43-زەرتتەۋ ماقالاسى
ەحوباعا قالتقىسىز بەرىلگەندىك تانىتىڭىز
«ەحوبا — قالتقىسىز بەرىلگەندىكتى تالاپ ەتەدى» (ناع. 1:2).
51-ٵن ٴبىز قۇدايعا باعىشتالدىق!
اڭداتپا *
1. نەگە ەحوبا قالتقىسىز بەرىلگەندىك تانىتۋىمىزعا ابدەن لايىق؟
ەحوبا ٴبىزدى جاراتقاندىقتان ٵرى ٶمىر سيلاعاندىقتان قالتقىسىز بەرىلگەنىمىزگە ابدەن لايىق (ايان 4:11). الايدا ٴبىر قاۋىپ بار: ەحوبانى جاقسى كورىپ، ونى قۇرمەتتەسەك تە، قالتقىسىز بەرىلگەندىك تانىتپاي كەتۋىمىز مۇمكىن. ادام مۇنداي كۇيگە قالاي تۇسەتىنىن جاقسىلاپ ٴتۇسىنىپ العانىمىز ٴجون. ٴبىراق الدىمەن قالتقىسىز بەرىلگەندىك دەگەننىڭ نە ەكەنىن ٴبىلىپ الايىق.
2. مۇسانىڭ 2-جازباسى 34:14 كە ساي، ەحوباعا قالتقىسىز بەرىلگەنىمىزدى قالاي كورسەتەمىز؟
2 كيەلى كىتاپتا قۇدايعا بەرىلگەندىك دەگەن ونى تەرەڭ جاقسى كورۋ دەگەندى دە بىلدىرەدى. ەحوباعا قالتقىسىز بەرىلگەندە، ٴبىز تەك وعان عانا عيبادات ەتەمىز. ەشكىمنىڭ دە، ەشتەڭەنىڭ دە جۇرەگىمىزدەگى وعان تيەسىلى ورنىن الىپ قويۋىنا جول بەرمەيمىز (مۇسانىڭ 2-جازباسى 34:14 وقىڭىز).
3. نەگە ەحوباعا بەرىلگەندىگىمىز سوقىر سەزىم ەمەس؟
3 ٴبىزدىڭ بەرىلگەندىگىمىز سوقىر سەزىمنىڭ ىقپالىندا ەمەس. نەگە؟ ويتكەنى ول بىلگەن-تۇيگەن ايعاقتارعا نەگىزدەلگەن. ٴبىز قۇدايدىڭ كوركەم قاسيەتتەرىن ٴبىلىپ، تامسانا باستادىق. وعان نە ۇناپ، نە ۇنامايتىنىن ٴبىلىپ، كوزقاراسىنا قوسىلدىق. ەحوبا وعان ماڭگىلىك بويى قۋانا قىزمەت ەتكەنىمىزدى قالايتىنىن بىلدىك. سوندىقتان ٴبىز ونىڭ ورناتقان نورمالارىن ۇستانىپ ٶمىر سۇرەمىز. ونىمەن دوس بولۋعا مۇمكىندىك بەرگەنىن مارتەبە دەپ بىلەمىز (ٴزاب. 25:14). جاراتۋشىمىز جايىندا ٵر بىلگەنىمىز ٴبىزدى وعان جاقىنداتا تۇسەدى (جاق. 4:8).
4. ا) شايتان ەحوباعا دەگەن سۇيىسپەنشىلىگىمىزدى السىرەتۋ ٷشىن نە ىستەيدى؟ ٵ) بۇل ماقالادا نە قاراستىرامىز؟
4 ٸبىلىس وسى دۇنيەنى ٶز ۋىسىندا ۇستاپ وتىر. وسى دۇنيە ارقىلى ول ٴبىزدىڭ كادىمگى قالاۋلارىمىز بەن بۇرىس قالاۋلارىمىزدى ورشىتكىسى كەلەدى (ەفەس. 2:1—3؛ جوح. 1-ح. 5:19). ول ەحوباعا دەگەن ٴبىرتۇتاس سۇيىسپەنشىلىگىمىزدى ٴبولىپ تاستاپ، ونى باسقا نارسەلەرگە دە ارناعانىمىزدى كوزدەيدى. شايتان قانداي ەكى ٴتاسىل ارقىلى ٶز ماقساتىنا جەتكىسى كەلەدى؟ ٴبىرىنشىسى — اقشاعا قۇمارتقىزۋعا تىرىسادى، ەكىنشىسى — ويىن-ساۋىقتى بۇرىس تاڭداۋىمىزعا ىقپال ەتكىسى كەلەدى.
اقشاقۇمارلىقتان ساق بولايىق
5. نەگە اقشاعا قۇمار بولىپ كەتۋدەن ساق بولۋىمىز كەرەك؟
5 تاماعى توق، كيىمى كوك، باسىندا جايلى باسپاناسى بولسا، ٵر ادامنىڭ قالاۋى وسى ەمەس پە؟! الايدا ٴبىز اقشاعا قۇمار بولىپ كەتۋدەن ساق بولۋىمىز كەرەك. بۇگىندە كوپ ادام اقشانى دا، اقشاعا ساتىپ الاتىن نارسەلەردى دە جاقسى كورەدى (ٴتىم. 2-ح. 3:2). يسا ٶز ىزباسارلارىنىڭ بويىندا وسىنداي «ماحابباتتىڭ» پايدا بولۋى مۇمكىن ەكەنىن بىلگەن. سوندىقتان ول: «ەشكىم ەكى قوجايىنعا بىردەي قۇل بولا المايدى. ولاي ەتكەن كۇندە بىرەۋىن جەك كورىپ، ەكىنشىسىن جاقسى كورەدى، نەمەسە بىرىنە ادال بولىپ، ەكىنشىسىنە نەمكەتتى قارايدى. سەندەر قۇدايعا جانە بايلىققا بىردەي قىزمەت ەتە المايسىڭدار»،— دەپ ايتقان (مات. 6:24). ادام ەحوباعا قىزمەت ەتە ٴجۇرىپ، تىم كوپ ۋاقىتى مەن كۇشىن بايۋ ٷشىن جۇمساپ جۇرسە، ول، بىلايشا ايتقاندا، ەكى قوجايىنعا بىردەي قىزمەت ەتۋگە تىرىسىپ جاتىر دەگەن ٴسوز. ونداي ادام ەحوباعا قالتقىسىز بەرىلگەندىك تانىتا المايدى.
لاۋديكيدەگىلەر وزدەرىن وسىلاي كورگەن، ال ەحوبا مەن يسانىڭ كوزىندە وسىنداي بولعان (6-ابزاستى قاراڭىز)
6. يسانىڭ لاۋديكيدەگى ماسىحشىلەرگە ايتقانى بىزگە قاي جاعىنان ساباق؟
6 لاۋديكي قالاسىنداعى ماسىحشىلەر: «مەن داۋلەتتىمىن، بايىپ الدىم، ەشتەڭەگە مۇقتاج ەمەسپىن»،— دەپ ماقتانعان. ٴبىراق ەحوبا مەن يسانىڭ كوزىندە ولار «سورلى، بەيشارا، كەدەي، سوقىر ٵرى جالاڭاش» ەدى. يسا ولارعا كەڭەس بەردى، ٴبىراق باي بولعاندارى ٷشىن ەمەس، بايلىققا دەگەن «ماحابباتتارى» ەحوبامەن دوستىعىن بۇزعانى ٷشىن (ايان 3:14—17). ٴبىز اقشاعا دەگەن قۇمارلىعىمىزدىڭ ارتىپ جاتقانىن بايقاپ جاتساق، تەز ارادا وي-سانامىزدى تۇزەتۋىمىز كەرەك (ٴتىم. 1-ح. 6:7، 8). ولاي ەتپەسەك، ٴبىز ەحوبامەن قاتار باسقا نارسەلەردى دە سۇيە باستايمىز. وندايدا ەحوبا عيباداتىمىزدى قابىلداماي قويادى. ويتكەنى ول «قالتقىسىز بەرىلۋدى تالاپ ەتەدى» (مۇس. 5-ج. 4:24). ولاي بولسا، اقشا ٴبىز ٷشىن قالاي تىم ماڭىزدى بولىپ كەتۋى مۇمكىن؟
7—9. دەيۆيدتىڭ مىسالىنان نە ۇيرەندىڭىز؟
7 امەريكادا تۇراتىن دەيۆيد ەسىمدى ەڭبەكقور اقساقالدىڭ وقيعاسىن كورەيىك. ول وزىنە «جۇمىسىمدى بەرىلىپ ىستەيتىن اداممىن» دەپ باعا بەرگەن. ونىڭ كومپانياسى وعان كوپ اقشا تولەيتىن، ٵرى ول ەل بويىنشا ٶز ٸسىنىڭ شەبەرى دەپ تانىلعان. «ول كەزدە مەن جەتكەن جەتىستىگىمنىڭ ٴبارىن ەحوبانىڭ باتاسى دەپ كورەتىنمىن»،— دەيدى ول ٴبىر سوزىندە. ٴبىراق بۇل راسىندا سولاي ما؟
8 دەيۆيد ٶز جۇمىسىنىڭ ەحوبامەن دوستىعىنا كەرى اسەر تيگىزىپ جاتقانىن بايقاي باستايدى. ول بىلاي دەيدى: «مەن قاۋىمدا، ٴتىپتى قىزمەتتە جۇمىستاعى پروبلەمالاردى ويلاي بەرەتىنمىن. ٴيا، مەن كوپ اقشا تاباتىنمىن، ٴبىراق كۇننەن كۇنگە سترەسسكە ۇشىراپ، نەكەمدە دە قيىندىقتار تۋىنداپ جاتتى».
9 دەيۆيد ول ٷشىن نەنىڭ ماڭىزدى ەكەنىن شەشىپ الۋ كەرەكتىگىن ٴتۇسىندى. «ومىرىمدە وزگەرىس جاسايمىن دەپ نىق شەشىم قابىلدادىم»،— دەيدى ول. دەيۆيد ٶزىنىڭ جۇمىس كەستەسىن وزگەرتىپ، باستىعىنا ايتادى. ناتيجەسىندە نە بولدى؟ دەيۆيد جۇمىسىنان ايىرىلدى! سودان كەيىن ول نە ىستەدى؟ «كەلەسى كۇنى-اق مەن ۇزبەي قوسالقى ٸزاشار بولىپ قىزمەت ەتۋ ٷشىن ٶتىنىش تولتىردىم»،— دەدى ول. وزدەرىن قامتاماسىز ەتۋ ٷشىن دەيۆيد پەن ونىڭ ايەلى ۇلكەن عيماراتتاردا تازالىق جۇمىستارىن ىستەدى. ٴبىرشاما ۋاقىتتان كەيىن ول تۇراقتى ىزاشارلىق قىزمەتتى باستادى، كەيىن ايەلى دە وعان قوسىلدى. بۇل ەرلى-زايىپتى كوپشىلىك مەنسىنبەي قارايتىن جۇمىستى ىستەۋدى تاڭدادى. ٴبىراق جۇمىستىڭ قانداي ٴتۇرىن اتقارىپ جاتقاندارى ولار ٷشىن ماڭىزدى ەمەس ەدى. ولاردىڭ تاپقان اقشالارى بۇرىنعىمەن سالىستىرعاندا الدەقايدا از بولسا دا، اي سايىنعى شىعىندارىن جابۋعا تۇپ-تۋرا جەتەدى. ولار ەحوبانى ومىرلەرىندە ٴبىرىنشى ورىنعا قويۋدى شەشتى. سونىڭ ارقاسىندا پاتشالىقتىڭ مۇددەسىن ٴبىرىنشى ورىنعا قوياتىنداردى ەحوبا ٵردايىم قامقورلايتىنىنا كوزدەرى جەتىپ جاتىر (مات. 6:31—33).
10. جۇرەگىمىزدى قالاي قورعاي الامىز؟
10 اقشامىز كوپ يا از بولسىن، بارىمىزگە جۇرەگىمىزدى قورعاۋ كەرەك. بۇنى قالاي ىستەي الامىز؟ اقشاقۇمارلىقتان اۋلاق بولىڭىز. جۇمىسىڭىزدىڭ ەحوباعا دەگەن قىزمەتىڭىزدەن ارتىق بولىپ كەتۋىنە جول بەرمەڭىز. مۇنى قالاي تەكسەرسە بولادى؟ مىنا سۇراقتارعا جاۋاپ بەرىپ كورىڭىز: «جينالىستا نە قىزمەتتە جۇمىسىم تۋرالى قانشالىقتى ٴجيى ويلايمىن؟ ەرتەڭگى كۇنى اقشاسىز قالىپ كەتپەيمىن بە دەپ ۇنەمى ۋايىمدايمىن با؟ اقشا مەن دۇنيە-مۇلىك ماسەلەسى نەكەمدە قيىندىقتار تۋدىرا ما؟ وزگەلەر مەنسىنبەي قارايتىن، ٴبىراق ەحوباعا كوبىرەك قىزمەت ەتۋگە مۇمكىندىك بەرەتىن جۇمىستى ىستەۋگە دايىنمىن با؟» (ٴتىم. 1-ح. 6:9—12). وسى سۇراقتار جايلى ويلانعاندا، ەحوبانىڭ ٴبىزدى جاقسى كورەتىنىن جانە قالتقىسىز بەرىلگەندەرگە: «مەن سەنى ەشقاشان قالدىرمايمىن، ەشقاشان تاستامايمىن»،— دەپ ۋادە بەرەتىنىن ەستە ۇستاڭىز. وسىنى بىلگەن ەلشى پاۋىل سول سەبەپتى «اقشاقۇمار بولماي ٶمىر سۇرۋگە» كەڭەس بەرگەن (ەۆر. 13:5، 6).
ويىن-ساۋىقتى ويلانىپ تاڭداڭىز
11. ويىن-ساۋىق ٴتۇرى ادامعا قالاي اسەر ەتۋى مۇمكىن؟
11 ەحوبا قۋانىپ ٶمىر كەشكەنىمىزدى قالايدى. ٴبىز كوڭىل كوتەرگەندە، دەمالعاندا، ٴبىر جاساپ قالاتىنىمىز راس. قۇداي سوزىندە دە: «ادام بالاسى ٷشىن ٸشىپ-جەپ، بەينەتىنىڭ زەينەتىن كورىپ، راقاتتانۋدان ارتىق ەشتەڭە جوق»،— دەلىنگەن (ۋاع. 2:24). الايدا بۇل دۇنيەدەگى ويىن-ساۋىق تۇرلەرىنىڭ كوبىسى بىزگە جامان جاعىنان اسەر ەتەدى. ولار ادامداردىڭ مورالدىق نورمالارىن تومەندەتىپ، قۇداي ٴسوزى ايىپتايتىن نارسەلەردى قابىلداۋعا، ٴتىپتى جاقسى كورۋگە تالپىندىرادى.
سىزگە ويىن-ساۋىقتى كىم دايىندايدى؟ (11—14 ابزاستاردى قاراڭىز) *
12. قورىنتتىقتارعا 1-حات 10:21، 22 گە ساي، نەگە ويىن-ساۋىق تۇرلەرىن ويلاپ تاڭداۋىمىز كەرەك؟
12 ٴبىز ەحوباعا قالتقىسىز بەرىلگەندىك تانىتقىمىز كەلەدى. سوندىقتان ٴبىز «ەحوبانىڭ دا، جىنداردىڭ دا داستارقانىنان بىردەي جەي المايمىز» (قورىنتتىقتارعا 1-حات 10:21، 22 وقىڭىز). ادەتتە بىرەۋمەن تاماقتانۋ دوستىقتىڭ بەلگىسى بولىپ جاتادى. ٴبىز قاتىگەزدىكتى، باقسى-بالگەرلىكتى، ازعىندىقتى، باسقا دا جامان قۇمارلىقتار مەن كوزقاراستاردى ناسيحاتتايتىن ويىن-ساۋىق تۇرلەرىن تاڭداساق، قۇدايدىڭ جاۋلارىمەن بىرگە وتىرىپ، ولار دايىنداعان تاماقتى جەگەندەي بولامىز. ناتيجەسىندە وزىمىزگە دە زيانى تيەدى، ەحوبامەن دوستىعىمىزدى دا بۇزادى.
13، 14. جاقىپ 1:14، 15 ٴتى ەسكەرسەك، نەگە ويىن-ساۋىق تۇرلەرىن تاڭداعاندا اباي بولۋىمىز كەرەك؟ مىسال كەلتىرىڭىز.
13 ويىن-ساۋىق تۇرلەرى مەن تاماقتىڭ كەيبىر ۇقساستىقتارىن قاراستىرايىق. ٴبىز نە جەيتىنىمىزدى ٶزىمىز تاڭداپ، ٶزىمىز قاداعالاي الامىز. ٴبىراق تاماق ىشىمىزگە كەتكەننەن كەيىن اعزامىزدا ٴبىز قاداعالاي المايتىن پروسەستەر جۇرە باستايدى، ٴسۇيتىپ، تاماقتاعى قورەكتىك زاتتار اقىرىندا اعزامىزدىڭ ٴبىر بولشەگىنە اينالادى. دۇرىس تاماق دەنساۋلىققا پايدا اكەلسە، زياندى تاماق دەنساۋلىققا كەسىرىن تيگىزەدى. تاماقتىڭ اسەرى بىردەن بايقالمايتىن شىعار، ٴبىراق ۋاقىت وتە كەلە بۇل ايقىن كورىنەتىن بولادى.
14 سول سياقتى ويىن-ساۋىق تۇرلەرىن ٶزىمىز تاڭداپ، سانامىزدى نەمەن تولتىراتىنىمىزدى ٶزىمىز قاداعالاي الامىز. ٴبىراق كەيىن ٴبىز توقتاتا المايتىن پروسەستەر ٴجۇرىپ، ويىن-ساۋىق ٴتۇرى سانامىز بەن جۇرەگىمىزگە اسەر ەتە باستايدى. دۇرىس ويىن-ساۋىق ٴتۇرى بىزگە كۇش بەرسە، جامان ٴتۇرى زيانىن تيگىزەدى (جاقىپ 1:14، 15 وقىڭىز). جامان ويىن-ساۋىق تۇرىنىڭ اسەرى بىردەن بايقالمايتىن شىعار، ٴبىراق بىرتە-بىرتە ول ايقىن بولادى. سوندىقتان كيەلى كىتاپ ٴبىزدى بىلاي دەپ ەسكەرتەدى: «الدانباڭدار! قۇداي ٶزىن مازاقتاتىپ قويمايدى. ادام نە ەكسە، سونى ورادى: ٴتان قۇمارلىعىن ويلاپ سەپكەن ادام سودان تۋاتىن ٶلىمدى ورادى» (عال. 6:7، 8). ەحوبا جەك كورەتىن نارسەلەردى ناسيحاتتايتىن بارلىق ويىن-ساۋىق تۇرلەرىنەن باس تارتۋ وتە ماڭىزدى! (ٴزاب. 97:10).
15. ەحوبا بىزگە قانداي سي بەرىپ وتىر؟
15 ەحوبانىڭ كوپتەگەن قىزمەتشىلەرى ٴبىزدىڭ كەرەمەت ®JW Broadcasting ينتەرنەت-تەلەارنامىزدى قاراعاندى جاقسى كورەدى. مەريلين دەگەن ايەل باۋىرلاس بىلاي دەيدى: «JW Broadcasting ماعان وڭ كوزقاراس ساقتاۋعا كومەكتەسىپ كەلەدى، ول جاقتاعى ۆيدەولاردى سۇرىپتاپ وتىرۋدىڭ قاجەتى جوق. مەن جالعىزدىق سەزىنگەندە نە مۇڭايعاندا جىگەرلەندىرەرلىك ٴبىر بايانداما نەمەسە تاڭعى عيبادات كورەمىن. بۇل مەنى ەحوباعا جانە ونىڭ ۇيىمىنا جاقىنداتادى. JW Broadcasting مەنىڭ ٶمىرىمدى تولىقتاي وزگەرتتى». ٴسىز ەحوبانىڭ سيىن كادەگە جاراتىپ ٴجۇرسىز بە؟ JW Broadcasting-تەگى اي سايىن شىعاتىن باعدارلامامەن قاتار رۋحاني قورجىنىمىزدا كەز كەلگەن ۋاقىتتا كورىپ-تىڭداۋعا بولاتىن كوپتەگەن اۋديو-ۆيدەو باعدارلامالار، رۋحتى كوتەرەتىن اندەر دە بار.
16، 17. ويىن-ساۋىق تۇرلەرىنە قانشا ۋاقىت جۇمسايتىنىمىزدى نەگە قاداعالاۋىمىز كەرەك جانە مۇنى قالاي ىستەسەك بولادى؟
16 ٴبىز ويىن-ساۋىقتىڭ قانداي تۇرلەرىن تاڭدايتىنىمىزدى عانا ەمەس، ولارعا قانشا ۋاقىت جۇمسايتىنىمىزدى دا قاداعالاۋىمىز كەرەك. اباي بولماساق، كوپ ۋاقىتىمىز رۋحاني ىستەرگە ەمەس، ويىن-ساۋىققا كەتۋى مۇمكىن. كوبىسى ويىن-ساۋىققا كەتەتىن ۋاقىتىن قاداعالاۋ قيىن ەكەنىن بايقاعان. مىسالى، 18 جاسار ابيگەيل بىلاي دەيدى: «كۇننىڭ سوڭىندا تەلەديداردىڭ الدىندا وتىرىپ مەن كادىمگىدەي دەمالىپ قالامىن. ٴبىراق ٶزىمدى تىزگىندەپ وتىرماسام، ساعاتتاپ وتىرىپ قالۋىم ابدەن مۇمكىن». ال سامۋيل دەگەن جاس ەر باۋىرلاس بىلاي دەيدى: «كەيدە مەن ينتەرنەتتەن شەتى-قيىرى جوق قىسقا بەينەروليكتەردى قاراپ وتىرىپ قالامىن. نەگىزى مەن بىرەۋىن كورەمىن دەپ كىرەمىن، ٴبىراق 3-4 ساعاتتىڭ قالاي ٶتىپ كەتكەنىن تۇسىنبەي قالامىن».
17 ويىن-ساۋىققا جۇمسايتىن ۋاقىتىڭىزدى قالاي قاداعالاساڭىز بولادى؟ بىرىنشىدەن، ادەتتە قانشا ۋاقىت جۇمسايتىنىڭىزدى انىقتاپ الىڭىز. نەگە سونى ٴبىر اپتا بويى تەكسەرىپ كورمەسكە؟ ول ٷشىن تەلەديدار كورۋگە، ينتەرنەت شارلاۋعا، تەلەفون يا پلانشەتتەن ويىن ويناۋعا قانشا ساعات كەتەتىنىن كۇن سايىن جازىپ وتىرىڭىز. ولارعا تىم كوپ ۋاقىت كەتىپ جاتقانىن تۇسىنسەڭىز، ۋاقىت شەگىن بەلگىلەڭىز. الدىمەن، ۋاقىتىڭىزدى ماڭىزدىراق ىستەرگە جۇمساڭىز، ال قالعان ۋاقىتتى ويىن-ساۋىققا قالدىرىڭىز. سوسىن ەحوبادان جوسپارىڭىزدى ۇستانۋ ٷشىن كومەك سۇراڭىز. وسىلايشا كيەلى كىتاپتى جەكە زەرتتەۋگە، وتباسىلىق عيباداتقا، قاۋىم كەزدەسۋلەرىنە، ۋاعىزداۋعا سىزدە ٵردايىم ۋاقىت تا، كۇش تە بولادى. سول كەزدە «ويىن-ساۋىققا كوپ ۋاقىت جۇمساپ قويدىم-اۋ» دەپ ٶزىڭىزدى كىنالى سەزىنبەيسىز.
ەحوباعا قالتقىسىز بەرىلگەندىك تانىتامىز
18، 19. ەحوباعا قالتقىسىز بەرىلگەنىمىزدى قالاي دالەلدەي الامىز؟
18 شايتاننىڭ دۇنيەسىنىڭ سوڭى جايلى جانە جاڭا دۇنيەنىڭ ورنايتىنى جايلى جازعان سوڭ، ەلشى پەتىر بىلاي دەپ قوستى: «سۇيىكتى باۋىرلاستار، وسىلاردى كۇتىپ جۇرگەندەرىڭدە، اقىر سوڭىندا ول سەندەردى كىرشىكسىز، تازا ٵرى تاتۋ دەپ تابۋ ٷشىن قولدان كەلگەننىڭ ٴبارىن ىستەڭدەر» (پەت. 2-ح. 3:14). ٴبىز پەتىردىڭ بەرگەن كەڭەسىنە قۇلاق اسساق جانە مورالدىق جاعىنان دا، رۋحاني جاعىنان دا تازا بولۋ ٷشىن بارىمىزدى سالساق، ەحوباعا قالتقىسىز بەرىلگەنىمىزدى كورسەتەمىز.
19 شايتان مەن ونىڭ دۇنيەسى ەحوبانى ٴبىرىنشى ورىننان ىعىستىرىپ جىبەرۋدى توقتاتار ەمەس (لۇقا 4:13). الايدا ەشقانداي قيىندىقتارعا قاراماستان جۇرەگىمىزدەگى ەحوباعا تيەسىلى ورىندى ەشكىمگە دە، ەش نارسەگە دە بەرمەيمىز. ٴبىز ەحوباعا عانا قالتقىسىز بەرىلۋگە نىق بەكىنگەنبىز، ويتكەنى ول سوعان لايىق!
30-ٵن ەحوبا، قۇدايىمسىڭ، ادال دوسىم
^ 5-ابزاس ٴبىز ەحوبانى جاقسى كورگەندىكتەن وعان قىزمەت ەتەمىز. الايدا ٴبىز جالعىز وعان عانا عيبادات ەتەمىز بە؟ بۇل قابىلدايتىن شەشىمدەرىمىزدەن كورىنەدى. ەحوباعا قانشالىقتى قالتقىسىز بەرىلگەنىمىزدى انىقتاۋ ٷشىن ومىردەگى ەكى سالانى قاراستىرىپ كورەيىك.
^ 53-ابزاس سۋرەت سيپاتتاماسى: ٴبىز سانيتاريالىق جاعدايى ناشار اسحانادا دايىندالعان تاماقتى جەمەس ەدىك. ەندەشە زۇلىمدىققا، باقسى-بالگەرلىككە، ازعىندىققا تولىپ تۇرعان دۇنيەنى قارايمىز با؟
