45-زەرتتەۋ ماقالاسى
كيەلى رۋح بىزگە قالاي كومەكتەسەدى؟
«سەبەبى ماعان كۇش-قۋات بەرۋشىنىڭ ارقاسىندا ٴبارىن دە ىستەي الامىن» (ٴفىلىپ. 4:13).
104-ٵن كيەلى رۋح — قۇدايدىڭ سيى
اڭداتپا *
1، 2. ا) قيىندىققا كۇن سايىن توزۋگە نە كومەكتەسەدى؟ ٴتۇسىندىرىڭىز. ٵ) بۇل ماقالادان نە بىلەمىز؟
«باسىما تۇسكەن قيىندىقتاردان ٶز كۇشىممەن وتە الماس ەدىم». وسىلاي دەگەن كەزىڭىز بولعان با؟ بالكىم، اۋىر دەرتپەن كۇرەسۋ نە جاقىن ادامدى جوعالتۋ سياقتى قيىندىقتاردان وتكەندە، وسى سوزدەردى ايتقان بولارسىز. وتكەندى ەسكە الساڭىز، ەحوبانىڭ كيەلى رۋحىنىڭ ارقاسىندا عانا «ادام كۇشىنەن اسقان كۇشكە» يە بولىپ، كۇن سايىن سول قيىندىقتارعا توزە العان ەكەنسىز (قور. 2-ح. 4:7—9).
2 وسى زۇلىم دۇنيەنىڭ ىقپالىنا قارسى تۇرۋ ٷشىن دە ٴبىز كيەلى رۋحقا مۇقتاجبىز (جوح. 1-ح. 5:19). بۇعان قوسا، «زۇلىم رۋحتارعا قارسى كۇرەسۋىمىز» كەرەك (ەفەس. 6:12). قازىر وسى تۇستا كيەلى رۋح بىزگە قانداي ەكى جولمەن كومەكتەسەتىنىن تالقىلايمىز. سودان سوڭ كيەلى رۋحتىڭ پايداسىن تولىق كورۋ ٷشىن نە ىستەي الاتىنىمىزدى بىلەمىز.
كيەلى رۋح كۇش دارىتادى
3. قيىندىقتارعا ٴتوزۋ ٷشىن ەحوبا بەرەتىن كومەكتىڭ ٴبىرى قانداي؟
3 ەحوبانىڭ كيەلى رۋحى ٶمىردىڭ ٴتۇرلى سوقپاقتارىنا قاراماي جاۋاپكەرشىلىكتەرىمىزدى اتقارۋعا قاجەتتى كۇش-قايرات بەرەدى. ەلشى پاۋىل قيىنشىلىقتارىنا قاراماستان، «ٴماسىحتىڭ كۇشىنىڭ» ارقاسىندا ەحوباعا قىزمەت ەتۋىن جالعاستىرا بەردى (قور. 2-ح. 12:9). ەكىنشى ميسسيونەرلىك ساپارى كەزىندە پاۋىل ۋاعىز ىسىندە تەر توگىپ قانا قويماي، كۇن كورۋ ٷشىن جۇمىس تا ىستەگەن. ول قورىنت قالاسىندا اقيلا مەن پريسكيلانىڭ ۇيىندە تۇرعان. ولار شاتىر جاساۋمەن شۇعىلداناتىن ەدى. پاۋىل دا وسى كاسىپپەن اينالىسقاندىقتان، كەي كۇندەرى ولارمەن بىرگە جۇمىس ىستەدى (ەل. ٸس. 18:1—4). كيەلى رۋحتىڭ كومەگىمەن پاۋىل جۇمىسىن دا ىستەي الدى، قىزمەتىن دە اتقارا الدى.
4. قورىنتتىقتارعا 2-حات 12:7ٵ—9 تارماقتارعا ساي، پاۋىلدىڭ قانداي قيىندىعى بولدى؟
4 قورىنتتىقتارعا 2-حات 12:7ٵ—9 وقىڭىز. بۇل تارماقتاردا پاۋىل «تانىمە قادالىپ تۇراتىن تىكەن» دەپ نەنى ايتقان؟ ەگەر دەنەڭىزگە تىكەن كىرىپ كەتسە، بۇل جانىڭىزعا باتار ەدى. سول سياقتى، پاۋىل جانىنا باتقان ٴبىر قيىندىعى جايلى ايتقان. ول ونى ٶزىن «تىنباي مازالاعان» «شايتاننىڭ پەرىشتەسى» دەپ اتادى. شايتان نە ونىڭ جىن-پەرىلەرى پاۋىلدىڭ تىكەن ىسپەتتى وسى قيىندىعىنا تىكەلەي سەبەپشى بولماعان شىعار. الايدا بۇل زۇلىم رۋحتار سول «تىكەندى» كورگەندە، پاۋىلدىڭ قيىندىعىنا قيىندىق قوسۋ ٷشىن، بىلايشا ايتقاندا، «تىكەندى» ودان سايىن باتىردى. ال پاۋىل نە ىستەدى؟
5. ەحوبا پاۋىلدىڭ دۇعاسىنا قالاي جاۋاپ بەردى؟
5 العاشىندا پاۋىل ەحوبانىڭ «تىكەندى» الىپ تاستاعانىن قالادى. ول بىلاي دەدى: «ونى الىپ تاستاۋىن سۇراپ، يەمىزگە [ەحوباعا] ٷش رەت جالبارىندىم». ٴبىراق پاۋىل قانشا جالبارىنسا دا، تانىندەگى «تىكەننەن» قۇتىلمادى. بۇل ەحوبا ونىڭ دۇعالارىنا جاۋاپ بەرگەن جوق دەگەندى بىلدىرە مە؟ مۇلدەم ولاي ەمەس. ەحوبا ونىڭ دۇعالارىنا جاۋاپ بەردى. ول پاۋىلدى قيىندىقتارىنان ارىلتپاسا دا، توزۋگە كۇش-قۋات بەردى. ەحوبا وعان: «ٵلسىز كەزىڭدە مەنىڭ قۇدىرەتىمە تولىق يە بولاسىڭ»،— دەدى (قور. 2-ح. 12:8، 9). وسىلاي پاۋىل قۇدايدىڭ كومەگىمەن جانتىنىشتىعىن ساقتاپ، قۋانىشىن جوعالتپادى (ٴفىلىپ. 4:4—7).
6. ا) ەحوبا دۇعالارىمىزعا قالاي جاۋاپ بەرۋى مۇمكىن؟ ٵ) ابزاستا كەلتىرىلگەن تارماقتارداعى ۋادەلەر سىزگە قانداي جىگەر بەرەدى؟
6 پاۋىل سياقتى ٴسىز دە قيىندىقتان ارىلتۋىن ٶتىنىپ، ەحوباعا جالبارىنعان كەزىڭىز بولعان با؟ قانشا جالبارىنىپ سۇراساڭىز دا، قيىندىقتان ارىلماساڭىز، يا بولماسا قيىندىعىڭىز ودان سايىن شيەلەنىسىپ كەتسە، ەحوبانىڭ ىقىلاسىنان ايىرىلىپ قالدىم دەپ ۋايىمدايسىز با؟ وسىنداي كەزدە پاۋىلدى ەسكە الىڭىز. ەحوبا پاۋىلدىڭ دۇعالارىنا جاۋاپ بەرگەنى سياقتى، ٴسىزدىڭ دە دۇعالارىڭىزعا جاۋاپ بەرەدى! بالكىم، ەحوبا قيىندىقتارىمىزدى الىپ تاستامايتىن شىعار. الايدا توزە الۋىمىز ٷشىن ول بىزگە كيەلى رۋحى ارقىلى قاجەتتى كۇش بەرەدى (ٴزاب. 61:3، 4). «قۇلاساڭىز» دا، ەحوبا ٴسىزدى ەش تاستامايدى (قور. 2-ح. 4:8، 9؛ ٴفىلىپ. 4:13).
كيەلى رۋح العا جىلجۋعا كومەكتەسەدى
7، 8. ا) كيەلى رۋح قاي جاعىنان جەلگە ۇقسايدى؟ ٵ) پەتىر كيەلى رۋحتىڭ اسەرىن قالاي سيپاتتاعان؟
7 كيەلى رۋح بىزگە تاعى قالاي كومەكتەسەدى؟ ونى جەلگە تەڭەۋگە بولادى. تەڭىز بۋىرقانىپ جاتسا دا، كەمە جەلدىڭ كومەگىمەن دىتتەگەن جەرىنە ٴجۇزىپ بارا الادى. سول سياقتى، كيەلى رۋح تا ٶمىردىڭ دۇلەي تولقىندارىنا قاراماي، قۇداي ۋادە ەتكەن جاڭا دۇنيەگە جەتكەنشە، وعان قىزمەت ەتە بەرۋىمىزگە كومەكتەسەدى.
8 ەلشى پەتىر بالىقشى بولعاندىقتان، قايىقپەن جۇزۋدىڭ نە ەكەنىن جاقسى بىلگەن. سوندىقتان دا ول كيەلى رۋحتىڭ قالاي اسەر ەتەتىنىن سيپاتتاۋ ٷشىن جۇزۋگە قاتىستى ايتىلاتىن تىركەستى قولدانعان بولسا كەرەك. ول بىلاي جازدى: «پايعامبارلىق ەشقاشان ادام بالاسىنىڭ قالاۋىمەن ايتىلعان ەمەس، قايتا، ونى ادامدار قۇدايدىڭ كيەلى رۋحىنىڭ قوزعاۋ سالۋىمەن ايتقان». «قوزعاۋ سالۋ» دەگەن گرەك ٴسوزى سوزبە-ٴسوز «الىپ ٴجۇرۋ»، «ٴبىر جەردەن باسقا جەرگە اپارۋ» دەگەندى بىلدىرەدى (پەت. 2-ح. 1:21).
9. پەتىر قولدانعان «الىپ ٴجۇرۋ» دەگەن تىركەستى ەستىگەندە ادام نەنى ەلەستەتەر ەدى؟
9 پەتىر قولدانعان «الىپ ٴجۇرۋ» دەگەن تىركەستى ەستىگەندە ادام نەنى ەلەستەتەر ەدى؟ ەلشىلەردىڭ ىستەرى كىتابىن جازعان لۇقا دا كەمەنىڭ جەلمەن «كەتە بارعانىن» ايتقاندا، وسىعان ۇقساس گرەك ٴسوزىن قولدانعان (ەل. ٸس. 27:15). كيەلى كىتاپتى زەرتتەيتىن ٴبىر عالىمنىڭ ايتۋىنشا، پەتىر كيەلى كىتاپ جازۋشىلارىن كيەلى رۋح «الىپ ٴجۇردى» دەگەندە، «تەڭىزگە قاتىستى وتە قىزىق مەتافورانى» قولدانعان. پەتىردىڭ ايتقىسى كەلگەنى، جەل كەمەگە باعىت بەرىپ، دىتتەگەن جەرىنە جەتكىزەتىنى ىسپەتتى، پايعامبارلار مەن كيەلى كىتاپ جازۋشىلارى ٶز تاپسىرمالارىن ورىنداي الۋلارى ٷشىن كيەلى رۋح ولارعا باعىت بەرىپ وتىرعان. الگى عالىم بەينەلى تىلمەن: «پايعامبارلار پايعامبارلىق ايتۋ ٷشىن جەلكەندەرىن جايعان»،— دەدى. ەحوبا ٶز تاراپىنان ارەكەت ەتتى. ول «جەلدى» ياكي كيەلى رۋحىن بەردى. ال كيەلى كىتاپ جازۋشىلارى ٶز تاراپىنان كيەلى رۋحتىڭ باعىتىنا ەردى.
1-قادام: رۋحاني ىستەرمەن ۇنەمى اينالىسىڭىز
2-قادام: سول ىستەرگە بارىنشا اتسالىسىڭىز (11-ابزاستى قاراڭىز) *
10، 11. كيەلى رۋح ٴبىزدى باعىتتاۋ ٷشىن قانداي ەكى قادام جاساۋىمىز كەرەك؟ مىسال كەلتىرىڭىز.
10 ارينە، بۇگىندە ەحوبا كيەلى رۋحىن بەرىپ، ادامدارعا كيەلى كىتاپتى جازدىرمايدى. الايدا ەحوبا حالقىنا باعىت بەرۋ ٷشىن كيەلى رۋحىن ٵلى دە قولدانۋدا. ەحوبا ٶز تاراپىنان ارەكەت ەتۋىن دوعارعان جوق. كيەلى رۋح ٴبىزدى باعىتتاپ جاتقانىنا قالاي كوز جەتكىزسەك بولادى؟ ٴبىز ٶز تاراپىمىزدان ارەكەت ەتىپ جاتىرمىز با، سونى تەكسەرۋىمىز كەرەك. ونى قالاي ىستەي الامىز؟
11 مىسالى، تەڭىزشى جەلدىڭ پايداسىن كورۋ ٷشىن ەكى نارسە ىستەۋى كەرەك. بىرىنشىدەن، ول قايىعىن جەلدىڭ ىرقىنا باعىتتاپ الۋى كەرەك. ەگەر قايىق جەل سوعاتىن جەرگە شىقپاي، كەمەجايدا تۇرا بەرسە، العا جۇزە المايدى. ەكىنشىدەن، جەلكەنىن مۇمكىندىگىنشە كەڭ جايۋى كەرەك. ٴتىپتى جەل سوعىپ تۇرسا دا، قايىق ونىڭ باعىتىنا قاراي بەيىمدەلمەسە، العا جىلجي المايدى. سول سياقتى، كيەلى رۋحتىڭ كومەگىنسىز ٴبىز ەحوباعا قىزمەت ەتە المايمىز. كيەلى رۋح ٴبىزدى باعىتتاسىن دەسەك، بىزگە ەكى قادام جاساۋ كەرەك. بىرىنشىدەن، ٴبىز كيەلى رۋح باعىتتاپ جاتقان ىستەرمەن اينالىسۋعا ٴتيىسپىز. ەكىنشىدەن، «جەلكەنىمىزدى كەڭ جايىپ»، سول ىستەردى بارىنشا جاقسى اتقارۋىمىز كەرەك (ٴزاب. 119:32). وسىلاي ەتسەك، كيەلى رۋح بىزگە جاڭا دۇنيە كەلگەنشە قارسىلىق پەن ٶمىردىڭ قاتال سوققىلارىنا ادالدىقپەن توزۋگە كومەكتەسەدى.
12. قازىر نەنى قاراستىرامىز؟
12 سونىمەن، كيەلى رۋحتىڭ بىزگە ەكى جولمەن كومەكتەسەتىنىن بىلدىك. كيەلى رۋح بىزگە كۇش بەرىپ، قيىندىقتاردان ادال وتۋگە جاردەم بەرەدى. سونداي-اق العا جىلجۋعا جانە ماڭگىلىك ومىرگە اپارار جولدان تايماۋعا كومەكتەسەدى. ال قازىر كيەلى رۋحتىڭ تولىق پايداسىن كورۋ ٷشىن قانداي ٴتورت نارسەنى ىستەۋىمىز كەرەكتىگىن قاراستىرايىق.
كيەلى رۋحتىڭ پايداسىن قالاي تولىق كورە الاسىز؟
13. تىموتەگە 2-حات 3:16، 17 گە ساي، جازبالار بىزگە قالاي ىقپال ەتەدى، ال ٴبىز نە ىستەۋىمىز كەرەك؟
13 بىرىنشىدەن، قۇداي ٴسوزىن وقىپ-زەرتتەڭىز (تىموتەگە 2-حات 3:16، 17 وقىڭىز). «قۇداي رۋحىنىڭ جەتەلەۋىمەن» دەپ اۋدارىلعان گرەك تىركەسى سوزبە-ٴسوز «قۇدايدىڭ ۇرلەۋىمەن» دەگەن ماعىنانى بىلدىرەدى. قۇداي كيەلى رۋحىن قولدانىپ ٶز ويلارىن كيەلى كىتاپ جازۋشىلارىنىڭ ويىنا «ۇرلەگەن». كيەلى كىتاپتى وقىپ، ويلانعاندا، قۇدايدىڭ نۇسقاۋلارى ٴبىزدىڭ ويىمىز بەن جۇرەگىمىزگە قونادى. كيەلى رۋحتىڭ قوزعاۋىنان تۋعان سول ويلار ٶمىرىمىزدى قۇدايدىڭ ەركىنە ساي باعىتتايدى (ەۆر. 4:12). ال كيەلى رۋحتىڭ تولىق پايداسىن كورۋ ٷشىن كيەلى كىتاپتى كۇن سايىن وقىپ، وي سۇزگىسىنەن وتكىزۋىمىز كەرەك. سوندا قۇداي ٴسوزى ٸس-ارەكەتىمىز بەن سوزىمىزگە ىقپال ەتەدى.
14. ا) نەگە قاۋىمدا كيەلى رۋح بار دەي الامىز؟ ٵ) قاۋىمدا قالايشا «جەلكەنىمىزدى كەڭ جايا» الامىز؟
14 ەكىنشىدەن، قۇدايعا وزگەلەرمەن بىرلەسە عيبادات ەتىڭىز (ٴزاب. 22:22). جينالىستاردا ەحوبانىڭ رۋحى بار (ايان 2:29). نەگە بۇلاي دەي الامىز؟ سەبەبى باۋىرلاستارمەن بىرگە عيبادات ەتۋگە جينالعاندا، كيەلى رۋح سۇراپ دۇعا ەتەمىز، قۇداي سوزىنە نەگىزدەلگەن پاتشالىق اندەرىن ايتامىز، سونداي-اق كيەلى رۋحپەن تاعايىندالعان باۋىرلاستاردىڭ كيەلى كىتاپقا نەگىزدەپ بەرگەن نۇسقاۋلارىن تىڭدايمىز. ٴدال سول كيەلى رۋح ايەل باۋىرلاستارعا تاپسىرمالارىن دايىنداۋعا ٵرى ورىنداۋعا كومەكتەسەدى. كيەلى رۋحتىڭ پايداسىن تولىق كورۋ ٷشىن، قاۋىمدا تۇسىنىكتەمەلەر بەرۋگە دايىندالىپ كەلۋىمىز كەرەك. وسىلايشا ٴبىز قاۋىمدا «جەلكەنىمىزدى كەڭ جايا الامىز».
15. ۋاعىز ىسىندە كيەلى رۋح بىزگە قالاي كومەكتەسەدى جانە ٴبىز نە ىستەۋىمىز كەرەك؟
15 ۇشىنشىدەن، ۋاعىز ىسىنە قاتىسىڭىز. ۋاعىزداۋ مەن ٴتالىم بەرۋ ىسىندە كيەلى كىتاپتى قولدانساق، كيەلى رۋحتىڭ بىزگە كومەكتەسۋىنە جول بەرەمىز (ريم. 15:18، 19). قۇداي رۋحىنىڭ پايداسىن تولىق كورۋ ٷشىن، ۋاعىز ىسىنە جۇيەلى تۇردە اتسالىسۋىمىز كەرەك، ٵرى ىڭعايى كەلگەن كەزدىڭ بارىندە كيەلى كىتاپتى قولدانۋىمىز قاجەت. ۋاعىزدا ادامدارمەن جاقسى اڭگىمەلەسۋدىڭ ٴبىر جولى — «ٶمىرىمىز بەن قىزمەتىمىز» جۇمىس داپتەرىندەگى پىكىرلەسۋ ۇلگىلەرىن قولدانۋ.
16. كيەلى رۋحتى تىكەلەي الۋدىڭ جولى قانداي؟
16 تورتىنشىدەن، ەحوباعا دۇعا ەتىڭىز (مات. 7:7—11؛ لۇقا 11:13). ەحوبادان كيەلى رۋح سۇراپ، دۇعا ەتسەك، وعان تىكەلەي يە بولامىز. دۇعالارىمىزدىڭ ەحوباعا جەتۋىنە نە كيەلى رۋحتى الۋىمىزعا ەش نارسە، تۇرمە قابىرعالارى دا، ٴتىپتى شايتاننىڭ ٶزى دە بوگەت بولا المايدى (جاق. 1:17). كيەلى رۋحتىڭ پايداسىن تولىق كورۋ ٷشىن قالاي دۇعا ايتقانىمىز دۇرىس؟ قازىر دۇعا تۋرالى كوبىرەك ٴبىلۋ ٷشىن لۇقا * عانا جازىپ كەتكەن ٴبىر مىسالدى قاراستىرايىق.
قادالا سۇراپ دۇعا ەتىڭىز
17. لۇقا 11:5—9، 13 تەگى يسانىڭ مىسالىنان دۇعاعا قاتىستى نە ۇيرەنەمىز؟
17 لۇقا 11:5—9، 13 وقىڭىز. يسانىڭ مىسالىنان كيەلى رۋح سۇراپ قالاي دۇعا ەتۋىمىز كەرەكتىگىن بىلەمىز. مىسالداعى كىسى «قادالىپ سۇراپ تۇرىپ العاندىقتان» قاجەتىن الدى. ول ٴتۇن ورتاسى بولسا دا، دوسىنان كومەك سۇراۋعا تارتىنبادى (لۇقا 11:8) *. يسا بۇل مىسالدى دۇعاعا قالاي قاتىستىردى؟ ول: «سۇراي بەرىڭدەر، سوندا بەرىلەدى؛ ىزدەي بەرىڭدەر، سوندا تاباسىڭدار؛ ەسىكتى قاعا بەرىڭدەر، سوندا اشىلادى»،— دەدى. ٴبىز بۇدان نە تۇيەمىز؟ دۇعادا ەحوبادان كيەلى رۋحتى قادالىپ تۇرىپ سۇراۋىمىز كەرەك.
18. يسانىڭ مىسالىنان كورگەنىمىزدەي، ەحوبا بىزگە كيەلى رۋح بەرەتىنىنە نەگە سەنىمدى بولا الامىز؟
18 يسانىڭ مىسالىنان ەحوبا بىزگە نەلىكتەن كيەلى رۋحىن بەرەتىنىن كورە الامىز. مىسالداعى كىسى قوناقجاي بولعىسى كەلدى. ول بەرەتىن تۇگى بولماسا دا، ٴتۇن ورتاسىندا كەلگەن قوناعىنا تاماق بەرۋدى مىندەت سانادى. يسانىڭ ايتۋىنشا، ول قادالىپ تۇرىپ سۇراعاندىقتان، كورشىسى وعان نان بەردى. مۇنىمەن يسا نە ايتقىسى كەلدى؟ ەگەر ٴتىپتى كەمەلسىز ادامنىڭ ٶزى قادالىپ تۇرىپ سۇراعان كورشىسىنە كومەكتەسسە، كوكتەگى مەيىرىمدى اكەمىز وزىنەن قادالىپ تۇرىپ كيەلى رۋح سۇراعاندارعا ونى قالاي عانا بەرمەيدى!؟ (ٴزاب. 10:17؛ 66:19).
19. جەڭىمپاز بولاتىنىمىزعا نەگە سەنىمدىمىز؟
19 شايتاننىڭ تىنباي شابۋىلداي بەرگەنىنە قاراماي، جەڭىسكە جەتەمىز. بۇعان نەگە سەنىمدىمىز؟ ويتكەنى كيەلى رۋح بىزگە ەكى جولمەن كومەكتەسەدى. بىرىنشىدەن، قيىندىققا توزۋگە كۇش بەرەدى. ەكىنشىدەن، جاڭا دۇنيە كەلگەنشە، ەحوباعا قىزمەت ەتە بەرۋگە كومەكتەسەدى. ەندەشە، كيەلى رۋحتىڭ پايداسىن تولىق كورەيىك!
41-ٵن ەستي كور مەنى دەپ وتىنەم
^ 5-ابزاس بۇل ماقالادان قۇدايدىڭ كيەلى رۋحى قيىندىقتارعا توزۋگە قالاي كومەكتەسەتىنىن بىلەمىز. سونداي-اق كيەلى رۋحتىڭ پايداسىن تولىق كورۋ ٷشىن نە ىستەۋ كەرەكتىگىنە توقتالامىز.
^ 16-ابزاس يسانىڭ ومىرىندە دۇعانىڭ ەرەكشە ورىن العانىنا باسقا ىزگى حابار جازۋشىلارىنا قاراعاندا لۇقا كوبىرەك نازار اۋدارعان (لۇقا 3:21؛ 5:16؛ 6:12؛ 9:18، 28، 29؛ 18:1؛ 22:41، 44).
^ 17-ابزاس «قادالىپ سۇراپ تۇرىپ العاندىقتان» دەپ اۋدارىلعان گرەك ٴسوزى سوزبە-ٴسوز «قاراپايىمدىلىقتىڭ جەتىسپەۋشىلىگىن»، «ۇياتتان جۇرداي بولۋدى» بىلدىرەدى. ٴبىراق وسى تارماقتا بۇل ٴسوز قايسارلىققا، تاباندىلىققا نۇسقايدى. يسانىڭ مىسالىنداعى كىسى وزىنە قاجەت نارسەنى قايتا-قايتا سۇراۋدان ۇيالىپ، تارتىنباعان. يسا وسى مىسال ارقىلى شاكىرتتەرىنە دۇعا ەتكەندە تاباندى بولۋلارى كەرەكتىگىن ايتقىسى كەلگەن (لق 11:9، 10).
^ 60-ابزاس سۋرەتتەر سيپاتتاماسى: 1-قادام: ەكى باۋىرلاس پاتشالىق سارايىنا كەلدى. ولار باۋىرلاستارمەن بىرگە قاۋىم كەزدەسۋىنە جينالدى. ال وندا ەحوبانىڭ رۋحى بار. 2-قادام: باۋىرلاستار قاۋىم كەزدەسۋىنە اتسالىسۋعا دايىندالىپ كەلگەن. وسى ەكى قادامدى ماقالادا ايتىلعان قۇداي ٴسوزىن وقىپ-زەرتتەۋگە، ۋاعىز ىسىنە قاتىسۋعا، ەحوباعا دۇعا ەتۋگە دە قاتىستىرۋعا بولادى.
