29-زەرتتەۋ ماقالاسى
بارىڭدار دا، شاكىرتتەر دايىنداڭدار
«بارىڭدار دا، بارلىق حالىقتاردان شاكىرتتەر دايىنداڭدار» (مات. 28:19).
60-ٵن امان قالسىن ٴبارى
اڭداتپا *
1، 2. ا) ماتاي 28:18—20 تارماقتارداعى يسانىڭ بۇيرىعىنا ساي، ماسىحشىلەر قاۋىمىنىڭ ەڭ نەگىزگى ماقساتى قانداي؟ ٵ) وسى ماقالادا قانداي سۇراقتاردى قاراستىرامىز؟
يسا قايتا تىرىلگەننەن كەيىن شاكىرتتەرىمەن عاليلەياداعى تاۋدا كەزدەسپەك بولدى. ەلشىلەرى «ول نە ايتپاق ەكەن» دەپ تاۋعا جەتكەنشە اسىققان شىعار (مات. 28:16). يسانىڭ «ٴبىر مەزگىلدە 500 دەن اسا باۋىرلاسقا كورىنگەنى» وسى كەز بولسا كەرەك (قور. 1-ح. 15:6). ول نە ايتقىسى كەلدى؟ يسا شاكىرتتەرىنە ەرەكشە ٸس تاپسىرىپ: «بارىڭدار دا، بارلىق حالىقتاردان شاكىرتتەر دايىنداڭدار»،— دەدى (ماتاي 28:18—20 وقىڭىز).
2 وسى سوزدەردى ەستىگەن شاكىرتتەر كەيىننەن ٴبىرىنشى عاسىرداعى ماسىحشىلەر قاۋىمىنىڭ مۇشەسى بولدى. سول قاۋىمنىڭ ەڭ باستى ماقساتى ٴماسىحتىڭ شاكىرتى بولاتىن ادامداردى تابۋ ەدى *. بۇگىنگى كۇنى جەر شارى بويىنشا كۋاگەرلەردىڭ ونداعان مىڭ قاۋىمى دا سول ماقساتتى كوزدەيدى. وسى ماقالادا مىنا سۇراقتاردى قاراستىرامىز: شاكىرت دايىنداۋ نەگە ماڭىزدى؟ وعان نە كىرەدى؟ شاكىرت دايىنداۋعا ماسىحشىلەردىڭ ٴبارى قاتىسا ما؟ بۇل ٸس نەلىكتەن شىدامدىلىقتى تالاپ ەتەدى؟
شاكىرت دايىنداۋ نەگە ماڭىزدى؟
3. جوحان 14:6 مەن 17:3 ٴتى ەسكەرسەك، شاكىرت دايىنداۋ نەگە ماڭىزدى؟
3 شاكىرت دايىنداۋ نەسىمەن ماڭىزدى؟ ادام ٴماسىحتىڭ شاكىرتى بولسا عانا قۇدايمەن دوس بولا الادى. سونداي-اق ٴماسىحتىڭ ىزىمەن جۇرسە، ول باقىتقا قول جەتكىزەدى ٵرى بولاشاقتا ماڭگى ٶمىر ٴسۇرۋ ۇمىتىنە يە بولادى (جوحان 14:6؛ 17:3 وقىڭىز). شىنىندا دا، يسانىڭ تاپسىرعانى — وتە جاۋاپتى ٸس. الايدا بۇل ٸستى ٴبىز جالعىز اتقارمايمىز. ەلشى پاۋىل ٶزى مەن جانىندا جۇرگەن سەرىكتەستەرى جايىندا: «ٴبىز قۇدايمەن قىزمەتتەسپىز»،— دەگەن (قور. 1-ح. 3:9). كۇناكار پەندە بولساق تا، ەحوبا مەن ٴماسىح بىزگە مارتەبەلى ٸس تاپسىرىپ، ۇلكەن سەنىم ارتىپ وتىر!
4. يۆان مەن ماتيلدانىڭ وقيعاسىنان نە ۇيرەنەمىز؟
4 شاكىرت دايىنداۋ ٸسىنىڭ سيلار باقىتى مول. كولۋمبياداعى يۆان مەن ماتيلدا دەگەن كۋاگەر ەرلى-زايىپتىنىڭ مىسالىنا كوڭىل بولەيىكشى. ولار داۆيەر ەسىمدى ٴبىر جىگىتكە ۋاعىزدايدى. ول: «جاقسارعىم-اق كەلەدى، ٴبىراق تۇك شىقپاي جاتىر»،— دەپ اعىنان جارىلادى. داۆيەر ەسىرتكى مەن ىشىمدىككە قۇمارتقان، اقشا ٷشىن توبەلەسەتىن بوكسشى ەدى. ٵرى ەريكا دەگەن قىزبەن بىرگە تۇراتىن. يۆان باۋىرلاس بىلاي دەيدى: «داۆيەر شالعايداعى ٴبىر اۋىلدا تۇراتىن. ۇيىنە جەتۋ ٷشىن ۆەلوسيپەدكە ٴمىنىپ، باتپاق جولمەن ساعاتتاپ جۇرەتىنبىز. ونىڭ مىنەز-قۇلقىنداعى جاقسى وزگەرىستەردى بايقاپ، ەريكا دا كەيىننەن زەرتتەۋ ساباعىنا قوسىلدى». ۋاقىت وتە داۆيەر بوكستى، ەسىرتكى مەن ىشىمدىكتى قويدى. ەريكامەن دە زاڭدى نەكەگە تۇردى. «2016-جىلى ەكەۋى شومىلدىرۋ راسىمىنەن وتكەندە، كەزىندە داۆيەردىڭ «جاقسارعىم-اق كەلەدى، ٴبىراق تۇك شىقپاي جاتىر» دەگەنىن ەسكە الدىق. قۋانىشتان كوزىمىزدەن اعىل-تەگىل جاس اقتى»،— دەيدى ماتيلدا باۋىرلاس. ٴيا، ٴبىز ٷشىن ادامدارعا ٴماسىحتىڭ شاكىرتى بولۋعا كومەكتەسۋدەن ارتىق قۋانىش جوق!
شاكىرت دايىنداۋعا نە كىرەدى؟
5. شاكىرت دايىنداۋ جولىنداعى ٴبىرىنشى قادام قانداي؟
5 شاكىرت دايىنداۋ جولىنداعى ەڭ ٴبىرىنشى قادام — اقجۇرەك ادامدى ىزدەپ تابۋ (مات. 10:11). ادامداردىڭ بارىنە بىردەي كۋالىك ەتكەنىمىز ناعىز ەحوبا كۋاگەرى ەكەنىمىزدى كورسەتەدى. سونداي-اق ناعىز ٴماسىحشى ەكەنىمىزدى دە پاش ەتەدى، سەبەبى ٴبىز ٴماسىحتىڭ بۇيرىعىنا ساي ۋاعىزدايمىز.
6. ۋاعىز ىسىندە جەمىستى بولۋعا نە كومەكتەسەدى؟
6 ادامداردىڭ كەيبىرى جازبالارداعى شىندىقتى بىلۋگە اسىق بولسا، باسقالارى بىردەن دەن قويا بەرمەيدى. بىزگە سولاردىڭ ىقىلاسىن وياتۋعا كۇش سالۋ كەرەك بولار. بۇل ىستە جەمىستى بولۋ ٷشىن جاقسى جوسپار كەرەك. الدىمەن، ادامدارعا قىزىق بولاتىن تاقىرىپتاردى تاڭداڭىز. سوسىن، سول تاقىرىپتا قالاي اڭگىمە باستايتىنىڭىزدى ويلاستىرىڭىز.
7. اداممەن قالاي اڭگىمە باستاۋعا بولادى جانە ونى مۇقيات تىڭداپ، قۇرمەت كورسەتۋ نەگە ماڭىزدى؟
7 ەسىكتى اشقان اداممەن اڭگىمەنى بىلاي باستاساڭىز بولادى: «پىكىرىڭىزدى بىلگىم كەلگەن ەدى. بۇگىندە وتباسىلاردىڭ اراسىندا اجىراسۋ كوبەيىپ بارادى. وتباسىن نىعايتۋ ٷشىن نە قاجەت دەپ ويلايسىز؟» سوسىن ماتاي 7:12 ٴنى نەمەسە قولوستىقتارعا 3:18، 19 دى قاراستىرىڭىز. يا بولماسا: «بالانى قالاي جاقسى ادام ەتىپ تاربيەلەۋگە بولادى؟»— دەگەن سوڭ، مۇسانىڭ 5-جازباسى 6:6، 7 گە نازار اۋدارىڭىز. قاي تاقىرىپتى تاڭداساڭىز دا، ايماعىڭىزداعى ادامداردى ويلاڭىز. كيەلى كىتاپتاعى شىندىقتى بىلگەندە، مۇنىڭ قانداي يگىلىگىن كورەتىنىن ەلەستەتىپ كورىڭىز. ولارمەن اڭگىمەلەسكەندە، مۇقيات تىڭداپ، پىكىرلەرىنە قۇرمەتپەن قاراعانىڭىز ابزال. سوندا جاندارىن جاقسى تۇسىنەسىز، ٵرى ولار دا ٴسىزدى تىڭداۋعا ىقىلاستى بولادى.
8. ادامعا قايتا بارۋ نەگە تاباندىلىقتى تالاپ ەتەدى؟
8 ادام كيەلى كىتاپتى زەرتتەۋگە كەلىسپەس بۇرىن، وعان بىرنەشە رەت قايتا بارۋ كەرەك بولار. بۇل ٴبىزدىڭ تاراپىمىزدان ٴبىراز ۋاقىت پەن كۇش تالاپ ەتەدى. سەبەبى كەيدە ٴبىز بارعان كەزدە ادام ۇيىندە بولماي قالۋى مۇمكىن. سونداي-اق زەرتتەۋ ساباعىنا كەلىسۋ ٷشىن ول سىزگە ۇيرەنىسۋ كەرەك، ال ۇيرەنىسۋ ٷشىن ٴسىزدىڭ ٴبىر كەلگەنىڭىز جەتكىلىكسىز. وسى ورايدا مىنا مىسالدى ويدا ۇستاڭىز: وسىمدىك ٴجيى سۋارىلىپ تۇرعاندا عانا جاقسى وسەدى. ٴدال سولاي، اداممەن قۇداي سوزىنىڭ توڭىرەگىندە ٴجيى سويلەسىپ تۇرعاندا عانا ونىڭ ەحوبا مەن ماسىحكە دەگەن سۇيىسپەنشىلىگى وسەدى.
شاكىرت دايىنداۋعا ماسىحشىلەردىڭ ٴبارى قاتىسا ما؟
لايىق جانداردى ىزدەپ تابۋعا كۋاگەرلەر دۇنيەجۇزى بويىنشا قاتىسادى (9، 10-ابزاستى قاراڭىز) *
9، 10. نەلىكتەن اقجۇرەك ادامدى ىزدەۋگە ٵربىر ٴماسىحشى قاتىسادى دەي الامىز؟
9 اقجۇرەك ادامداردى ىزدەپ تابۋعا ٵربىر ٴماسىحشى اتسالىسادى. بۇل ٸس جوعالىپ كەتكەن بالانى ىزدەۋگە ۇقسايدى. قالاي دەيسىز بە؟ ومىردە بولعان ٴبىر وقيعانى كەلتىرەيىكشى. ٴبىر ەلدە ٷش جاسار كىشكەنتاي بالا جوعالىپ قالادى. ونى ىزدەۋگە 500 دەي ەرىكتى قاتىسادى. سودان شامامەن 20 ساعات وتكەن سوڭ، ٴبىر كىسى ونى جۇگەرى القابىنان تاۋىپ الادى. ول كىسى: «ونى ٴبىر ٶزىم ەمەس، جۇزدەگەن ادام بوپ ىزدەدىك قوي»،— دەپ جۇرتتىڭ ماقتاۋ-ماراپاتىن قابىل المادى.
10 بۇگىندە كوپ ادام جوعالىپ قالعان سول بالاعا ۇقسايدى. ولاردىڭ ۇمىتتەرى سونگەن، ٴبىراق كومەككە ٴزارۋ (ەفەس. 2:12). سول لايىق جانداردى تابۋعا ٴبىز، سەگىز ميلليوننان اسا ەرىكتى، جۇمىلا كىرىسكەنبىز. كيەلى كىتاپتى زەرتتەيتىن ادام ٴدال سىزگە جولىقپاسا دا، ونى ايماعىڭىزدا ەڭبەكتەنىپ جۇرگەن باسقا جاريالاۋشىلار كەزىكتىرۋى مۇمكىن. شىندىققا سۋساعان ادامدى كىم تاپپاسىن، ونىڭ ٴماسىحتىڭ شاكىرتى بولعانىن كورۋ بارىمىزگە شاتتىق سيلايدى، ويتكەنى ونى ىزدەۋگە ٴبارىمىز اتسالىستىق.
11. سىزدە زەرتتەۋ ساباعى بولماسا دا، شاكىرت دايىنداۋ ىسىنە قالاي اتسالىسا الاسىز؟
11 سىزدە ازىرگە زەرتتەۋ ساباعى بولماسا دا، شاكىرت دايىنداۋ ىسىنە اتسالىسا الاسىز. مىسالى، پاتشالىق سارايىنا ٴبىرىنشى رەت كەلگەن ادامداردى جىلى قارسى الىپ، ولارعا كوڭىل ٴبولۋ ارقىلى. سوندا ولار شىنايى ٴماسىحشى ەكەنىمىزدى «سۇيىسپەنشىلىگىمىزدەن بىلەتىن بولادى» (جوح. 13:34، 35). قاۋىم كەزدەسۋىندە قىسقا بولسا دا، شىن جۇرەكتەن ٵرى ىزەتپەن بەرگەن تۇسىنىكتەمەلەرىڭىز دە ولاردى كوپ نارسەگە ۇيرەتە الادى. سونىمەن قاتار جاڭا جاريالاۋشىنى قىزمەتكە شاقىرىپ، وعان جازبالاردى قولدانىپ ٴتالىم بەرۋدى ۇيرەتسەڭىز بولادى. وسىلايشا وعان ماسىحكە ەلىكتەۋگە كومەكتەسەسىز (لۇقا 10:25—28).
12. شاكىرت دايىنداۋ ٷشىن ەرەكشە دارىندى بولۋ كەرەك پە؟ ٴتۇسىندىرىڭىز.
12 ادامعا يسانىڭ شاكىرتى بولۋعا كومەكتەسۋ ٷشىن ەرەكشە دارىن يەسى بولۋدىڭ قاجەتى جوق. بۇعان بوليۆيادا تۇراتىن فاۋستينا باۋىرلاستىڭ مىسالى دالەل. ول ەحوبا كۋاگەرلەرىمەن ەندى عانا ارالاسىپ جۇرگەندە ەش وقي المايتىن، ٴبىراق كەيىن بۇل جاعىنان ٴبىراز جاقساردى. قازىر فاۋستينا — شومىلدىرۋ راسىمىنەن وتكەن باۋىرلاس. ول باسقالارعا شىندىقتى ۇيرەتكەندى جانى سۇيەدى. اپتاسىنا بەس زەرتتەۋ ساباعىن جۇرگىزەدى. كەي زەرتتەۋشىلەرى سياقتى جاقسى وقي الماسا دا، فاۋستينا التى ادامعا ەحوبا كۋاگەرى بولۋعا كومەكتەستى (لۇقا 10:21).
13. مىندەتىمىز كوپ بولسا دا، شاكىرت دايىنداۋعا قاتىسۋدىڭ قانداي باتاسى بولۋى مۇمكىن؟
13 ماسىحشىلەردىڭ كوبىسىنىڭ اتقاراتىن مىندەتتەرى وتە كوپ. سوندا دا ولار زەرتتەۋ ساباقتارىن جۇرگىزۋگە ۋاقىت تاۋىپ، بۇدان قۋانىش الىپ ٴجۇر. مەلاني باۋىرلاستىڭ وقيعاسىنا نازار اۋدارايىقشى. ول سەگىز جاسار قىزىمەن الياسكانىڭ وقشاۋ ٴبىر قالاشىعىندا تۇراتىن. ول تولىق ۋاقىت جۇمىس ىستەيتىن ٵرى قاتەرلى ىسىككە شالدىققان اكەسىنە قارايتىن. مەلاني سول قالاداعى جالعىز كۋاگەر بولاتىن. ول كيەلى كىتاپتى زەرتتەگىسى كەلەتىن ادام تابۋدى قاتتى قالاعاندىقتان، كوپ دۇعا ايتىپ، قاقاعان سۋىققا قاراماي قىزمەتكە شىعاتىن. كۇندەردىڭ كۇنىندە ول سارا دەگەن ايەلدى كەزىكتىردى. سارا قۇدايدىڭ دارا ەسىمى جايىندا ٴبىلىپ قاتتى قۋاندى. كەيىننەن ول كيەلى كىتاپتى زەرتتەي باستادى. مەلاني بىلاي دەيدى: «جۇما كۇندەرى كەشكە سۇيرەتىلىپ ارەڭ كەلسەم دە، قىزىمدى الىپ، زەرتتەۋگە باراتىنمىن. بۇل زەرتتەۋ ساباعىنىڭ قىزىم ەكەۋمىزگە تيگىزگەن پايداسى كوپ. بىزگە سارانىڭ سۇراقتارىنا جاۋاپ ىزدەگەن قاتتى ۇنايتىن. ونىڭ ەحوبامەن دوس بولعانىن كورىپ، قۋانىشىمىز كەۋدەمىزگە سيمادى!» سارا جۇرتتىڭ تاراپىنان قارسىلىق كورسە دە شىركەۋدەن كەتىپ، كەيىننەن شومىلدىرۋ راسىمىنەن ٶتتى.
شاكىرت دايىنداۋ ٷشىن نەگە شىدامدىلىق قاجەت؟
14. ا) شاكىرت دايىنداۋ ٸسىنىڭ بالىق اۋلاۋمەن قانداي ۇقساستىعى بار؟ ٵ) پاۋىلدىڭ تىموتەگە 2-حات 4:1، 2 دەگى سوزدەرىنە ساي، ٴبىز نە ىستەۋىمىز كەرەك؟
14 قىزمەتىڭىز ناتيجەسىز بولىپ كورىنسە، جىگەرىڭىز جاسىماسىن. يسا شاكىرت دايىنداۋ ٸسىن بالىق اۋلاۋعا تەڭەگەن. بالىقشى بالىق ۇستاۋ ٷشىن كوپ ۋاقىتىن جۇمساۋى مۇمكىن. كەيدە ول تۇنگە دەيىن اۋلاسا، كەيدە تاڭ اتپاي شىعىپ، ٴتىپتى ۇزاق قاشىقتىقتى ٴجۇزىپ وتەدى (لۇقا 5:5). ٴدال سولاي كەيبىر جاريالاۋشىلار اقجۇرەك ادامداردى تابۋ ٷشىن ٴتۇرلى ۋاقىتتا جانە ٴتۇرلى جەردە ۋاعىزداپ، كوپ ۋاقىتتارىن جۇمسايدى. وسىلاي ولار مەيلىنشە كوپ ادامعا ىزگى حاباردى جەتكىزە الادى. ىزگى حاباردى تىڭداۋعا ىڭعاي تانىتاتىن ادامداردى ادەتتە كوپ ەڭبەكتەنەتىن جاريالاۋشىلار جولىقتىرىپ جاتادى. ٴسىز دە ادامدار كوپ جۇرەتىن ۋاقىتتا جانە جەردە ۋاعىزداۋعا كۇش سالىپ ٴجۇرسىز بە؟ (تىموتەگە 2-حات 4:1، 2 وقىڭىز).
رۋحاني وسۋلەرى ٷشىن زەرتتەۋشىلەرگە شىدامدىلىقپەن كومەكتەسىڭىز (15، 16-ابزاستى قاراڭىز) *
15. كيەلى كىتاپ زەرتتەۋ ساباعىن جۇرگىزۋ ٷشىن نەگە شىدامدىلىق قاجەت؟
15 كيەلى كىتاپ زەرتتەۋ ساباعىن جۇرگىزۋ ٷشىن شىدامدىلىق قاجەت. نەگە؟ ويتكەنى ادامعا كيەلى كىتاپتان ٴبىلىم الىپ، ىلىمدەردى جاقسى كورىپ كەتۋىنە كومەكتەسىپ قانا قويۋ جەتكىلىكسىز. ٴبىز وعان كيەلى كىتاپتىڭ اۆتورى ەحوبا جايىندا ٴبىلىم الىپ، ونى جاقسى كورۋىنە كومەكتەسۋىمىز قاجەت. ٴماسىح شاكىرتتەرىنە قانداي تالاپتار قوياتىنىن عانا ەمەس، سول تالاپتار بويىنشا قالاي ٶمىر ٴسۇرۋدى دە ۇيرەتۋىمىز قاجەت. كيەلى كىتاپتىڭ پرينسيپتەرىن بىردەن قولدانا الماي جاتسا، وعان شىدامدىلىقپەن جاردەمدەسكەنىمىز دۇرىس. كەي زەرتتەۋشىلەر بىرنەشە ايدىڭ ىشىندە-اق كوزقاراستارى مەن ٶمىر سالتتارىن تۇزەپ جاتادى. باسقالارىنا ٴبىراز ۋاقىت كەرەك بولادى.
16. راۋلمەن بولعان جاعدايدان نە ٴتۇيدىڭىز؟
16 ٴپەرۋدەگى ٴبىر باۋىرلاس شىدامدىلىقتىڭ تاۋداي جەمىسىن كوردى. «مەن راۋل ەسىمدى كىسىمەن ەكى كىتاپتى زەرتتەدىم،— دەيدى ول. — بىراق وعان تۇزەلۋ قيىنعا سوقتى. ول بالاعات سوزدەر ايتاتىن، نەكەسىنىڭ شىرقى بۇزىلعان ەدى، بالالارى ونى ادام قۇرلى كورمەيتىن. ٴبىراق ول جينالىستارعا ۇزبەي كەلگەندىكتەن، مەن دە وعان ۇزبەي بارىپ، وزىنە دە، وتباسىنا دا كومەكتەسە بەردىم. ٷش جىلداي ۋاقىت وتكەن سوڭ راۋل شومىلدىرۋ راسىمىنەن ٶتتى».
17. كەلەسى ماقالا نە جايىندا؟
17 يسا بىزگە: «بارىڭدار دا، بارلىق حالىقتاردان شاكىرتتەر دايىنداڭدار»،— دەدى. وسى تاپسىرمانى ورىنداۋ ٷشىن ٴبىز ٴتۇرلى ادامدارمەن سويلەسەمىز. ولاردىڭ كوزقاراسى بىزدىكىنەن مۇلدەم باسقاشا بولۋى مۇمكىن، مىسالى، كەيبىرى ەشقانداي ٴدىندى ۇستانبايدى نەمەسە قۇدايدىڭ بار ەكەنىنە سەنبەيدى. وسىنداي ادامدارعا ىزگى حاباردى قالاي جەتكىزۋگە بولاتىنىن كەلەسى ماقالادان بىلەمىز.
68-ٵن پاتشالىق تۇقىمىن سەبەيىك!
^ 5-ابزاس ماسىحشىلەر قاۋىمىنىڭ ەڭ باستى ماقساتى — ادامدارعا ٴماسىحتىڭ شاكىرتى بولۋعا كومەكتەسۋ. بۇل ماقالادا وسى ماقساتىمىزعا جەتۋگە كومەك بولاتىن ٴتيىمدى كەڭەستەر بار.
^ 2-ابزاس ٴسوز ٴمانى: ٴماسىحتىڭ شاكىرتتەرى ونىڭ تالىمدەرىن وقىپ-ٴبىلىپ قانا قويماي، بىلگەندەرىن ومىردە قولدانادى. ولار يسانىڭ ىزىمەن، ياعني ۇلگىسىمەن، تۋرا جۇرۋگە كۇش سالادى (پەت. 1-ح. 2:21).
^ 52-ابزاس سۋرەت سيپاتتاماسى: دەمالىسقا كەتىپ بارا جاتقان ەر كىسى اۋەجايداعى كۋاگەرلەردەن ادەبيەت الدى. كەيىن كورنەكى جەرلەردى ارالاۋعا شىققاندا، كۋاگەرلەردىڭ ادەبيەت ارباسىمەن ۋاعىزداپ تۇرعانىن كوردى. ال ۇيىنە ورالعان سوڭ، وعان جاريالاۋشىلار كەلدى.
^ 54-ابزاس سۋرەت سيپاتتاماسى: الدىڭعى سۋرەتتەگى كىسى كيەلى كىتاپتى زەرتتەپ وتىر. كەيىن ول شومىلدىرۋ راسىمىنەن ٶتتى.
