قۇدايدىڭ جازاسى: ول جەتكىلىكتى تۇردە ەسكەرتە مە؟
اۋا رايىن باقىلاپ وتىرعان مامان كوپ شوعىرلانعان ايماققا قاۋىپتى داۋىلدىڭ ٴتونىپ كەلە جاتقانىن كورەدى. ادامداردىڭ ٶمىرىن ويلاعاندىقتان داۋىل كەلمەي تۇرعاندا شاماسى كەلگەنشە ول ٴبارىن ەسكەرتەدى.
ەحوبا دا جەر تۇرعىندارىنا ودان دا جويقىن «داۋىلدىڭ» كەلە جاتقانىن ەسكەرتىپ جاتىر. بۇنداي داۋىل تۋرالى ٴسىز اۋا رايىنان ەستىمەگەنسىز دە، ەستىمەيسىز دە. سوندا ەحوبا قالاي ەسكەرتەدى؟ ول ادامداردىڭ ارەكەت ەتۋىنە جەتكىلىكتى ۋاقىت بەرىپ جاتقانىن قايدان بىلەمىز؟ جاۋابىن الۋ ٷشىن، الدىمەن، ەحوبانىڭ ەجەلدە بەرگەن كەيبىر ەسكەرتۋلەرىن ەسىمىزگە تۇسىرەيىك.
قۇداي الدىن الا ەسكەرتتى
كيەلى كىتاپ جازىلعان زاماندا ەحوبا وسيەتتەرىنە ادەيى مويىنسۇنباعان ادامدارعا قانداي «داۋىل» ٴتونىپ كەلە جاتقانىن، ياعني ۇكىم شىعارىلعانىن ەسكەرتەتىن (ناق. س. 10:25؛ ەرم. 30:23). ول ٵر جاعدايدا ٴتىلازار ادامداردى بەلگىلەگەن ۋاقىتىنان بۇرىن ەسكەرتىپ، وزگەرۋ ٷشىن نە ىستەۋ كەرەكتىگىن ايتاتىن (پات. 2-ج. 17:12—15؛ نەح. 9:29، 30). قاجەتتى وزگەرىستەر جاساعىسى كەلەتىن ادامدار ٷشىن ەحوبا ٴجيى جەردەگى ادال قىزمەتشىلەرىن جىبەرىپ، ۇكىمىن ايتقىزعان جانە ادامدارعا تەز ارادا ارەكەت ەتۋ كەرەكتىگىن تۇسىنۋلەرىنە كومەكتەسكەن (اموس 3:7).
سونداي ادال قىزمەتشىلەردىڭ ٴبىرى — نۇح پايعامبار. ول قورىقپاستان كوپ جىل بويى ازعىن دا قاتىگەز زامانداستارىنا ٴتونىپ كەلە جاتقان دۇنيەجۇزىلىك توپان سۋ جايلى ەسكەرتتى (مۇس. 1-ج. 6:9—13، 17). سونداي-اق ول قۇتقارىلۋ ٷشىن نە قاجەت ەكەنىن ايتتى. نۇح كوپ ۋاعىزداعان، سوندىقتان ونى كيەلى كىتاپتا «ادىلدىكتى ۋاعىزداۋشى» دەپ اتاعان (پەت. 2-ح. 2:5).
نۇح قانشا تىرىسسا دا، توپان سۋعا دەيىنگى ادامدار قۇدايدىڭ حابارىنا قۇلاق اسپادى. ولار سەنىمدەرىنىڭ جوقتىعىن كورسەتتى. سوندىقتان «سۋ باسىپ»، ولاردىڭ «ٴبارىن الىپ كەتتى» (مات. 24:39؛ ەۆر. 11:7). ولار «ٴبىزدى قۇداي ەسكەرتپەدى» دەپ ەش ايتا المايتىن ەدى.
باسقا ٴبىر جولى ەحوبا جەكە ادامداردى ۇكىمى جايلى تۋرا «داۋىلدىڭ» الدىندا ەسكەرتتى. سويتسە دە ەسكەرتۋدى ەستىگەن ادامداردىڭ حابارعا قۇلاق اسۋىنا جەتكىلىكتى ۋاقىتتارى بولدى. مىسالى، ەحوبا مىسىردىڭ باسىنا تۇسكەن ون اپات كەزىندە الدىن الا ەسكەرتۋ ايتىپ وتىرعان. سولاردىڭ ٴبىرىن — جەتىنشى اپاتتىڭ الدىندا ايتتى. ەحوبا مۇسا مەن حاروندى پەرعاۋىن مەن ونىڭ قىزمەتشىلەرىنە جىبەرىپ، بۇرشاق جاۋدىراتىنىن ەسكەرتەدى. بۇرشاق ەرتەسىنە جاۋۋ كەرەك بولعاندىقتان، ەحوبا ادامدارعا تىعىلىپ، قاشىپ كەتۋ ٷشىن جەتكىلىكتى ۋاقىت بەردى مە؟ كيەلى كىتاپتا بىلاي دەلىنگەن: «پەرعاۋىننىڭ قىزمەتشىلەرىنىڭ ىشىندەگى ەحوبادان قورىققاندارى قۇلدارى مەن مالدارىن دەرەۋ ىشكە كىرگىزىپ الدى. ەحوبانىڭ سوزىنە ٴمان بەرمەگەندەرى بولسا قۇلدارى مەن مالدارىن دالادا قالدىردى» (مۇس. 2-ج. 9:18—21). ٴيا، ەحوبا جەتكىلىكتى ۋاقىت بەردى، سوندىقتان تەز ارەكەت ەتكەندەر اپاتتان باسقالار سياقتى زارداپ شەككەن جوق.
پەرعاۋىن مەن ونىڭ قىزمەتشىلەرىنە دە ٴدال ونىنشى اپاتتىڭ الدىندا ەسكەرتۋ ايتىلدى. ٴبىراق ولار بۇل ەسكەرتۋگە قۇلاق اسپادى (مۇس. 2-ج. 4:22، 23). ناتيجەسىندە ولاردىڭ تۇڭعىش ۇلدارى ٶلدى. نەتكەن قاسىرەت! (مۇس. 2-ج. 11:4—10؛ 12:29). ولاردىڭ ەسكەرتۋگە قۇلاق اسۋعا جەتكىلىكتى ۋاقىتتارى بولدى ما؟ ارينە! مۇسا ٴتونىپ كەلە جاتقان ونىنشى اپات تۋرالى بىردەن يسرايلدىكتەرگە ايتىپ ەسكەرتتى، ودان امان قالۋدىڭ جولىن دا ايتتى (مۇس. 2-ج. 12:21—28). مۇسانىڭ نۇسقاۋىنا قانشا ادام قۇلاق استى؟ كەيبىر ساناقتارعا سۇيەنسەك، 3 000 000 نە ودان دا كوپ يسرايلدىك پەن يسرايلدىك ەمەس باسقا حالىقتار جانە مىسىرلىقتار قۇدايعا مويىنسۇنعاننىڭ ارقاسىندا مىسىردان شىعىپ كەتتى (مۇس. 2-ج. 12:38 ٴسىلت.).
بۇل وقيعالار ەحوبا حالقىنا ەسكەرتۋلەرگە قۇلاق اسۋىنا جەتكىلىكتى ۋاقىت بەرەتىنىن كورسەتەدى (مۇس. 5-ج. 32:4). ەحوبا بۇنى نە ٷشىن ىستەيدى؟ ەلشى پەتىردىڭ ايتۋىنشا، ەحوبا «بىردە-ٴبىر ادامنىڭ جويىلماي، بارىنىڭ وكىنگەنىن قالايدى» (پەت. 2-ح. 3:9). ٴيا، قۇداي ادامداردىڭ قامىن ويلايدى. ۇكىمى جۇزەگە اسپاي تۇرعاندا، ادامداردىڭ ٶز ىستەرىنە وكىنىپ، ومىرلەرىندە قاجەتتى وزگەرىستەر جاساسا ەكەن دەيدى (يشايا 48:17، 18؛ ريم. 2:4).
قۇدايدىڭ ەسكەرتۋلەرىنە قۇلاق اسىڭىز
بۇگىندە بارلىق ادامدار دۇنيەجۇزى بويىنشا جاريالانىپ جاتقان ماڭىزدى ەسكەرتۋگە قۇلاق اسۋلارى كەرەك. جەردە بولعان كەزىندە يسا وسى دۇنيە «زور الاپاتتا» جويىلاتىنىن ايتىپ ەسكەرتتى (مات. 24:21). وسى ۇكىم جۇزەگە اساتىن ۋاقىت جاقىنداعان كەزدە يسا ىزباسارلارىنىڭ قانداي پايعامبارلىققا كۋا بولىپ، باستان وتكىزەتىنىن ايتىپ كەتكەن. وسىلايشا ول بۇگىندە ٴبىز ەستىپ-كورىپ جۇرگەن الەمدىك جاعدايلاردى سيپاتتاپ بەردى (مات. 24:3—12؛ لۇقا 21:10—13).
سول پايعامبارلىققا ساي، ەحوبا بۇگىندە ٵربىر ادامدى وعان قىزمەت ەتۋگە، وعان مويىنسۇنۋعا شاقىرىپ جاتىر. ول مويىنسۇنعىش ادامداردىڭ قازىردىڭ وزىندە جاقسى ٶمىر كەشكەنىن، ال بولاشاقتا ادىلدىك ورناعان جاڭا دۇنيەنىڭ باتالارىنا كەنەلگەنىن قاتتى قالايدى (پەت. 2-ح. 3:13). ەحوبا ادامدار ۋادەلەرىنە سەنىم ارتسا ەكەن دەيدى، بۇل ٷشىن ولارعا ٶمىر ساقتايتىن حابار بەردى. بۇل — «بۇكىل جەر بەتىندە ۋاعىزدالاتىن» «پاتشالىق جايلى ىزگى حابار» (مات. 24:14). قۇداي ٶز قىزمەتشىلەرىن ۇيىمداستىرىپ، سول حاباردىڭ 240 ەلدە ۋاعىزدالۋىن مۇمكىن ەتىپ وتىر. ەحوبا مۇمكىندىگىنشە كوپ ادامنىڭ ەسكەرتۋگە قۇلاق اسىپ، ٴتونىپ كەلە جاتقان ٵدىل ۇكىمىنىڭ «داۋىلىنان» امان قالعانىن قالايدى (ساف. 1:14، 15؛ 2:2، 3).
سونىمەن، ەحوبا ەسكەرتۋلەر ايتقاندا، ادامدارعا قۇلاق اسۋعا جەتكىلىكتى ۋاقىت بەرە مە، جوق پا — ماسەلە وندا ەمەس. ويتكەنى ول ٵردايىم جەتكىلىكتى ۋاقىت بەرەتىنىنە كوز جەتكىزدىك. ماسەلە ادامدار تىم كەش بولماي تۇرعاندا قۇدايدىڭ ەسكەرتۋلەرىنە قۇلاق اسا ما، جوق پا — مىنە، سوندا. قۇدايدىڭ حابارشىلارى رەتىندە مۇمكىندىگىنشە كوپ ادامعا وسى دۇنيەنىڭ سوڭى كەلگەندە امان قالۋعا كومەكتەسەيىك.