، بارىنە شىدامدىلىقپەن جانە قۋانىشپەن توزە الامىز (قول. 1:9—11). سونداي-اق بىزگە كيەلى كىتاپ وقىعانىمىز، ول جايىندا وي جۇگىرتكەنىمىز كومەك بولادى. سونىڭ ارقاسىندا قۇداي ٷشىن ىستەپ جاتقانىمىزدىڭ ٴبارى بەكەر ەمەس ەكەنىن ۇمىتپايمىز (قور. 1-ح. 15:58). ساندرا بىلاي دەيدى: «كۇن سايىن كيەلى كىتاپتىڭ تاراۋىن وقيمىن، سونىڭ ارقاسىندا ەحوباعا ودان بەتەر جاقىنداي ٴتۇستىم. بۇل ماعان بار نازارىمدى وزىمە ەمەس، ەحوباعا اۋدارۋعا كومەكتەسەدى». بۇعان قوسا، ٴبىز پاتشالىق ٸسىنىڭ دۇنيەجۇزىلىك ەسەبىنە دەن قويامىز. بۇل بىزگە تەك ٶزىمىز جايىندا ويلاۋ بەرمەۋگە، ونىڭ ورنىنا، ەحوبانىڭ ىستەپ جاتقان ىستەرىنە نازار اۋدارۋعا سەپتەسەدى. «اي سايىنعى ®JW Broadcasting باعدارلاماسى بىزگە ۇيىمعا جاقىن بولۋعا، سونداي-اق ٶز قىزمەتىمىزدى قۋانا اتقارۋعا كومەكتەسەدى»،— دەيدى ساندرا.
قامشىنىڭ سابىنداي قىسقا عۇمىرىن جاقيا قىزمەتكە ارنادى. «ول ٸلياسقا دارىعان رۋح پەن كۇشكە بولەندى» جانە «بىزدىكىندەي سەزىمى بار ادام بولعان» (لۇقا 1:17؛ جاق. 5:17).جاقيانىڭ ريزاشىلىعىنا ەلىكتەپ، ول سياقتى بار نازارىمىزدى رۋحاني نارسەلەرگە اۋدارساق، ومىرىمىزدە قانداي جاعداي بولماسىن، ٴبىز دە قىزمەتىمىزدى قۋانا اتقاراتىن بولامىز.
قىزىقتى بولار مالىمەتتەر
يسا پايعامبار — جول، شىندىق، ٶمىر
يسا جوعارىلادى، ال جاقيا تومەندەدى
جاقيانىڭ شاكىرتتەرى قىزعانىش سەزىندى، ال جاقيانىڭ ٶزى يسا ٷشىن قۋاندى.
