48-زەرتتەۋ ماقالاسى
باستاپ قانا قويماي، اياعىنا دەيىن جەتكىزىڭىز
«بۇل ٸستى باستاپ قانا قويماي... اياعىنا دەيىن جەتكىزىڭدەر» (قور. 2-ح. 8:10، 11).
35-ٵن «نەنىڭ ماڭىزدىراق ەكەنىنە كوز جەتكىزىڭدەر»
اڭداتپا *
1. ەحوبا بىزگە نە ىستەۋگە جول بەرەدى؟
ەحوبا ٶمىر جولىن تاڭداۋدى وزىمىزگە قالدىرعان. ايتسە دە ول بىزگە جاقسى شەشىم قابىلداۋدى ۇيرەتەدى، ٵرى وعان ۇنامدى شەشىم قابىلداعاندا، ونى جۇزەگە اسىرۋعا كومەكتەسەدى (ٴزاب. 119:173). قۇداي سوزىندەگى دانا كەڭەستەردى قولدانعان سايىن، جاقسى شەشىمدەر قابىلدايتىن بولامىز (ەۆر. 5:14).
2. شەشىم قابىلداعاننان كەيىن قانداي قيىندىققا كەزىگۋىمىز مۇمكىن؟
2 كەيدە ٴتىپتى جاقسى شەشىم قابىلداساق تا، باستاعان ٸسىمىزدى اياعىنا دەيىن جەتكىزۋ قيىن بولىپ جاتادى. ماسەلەن، جاس ەر باۋىرلاس كيەلى كىتاپتى تولىعىمەن وقىپ شىعۋدى ماقسات ەتەدى. باسىندا بىرنەشە اپتا بويى وقىپ ٴجۇرىپ، كەيىن ٴبىر سەبەپتەرمەن توقتاتىپ قويادى. ال ٴبىر ايەل باۋىرلاس تۇراقتى ٸزاشار بولۋدى شەشەدى، ٴبىراق ونى كەيىنگە شەگەرە بەرەدى. اقساقالدار كەڭەسى قاۋىمداعى باۋىرلاستاردىڭ كوبىنە باقتاشىلىق ساپار جاساۋعا قاتىستى ٴبىراۋىزدان شەشىم قابىلدايدى. الايدا بىرنەشە اي وتسە دە، ونى باستامايدى. بۇل جاعدايلار ٴبىر-بىرىنە ۇقساماسا دا، بارىنە دە ورتاق ٴبىر نارسە بار: ولاردىڭ شەشىمدەرى ىسكە اسپاي قالدى. ٴبىرىنشى عاسىرداعى قورىنتتاعى ماسىحشىلەر دە وسىنداي قيىندىققا تاپ بولعان. سول جاعدايدان كوپ نارسەگە ۇيرەنە الامىز.
3. قورىنتتىقتار قانداي شەشىم قابىلدادى، ٴبىراق كەيىن نە بولدى؟
3 ب.ز. 55-جىلى قورىنتتىقتار ماڭىزدى شەشىم قابىلدادى. ولار يەرۋساليم مەن ياھۋدەياداعى باۋىرلاستارىنىڭ قيىندىققا كەزىگىپ، جوقشىلىق كورىپ جۇرگەنىن جانە وزگە قاۋىمداردىڭ ولار ٷشىن قارجى جيناپ جاتقانىن ەستىدى. جاناشىرلىقتارى مەن جومارتتىقتارى تالپىندىرعاندىقتان، قورىنتتىقتار باۋىرلاستارىنا كومەكتەسكىسى كەلىپ، ەلشى پاۋىلدان قالاي جاردەم بەرە الاتىندارىن سۇرادى. پاۋىل ولارعا قارجى جيناۋعا قاتىستى نۇسقاۋلار جىبەرىپ، وسى ىسكە ٴتيتتى تاعايىندادى (قور. 1-ح. 16:1؛ قور. 2-ح. 8:6). بىرنەشە اي وتكەننەن كەيىن پاۋىلعا كەلەسى ٴبىر جايت ٴمالىم بولادى: قورىنتتىقتار سوزدەرىندە تۇرماي، جينايمىز دەگەن اقشالارىن جيناماپتى. سودان وزگە قاۋىمداردان جينالعان قارجىنى يەرۋساليمگە الىپ كەتەتىن ۋاقىت كەلگەندە، قورىنتتاعى باۋىرلاستاردىڭ ساداقالارى دايىن بولماعانعا ۇقسايدى (قور. 2-ح. 9:4، 5).
4. قورىنتتىقتارعا 2-حات 8:7، 10، 11 دەن كورىنەتىندەي، پاۋىل قورىنتتىقتاردى نە ىستەۋگە تالپىندىردى؟
4 قورىنتتىقتار جاقسى شەشىم قابىلدادى جانە پاۋىل ولاردى بەرىك سەنىمدەرى مەن جومارت بولۋعا دەگەن ىقىلاستارى ٷشىن ماقتادى. ٴبىراق باستاعان ىستەرىن اياقتاۋلارى قاجەت ەكەنىن دە ايتۋىنا تۋرا كەلدى (قورىنتتىقتارعا 2-حات 8:7، 10، 11 وقىڭىز). بۇل وقيعادان ٴبىز ٴتىپتى ادال ماسىحشىلەرگە دە كەيدە قابىلداعان جاقسى شەشىمدەرىن ىسكە اسىرۋ قيىنعا سوعاتىنىن بىلدىك.
5. قانداي سۇراقتارعا جاۋاپ الامىز؟
5 قورىنتتىقتار ىسپەتتى بىزگە دە شەشىمدەرىمىزدى ىسكە اسىرۋ قيىن بولۋى مۇمكىن. ويتكەنى كەمەلسىز بولعاندىقتان، ٴبىز ولاردى كەيىنگە ىسىرىپ جاتامىز. يا بولماسا جاعداي كۇرت وزگەرىپ، شەشىمدەرىمىزدى جۇزەگە اسىرۋ قيىنعا سوعادى (ۋاع. 9:11؛ ريم. 7:18). شەشىمدەرىمىزدى قايتا قاراستىرۋعا نەمەسە ونى وزگەرتۋگە تۋرا كەلسە، نە ىستەۋگە بولادى؟ باستاعان ٸسىمىزدى قالاي سوڭىنا دەيىن جەتكىزە الامىز؟
شەشىم قابىلداماس بۇرىن
6. قاي كەزدە قابىلداعان شەشىمىمىزدى وزگەرتۋ قاجەت بولادى؟
6 ومىردە قابىلداعان كەيبىر ماڭىزدى شەشىمدەرىمىزدى ەشقاشان وزگەرتپەيمىز. مىسالى، ەحوباعا قىزمەت ەتۋگە دەگەن شەشىمىمىزگە بەرىكپىز. سونداي-اق جان جارىمىزعا ادال بولامىز دەگەن سوزىمىزدەن تايمايمىز (مات. 16:24؛ 19:6). دەسە دە باسقا شەشىمدەرىمىزدى وزگەرتۋىمىز مۇمكىن. سەبەبى جاعداي وزگەرىپ جاتادى. ولاي بولسا، بارىنشا جاقسى شەشىم قابىلداۋ ٷشىن قانداي قادامدار جاساۋ كەرەك؟
7. نە تۋرالى دۇعا ەتكەن ٴجون جانە نەگە؟
7 دانالىق سۇراپ دۇعا ەتىڭىز. ەحوبا رۋحتىڭ جەتەلەۋىمەن جاقىپقا بىلاي دەپ جازدىرعان: «قايسىبىرەۋىڭە دانالىق جەتپەي جاتسا، جومارتتىقپەن... بەرە سالاتىن قۇدايدان سۇراي بەرسىن» (جاق. 1:5). بارىمىزگە دە كەي جاعدايدا «دانالىق جەتپەي» جاتادى. سوندىقتان شەشىم قابىلداعاندا نەمەسە ونى وزگەرتۋ كەرەك بولعاندا ەحوبانىڭ كومەگىنە جۇگىنىڭىز. سوندا ول دۇرىس تاڭداۋ جاساۋىڭىزعا جاردەم بەرەدى.
8. شەشىم قابىلدار الدىندا قالاي ىزدەنگەن دۇرىس؟
8 تىڭعىلىقتى ىزدەنىس جاساڭىز. قۇداي سوزىنەن اقىل ىزدەڭىز، ەحوبانىڭ ۇيىمى شىعاراتىن باسىلىمداردى وقىپ-زەرتتەڭىز جانە سەنىم ارتاتىن بىرەۋمەن سويلەسىڭىز (ناق. س. 20:18). اسىرەسە جۇمىسىڭىزدى وزگەرتۋدى، باسقا جەرگە كوشۋدى شەشكەندە نەمەسە ٶزىڭىزدى قامتاماسىز ەتىپ، ەحوباعا قىزمەت ەتۋگە كومەكتەسەتىن وقۋدى تاڭداعاندا وسىنداي ىزدەنىس جاساۋ وتە ماڭىزدى.
9. وزىمىزبەن شىنشىل بولساق، مۇنىڭ قانداي پايداسىن كورەمىز؟
9 نيەتىڭىزدى تەكسەرىڭىز. ٴبىزدىڭ نيەتىمىز ەحوبا ٷشىن ماڭىزدى (ناق. س. 16:2). ول ٴبىزدىڭ بارلىق كەزدە شىنشىل بولعانىمىزدى قالايدى. سوندىقتان شەشىم قابىلداردا نيەتىمىزدى تەكسەرىپ، وزىمىزبەن جانە وزگەلەرمەن شىنشىل بولۋىمىز كەرەك. ەگەر تولىقتاي شىنشىل بولماساق، قابىلداعان شەشىمىمىزدى ىسكە اسىرۋ قيىن بولۋى مۇمكىن. ماسەلەن، ٴبىر جاس ەر باۋىرلاس تۇراقتى ٸزاشار بولامىن دەگەن توقتامعا كەلدى دەلىك. ۋاقىت وتە كەلە ول ساعات مولشەرىن ورىنداۋعا قينالىپ، قۋانىشىن جوعالتادى. ول ىزاشارلىق قىزمەتتى ەحوباعا ۇنامدى بولعىم كەلگەندىكتەن باستادىم دەپ ويلاۋى مۇمكىن. ٴبىراق، شىن مانىندە، ول اتا-اناسىنىڭ نە باسقا بىرەۋدىڭ كوڭىلىنەن شىعۋ ٷشىن وسى قىزمەتتى باستاعان بولار.
10. وزگەرىس جاساۋعا نە كومەكتەسەدى؟
10 ال ەندى شىلىم شەگۋدى قويامىن دەپ ۇيعارعان زەرتتەۋشىنىڭ جاعدايىن الايىق. باسىندا ول ٴبىر-ەكى اپتا شىلىم شەكپەي جۇرەدى دە، كەيىن شەگىپ قويادى. دەگەنمەن اقىر اياعىندا ول جەڭىسكە جەتەدى! ەحوباعا دەگەن سۇيىسپەنشىلىگى مەن وعان ۇنامدى بولۋعا دەگەن ىقىلاسى جامان ادەتىنەن ارىلۋعا كومەكتەسەدى (قول. 1:10؛ 3:23).
11. نەگە ناقتى ماقساتتار قويعان دۇرىس؟
11 ناقتى ماقساتتار قويىڭىز. ماقساتتارىڭىز ناقتى بولسا، ولارعا جەتۋ دە وڭايىراق بولادى. مىسالى، ٴسىز كيەلى كىتاپتى كۇن سايىن وقۋدى جوسپارلادىڭىز دەلىك. ٴبىراق ناقتى كەستە قۇرماساڭىز، ماقساتىڭىزعا جەتە الماۋىڭىز مۇمكىن *. تاعى ٴبىر مىسال: اقساقالدار باقتاشىلىق ساپاردى ٴجيى جاسايمىز دەپ ۇيعارادى. ٴبىراق ٴبىراز ۋاقىت وتسە دە، سول شەشىمدەرىن ۇستانبايدى. ولار ماقساتتارىنا جەتۋ ٷشىن مىناداي سۇراقتار جايلى ويلانسا بولادى: باقتاشىلىق ساپارعا مۇقتاج باۋىرلاستاردىڭ ٴتىزىمىن جاسادىق پا؟ ولارعا باراتىن ناقتى ۋاقىتتى بەلگىلەدىك پە؟
12. نە ىستەۋىمىز كەرەك جانە نەگە؟
12 شاما-شارقىڭىزدى ٴبىلىڭىز. شىنى كەرەك، قالاعان نارسەمىزدىڭ ٴبارىن ىستەۋگە ۋاقىت تا، مۇمكىندىك تە، كۇش تە بولا بەرمەيدى. سوندىقتان ەستى بولىپ، شاماڭىزعا قاراڭىز. قابىلداعان شەشىمىڭىزدى ىسكە اسىرۋ قولىڭىزدان كەلمەيتىنىن تۇسىنسەڭىز، ونى وزگەرتىڭىز (ۋاع. 3:6). ال شەشىمىڭىزدى سالماقتاپ-سارالاپ، وزگەرىستەر ەنگىزگەن سوڭ، ونى ىسكە اسىرا الاتىنىڭىزدى تۇسىنسەڭىز شە؟ قازىر باستاعان ٸسىڭىزدى اياعىنا دەيىن جەتكىزۋگە كومەكتەسەتىن بەس قادامدى قاراستىرايىق.
شەشىمىڭىزدى ىسكە اسىرۋعا كومەكتەسەتىن قادامدار
13. شەشىمىڭىزدى ىسكە اسىرۋ ٷشىن كۇشتى قايدان الساڭىز بولادى؟
13 ٵرەكەت ەتۋگە كۇش سۇراپ دۇعا ەتىڭىز. قۇداي بىزگە ارەكەت ەتۋگە «كۇش بەرىپ»، شەشىمىمىزدى ىسكە اسىرۋعا كومەكتەسەدى (ٴفىلىپ. 2:13). سوندىقتان ەحوبادان كيەلى رۋحى ارقىلى كۇش بەرۋىن سۇراڭىز. دۇعالارىڭىز جاۋاپسىز قالىپ جاتقانداي كورىنسە دە، دۇعا ەتۋدى توقتاتپاڭىز. يسا ايتقانداي، «سۇراي بەرىڭىز، سوندا [كيەلى رۋح] بەرىلەدى» (لۇقا 11:9، 13).
14. ناقىل سوزدەر 21:5 تەگى پرينسيپ شەشىمىڭىزدى ىسكە اسىرۋعا قالاي كومەكتەسەدى؟
14 جوسپار قۇرىڭىز (ناقىل سوزدەر 21:5 وقىڭىز). قانداي دا ٴبىر ٸستى باستاعان سوڭ، ونى اياعىنا دەيىن جەتكىزۋ ٷشىن، جوسپار قۇرۋ قاجەت. سوسىن سول جوسپارعا ساي ارەكەت ەتۋ كەرەك. سول سياقتى شەشىم قابىلداعاندا دا ونى ىسكە اسىرۋعا كومەكتەسەتىن ناقتى قادامداردىڭ ٴتىزىمىن جاساڭىز. ۇلكەن ىستەردى كىشىگىرىم ىستەرگە ٴبولىپ تاستاڭىز، سوندا جەتىستىكتەرىڭىزدى انىق كورە الاسىز. پاۋىل قورىنتتىقتاردى ٶزى كەلگەندە اقشا جيناپ جاتۋدىڭ ورنىنا، «ٵر اپتانىڭ ٴبىرىنشى كۇنى» قولدا بارلارىنىڭ ٴبىرازىن بولەك الىپ قويۋعا تالپىندىردى (قور. 1-ح. 16:2). ۇلكەن ىستەردى كىشىگىرىم ىستەرگە ٴبولىپ تاستاعانىڭىز ولاردى ىسكە اسىرۋ قولىمنان كەلمەيدى دەگەن سەزىمگە بەرىلمەۋگە دە كومەكتەسەدى.
15. جوسپار قۇرعان سوڭ نە ىستەۋ كەرەك؟
15 جوسپارىڭىزدى قاعاز بەتىنە تۇسىرسەڭىز، ونى ىسكە اسىرۋ وڭاي بولادى (قور. 1-ح. 14:40). اقساقالدار كەڭەسى ٵربىر قابىلدانعان شەشىمدى جانە ونى كىم اتقاراتىنىن، قاي كەزدە جاسالىپ ٴبىتۋ كەرەكتىگىن جازىپ وتىراتىن ٴبىر اقساقالدى تاعايىنداپ قويسا بولادى. وسىلاي ىستەسە اقساقالدارعا قابىلداعان شەشىمدەرىن ىسكە اسىرۋ وڭاي بولادى (قور. 1-ح. 9:26). بۇل كەڭەستى كۇندەلىكتى ومىردە دە قولدانا الاسىز. مىسالى، ٵر كۇنى ىستەۋ كەرەك ىستەردىڭ ٴتىزىمىن جاساپ، ماڭىزدىلارىن ٴتىزىمنىڭ ەڭ باسىنا جازىپ قويىڭىز. بۇل باستاعان ٸسىڭىزدى سوڭىنا دەيىن جەتكىزۋگە ٵرى از ۋاقىتتىڭ ىشىندە كوپ ٸس اتقارۋعا سەپتىگىن تيگىزەدى.
16. شەشىمدى ىسكە اسىرۋ ٷشىن تاعى نە ىستەۋىمىز كەرەك جانە بۇنى ريمدىكتەرگە 12:11 قالاي راستايدى؟
16 كۇش سالىڭىز. جوسپارعا ساي ارەكەت ەتۋ ٷشىن جانە باستاعان ٸستى سوڭىنا دەيىن جەتكىزۋ ٷشىن كۇش سالۋ كەرەك (ريمدىكتەرگە 12:11 وقىڭىز). پاۋىل تىموتەگە جاقسى تالىمگەر بولۋدان تالماي، ونى «بار ىقىلاسپەن جالعاستىرا بەرۋدى» جانە «ۇدايى ىستەي بەرۋدى» ايتتى. بۇل كەڭەستى رۋحاني ماقساتتارعا جەتۋ ٷشىن دە قولدانا الامىز (ٴتىم. 1-ح. 4:13، 16).
17. ەفەستىكتەرگە 5:15، 16 داعى كەڭەستەر جوسپارىڭىزدى ىسكە اسىرۋعا قالاي كومەكتەسەدى؟
17 ۋاقىتىڭىزدى دانالىقپەن جۇمساڭىز (ەفەستىكتەرگە 5:15، 16 وقىڭىز). جوسپارىڭىزدى ىسكە اسىرۋعا ناقتى ۋاقىت بەلگىلەپ، ودان تايماڭىز. قولايلى ۋاقىتتى كۇتپەڭىز، ول ۋاقىت كەلمەۋى دە مۇمكىن (ۋاع. 11:4). ماڭىزدى ىستەرگە قاجەت ۋاقىت پەن كۇشتى ماڭىزسىز ىستەردىڭ سارقىپ الۋىنا جول بەرمەڭىز (ٴفىلىپ. 1:10). مۇمكىن بولسا، ماڭىزدى ىسپەن اينالىسقاندا باسقالار كەدەرگى جاسامايتىن ۋاقىتتى تاڭداڭىز. وزگەلەردەن ٴسىزدى الاڭداتپاۋىن سۇراڭىز. تەلەفونىڭىزدى ٴسوندىرىپ قويىڭىز جانە پوچتا مەن الەۋمەتتىك جەلىنى قولدانباي تۇرىڭىز *.
18، 19. قابىلداعان شەشىمىڭىزدى جۇزەگە اسىرۋ قيىن بولسا دا، ەش بەرىلمەۋگە نە كومەكتەسەدى؟
18 شەشىمنىڭ ناتيجەسىن ويدا ۇستاڭىز. شەشىمنىڭ ناتيجەسىن قانداي دا ٴبىر جەرگە ساپار شەگۋمەن سالىستىرۋعا بولادى. سول جەرگە جەتۋدى قاتتى قالاعاندىقتان، جول جابىلىپ قالسا دا، باعىتىڭىزدى وزگەرتۋگە تۋرا كەلسە دە، ساياحاتىڭىزدى جالعاستىرا بەرەسىز. سول سياقتى قابىلداعان شەشىمىڭىزدىڭ ناتيجەسى جايلى ويلاساڭىز، كەدەرگىلەرگە قارامايسىز، باسقاشا ارەكەت ەتۋ كەرەك بولسا دا ەش بەرىلمەيسىز (عال. 6:9).
19 جاقسى شەشىم قابىلداۋ دا، ولاردى ىسكە اسىرۋ دا وڭاي ەمەس. الايدا ەحوبانىڭ كومەگىمەن دانالىق پەن كۇشكە يە بولىپ، باستاعان ٸسىڭىزدى اياعىنا دەيىن جەتكىزە الاسىز.
65-ٵن العا ۇمتىل!
^ 5-ابزاس قابىلداعان شەشىمدەرىڭىزدىڭ كەيبىرىنە وكىنەسىز بە؟ يا بولماسا جاقسى شەشىم قابىلداۋ مەن ونى جۇزەگە اسىرۋ كەيدە قيىنعا سوعا ما؟ بۇل ماقالا وسى قيىندىقتاردى جەڭۋگە جانە باستاعان ٸسىڭىزدى اياعىنا دەيىن جەتكىزۋگە سەپتىگىن تيگىزبەك.
^ 11-ابزاس كيەلى كىتاپتى وقۋدى جوسپارلاۋ ٷشىن ®jw.org تور بەكەتىندەگى «كيەلى كىتاپتى وقۋ كەستەسىن» قولدانساڭىز بولادى. باسىلىمدار > كىتاپتار مەن كىتاپشالار (حانزۇشا) دەگەن جەردى قاراڭىز.
^ 17-ابزاس ۋاقىتتى دانالىقپەن جۇمساۋ جايلى كوبىرەك ٴبىلۋ ٷشىن، 2010-جىلى ٴساۋىر ايىندا شىققان «ويانىڭدار!» (حانزۇشا) جۋرنالىنداعى «ۋاقىت تابۋدىڭ 20 جولى» دەگەن ماقالانى قاراڭىز.
