31-زەرتتەۋ ماقالاسى
«ٴبىز ەش تالمايمىز!»
«سوندىقتان ٴبىز ەش تالمايمىز» (قور. 2-ح. 4:16).
128-ٵن سوڭىنا دەيىن تاباندى تۇرايىق
اڭداتپا *
1. پاۋىل ماسىحشىلەردى نە ىستەۋگە شاقىردى؟
ماسىحشىلەردىڭ بارلىعى ٶمىر ٷشىن جارىسقا قاتىسىپ، جۇگىرىپ كەلەدى. جارىسقا ەندى قوسىلعاندار دا، بۇرىننان جۇگىرىپ كەلە جاتقاندار دا، مارە سىزىعىنا جەتكەنشە جۇگىرۋدى دوعارماۋ كەرەك. وسى ورايدا ەلشى پاۋىلدىڭ فىلىپىدەگى ماسىحشىلەرگە جازعان سوزدەرى بىزگە سوڭىنا دەيىن جۇگىرۋگە كۇش-جىگەر بەرەدى. سول قالاداعى ماسىحشىلەر پاۋىلدىڭ حاتىن العاندا، كەيبىرىنىڭ ەحوباعا قىزمەت ەتكەندەرىنە ٴبىراز جىل بولعان ەدى. قىزمەتتەرىن ادالدىقپەن اتقارىپ جاتسا دا، پاۋىل ولاردى تاباندىلىقپەن جۇگىرە بەرۋگە تالپىندىردى. وعان ەلىكتەپ، «ومىرگە جەتۋدى ماقسات ەتىپ جۇگىرۋگە» شاقىردى (ٴفىلىپ. 3:14).
2. نەگە پاۋىلدىڭ كەڭەسى ۋاقتىلى كەڭەس بولدى؟
2 پاۋىلدىڭ فىلىپىلىكتەرگە ايتقان شاقىرۋى دەر كەزىندە بولدى. ويتكەنى فىلىپىدەگى قاۋىم قۇرىلا سالىسىمەن-اق قۋعىن-سۇرگىنگە كەزىكتى. بۇل قارسىلىقتار پاۋىل مەن سيلاس «ماكەدونياعا كەل» دەگەن شاقىرۋعا قۇلاق اسىپ، شامامەن ب.ز. 50-جىلى فىلىپىگە كەلگەندە باستالدى (ەل. ٸس. 16:9). سول جەردە ولار ەحوبا جۇرەگىن اشقان «ٴلۇديا ەسىمدى ايەلدى» كەزدەستىردى (ەل. ٸس. 16:14). كوپ ۇزاماي ٴلۇديا جانە ونىڭ بۇكىل ٷي ٸشى شومىلدىرۋ راسىمىنەن ٶتتى. ٴبىراق ٸبىلىس قول قۋسىرىپ وتىرمادى. قالاداعى ەر ادامدار پاۋىل مەن سيلاستى ۇستاپ الدى دا، قالا بيلەۋشىلەرىنە سۇيرەپ اپارىپ، «جۇرتتى دۇرلىكتىرىپ ٴجۇر» دەگەن جالعان ايىپ تاقتى. ٴسۇيتىپ، ولار پاۋىل مەن سيلاسقا دۇرە سوقتىردى، تۇرمەگە جاپتى، ال كەيىن قالادان كەتۋدى ٶتىندى (ەل. ٸس. 16:16—40). ٴبىراق ولار قىزمەتتەرىن دوعاردى ما؟ جوق! ال جاڭا قۇرىلعان قاۋىمداعى باۋىرلاستار شە؟ ولار دا ەش تايسالماي تۇردى! پاۋىل مەن سيلاستىڭ كورسەتكەن تاباندىلىعى ولارعا قاتتى اسەر ەتكەنىندە كۇمان جوق.
3. پاۋىل نەنى تۇسىنگەن جانە بۇل ماقالادا قانداي سۇراقتارعا توقتالامىز؟
3 پاۋىل ٶمىر ٷشىن جارىستا تالماي جۇگىرۋگە نىق بەكىنگەن ەدى (قور. 2-ح. 4:16). ٴبىراق مارە سىزىعىنا جەتۋ ٷشىن ول ماقساتىنان اۋىتقىماۋ كەرەكتىگىن ٴتۇسىندى. پاۋىلدىڭ ۇلگىسىنەن نە تۇيەمىز؟ بۇگىنگى تاڭدا تاباندىلىق تانىتقان قانداي باۋىرلاستارىمىز بار؟ بولاشاققا دەگەن ٷمىتىمىز ەش تالماۋعا قالاي كومەكتەسەدى؟
پاۋىلدىڭ ۇلگىسىنىڭ بىزگە قانداي پايداسى بار؟
4. ٶز جاعدايىنا قاراماستان پاۋىل قالاي قىزمەتتە بەلسەندى بولدى؟
4 فىلىپىلىكتەرگە ارنالعان حاتتى جازعاندا پاۋىلدىڭ قانداي جاعدايدا بولعانى جايلى ويلاپ كورەيىكشى. سول كەزدە ول ريمدە ٷي قاماۋىندا وتىرعان ەدى. ەركىندىگىن شەكتەپ قويسا دا، ول كەلىپ-كەتۋشىلەرگە ۋاعىزداۋدىڭ مۇمكىندىگىن جىبەرمەگەن جانە الىس جەرلەردەگى قاۋىمدارعا حاتتار جازعان. بۇگىندە دە قارتتىقتىڭ نەمەسە اۋرۋدىڭ كەسىرىنەن ۇيلەرىنە ٴجىپسىز بايلانعان ماسىحشىلەر دە كەلىپ-كەتۋشىلەرگە ۋاعىزداۋدىڭ مۇمكىندىگىن قالت جىبەرمەيدى. سونداي-اق ولار ۇيلەرىنەن تابىلماعان ادامدارعا دا جىگەرلەندىرەتىن حاتتار جازادى.
5. فىلىپىلىكتەرگە 3:12—14 تارماقتارعا ساي، پاۋىلعا ماقساتىن نازاردا ۇستاۋعا نە كومەكتەستى؟
5 پاۋىل بۇرىنعى جەتىستىكتەرى مەن قاتەلىكتەرىنىڭ ەحوباعا قىزمەت ەتۋدەن الاڭداتۋىنا جول بەرمەگەن. ول «الداعى نارسەلەرگە ۇمتىلۋ» ٷشىن، ياعني مارەگە جەتۋ ٷشىن «وتكەندى ۇمىت قالدىرۋدىڭ» اسا ماڭىزدى ەكەنىن ايتقان (فىلىپىلىكتەرگە 3:12—14 وقىڭىز). وتكەن نارسەلەرگە الاڭداماۋ ٷشىن پاۋىل نە ىستەدى؟ بىرىنشىدەن، ول ياھۋدي دىنىندە ايتارلىقتاي جەتىستىكتەرگە جەتسە دە، ولاردى «تۇككە تۇرعىسىز قوقىس» سانادى (ٴفىلىپ. 3:3—8). ەكىنشىدەن، بۇرىن ماسىحشىلەردى قۋدالاعانىنا كىنالى سەزىنىپ، كەرتارتپا ويلارعا بەرىلگەن جوق. ۇشىنشىدەن، پاۋىل ەحوباعا جەتەرلىكتەي قىزمەت ەتتىم دەپ ويلامادى. كەرىسىنشە، تۇرمەگە جابىلسا دا، تاياق جەسە دە، تاسپەن اتقىلانسا دا، كەمە اپاتىنا ۇشىراپ، اس پەن كيىمگە جارىماسا دا جەمىستى قىزمەت اتقاردى (قور. 2-ح. 11:23—27). ٴيا، قانداي جەتىستىكتەرگە جەتپەسىن، قانداي قيىنشىلىقتارعا كەزىكپەسىن، پاۋىل ەحوباعا قىزمەت ەتۋىن دوعارماۋ كەرەكتىگىن ٴتۇسىندى. ٴبىز دە پاۋىلعا وسى جاعىنان ەلىكتەسەك بولادى.
6. قانداي «وتكەن» نارسەلەردى ۇمىتۋىمىز كەرەك؟
6 پاۋىل سياقتى «وتكەندى ۇمىت قالدىرۋ» ٷشىن ٴبىز نە ىستەۋىمىز قاجەت؟ بالكىم، كەيبىرىمىزدى كەزىندە جاساعان كۇنالارىمىز جەگىدەي جەيتىن شىعار. بويىڭىزدا وسىنداي سەزىمدەر بولسا، نەگە ٴماسىحتىڭ تولەم قۇرباندىعى جايلى جەكە زەرتتەۋ جۇرگىزبەسكە؟ جىگەرلەندىرەرلىك تاقىرىپتا جەكە زەرتتەۋ جۇرگىزسەك، وي جۇگىرتىپ، دۇعا ەتەتىن بولساق، ٶزىمىزدى الدەقايدا جاقسى سەزىنەمىز. ەحوبانىڭ ٴبىزدى كەشىرگەنىن سەزىنىپ، ٶزىمىزدى كىنالاۋدى قويامىز. پاۋىلدىڭ ۇلگىسىنەن تاعى نە ۇيرەنە الامىز؟ كەيبىرىمىز ەحوباعا كوبىرەك قىزمەت ەتۋ ٷشىن اقشاسى وتە جاقسى جۇمىستان باس تارتقان شىعارمىز. ولاي بولسا، «سول كەزدە كوپ اقشاعا قول جەتكىزەر ەدىم-اۋ» دەگەن ويدى دا ۇمىت قالدىردىق پا؟ (مۇس. 4-ج. 11:4—6؛ ۋاع. 7:10). سونداي-اق «وتكەن» نارسەلەرگە ەحوباعا اتقارعان قىزمەتىمىز نەمەسە باسىمىزدان وتكەن قيىندىقتارىمىز كىرەدى. ارينە، بۇرىن ەحوبانىڭ بىزگە قالاي باتاسىن توككەنى جايلى، قولداپ كەلگەنى جايلى ويلاعانىمىز وعان جاقىنداتا تۇسەدى. ٴبىراق بولدىم-تولدىم، ەحوباعا جەتەرلىكتەي قىزمەت ەتتىم دەگەن ويدا بولعىمىز كەلمەسى انىق (قور. 1-ح. 15:58).
7. قورىنتتىقتارعا 1-حات 9:24—27 تارماقتارعا ساي، ٶمىر ٷشىن جارىستا جەڭۋ ٷشىن نە ىستەۋ كەرەك؟ مىسال كەلتىرىڭىز.
7 پاۋىل يسانىڭ «تار ەسىكتەن كىرۋگە بارىنشا تىرىسىڭدار» دەگەن سوزدەرىنىڭ ٴمانىن جاقسى تۇسىنگەن (لۇقا 13:23، 24). ول يسا سياقتى ٶمىرىنىڭ سوڭىنا دەيىن ايانباي قىزمەت ەتۋ كەرەكتىگىن بىلگەن. سوندىقتان دا ول ماسىحشىلەردىڭ ٶمىر جولىن جارىسقا تەڭەدى (قورىنتتىقتارعا 1-حات 9:24—27 وقىڭىز). جارىسقا تۇسكەن جۇيرىك جان-جاعىنا الاڭداماي، بار نازارىن مارەگە تىگەدى. مىسالى، بۇگىندە جارىس كەزىندە جۇيرىكتەر قالا كوشەلەرىمەن جۇگىرىپ جاتادى. ولاردى ٴتۇرلى دۇكەندەر نەمەسە باسقا دا نارسەلەر الاڭداتۋى مۇمكىن. جۇگىرىپ كەلە جاتقان جۇيرىك توقتاي قالىپ، دۇكەندەردە تۇرعان تاۋارلارعا قاراي ما؟ جەڭىسكە جەتكىسى كەلسە، ول جان-جاعىنا الاڭدامايدى. سول سياقتى ٶمىر ٷشىن جارىسقا قاتىسىپ، جۇگىرىپ كەلە جاتقان ٴبىز دە ەش نارسەگە الاڭداماۋىمىز كەرەك. بار نازارىمىز ماقساتىمىزدا بولىپ، پاۋىل سياقتى ەحوباعا ايانباي قىزمەت ەتسەك، جۇلدەگە يە بولامىز!
سەنىمىمىزدى سىنايتىن جاعدايلار
8. قازىر قانداي ٷش جايتتى قاراستىرامىز؟
8 قازىر قارقىنىمىزدى باسەڭدەتەتىن ٷش جايتتى قاراستىرايىق. ولار — بىردەن ورىندالماعان ۋادەلەر، بويدان كەتكەن كۇش-قۋات جانە ۇزاققا سوزىلعان قيىندىقتار. وزگەلەردىڭ وسى قيىندىقتاردى قالاي ەڭسەرگەنىن بىلگەنىمىزدىڭ ٴبىز ٷشىن زور پايداسى بار (ٴفىلىپ. 3:17).
9. كۇتكەنىمىز بىردەن ورىندالماسا، بۇل بىزگە قالاي اسەر ەتۋى مۇمكىن؟
9 ۋادەلەر بىردەن ورىندالماعاندا. بۇگىندە ٴبىز ەحوبانىڭ بەرگەن ۋادەلەرىنىڭ ورىندالۋىن كۇتىپ ٴجۇرمىز. اباقۇق پايعامباردىڭ جاعدايى بىزدىكىنە ۇقساس بولعان. ول ياھۋدا ەلىندەگى زۇلىمدىقتىڭ جويىلۋىن قاتتى قالايتىنىن ەحوباعا ايتقاندا، ەحوبا اباقۇققا سول ۋاقىتتى «كۇت» دەپ بۇيىردى (ابق. 2:3). الايدا كۇتكەنىمىز ۇزاق ورىندالماي جاتقانداي كورىنسە، قارقىنىمىز باسەڭدەپ، ٴتىپتى سالىمىز سۋعا كەتۋى مۇمكىن (ناق. س. 13:12). بۇعان — جيىرماسىنشى عاسىردىڭ باسىندا باۋىرلاستارمەن بولعان جاعداي دالەل. سول ۋاقىتتا كوپتەگەن مايلانعان ماسىحشىلەر 1914-جىلى كوكتەگى سيلارىن الۋعا ۇمىتتەنگەن. الايدا كۇتكەندەرى بىردەن جۇزەگە اسپاعاندا، ادال قىزمەتشىلەر بۇنى قالاي ەڭسەردى؟
10. كۇتكەندەرى بىردەن ورىندالماعاندا ٴبىر ەرلى-زايىپتى نە ىستەدى؟
10 سونداي قيىندىقتى باستان وتكەرگەن ەكى ادال ماسىحشىنىڭ ۇلگىسىنە توقتالايىق. رويال
سپاس باۋىرلاس 1908-جىلى 20 جاسىندا شومىلدىرۋ راسىمىنەن وتكەن. سول كەزدە ول كوكتەگى سيىن الاتىن ۋاقىتتىڭ وتە جاقىن ەكەنىنە تولىقتاي سەنىمدى بولدى. سوندىقتان 1911-جىلى بولاشاق جارى پيورلگە نەكەلەسۋدى ۇسىنىپ جاتىپ بىلاي دەيدى: «1914-جىلى قانداي وقيعا بولاتىنىن بىلەسىڭ عوي. ۇيلەنەتىن بولساق، جاقىن ارادا ۇيلەنگەنىمىز دۇرىس!» الايدا 1914-جىلى ولار كوكتەگى سيىن الماعاندا، ٶمىر ٷشىن جۇگىرۋدى قويدى ما؟ جوق. سەبەبى ولار ٴبىرىنشى كەزەكتە كوكتەگى سيدى الۋدى ەمەس، ەحوباعا ادال قىزمەت ەتۋدى ويلادى. ولار جارىستى تاباندىلىقپەن جۇگىرىپ وتۋگە بەلدەرىن بەكەم بۋدى. رويال مەن پيورل ونداعان جىلدار بويى قىزمەتتەرىن قۇلشىنىسپەن اتقارىپ، جەردەگى ومىرلەرىن اياقتاعانشا ادالدىقتارىنان تايمادى. ٴسىز ەحوبا ٶزىنىڭ ەسىمى مەن بۇكىلالەمدىك بيلىگىن اقتايتىن جانە بارلىق ۋادەلەرىن ورىندايتىن كەزدى اڭساپ كۇتىپ جۇرگەن شىعارسىز. بۇنىڭ بارلىعى ەحوبا بەلگىلەگەن ۋاقىتتا مىندەتتى تۇردە جۇزەگە اساتىنىنا سەنىمدى بولىڭىز. ال وعان دەيىن ەحوباعا بارىنشا قىزمەت ەتىپ، ۋادەلەردىڭ ورىندالماي جاتقانى قىزمەتىمىزدى كەرى تارتۋىنا جول بەرمەيىك.11، 12. دەنساۋلىعىمىزدىڭ ناشارلاعانى رۋحاني العا باسا المايمىز دەگەندى بىلدىرە مە؟ مىسال كەلتىرىڭىز.
11 بويدان كۇش كەتكەندە. ٴبىزدىڭ كادىمگى جۇيرىكتەن ايىرماشىلىعىمىز — رۋحاني مىقتى بولۋىمىز تاندىك دەنساۋلىعىمىزعا تاۋەلدى ەمەس. بۇعان — دەنساۋلىعى سىر بەرسە دە، رۋحاني مىقتى بولىپ، العا ۇمتىلىپ جۇرگەن باۋىرلاستارىمىز دالەل (قور. 2-ح. 4:16). مىسالعا، بەتەلدە قىزمەت ەتكەنىنە 55 جىل بولعان ارتۋر سيكورد * باۋىرلاستىڭ وقيعاسىن الايىق. ول 88 جاسقا كەلگەندە، بويىنان كۇش-قايراتى كەتىپ، توسەك تارتىپ قالادى. بىردە وعان كۇتىم جاسايتىن باۋىرلاس توسەگىنىڭ جانىنا كەلىپ، جىلى ۇنمەن: «ارتۋر باۋىرلاس، ٴسىز ەحوبا ٷشىن كوپ نارسە ىستەدىڭىز»،— دەپ ماقتادى. ٴبىراق ارتۋر باۋىرلاس بۇرىن اتقارعان قىزمەتىمەن شەكتەلمەيتىن ادام ەدى. ول الگى باۋىرلاسقا كۇلىمدەپ قارادى دا، بىلاي دەپ جاۋاپ بەردى: «ٴيا، مۇنىڭ راس. ٴبىراق ٴبىزدىڭ بۇرىن اتقارعان قىزمەتىمىز ەمەس، قازىر نە ىستەپ جاتقانىمىز ماڭىزدىراق».
12 مۇمكىن، ٴسىز ەحوباعا جىلدار بويى قىزمەت ەتىپ، ال قازىر دەنساۋلىعىڭىز سىر بەرگەندىكتەن بۇرىنعىداي كوپ قىزمەت ەتە المايتىن شىعارسىز. ٴسىز سونداي جاعدايدا بولساڭىز، سالىڭىز سۋعا كەتپەسىن. جىلدار بويى اتقارعان ادال قىزمەتىڭىزدى ەحوبا ارداقتاپ اسا باعالايدى (ەۆر. 6:10). ال قازىرگى جاعدايىڭىزعا كەلەر بولساق، ەحوبانى قانشالىقتى سۇيەتىنىڭىز وعان قانشا قىزمەت ەتەتىنىڭىزبەن ولشەنبەيدى. قۋانىشىڭىز بەن ٷمىتىڭىزدى وشىرمەي، قولىڭىزدان كەلگەندى ىستەيتىن بولساڭىز، مىنە، سۇيىسپەنشىلىك وسىمەن دالەلدەنەدى (قول. 3:23). ەحوبا شاما-شارقىمىزدىڭ شەگىن بىلەدى، سوندىقتان قولىمىزدان كەلمەيتىندى تالاپ ەتپەيدى (مار. 12:43، 44).
13. اناتوليي مەن ليديا باۋىرلاس قانداي جاعدايلارعا تاپ بولدى؟ قيىندىقتارعا قاراماستان، ەحوباعا ادالدىقپەن قىزمەت ەتۋگە ولاردىڭ ۇلگىسى قالاي كومەكتەسەدى؟
13 ۇزاققا سوزىلعان قيىندىقتار. ەحوبانىڭ كەيبىر قىزمەتشىلەرى ونداعان جىلعا سوزىلعان قۋعىن-سۇرگىن مەن اساۋ قيىندىقتارعا كەزىككەن. مىسالى، اناتوليي مەلنيك * باۋىرلاس 12 جاستا بولعاندا، ونىڭ اكەسى تۇتقىندالىپ، تۇرمەگە جابىلدى، مولدوۆاداعى وتباسىنان اجىراتىلىپ، 7000 شاقىرىم جەردە جاتقان سىبىرگە جەر اۋدارىلدى. ال ٴبىر جىلدان سوڭ اناتولييدىڭ ٶزى دە، اناسى مەن اتا-اجەسى دە سىبىرگە ايدالدى. كەيىنىرەك ولار باسقا اۋىلدا وتەتىن قاۋىم كەزدەسۋىنە بارا باستايدى. ٴبىراق بۇل ٷشىن قاقاعان ايازدا قار باسقان جولمەن 30 شاقىرىم جەردى ٴجۇرىپ وتەدى. ٴبىرشاما ۋاقىت وتكەن سوڭ اناتوليي باۋىرلاس 3 جىلعا تۇرمەگە جابىلادى. ايەلى ليديا ٴبىر جاسار قىزىمەن جالعىز قالادى. قانشاما جىلدارعا سوزىلعان وسىنداي سىناقتارعا قاراماستان، اناتوليي باۋىرلاس وتباسىمەن بىرگە قايتپاس قايسارلىق تانىتىپ، ەحوباعا ادال قىزمەت ەتە بەردى. قازىر 82 جاستاعى اناتوليي باۋىرلاس ورتالىق ازياداعى ٴبىر فيليالدا كوميتەت مۇشەسى بولىپ قىزمەت ەتەدى. اياۋلى اناتوليي مەن ليديا باۋىرلاس سياقتى ٴبىز دە ەحوباعا قىزمەت ەتۋگە بارىمىزدى سالىپ، قيىندىقتارعا بۇرىنعىداي توتەپ بەرۋدى دوعارمايىق (عال. 6:9).
ۇمىتىمىزدەن كوز جازبايىق
14. پاۋىل ماقساتىنا قاتىستى نەنى جاقسى تۇسىنەتىن؟
14 پاۋىل ٶمىر ٷشىن جارىستى اياقتاپ، ماقساتىنا جەتەتىنىنە سەنىمدى بولدى. مايلانعان ٴماسىحشى بولعاندىقتان ول قۇدايدىڭ سيىن، ياعني «كوكتەگى ومىرگە جەتۋدى» اسىعا كۇتتى. الايدا سول ماقساتقا جەتۋ ٷشىن ول جۇگىرۋدى توقتاتپاۋ كەرەكتىگىن جاقسى تۇسىنەتىن (ٴفىلىپ. 3:14). فىلىپىلىكتەرگە سول ماقساتقا جەتۋگە كومەكتەسۋ ٷشىن ولارعا ٴبىر قىزىق سالىستىرۋ ايتىپ بەردى.
15. فىلىپىدەگى ماسىحشىلەردى ماقساتتارىنا جەتۋگە تالپىندىرۋ ٷشىن پاۋىل نەنى مىسالعا الدى؟
15 پاۋىل فىلىپىلىكتەرگە ولاردىڭ كوكتىڭ ازاماتتارى ەكەندەرىن ەستەرىنە سالدى (ٴفىلىپ. 3:20، ٴسىلت.). نەگە پاۋىل بۇل تاقىرىپتى قوزعادى؟ سول زاماندا ادامدار ريم ازاماتى بولعىسى كەلەتىن، ويتكەنى مۇنىڭ كوپتەگەن ارتىقشىلىقتارى بار ەدى *. فىلىپىدەگى ماسىحشىلەر ريم ازاماتتارى بولعان، سوندىقتان ولار ريمنىڭ زاڭدارىنا ساي ٶمىر سۇرۋلەرى كەرەك ەدى. الايدا مايلانعان ماسىحشىلەر الدەقايدا جاقسى ۇكىمەتتىڭ ازاماتتارى بولاتىن. ونىڭ ارتىقشىلىقتارى بارىنەن اسىپ تۇسەتىن. بۇل ەش نارسەمەن سالىستىرۋعا كەلمەيتىن ازاماتتىق ەدى! سوندىقتان پاۋىل فىلىپىدەگى ماسىحشىلەردى «ٴماسىح تۋرالى ىزگى حابارعا لايىق ٶمىر سۇرۋگە» شاقىردى (ٴفىلىپ. 1:27). بۇگىندە مايلانعان ماسىحشىلەر كوكتەگى ماڭگىلىك ومىرگە جەتۋ ٷشىن توقتاماي جۇگىرىپ، جاقسى ۇلگى كورسەتىپ جاتىر.
16. ٷمىتىمىز كوكتە نە جەردە ٶمىر ٴسۇرۋ بولسا دا، فىلىپىلىكتەرگە 4:6، 7 گە ساي، نە ىستەۋدى دوعارماۋىمىز كەرەك؟
16 ٷمىتىمىز كوكتەگى يا جەردەگى بولسىن، ٴبىز ماقساتىمىزعا جەتۋگە بارىنشا ۇمتىلۋىمىز كەرەك. قانداي قيىندىقتارعا تاپ بولمايىق، ٴبىز وتكەندى ويلاي بەرمەۋىمىز كەرەك. سونداي-اق ەش نارسەنىڭ ەحوباعا قىزمەت ەتۋگە كەدەرگى جاساۋىنا جول بەرمەيىك (ٴفىلىپ. 3:16). بىرەۋىمىز ەحوبانىڭ ۋادەلەرىنىڭ ورىندالۋىن كوپتەن بەرى كۇتىپ جۇرگەن بولارمىز، باسقا بىرەۋىمىز قارتايىپ، كۇشىمىزدەن ايىرىلعان شىعارمىز. تاعى بىرەۋىمىز قانشا جىلدان بەرى قيىندىقتان كوز اشپاي، قۋدالاۋعا شىداپ جۇرگەن شىعارمىز. ٴسىزدىڭ جاعدايىڭىز قايسىسى بولماسىن، «ەش نارسەنى ۋايىمداماڭىز». بارلىق وتىنىشتەرىڭىزدى جالبارىنىپ قۇدايعا ايتىڭىز. سوندا ول سىزگە ادام اقىلىنان اسقان تىنىشتىعىن سيلايدى (فىلىپىلىكتەرگە 4:6، 7 وقىڭىز).
17. كەلەسى ماقالادا نەنى قاراستىرامىز؟
17 مارە سىزىعىنا جەتۋ ٷشىن سپورتشى سوڭعى كۇشى قالعانشا جۇگىرەتىنى سياقتى، ٴبىز دە ٶمىر ٷشىن جارىستى اياقتاۋ ٷشىن ماقساتىمىزدى كوز الدىمىزدا ۇستاۋىمىز كەرەك. جۇگىرۋشى مارەگە جاقىنداعان سايىن ونىڭ بار ويى — جارىستى اياقتاۋ. جارىسىمىز سوڭىنا تاياعان سايىن بار نازارىمىزدى الداعى كەرەمەت ۋادەلەرگە تىككىمىز كەلەرى ٴسوزسىز. دۇرىس باعىتتان اۋىتقىماي جۇگىرۋ ٷشىن نە ىستەۋىمىز قاجەت؟ كەلەسى ماقالادا ومىرىمىزدە نە نارسەگە باسىمدىق بەرۋىمىز كەرەكتىگىن ٴتۇسىنىپ، نەنىڭ ماڭىزدىراق ەكەنىنە كوز جەتكىزەمىز (ٴفىلىپ. 1:9، 10).
79-ٵن ولارعا بەرىك تۇرۋدى ۇيرەتىڭدەر
^ 5-ابزاس ەحوباعا قانشا جىل قىزمەت ەتپەيىك، ٴبىز ٵردايىم رۋحاني تولىسىپ، ٴماسىحشى رەتىندە جاقسارا بەرۋىمىز كەرەك. ەلشى پاۋىل ٴبىر سەنىمدەگى باۋىرلاستارىن وسىلاي ەتۋگە ۇندەپ، ەش تالماۋعا شاقىرعان. ونىڭ فىلىپىلىكتەرگە جازعان جىگەرلى سوزدەرى بىزگە ٶمىر ٷشىن جارىستى تاباندىلىقپەن جۇگىرىپ وتۋگە كومەكتەسەدى. وسى ماقالادا پاۋىلدىڭ سوزدەرىن قالاي ٸس جۇزىندە قولدانا الاتىنىمىزدى قاراستىرامىز.
^ 11-ابزاس ارتۋر سيكوردتىڭ «شىنايى عيباداتقا قوسقان ۇلەسىم» (اع.) دەگەن ٶمىربايانىن 1965-جىلى 15-ماۋسىمداعى «كۇزەت مۇناراسىنان» وقي الاسىز.
^ 13-ابزاس اناتوليي باۋىرلاستىڭ ٶمىربايانى «ويانىڭدار!» جۋرنالىنىڭ 2004-جىلى 22-قازاندا «قۇدايدى ٴسۇيۋدى بالا كەزىمنەن ۇيرەتتى» (حانزۇشا) دەگەن ماقالادا جارىق كورگەن.
^ 15-ابزاس ٴفىلىپى قالاسى ريمنىڭ وتارىندا بولعاندىقتان، ونىڭ تۇرعىندارى ريم ازاماتىنا تيەسىلى كەيبىر قۇقىقتارعا يە بولعان. دەمەك، فىلىپىدەگى باۋىرلاستار سوزدىڭ توركىنىن تۇسىنگەن.