40-زەرتتەۋ ماقالاسى
«سوڭعى كۇندەردىڭ» سوڭعى كۇندەرىندە قولىمىز بوساماسىن
«بەرىك بولىڭدار، مىزعىماي تۇرىڭدار، يەمىزدىڭ ىسىندە ٵرقاشان كوپ ەڭبەكتەنىڭدەر» (قور. 1-ح. 15:58).
58-ٵن تاتۋلىقتى سۇيەتىندەردى ىزدەيىك
اڭداتپا *
1. «سوڭعى كۇندەردە» ٶمىر ٴسۇرىپ جاتقانىمىزعا نە نارسە كوزىمىزدى جەتكىزەدى؟
ٴسىز 1914-جىلدان كەيىن تۋىلدىڭىز با؟ ەندەشە ٴسىزدىڭ بار عۇمىرىڭىز وسى دۇنيەنىڭ «سوڭعى كۇندەرىندە» ٶتىپ جاتىر (ٴتىم. 2-ح. 3:1). يسانىڭ وسى ۋاقىتقا قاتىستى الدىن الا ايتىپ كەتكەن وقيعالاردىڭ بولىپ جاتقانىن ٴبارىمىز ەستىپ ٴجۇرمىز. سوعىس، اشارشىلىق، جەر سىلكىنىستەرى، ىندەتتەر، زاڭسىزدىقتىڭ كوبەيۋى، قۇداي حالقىنىڭ قۋدالانۋى — مۇنىڭ ٴبارى يسا ايتىپ كەتكەن وقيعالاردىڭ كەيبىرى (مات. 24:3، 7—9، 12؛ لۇقا 21:10—12). سونداي-اق ەلشى پاۋىلدىڭ ايتىپ كەتكەن ادام بويىنداعى جاعىمسىز مىنەز-قۇلىقتاردى دا كورىپ ٴجۇرمىز («بۇگىنگى ادامداردىڭ بولمىسى» دەگەن قورشاۋدى قاراڭىز). ٴبىز، ەحوبا كۋاگەرلەرى، «سوڭعى كۇندەردە» ٶمىر ٴسۇرىپ جاتقانىمىزعا ەش كۇماندانبايمىز (ميحا 4:1).
2. ٴبىز قانداي سۇراقتاردىڭ جاۋابىن ٴبىلۋىمىز كەرەك؟
2 1914-جىلدان بەرى تالاي ۋاقىت وتكەندىكتەن، ٴبىز قازىر «سوڭعى كۇندەردىڭ» سوڭعى كۇندەرىندە ٶمىر ٴسۇرىپ جاتىرمىز. وسى دۇنيەنىڭ سوڭى تاياپ قالعاندىقتان، ٴبىز كەيبىر ماڭىزدى سۇراقتاردىڭ جاۋابىن ٴبىلۋىمىز كەرەك: «سوڭعى كۇندەردىڭ» سوڭىندا قانداي وقيعالار بولماق؟ سول وقيعالاردى كۇتىپ جۇرگەن بىزدەردەن ەحوبا نە كۇتەدى؟
«سوڭعى كۇندەردىڭ» سوڭىندا نە بولادى؟
3. سالونيكالىقتارعا 1-حات 5:1—3 تارماقتارداعى پايعامبارلىققا ساي، الەمدىك كوشباسشىلار قانداي حاباردى جاريالايدى؟
3 سالونيكالىقتارعا 1-حات 5:1—3 وقىڭىز. پاۋىل «ەحوبانىڭ كۇنى» جايلى ايتىپ وتكەن. مانماتىنگە قارايتىن بولساق، «ەحوبانىڭ كۇنى» دەگەن «ۇلى بابىلعا»، ياعني دۇنيەجۇزىلىك جالعان دىندەر يمپەرياسىنا شابۋىل جاسالعاندا باستالىپ، ارماگەددونمەن اياقتالاتىن ۋاقىت ارالىعىنا نۇسقايدى (ايان 16:14، 16؛ 17:5). ەحوبانىڭ كۇنى باستالار الدىندا الەمدىك كوشباسشىلار «بەيبىتشىلىك پەن قاۋىپسىزدىكتى» جاريالاپ جاتادى. قازىردىڭ وزىندە كەيدە الەمدىك كوشباسشىلار ۇلتتار اراسىندا ورنىققان قارىم-قاتىناس جايلى وسىعان ۇقساس سوزدەردى ايتىپ جاتادى *. الايدا كيەلى كىتاپتا ايتىلعان «بەيبىتشىلىك پەن قاۋىپسىزدىك» تۋرالى حابار مۇلدەم باسقا حابار بولماق. نەگە؟ ويتكەنى بۇل حابار جاريالانعاندا، ادامداردىڭ كوبى الەمدىك كوشباسشىلار دۇنيەگە تىنىشتىق اكەلدى دەگەن ويدا بولادى. ٴبىراق شىن مانىندە «زور الاپات» باستالىپ، كەنەتتەن «جويىلاتىن كەز» كەلەدى (مات. 24:21).
الەمدىك كوشباسشىلار «بەيبىتشىلىك پەن قاۋىپسىزدىكتى» جاريالاعاندا، سول جالعان حابارعا الدانىپ قالماڭىز (3—6 ابزاستاردى قاراڭىز) *
4. ا) «بەيبىتشىلىك پەن قاۋىپسىزدىك» حابارىنا قاتىستى ٴبىز نەنى بىلمەيمىز؟ ٵ) بۇل حابار جايلى قازىر بىزگە نە بەلگىلى؟
4 بيلەۋشىلەردىڭ «بەيبىتشىلىك پەن قاۋىپسىزدىكتى» جاريالاۋىنا نە تۇرتكى بولاتىنىن نەمەسە بۇل حاباردى قالاي جاريالايتىنىن ٴبىز بىلمەيمىز. ول ٴبىر-اق رەت جاريالانا ما، الدە بىرنەشە رەت شەگەلەپ ايتىلا ما — مۇنى بولاشاقتا بىلە جاتارمىز. ٴبىراق ٴبىر جايت انىق: الەمدىك كوشباسشىلار جەر بەتىندە بەيبىتشىلىك ورناتا الادى ەكەن دەپ ويلاپ، سول حابارعا الدانىپ قالماۋىمىز كەرەك. كيەلى كىتاپتا بۇل حاباردىڭ جاريالاناتىنى بىزگە الدىن الا ايتىلدى ەمەس پە؟! بۇل — «ەحوبانىڭ كۇنى» باستالعالى تۇرعانىنىڭ بەلگىسى!
5. سالونيكالىقتارعا 1-حات 5:4—6 تارماقتاردا «ەحوبانىڭ كۇنىنە» دايىن بولۋ ٷشىن نە ىستەۋىمىز كەرەكتىگى ايتىلعان؟
5 سالونيكالىقتارعا 1-حات 5:4—6 وقىڭىز. پاۋىل «ەحوبانىڭ كۇنىنە» دايىن بولۋ ٷشىن نە ىستەۋىمىز كەرەكتىگىن ايتتى. ٴبىز «ۇيىقتاماي»، «وياۋ ٵرى قىراعى ٴجۇرۋىمىز» كەرەك. مىسالى، الەمنىڭ ساياسي ىستەرىنە ارالاسىپ كەتىپ، بەيتاراپتىعىمىزدان اتتاپ كەتۋدەن ساق بولۋىمىز كەرەك. ويتكەنى سول ىستەرگە ارالاسىپ كەتسەك، «وسى دۇنيەلىك» بولىپ كەتەمىز (جوح. 15:19). ال جەر بەتىندە بەيبىتشىلىك ورناتاتىن تەك قۇداي پاتشالىعى ەكەنىن ٴبىز جاقسى بىلەمىز.
6. وزگەلەرگە قالاي كومەكتەسكىمىز كەلەدى جانە نەگە؟
6 تەك ٶزىمىز عانا وياۋ جۇرمەي، ٴبىز باسقالاردىڭ دا كيەلى كىتاپتان دۇنيەدە بولاتىن جاعدايلار تۋرالى ٴبىلىپ، وياۋ جۇرۋلەرىنە كومەكتەسكىمىز كەلەدى. بۇنى قازىر ىستەمەسەك، زور الاپات باستالعان كەزدە ادامدار ٷشىن ەحوباعا بەت بۇرۋ تىم كەش بولادى. سوندىقتان ۋاعىز ٸسىن قازىر شۇعىل اتقارۋ قاجەت! *
قىزمەتتەن قولىمىز بوساماسىن
ٴبىز ۋاعىزداعاندا تەك قۇداي پاتشالىعى عانا جەر بەتىنە تىنىشتىق پەن قاۋىپسىزدىكتى ورناتا الاتىنىن كورسەتەمىز (7—9 ابزاستاردى قاراڭىز)
7. ەحوبا قازىر ٴبىزدىڭ نە ىستەگەنىمىزدى قالايدى؟
7 ەحوبا ونىڭ «كۇنى» باستالعانعا دەيىنگى از ۋاقىتىمىزدى ۋاعىز ىسىنە جۇمساعانىمىزدى قالايدى. ٴبىز «يەمىزدىڭ ىسىندە ٵرقاشان كوپ ەڭبەكتەنىپ» ٴجۇرمىز بە، جوق پا — سونى تەكسەرىپ وتىرۋىمىز كەرەك (قور. 1-ح. 15:58). يسا ٴبىزدىڭ نە ىستەيتىنىمىزدى الدىن الا ايتىپ كەتكەن. ول سوڭعى كۇندەردە قانداي وقيعالاردىڭ بولاتىنىن ايتا كەتىپ: «سونداي-اق الدىمەن بارلىق حالىقتارعا ىزگى حابار ۋاعىزدالۋ كەرەك»،— دەپ قوستى (مار. 13:4، 8، 10؛ مات. 24:14). ال ەندى ويلاپ كورىڭىزشى: ٴسىز قىزمەتكە شىققان سايىن وسى پايعامبارلىقتىڭ ورىندالۋىنا ۇلەس قوساسىز.
8. ۋاعىز ٸسى العا باسىپ جاتقانىن قايدان بىلەمىز؟
8 ۋاعىز ٸسى قالاي العا باسىپ جاتىر؟ جىل سايىن پاتشالىق جايلى ىزگى حاباردى كوپتەگەن ادام ەستۋدە. مىسالى، سوڭعى كۇندەر باستالعالى بەرى دۇنيەجۇزى بويىنشا جاريالاۋشىلاردىڭ سانى قالاي وسكەنىنە نازار اۋدارىڭىزشى. 1914-جىلى 43 ەلدە 5155 جاريالاۋشى بولدى. ال بۇگىندە 240 ەلدە 5،8 ميلليونعا جۋىق جاريالاۋشى بار. ٴبىراق بۇل ٸسىمىز ٵلى دە جالعاسىپ جاتىر. ٴبىز ادامزاتتىڭ بار قيىندىعىن تەك قۇداي پاتشالىعى عانا شەشىپ بەرەتىنىن ٵرى قاراي دا ادامدارعا جاريالاۋىمىز كەرەك (ٴزاب. 145:11—13).
9. ىزگى حاباردى نەگە ۋاعىزداي بەرۋىمىز كەرەك؟
9 ەحوبا ٴبىتتى دەمەيىنشە ۋاعىز ٸسى جالعاسا بەرەدى. ەحوبا قۇداي مەن يسا ٴماسىحتى تانىپ-ٴبىلۋ ٷشىن ادامداردىڭ قانشا ۋاقىتى قالدى؟ (جوح. 17:3). ٴبىز ونى بىلمەيمىز. ٴبىر بىلەتىنىمىز — زور الاپات باستالعانشا «ماڭگى ومىرگە ىڭعاي تانىتقان» ٵربىر ادام ىزگى حابارعا قۇلاق اسىپ، ەحوباعا قىزمەت ەتۋدى تاڭداي الادى (ەل. ٸس. 13:48). تىم كەش بولماي تۇرعاندا، ادامدارعا قالاي كومەكتەسە الامىز؟
10. ادامدارعا شىندىقتى ۇيرەتۋىمىزگە ەحوبا قالاي كومەكتەسىپ جاتىر؟
10 ادامدارعا شىندىقتى ۇيرەتۋ ٷشىن ەحوبا قاجەتتىنىڭ ٴبارىن بەرىپ جاتىر. ماسەلەن، ٴبىز اپتا ىشىندەگى كەزدەسۋدە ٴتالىم الامىز. بۇل كەزدەسۋلەر بىزگە العاش بارعاندا جانە ەكىنشى رەت، ٷشىنشى رەت بارعاندا نە ايتۋعا بولاتىنىن ۇيرەتەدى. زەرتتەۋ ساباقتارىن قالاي جۇرگىزۋگە بولاتىنىن دا ۇيرەنىپ جاتامىز. سونداي-اق ەحوبانىڭ ۇيىمى «ٴتالىم بەرۋ قۇرالدارىن» بەرىپ وتىر. ونىڭ ىشىندەگى ادەبيەتتەر، بەينەروليكتەر بىزگە كوپ جاعىنان كومەكتەسەدى. مىسالى:
-
اڭگىمە باستاۋعا؛
-
ىزگى حاباردى تارتىمدى ەتىپ جەتكىزۋگە؛
-
ادامنىڭ كيەلى كىتاپقا دەگەن ىقىلاسىن وياتۋعا؛
-
كيەلى كىتاپ زەرتتەۋ ساباعى كەزىندە شىندىقتى ۇيرەتۋگە؛
-
قىزىعۋشىلىق تانىتقانداردى ٴبىزدىڭ سايتقا كىرۋگە جانە پاتشالىق سارايلارىنا شاقىرۋعا.
ارينە، بۇل قۇرالداردىڭ بار بولعانى جاقسى عوي، ٴبىراق سول قولدا باردى قولدانۋ دا كەرەك *. مىسالى، ٴبىر اداممەن جاقسى اڭگىمەلەسىپ، ونىڭ قىزىعىپ جاتقانىن بايقاساڭىز، سايتىمىزدى كورسەتىپ، بۋكلەت نە جۋرنال جۇكتەپ بەرىڭىز. سوندا ٴسىز ونىمەن قايتا سويلەسكەنشە ول سونى وقي الادى. ٴيا، اي سايىن قىزمەتكە بارىنشا كوپ اتسالىسۋ — ٵرقايسىسىمىزعا بەرىلگەن جاۋاپكەرشىلىك.
11. كيەلى كىتاپتى ونلاين زەرتتەۋ ساباقتارى نە ٷشىن قۇراستىرىلدى؟
11 ٴبىزدىڭ ®jw.org سايتىمىزداعى كيەلى كىتاپتى ونلاين زەرتتەۋ ساباقتارى ارقىلى دا ەحوبا ادامدارعا شىندىقتى بىلۋگە كومەكتەسىپ جاتىر. بۇل ساباقتار نە ٷشىن قۇراستىرىلدى؟ اي سايىن دۇنيەجۇزى بويىنشا وتە كوپ ادام ينتەرنەتتەن كيەلى كىتاپتى ۇيرەتەتىن كۋرستاردى ىزدەيدى. ٴبىزدىڭ سايتىمىزداعى ساباقتار سونداي ادامدارعا قۇداي سوزىندەگى شىندىقتى بىلۋگە كومەكتەسەدى. كەيبىر ادامدار بىرەۋمەن كيەلى كىتاپ زەرتتەۋ ساباعىن وتۋگە كەلىسپەي، تارتىنشاقتاۋى مۇمكىن. سونداي ادامدارعا سايتىمىزداعى ونلاين ساباقتاردى كورسەتىڭىز نەمەسە ونىڭ سىلتەمەسىن جىبەرىڭىز *.
12. كيەلى كىتاپتى ونلاين زەرتتەۋ ساباقتارى ادامعا نە جايلى ۇيرەتەدى؟
12 كيەلى كىتاپتى ونلاين زەرتتەۋ ساباقتارى «كيەلى كىتاپ پەن ونىڭ اۆتورى»، «كيەلى كىتاپتىڭ باستى كەيىپكەرلەرى»، «كيەلى كىتاپتاعى ٷمىت سيلايتىن حابار» دەگەن تاقىرىپتاردى قامتيدى. وسى تاقىرىپتاردان ادام نە بىلەدى؟
-
كيەلى كىتاپ ادامعا قالاي كومەكتەسەتىنىن؛
-
ەحوبا، يسا مەن پەرىشتەلەردىڭ كىم ەكەنىن؛
-
قۇداي ادامداردى نە ٷشىن جاراتقانىن؛
-
قايعى-قاسىرەت پەن زۇلىمدىقتىڭ نەگە كوپ ەكەنىن.
سونداي-اق بۇل ساباقتار
-
ەحوبا قايعى-قاسىرەت پەن ٶلىمدى جوياتىنىن؛
-
مارقۇمداردى ومىرگە قايتاراتىنىن؛
-
ادامي ۇكىمەتتەردىڭ ورنىنا قۇداي پاتشالىعىن ورناتاتىنىن تۇسىندىرەدى.
13. ونلاين ساباقتار كۋاگەرلەرمەن وتەتىن كيەلى كىتاپ زەرتتەۋ ساباعىن الماستىرا ما؟ ٴتۇسىندىرىڭىز.
13 ونلاين ساباقتار كيەلى كىتاپتى زەرتتەۋ شاراسىن الماستىرمايدى. يسا بىزگە شاكىرت دايىنداۋ دەگەن مارتەبەلى ٸستى تاپسىردى. قىزىققان ادامدار ونلاين ساباقتاردى وقىپ، بىلگەندەرىن ۇناتىپ، كوبىرەك بىلۋگە ىنتالى بولادى دەگەن ٷمىتىمىز بار. سوسىن ول كيەلى كىتاپ زەرتتەۋ ساباعىنا دا كەلىسىپ قالار. ٵر ونلاين ساباقتىڭ سوڭىندا ادام كيەلى كىتاپتى ٶزى ەمەس، بىرەۋدىڭ كومەگىمەن زەرتتەۋگە ٶتىنىش تولتىرۋعا شاقىرىلادى. كۇن سايىن ٴبىزدىڭ ۇيىمعا تور بەكەت ارقىلى جەر جۇزىنەن 230 عا جۋىق ٶتىنىش ٴتۇسىپ جاتادى. ادامنىڭ كۋاگەرلەرمەن زەرتتەگەنى وتە ماڭىزدى.
شاكىرت دايىنداۋعا كۇش سالىڭىز
14. ماتاي 28:19، 20 دا يسا ايتقان نۇسقاۋعا ساي، ٴبىز نە نارسەگە بار كۇشىمىزدى سالۋىمىز كەرەك جانە نەگە؟
14 ماتاي 28:19، 20 وقىڭىز. كيەلى كىتاپ زەرتتەۋ ساباقتارىن وتكىزگەندە بار كۇشىمىزدى «شاكىرت دايىنداۋعا» سالىپ، ولارعا يسا «بۇيىرعانداردىڭ ٴبارىن ۇستانۋدى ۇيرەتۋىمىز قاجەت». ادامدارعا ەحوباعا قىزمەت ەتۋدى تاڭداپ، ونىڭ پاتشالىعىن قولداۋ وتە ماڭىزدى ەكەنىن تۇسىنۋلەرىنە كومەكتەسۋىمىز كەرەك. بۇل ٷشىن ادامداردى وقىپ-بىلگەندەرىن ىسكە اسىرۋعا، ومىرلەرىن ەحوباعا باعىشتاۋعا جانە شومىلدىرۋ راسىمىنەن وتۋگە تالپىندىرۋىمىز كەرەك. سوندا عانا ولار ەحوبانىڭ كۇنىنەن امان قالادى (پەت. 1-ح. 3:21).
15. ٴبىزدىڭ نە ىستەۋگە ۋاقىتىمىز جوق جانە نەگە؟
15 وسىعان دەيىن ايتىپ وتكەنىمىزدەي، وسى دۇنيەنىڭ سوڭىنا دەيىن وتە از ۋاقىت قالدى. سوندىقتان ٴماسىحتىڭ شاكىرتى بولعىسى كەلمەيتىن ادامدارمەن كيەلى كىتاپتى زەرتتەپ وتىراتىن ۋاقىت جوق (قور. 1-ح. 9:26). ٴبىزدىڭ ٸس وتە شۇعىل! تىم كەش بولماي تۇرعاندا پاتشالىق حابارىن تالاي ادامعا ەستىرتۋ كەرەك.
جالعان دىننەن اۋلاق جۇرەيىك
16. ايان 18:2، 4، 5، 8 گە ساي، ٴبىز نە ىستەۋىمىز كەرەك؟ (سىلتەمەنى دە قاراڭىز.)
16 ايان 18:2، 4، 5، 8 وقىڭىز. بۇل تارماقتاردا ەحوبا ٶز قىزمەتشىلەرىنەن تاعى نە كۇتەتىنى جازىلعان. بارلىق ماسىحشىلەر ۇلى بابىلدىڭ ەشقانداي ىسىنە قاتىسى جوق ەكەنىنە كوز جەتكىزۋ كەرەك. كيەلى كىتاپتى زەرتتەۋدى باستاماي تۇرعاندا ادام قانداي دا ٴبىر جالعان ٴدىننىڭ مۇشەسى بولعان شىعار. ولاردىڭ ٴدىني قىزمەتتەرىنە، ٸس-شارالارىنا قاتىسقان بولار. يا بولماسا سول ٴدىني ۇيىمدى قارجىلاي قولداعان شىعار. كيەلى كىتاپتى زەرتتەپ جۇرگەن ادام شومىلدىرۋ راسىمىنەن وتپەگەن جاريالاۋشى بولماي تۇرىپ، جالعان دىنمەن بايلانىسىن ٴبىرجولاتا ٷزۋ كەرەك. سول جالعان ٴدىننىڭ جانە جالعان ٴدىندى ناسيحاتتايتىن قانداي دا ٴبىر ۇيىمنىڭ مۇشەلىگىندە بار بولسا، ودان باس تارتامىن دەگەن حات جازۋ كەرەك *.
17. ٴماسىحشى قانداي جۇمىستان اۋلاق بولۋ كەرەك جانە نەگە؟
17 شىنايى ٴماسىحشى ىستەپ جۇرگەن جۇمىسىنىڭ ۇلى بابىلمەن ەشقانداي بايلانىسى جوق ەكەنىنە كوز جەتكىزۋ كەرەك (قور. 2-ح. 6:14—17). مىسالى، ول شىركەۋدە نە مەشىتتە جۇمىس ىستەمەۋ كەرەك. سونداي-اق ٴماسىحشى جالعان ٴدىندى ناسيحاتتايتىن عيماراتتىڭ كوركىن كەلتىرۋگە ارنالعان جۇمىستاردى ىستەمەس ەدى، ٴبىراق ٶرت ٴسوندىرۋ، جەدەل جاردەم سياقتى حالىققا باعىتتالعان شۇعىل قىزمەتتەردى اتقارۋى مۇمكىن. جەكە بيزنەسى بار بولسا، ٴماسىحشى ۇلى بابىلمەن بايلانىسى بار مەكەمەمەن قىزمەتتەس بولمايتىنى نەمەسە سودان تۇسكەن ۇسىنىستى قابىل المايتىنى انىق. نەگە ٴبىز بۇعان نىق بەكىندىك؟ ويتكەنى ٴبىز قۇدايدىڭ كوز الدىندا ارام سانالاتىن جالعان ٴدىننىڭ ىستەرى مەن كۇنالارىنا ورتاقتاسقىمىز كەلمەيدى (يشايا 52:11) *.
18. ٴبىر ەر باۋىرلاس قالاي كيەلى كىتاپ پرينسيپتەرىنە ساي ارەكەت ەتتى؟
18 كوپ جىل بۇرىن جەكە بيزنەسى بار اقساقالعا ٴبىر مەردىگەر قۇرىلىس ىسىنە قاتىستى جۇمىس ۇسىنادى. بۇل كىشىگىرىم جۇمىس قالاداعى شىركەۋدە جاسالۋ كەرەك ەدى. جۇمىس ۇسىنىپ جاتقان ادام باۋىرلاستىڭ شىركەۋدەگى جۇمىستاردان باس تارتاتىنىن بىلەتىن. ٴبىراق ول ەشكىمدى تاپپاي، امالى قالماعان سوڭ باۋىرلاستان ٶتىنىپتى. ٴبىراق باۋىرلاسىمىز كيەلى كىتاپ پرينسيپتەرىنە ساي ارەكەت ەتىپ، ۇسىنىستان باس تارتادى. كەلەسى اپتادا جەرگىلىكتى گازەتتە سول شىركەۋدە ايقىش ورناتىپ جاتقان باسقا ٴبىر ۇستانىڭ سۋرەتى جارىق كورەدى. باۋىرلاسىمىز كيەلى كىتاپ پرينسيپتەرىنەن اتتاپ، وسى جۇمىسقا كەلىسكەندە، گازەتتە سونىڭ سۋرەتى تۇرار ەدى. بۇل ونىڭ باۋىرلاستاردىڭ الدىنداعى جاقساتىنا كىر كەلتىرەر ەدى. ال ەحوبا نە سەزىنەتىنىن ويلاپ كورىڭىزشى.
ٴبىز نە بىلدىك؟
19، 20. ا) بۇل ماقالادان نە بىلدىك؟ ٵ) ٴبىز تاعى نە ٴبىلۋىمىز كەرەك؟
19 كيەلى كىتاپتىڭ پايعامبارلىعىنا ساي، الدا بولاتىن كەلەسى ۇلكەن وقيعا ول — الەمدىك كوشباسشىلاردىڭ «بەيبىتشىلىك پەن قاۋىپسىزدىك» حابارىن جاريالاۋى. ەحوباعا مىڭ دا ٴبىر راقمەت، ونىڭ بەرىپ جاتقان ٴتالىمىنىڭ ارقاسىندا ٴبىز الەمدىك كوشباسشىلاردىڭ جەر بەتىندە شىنايى ٵرى باياندى بەيبىتشىلىك ورناتا المايتىنىن بىلەمىز. سول وقيعا مەن سودان كەيىنگى جويىلۋ باستالماس بۇرىن ٴبىز نە ىستەۋىمىز كەرەك؟ ەحوبا پاتشالىق جايلى ىزگى حاباردى ۋاعىزداۋدان قولىمىز بوساماعانىن جانە كوبىرەك شاكىرت دايىنداعانىمىزدى قالايدى. سونىمەن قاتار ٴبىز بارلىق جالعان دىندەردەن بويىمىزدى اۋلاق ۇستاۋىمىز كەرەك. بۇعان ۇلى بابىلمەن بايلانىسى بار ۇيىمداردىڭ مۇشەلىگىنەن جانە ونىمەن بايلانىسى بار جۇمىستان باس تارتۋ دا كىرەدى.
20 «سوڭعى كۇندەردىڭ» سوڭعى كۇندەرىندە بۇدان باسقا دا وقيعالار بولادى. ەحوبانىڭ بىزدەن باسقا دا كۇتەتىنى بار. ول نە؟ جاقىندا بولاتىن وقيعالارعا ٴبىز قالاي دايىن بولا الامىز؟ بۇل تۋرالى كەلەسى ماقالادان بىلەمىز.
71-ٵن ٴبىز ەحوبانىڭ اسكەرىمىز!
^ 5-ابزاس جۋىردا الەمدىك كوشباسشىلار «بەيبىتشىلىك پەن قاۋىپسىزدىككە» قول جەتكىزدىك دەپ جارياعا جار سالادى. بۇل زور الاپاتتىڭ باستالعالى جاتقانىنىڭ بەلگىسى بولادى. سول حابار جاريالانعانعا دەيىن ەحوبا نە ىستەگەنىمىزدى قالايدى؟ وسى سۇراقتىڭ جاۋابىن بۇل ماقالادان تابامىز.
^ 3-ابزاس مىسالى، بىرىككەن ۇلتتار ۇيىمى ٶز رەسمي سايتىندا حالىقارالىق بەيبىتشىلىك پەن قاۋىپسىزدىكتى ورناتىپ جاتىرمىز دەپ ايتقان.
^ 6-ابزاس وسى جۋرنالداعى «قۇدايدىڭ جازاسى: ول جەتكىلىكتى تۇردە ەسكەرتە مە؟» دەگەن ماقالانى قاراڭىز.
^ 23-ابزاس «ٴتالىم بەرۋ قۇرالدارى» جايلى كوبىرەك مالىمەتتى 2018-جىلى قازان ايىندا «كۇزەت مۇناراسىندا» جارىق كورگەن «شىندىقتى ۇيرەتەيىك» ماقالاسىنان كورە الاسىز.
^ 11-ابزاس بۇل ساباقتار قازىر اعىلشىن جانە پورتۋگال تىلدەرىندە بار، بولاشاقتا ودان دا كوپ تىلدە شىعادى.
^ 16-ابزاس سونداي-اق ٴبىز مەملەكەت ەمەس، جالعان دىندەر ۇيىمداستىرعان بالالار لاگەرلەرىنەن نەمەسە دەمالىس نە وقۋ ورىندارىنان اۋلاق ٴجۇرۋىمىز كەرەك. مىسالى، كەيبىر ٴدىني ۇيىمدار جاتتىعۋ زالدارىن، باسسەيندەرىن، فيتنەس كلۋبتارىن، ٴتىل ۇيرەتۋ كۋرستارىن، مەكتەپتەرىن اشىپ جاتادى. مۇنداي مەكەمەلەر دىنگە قاتىسىمىز جوق دەۋى مۇمكىن. الايدا تۇپتەپ كەلگەندە، ولار ٴدىني يدەولوگيانى ناسيحاتتايدى.
^ 17-ابزاس ٴدىني ۇيىمدا جۇمىس اتقارۋعا قاتىستى كيەلى كىتاپتىڭ كوزقاراسى تۋرالى كوبىرەك بىلگىڭىز كەلسە، 1999-جىلى 15-ساۋىردە جارىق كورگەن «كۇزەت مۇناراسىنداعى» (حانزۇشا) «وقىرمان ساۋالدارىن» قاراڭىز.
^ 83-ابزاس سۋرەت سيپاتتاماسى: كافەگە كەلگەن ادامدار تەلەديداردان «بەيبىتشىلىك پەن قاۋىپسىزدىك» تۋرالى حابارلانعانىن كورىپ تاڭعالىپ جاتىر. قىزمەتتىڭ اراسىندا ٷزىلىس جاساعان كۋاگەر ەرلى-زايىپتى بۇل حابارعا الدانىپ قالعان جوق.
