28-زەرتتەۋ ماقالاسى
ىسىمىزگە تيىم سالىنسا دا، ەحوباعا عيبادات ەتە بەرەيىك!
«ٴبىز كورىپ-ەستىگەنىمىز جايلى ٷنسىز قالا المايمىز» (ەل. ٸس. 4:19، 20).
122-ٵن بەرىك تە مىعىم بول!
اڭداتپا *
1، 2. ا) ىسىمىزگە تيىم سالىنىپ جاتسا، ٴبىز بۇعان نەلىكتەن تاڭعالمايمىز؟ ٵ) وسى ماقالادا نەنى قاراستىرامىز؟
2018 قىزمەت جىلىنىڭ ەسەبىنە ساي، 223000 نان كوپ جاريالاۋشى ىسىمىزگە تيىم سالىنعان نەمەسە قاتاڭ شەكتەۋلەر قويىلعان ەلدەردە قىزمەت ەتتى. ٴبىز بۇعان تاڭعالمايمىز، سەبەبى الدىڭعى ماقالادان شىنايى ماسىحشىلەردىڭ قۋعىن-سۇرگىنگە كەزىگەتىنىن بىلدىك (ٴتىم. 2-ح. 3:12). دۇنيەنىڭ قاي بۇرىشىندا ٶمىر سۇرمەيىك، كەز كەلگەن ۋاقىتتا بيلىك باسىنداعىلار ٴسۇيۋشى قۇدايىمىز ەحوباعا قىزمەت ەتۋگە تيىم سالۋى مۇمكىن.
2 ٴسىز تۇرىپ جاتقان ەلدىڭ ۇكىمەتى عيبادات ەتۋىڭىزگە تيىم سالىپ جاتسا، كوكەيىڭىزدە كەلەسىدەي سۇراقتار تۋىندار: قۋعىن-سۇرگىنگە ۇشىراعانىمىز ەحوبانىڭ ىقىلاسىنان ايىرىلعانىمىزدىڭ بەلگىسى مە؟ ەندى ەحوباعا عيبادات ەتە الامىز با؟ قۇدايعا ەمىن-ەركىن قىزمەت ەتۋ ٷشىن، باسقا ەلگە كوشكەنىم دۇرىس بولا ما؟ وسى ماقالادا اتالمىش سۇراقتاردىڭ جاۋابىن الامىز. سونداي-اق ىسىمىزگە تيىم سالىنعان جاعدايدا ەحوباعا ٵرى قاراي دا قىزمەت ەتە بەرۋ ٷشىن نە ىستەۋ كەرەكتىگىن جانە نەدەن اۋلاق بولۋ كەرەكتىگىن دە قاراستىرامىز.
قۋعىندالعانىمىز ەحوبانىڭ ىقىلاسىنان ايىرىلعانىمىز با؟
3. قورىنتتىقتارعا 2-حات 11:23—27 تارماقتارعا ساي، ادال بولعان ەلشى پاۋىل قانداي قارسىلىقتارعا كەزىكتى جانە بۇدان ٴبىز نە تۇيەمىز؟
3 ۇكىمەت باسىنداعىلار ىسىمىزگە تيىم سالىپ جاتسا، ٴبىز ٶزىمىزدى ەحوبانىڭ باتاسىنان ايىرىلىپ قالعانداي سەزىنۋىمىز مۇمكىن. الايدا مىنا جايتتى ەسىمىزدەن شىعارمايىق: قۋعىن-سۇرگىنگە ۇشىراعانىمىز ەحوبانىڭ بىزگە كوڭىلى تولمايدى دەگەندى بىلدىرمەيدى. ەلشى پاۋىلدى ەسكە تۇسىرەيىكشى. ول ەحوبانىڭ ىقىلاسىنا يە بولعانى ٴسوزسىز. وعان ماسىحشىلەردىڭ گرەك جازبالارىنىڭ 14 حاتىن جازۋ مارتەبەسى بەرىلدى. سونىمەن قاتار ول باسقا ۇلتتارعا جىبەرىلگەن ەلشى بولدى. ايتسە دە ول قاتتى قۋعىن-سۇرگىنگە ۇشىراعان (قورىنتتىقتارعا 2-حات 11:23—27 وقىڭىز). پاۋىلدىڭ جاعدايىنان تۇيەرىمىز — ەحوبا ادال قىزمەتشىلەرىنىڭ قۋعىندالۋىنا جول بەرۋى مۇمكىن.
4. وسى دۇنيە نەگە ٴبىزدى جەك كورەدى؟
4 يسا قارسىلىقتارعا كەزىگۋىمىزدىڭ سەبەبىن ٴتۇسىندىرىپ كەتكەن. ول ايتقانداي، وسى دۇنيەلىك بولماعاندىقتان، وسى دۇنيە ٴبىزدى جەك كورەدى (جوح. 15:18، 19). قارسىلىقتار ەحوبانىڭ باتاسىنان ايىرىلعانىمىزدىڭ بەلگىسى ەمەس. كەرىسىنشە، بۇل — دۇرىس نارسەنى ىستەپ جاتقانىمىزدىڭ دالەلى!
ەندى ەحوباعا عيبادات ەتە الامىز با؟
5. ادامدار ەحوبانىڭ ٸسىن توقتاتا الا ما؟ مىسال كەلتىرىڭىز.
5 جۇمىر باستى پەندەلەر قۇدىرەتى شەكسىز قۇداي ەحوبانىڭ ٸسىن ەش توقتاتا المايدى. توقتاتۋعا تالايى تىرىسىپ باققان، ٴبىراق بۇلارىنان تۇك شىقپاعان. ەكىنشى دۇنيەجۇزىلىك سوعىس كەزىندە بولعان جاعدايدى الايىق. سول ۋاقىتتا قۇداي حالقى بىرنەشە ەلدە اياۋسىز قۋعىنعا ۇشىرادى. ەحوبا كۋاگەرلەرىنىڭ ىسىنە ناسيستىك گەرمانيادا عانا ەمەس، اۆستراليا، كانادا مەن باسقا دا ەلدەردە تيىم سالىندى. ٴبىراق بۇنىڭ ارتى نە بولدى؟ 1939-جىلى سوعىس بۇرق ەتكەندە، دۇنيەجۇزى بويىنشا 72475 جاريالاۋشى بولعان. ال 1945-جىلى سوعىس اياقتالىپ جاتقاندا، ولاردىڭ سانى 156 299 عا جەتتى. ٴيا، ەحوبانىڭ ارقاسىندا جاريالاۋشىلاردىڭ سانى ەكى ەسەدەن دە كوپكە كوبەيدى!
6. ىسىمىزگە تيىم سالىنسا، بۇنىڭ قانداي جاقسى جاقتارى بار؟ مىسال كەلتىرىڭىز.
6 قارسىلىقتار ٴبىزدى ۇرەيگە بەرىلمەي، كەرىسىنشە، ەحوباعا كوبىرەك قىزمەت ەتۋگە تالپىندىرۋى مۇمكىن. كىشكەنتاي بالاسى بار ٴبىر ەرلى-زايىپتىنىڭ مىسالى — سوعان ٴبىر دالەل. ولار تۇراتىن ەلدە ٴبىزدىڭ ىسىمىزگە تيىم سالىنعان بولاتىن. قورقىنىشقا بوي الدىرۋدىڭ ورنىنا بۇل ەرلى-زايىپتى تۇراقتى ىزاشارلىق قىزمەتتى باستادى. بۇل ٷشىن ايەلى ٴتىپتى تابىسى جاقسى جۇمىسىنان شىعىپ كەتتى. كۇيەۋىنىڭ ايتۋى بويىنشا، ىسىمىزگە تيىم سالىنعانى كوپتەگەن ادامداردا ەحوبا كۋاگەرلەرى تۋرالى سۇراقتار تۋعىزدى. وسىنىڭ ارقاسىندا وعان كيەلى كىتاپتى زەرتتەۋ ساباقتارىن باستاۋ وڭاي بولدى. سالىنعان تيىمنىڭ جاقسى جاعى بۇل عانا ەمەس ەدى. سول ەلدە تۇراتىن ٴبىر اقساقال ايتقانداي، ەحوباعا قىزمەت ەتپەي كەتكەن ٴبىراز ادام قايتادان قاۋىمعا كەلىپ، قىزمەتتەرىن جانداندىردى.
7. ا) مۇسانىڭ 3-جازباسى 26:36، 37 دەن نە ۇيرەنەمىز؟ ٵ) ىسىمىزگە تيىم سالىنسا، قالاي ارەكەت ەتەسىز؟
7 قارسىلاستارىمىز ىسىمىزگە تيىم سالۋىمەن ٴبىزدىڭ قورقىنىشقا بەرىلىپ، قىزمەتىمىزدى دوعارعانىمىزدى كوزدەيدى. بۇعان قوسا، ولار ٴبىز جايىندا جالعان اڭگىمەلەر تاراتۋى، ٷيىمىزدى ٴتىنتۋ ٷشىن ٴتارتىپ ساقشىلارىن جىبەرۋى، سوتقا بەرۋى، ٴتىپتى تۇرمەگە جاپقىزۋى مۇمكىن. ولار بىرنەشە كۋاگەردى تۇرمەگە جاپساق، قالعاندارىنىڭ دا زارە-قۇتى قالمايدى دەپ ويلايدى. سوندايدا جۇرەگىمىزدە قورقىنىشتىڭ ۇيالاۋىنا جول بەرسەك، ٶز قىزمەتىمىزگە ٶزىمىز «تيىم سالا» باستاۋىمىز مۇمكىن. ٴبىز مۇسانىڭ 3-جازباسى 26:36، 37 دە (وقىڭىز) سۋرەتتەلگەن ادامدارعا ۇقساعىمىز كەلمەيدى. ىسىمىزگە تيىم سالىندى دەپ رۋحاني ىستەرىمىزدى دوعارماق تۇگىلى ولاردىڭ قارقىنىن دا باسەڭدەتپەيمىز. ەحوباعا تولىقتاي سەنىم ارتامىز جانە دۇربەلەڭگە تۇسپەيمىز (يشايا 28:16). سونداي كەزدە ەحوباعا دۇعا ەتىپ، باسشىلىعىن ىزدەيمىز. ەحوبا قولداپ-قۋاتتاسا، ەڭ مىقتى ادامي ۇكىمەتتىڭ ٶزى دە قۇدايعا ادال قىزمەت ەتۋىمىزگە توسقاۋىل بولا المايدى، ٴبىز بۇعان نىق سەنىمدىمىز (ەۆر. 13:6).
باسقا ەلگە كوشكەنىم دۇرىس بولا ما؟
8، 9. ا) ٵربىر وتاعاسى نە ٴماسىحشى قانداي شەشىم قابىلداۋ كەرەك؟ ٵ) دۇرىس شەشىم قابىلداۋ ٷشىن نە ىستەۋ كەرەك؟
8 ەلىڭىزدەگى ۇكىمەت قىزمەتىمىزگە تيىم سالسا، سىزگە «ەحوباعا ەمىن-ەركىن قىزمەت ەتۋ ٷشىن باسقا ەلگە كوشكەنىم دۇرىس پا؟» دەگەن سۇراق كەلەتىن شىعار. مۇندايدا ٶزىڭىز شەشىم قابىلداۋىڭىز كەرەك. كەيبىرىمىز كوشۋ-كوشپەۋدى شەشپەس بۇرىن، ٴبىرىنشى عاسىرداعى ماسىحشىلەر قۋعىن-سۇرگىنگە كەزىككەندە قالاي ارەكەت ەتكەنىن قاراستىرۋدى ٴجون كورەر. مىسالى، قارسىلاستار ستەپاندى تاسپەن ۇرىپ ولتىرگەننەن كەيىن، شاكىرتتەر يەرۋساليمنەن ياھۋدەيا مەن ساماريا ايماعىنا، ٴتىپتى فينيكيا، كيپر جانە انتيوحيا سياقتى شالعاي ايماقتارعا كوشىپ كەتكەن (مات. 10:23؛ ەل. ٸس. 8:1؛ 11:19). الايدا سول كەزەڭدەگى ماسىحشىلەر قارسىلىقتىڭ جاڭا تولقىنىنا ۇشىراعاندا، ەلشى پاۋىل ۋاعىز ىسىنە قارسىلىق كورسەتىلگەن ايماقتاردا قالا بەردى. وزىنە قاۋىپ تونسە دە، ول سول ايماقتاردا ىزگى حاباردى تاراتىپ، شاكىرتتەردى نىعايتۋعا بارىنشا اتسالىستى (ەل. ٸس. 14:19—23).
9 كيەلى كىتاپتاعى وسى وقيعالاردان نە تۇيەمىز؟ ٵر وتباسىندا كوشۋ-كوشپەۋگە قاتىستى ماسەلەنى وتاعاسى شەشۋ كەرەك. ٴبىر توقتامعا كەلمەس بۇرىن، ول دۇعا ەتە وتىرىپ وتباسىنىڭ جاعدايىن جان-جاقتى قاراستىرۋى جانە كوشۋدىڭ جاقسى-جامان جاقتارىن تارازىلاۋى قاجەت. بۇل ورايدا ٵر ٴماسىحشى «ٶز جۇگىن ٶزى كوتەرەدى» (عال. 6:5). ٵر وتباسى قانداي شەشىم قابىلداماسىن، ٴبىزدىڭ ولاردى ايىپتاۋعا قاقىمىز جوق.
ىسىمىزگە تيىم سالىنعان كەزدە قالاي عيبادات ەتەمىز؟
10. فيليالداعى باۋىرلاستار مەن اقساقالدار قانداي باسشىلىق بەرەدى؟
10 ىسىمىزگە تيىم سالىنعان جاعدايدا ەحوباعا عيبادات ەتە بەرۋىمىزگە نە كومەك بولادى؟ فيليال قاۋىمىڭىزداعى اقساقالدارعا رۋحاني اس-سۋدى قايدان الۋ كەرەكتىگىنە قاتىستى، كەزدەسۋلەردى جانە ۋاعىز ٸسىن قالاي ۇيىمداستىرۋعا بولاتىنىنا قاتىستى نۇسقاۋلار مەن ٴتيىمدى كەڭەستەر بەرەدى. فيليالداعى باۋىرلاستار ولارعا حابارلاسا الماعان جاعدايدا اقساقالدار سىزگە جانە قاۋىمىڭىزداعى بارلىق باۋىرلاستارعا ەحوباعا ۇزبەي عيبادات ەتە بەرۋگە كومەكتەسەدى. ولار كيەلى كىتاپ پەن ادەبيەتتەرىمىزگە سۇيەنىپ باسشىلىق بەرەتىن بولادى (مات. 28:19، 20؛ ەل. ٸس. 5:29؛ ەۆر. 10:24، 25).
11. قاجەتتى رۋحاني اس-سۋىڭىز ٵردايىم بولاتىنىنا نەلىكتەن سەنىمدى بولا الاسىز؟ كيەلى كىتاپ پەن ادەبيەتتەردەن ايىرىلىپ قالماس ٷشىن نە ىستەسەڭىز بولادى؟
11 ەحوبا ٶز قىزمەتشىلەرىنىڭ رۋحاني جاعىنان توق بولاتىنىن ۋادە ەتكەن (يشايا 65:13، 14؛ لۇقا 12:42—44). سول سەبەپتى ەحوبانىڭ ٶز ۇيىمى ارقىلى سىزگە قاجەتتى رۋحاني اس-سۋدى جەتكىزەتىنىنە نىق سەنىمدى بولىڭىز. ال ٴسىز نە ىستەي الاسىز؟ قىزمەتىمىزگە تيىم سالىنىپ جاتسا، كيەلى كىتابىڭىزدى جانە قولدا بار ادەبيەتتەرىڭىزدى تىعۋعا بولاتىن جەردى تابىڭىز. وسى اسا باعالى رۋحاني اس-سۋىمىزدى، مەيلى ول باسپا تۇرىندە نە ەلەكتروندى تۇردە بولسىن، وڭاي تابۋعا بولاتىن جەردە ەشقاشان قالدىرماڭىز. ٵرقايسىسىمىز رۋحاني مىقتى بولىپ قالۋدىڭ امالىن ىزدەۋىمىز كەرەك.
ەحوبا باۋىرلاستارمەن بىرگە عيبادات ەتۋ ٷشىن قورىقپاي باس قوسۋعا كومەكتەسەدى (12-ابزاستى قاراڭىز) *
12. كوزگە ىلىكپەس ٷشىن اقساقالدار كەزدەسۋلەردى قالاي ۇيىمداستىرادى؟
12 ال قاۋىم كەزدەسۋلەرى جايلى نە دەۋگە بولادى؟ جينالىستارىمىز جۇرتتىڭ كوزىنە ىلىكپەس ٷشىن اقساقالدار ٴبارىن جاقسىلاپ ۇيىمداستىرادى. ولار قاۋىمداعىلاردى شاعىن توپتارعا ٴبولىپ، كەزدەسۋلەردىڭ ۋاقىتى مەن وتەتىن جەرىن ٴجيى وزگەرتىپ وتىرۋى مۇمكىن. وزگەلەرگە قاۋىپ توندىرمەس ٷشىن، سونداي كەزدەسۋلەرگە كەلىپ-كەتكەندە اقىرىن سويلەگەنىڭىز دۇرىس بولار. سونىمەن قاتار وزگەلەردىڭ نازارىنا ىلىكپەۋ ٷشىن كيىمىڭىزگە دە ٴمان بەرگەنىڭىز ٴجون.
ۇكىمەت تيىم سالسا دا، ٴبىز ۋاعىزداۋدى دوعارمايمىز (13-ابزاستى قاراڭىز) *
13. كەڭەس وداعىنداعى باۋىرلاستارىمىزدان نە ۇيرەنەمىز؟
13 ال ۋاعىز ىسىنە كەلەر بولساق، ٵر جەردە جاعداي ٵرتۇرلى بولۋى مۇمكىن. ٴبىراق ٴبىز ەحوبانى جاقسى كورەمىز جانە ونىڭ پاتشالىعى جايلى ادامدارعا ايتۋدى قالايمىز، سوندىقتان جاعداي قانداي بولماسىن ۋاعىزداۋدىڭ جولىن تابامىز (لۇقا 8:1؛ ەل. ٸس. 4:29). تاريحشى ەميلي بەران ەحوبا كۋاگەرلەرىنىڭ كەڭەس وداعى كەزىندە جۇرگىزگەن ۋاعىز ٸسى جايلى بىلاي دەگەن: «ۇكىمەت باسىنداعىلار ەحوبا كۋاگەرلەرىنە ۋاعىزداۋعا تيىم سالعاندا، ولار ٶز سەنىمدەرى جايلى كورشىلەرىنە، ارىپتەستەرى مەن دوستارىنا ايتاتىن. ال كەيىن سول ٷشىن ەڭبەكپەن تۇزەتۋ لاگەرلەرىنە جىبەرىلگەندە، ولار تۇرمەدەگىلەرگە ۋاعىزداي باستادى». ىسىمىزگە تيىم سالىنعانىنا قاراماستان كەڭەس وداعىنداعى باۋىرلاستارىمىز ۋاعىزداۋدى ەش دوعارمادى. ٴسىز تۇراتىن جەردە ۋاعىز ىسىنە تيىم سالىنسا، سول باۋىرلاستارعا ەلىكتەگەيسىز!
نەدەن اۋلاق بولۋ كەرەك؟
قاي كەزدە ۇندەمەۋ كەرەكتىگىن جاقسى ٴبىلىڭىز (14-ابزاستى قاراڭىز) *
14. ٴزابۇر 39:1 دەگى سوزدەر ٴبىزدى نە جايلى ەسكەرتەدى؟
14 وزگەلەرگە نە ايتاتىنىڭىزعا مۇقيات بولىڭىز. قىزمەتىمىزگە تيىم سالىنعاندا، بىزگە «ۇندەمەيتىن ۋاقىتتى» انىقتاي ٴبىلۋ قاجەت (ۋاع. 3:7). ٴبىز قۇپيا مالىمەتتەردى ساقتاي بىلۋگە ٴتيىسپىز. بۇعان باۋىرلاستاردىڭ ەسىمدەرى، قايدا جينالاتىنىمىز، قالاي قىزمەت ەتەتىنىمىز جانە رۋحاني اس-سۋدى قايدان الاتىنىمىز سياقتى مالىمەتتەر جاتادى. ٴبىز بۇلار جايىندا جەرگىلىكتى بيلىك يەلەرىنە دە، ٶز ەلىمىزدەگى نە باسقا جەردەگى جاقسى ارالاساتىن دوستارىمىزعا دا، تۋىسقاندارىمىزعا دا ٴتىس جارمايمىز. وسى جاعىنان مۇقيات بولماساق، باۋىرلاستارىمىزدىڭ ٶمىرىن قاتەرگە تىگەمىز (ٴزابۇر 39:1 وقىڭىز).
15. شايتان نەنى كوكسەيدى جانە ونىڭ تۇزاعىنا ٴتۇسىپ قالماۋ ٷشىن نە ىستەۋىمىز كەرەك؟
15 ۇساق-تۇيەك كەلىسپەۋشىلىكتەر بىرلىگىڭىزدى بۇزباسىن. شايتان جىككە بولىنگەن وتباسىنىڭ ويران بولاتىنىن بىلەدى (مار. 3:24، 25). ول قالاي دا ارامىزعا ىرىتكى سالۋعا تىرىسىپ باعادى. وسىلايشا ونىمەن كۇرەسۋدى قويىپ، ٶزارا قىرىق پىشاق بولعانىمىزدى قالايدى.
16. گەرترۋد پيوتسينگەر باۋىرلاس بىزگە قانداي ۇلگى قالدىردى؟
16 شايتاننىڭ وسى تۇزاعىنان تولىسقان ماسىحشىلەر دە اباي بولۋلارى كەرەك. گەرترۋد پيوتسينگەر مەن ەلفريدە ليور دەگەن مايلانعان ايەل باۋىرلاستاردىڭ مىسالىنا توقتالايىق. ولار باسقا دا ايەل باۋىرلاستارمەن بىرگە ناسيستىك كونسلاگەرگە قامالعان بولاتىن. سول جەردە ەلفريدە ايەل باۋىرلاستاردىڭ رۋحتارىن كوتەرىپ، باياندامالار ايتقان. گەرترۋد ونى ىشتەي كورە المادى. كەيىن ول مۇنىسىنا قاتتى ۇيالىپ، ەحوبادان كومەك سۇراپ جالبارىندى. گەرترۋد: «بىزدەن دە قابىلەتتى، جاۋاپكەرشىلىگى كوبىرەك ادامدار بار ەكەنىن مويىنداي ٴبىلۋىمىز كەرەك»،— دەپ جازدى. كورەالماۋشىلىقتى ول قالاي جەڭدى؟ ول ەلفريدەنىڭ تارتىمدى قاسيەتتەرى مەن اقپەيىلدىلىگى تۋرالى كوبىرەك ويلاندى. وسىنىڭ ارقاسىندا ەلفريدەمەن اراقاتىناسىن جاقسارتتى. بۇل ايەل باۋىرلاستارىمىز كونسلاگەردەن امان-ەسەن شىعىپ، جەردەگى ومىرلەرىن اياقتاعانشا ەحوباعا ادال قىزمەت ەتتى. ٴبىز دە باۋىرلاستارمەن ارامىزداعى كەلىسپەۋشىلىكتەردى شەشۋگە بارىنشا كۇش سالساق، بىرلىگىمىزگە ەش نارسە سىزات تۇسىرمەيدى (قول. 3:13، 14).
17. ٶز بەتىمىزبەن ارەكەت ەتۋدەن نەگە اۋلاق بولۋىمىز كەرەك؟
17 ٶز بەتىڭىزبەن ارەكەت ەتۋدەن اۋلاق بولىڭىز. جاۋاپتى باۋىرلاستاردىڭ بەرگەن نۇسقاۋلارىنا ٵردايىم مويىنسۇنساق، كوپ قيىندىقتىڭ الدىن الامىز (پەت. 1-ح. 5:5). مىسالى، ىسىمىزگە تيىم سالىنعان ٴبىر ەلدە جاۋاپتى باۋىرلاستار قىزمەتتە ەشقانداي ادەبيەت تاراتپاۋ كەرەكتىگىن ايتادى. ٴبىراق ٴبىر ٸزاشار ەر باۋىرلاس ٶز اقىلىنا سۇيەنىپ، ادەبيەتتەر تاراتادى. ونىڭ بۇل ارەكەتى نەگە اكەپ سوقتى؟ ونى دا، سول ايماقتا قىزمەت ەتكەن باسقا باۋىرلاستاردى دا ساقشىلار قىزمەتكەرلەرى تەرگەۋدىڭ استىنا الدى. ولار باۋىرلاستار جۇرگەن جەرلەرمەن ٴجۇرىپ، تاراتىلعان بۇكىل ادەبيەتتى جيناپ الدى. بۇدان قانداي ساباق الامىز؟ باۋىرلاستاردىڭ بەرگەن نۇسقاۋلارىمەن كەلىسپەسەك تە، ولارعا مويىنسۇنعانىمىز دۇرىس. ارامىزدا باسشىلىقتى قولعا العان باۋىرلاستارمەن قىزمەتتەسسەك، ەحوبا ٵردايىم بىزگە باتاسىن بەرەدى (ەۆر. 13:7، 17).
18. قاجەتسىز ەرەجەلەر ورناتۋدان نەگە اۋلاق بولعان ٴجون؟
18 قاجەتسىز ەرەجەلەر ورناتپاڭىز. قاۋىمداعى اقساقالدار قاجەتسىز ەرەجەلەر ورناتاتىن بولسا، باۋىرلاستاردىڭ جاعدايىن قيىنداتا تۇسەدى. بۇرىنعى چەحوسلوۆاكيادا ىسىمىزگە تيىم سالىنعان كەزدە ٶمىر سۇرگەن يۋراي كامينسكيي باۋىرلاس بىلاي دەدى: «جاۋاپتى باۋىرلاستار مەن كوپتەگەن اقساقالدار تۇتقىنعا الىنعاننان كەيىن، وزگە ەر باۋىرلاستار قاۋىمدار مەن اۋدانداردا باسشىلىقتى قولعا الدى. ولاردىڭ كەيبىرى جاريالاۋشىلاردىڭ نە ىستەپ، نە ىستەمەۋ كەرەكتىگىنە قاتىستى كوپتەگەن ەرەجەلەر ورناتا باستادى». ەحوبا بىزگە بىرەۋ ٷشىن شەشىم قابىلداۋعا قۇقىق بەرگەن جوق. قاجەتسىز ەرەجەلەر ورناتۋ — باۋىرلاستاردىڭ قاۋىپسىزدىگىن ويلاۋ ەمەس، سەنىمدەرىنە ۇستەمدىك ەتۋ بولىپ تابىلادى (قور. 2-ح. 1:24).
ەحوباعا عيبادات ەتۋدى ەشقاشان دوعارماڭىز!
19. شايتان قالاي قارسىلاسپاسىن، شەجىرەلەر 2-جازبا 32:7، 8 گە ساي، ٴبىز نە نارسەگە سەنىمدىمىز؟
19 ٴبىزدىڭ ەڭ باستى قارسىلاسىمىز شايتان ەحوبانىڭ ادال قىزمەتشىلەرىن قۋدالاۋىن دوعارمايدى (پەت. 1-ح. 5:8؛ ايان 2:10). ول دا، ونىڭ جاقتاستارى دا قىزمەتىمىزگە تيىم سالۋعا تىرىسادى. ٴبىراق ٴبىز قورقىنىشقا بوي الدىرىپ، عيباداتىمىزدان قول ٷزىپ قالمايىق! (مۇس. 5-ج. 7:21). ويتكەنى ەحوبا ٴبىزدىڭ جاعىمىزدا. ىسىمىزگە تيىم سالىنعان كۇندە دە ول ٴبىزدى قولداي بەرەدى (شەجىرەلەر 2-جازبا 32:7، 8 وقىڭىز).
20. ٴسىز نە ىستەۋگە بەل بۋدىڭىز؟
20 ٴبىز دە ٴبىرىنشى عاسىرداعى باۋىرلاستار سياقتى ەحوباعا ۇزبەي قىزمەت ەتە بەرەيىك. ولار سول كەزدەگى بيلىك يەلەرىنە بىلاي دەگەن: «قۇدايدى ەمەس، سىزدەردى تىڭداعانىمىز ونىڭ الدىندا ٴجون بولار ما ەكەن؟ مۇنى وزدەرىڭىز ويلاپ كورىڭىزدەر. ال ٴبىز كورىپ-ەستىگەنىمىز جايلى ٷنسىز قالا المايمىز» (ەل. ٸس. 4:19، 20).
73-ٵن باتىلدىق دارىتا كور
^ 5-ابزاس بيلىك باسىنداعىلار ىسىمىزگە تيىم سالسا، قالاي ارەكەت ەتۋىمىز كەرەك؟ بۇل ماقالادا سونداي جاعدايدا نە ىستەپ، نە ىستەمەۋ كەرەكتىگىنە قاتىستى ٴتيىمدى كەڭەستەر بەرىلەدى. سولاردى ۇستانساق، ەحوباعا ۇزبەي عيبادات ەتە بەرەمىز.
^ 59-ابزاس سۋرەت سيپاتتاماسى: سۋرەتتەردىڭ بارىندە كۋاگەرلەر ىسىمىزگە شەكتەۋ قويىلعان جەردە قىزمەت ەتىپ جاتىر. شاعىن توپ ٴبىر ەر باۋىرلاستىڭ قويماسىندا قاۋىم كەزدەسۋىن وتكىزىپ جاتىر.
^ 61-ابزاس سۋرەت سيپاتتاماسى: ايەل باۋىرلاسىمىز ٴبىر ايەلمەن جاي اڭگىمەلەسىپ وتىرىپ، وعان شىندىق تۋرالى ايتپاقشى.
^ 63-ابزاس سۋرەت سيپاتتاماسى: ساقشىلار قىزمەتكەرلەرى قانشا تەرگەسە دە، ەر باۋىرلاسىمىز قاۋىم جايىندا ٴتىس جارماي وتىر.
