3-زەرتتەۋ ماقالاسى
جۇرەگىڭىزدى قالاي ساقتاي الاسىز؟
«بارىنەن دە بۇرىن ساقتا جۇرەگىڭدى» (ناق. س. 4:23).
36-ٵن جۇرەگىمىزدى ساقتايىق
اڭداتپا *
1—3. ا) ەحوبا سۇلەيمەندى نە ٷشىن جاقسى كوردى جانە سۇلەيمەن قانداي باتالارعا كەنەلدى؟ ٵ) وسى ماقالادا قانداي سۇراقتارعا جاۋاپ الامىز؟
سۇلەيمەن ورىمدەي جاس كەزىندە يسرايلدىڭ پاتشاسى اتاندى. بيلىككە جاڭا كەلگەنىندە، ەحوبا ونىڭ تۇسىنە ەنىپ: «وزىڭە نە بەرگەنىمدى قالايسىڭ، سۇرا»،— دەدى. سۇلەيمەن بىلاي دەپ جاۋاپ بەردى: «مەن تىم جاسپىن، تاجىريبەم دە جوق... سوندىقتان حالقىڭا تورەلىك ەتە... الۋىم ٷشىن، قىزمەتشىڭە مويىنسۇنعىش جۇرەك سيلاي كور» (پات. 1-ج. 3:5—10). ونىڭ «مويىنسۇنعىش جۇرەك» سۇراعان كىشىپەيىلدىلىگىنە قالاي عانا ٴتانتى بولمايسىڭ؟! ەحوبانىڭ سۇلەيمەندى جاقسى كورگەنى دە سوندىقتان! (سام. 2-ج. 12:24). جاپ-جاس پاتشانىڭ بۇل وتىنىشىنە ريزا بولعان ەحوبا وعان «اقىل-پاراساتقا تولى جۇرەك سيلادى» (پات. 1-ج. 3:12).
2 قۇدايعا ادال شاعىندا سۇلەيمەن كول-كوسىر باتاعا كەنەلدى. مىسالى، «يسرايلدىڭ قۇدايى ەحوبانىڭ ەسىمىنە ارناپ ٷي سالدى» (پات. 1-ج. 8:20). قۇداي دارىتقان دانالىعىمەن شارتاراپقا تانىلدى. كيەلى رۋحتىڭ قوزعاۋىمەن ايتقان تاعىلىمدى تالىمدەرى جازبالاردىڭ ٷش كىتابىنا جازىلدى. سول كىتاپتاردىڭ ٴبىرى — ناقىل سوزدەر.
3 ناقىل سوزدەر كىتابىندا «جۇرەك» ٴسوزى جۇزگە جۋىق رەت كەزدەسەدى. ماسەلەن، ناقىل سوزدەر 4:23 تە: «بارىنەن دە بۇرىن ساقتا جۇرەگىڭدى»،— دەلىنگەن. وسىندا «جۇرەك» دەپ نە ايتىلىپ وتىر؟ شايتان جۇرەگىمىزدى قالاي لاستاۋى مۇمكىن؟ جۇرەگىمىزدى قالاي ساقتاي الامىز؟ وسى سۇراقتاردىڭ جاۋابىن جاقسى تۇسىنسەك، قۇدايعا ادال بولىپ قالامىز.
«جۇرەك» دەگەن نە؟
4، 5. ا) ٴزابۇر 51:6 «جۇرەك» سوزىنىڭ ماعىناسىن تۇسىنۋگە قالاي كومەكتەسەدى؟ ٵ) ىشكى دۇنيەمىزدىڭ ساۋلىعىن ويلاۋ قانشالىقتى ماڭىزدى؟ مىسال كەلتىرىڭىز.
4 ناقىل سوزدەر 4:23 تەگى جۇرەك ٴسوزى ادامنىڭ «ىشكى سارايىن»، «جان دۇنيەسىن» بىلدىرەدى (ٴزابۇر 51:6 وقىڭىز). باسقالاي ايتقاندا، بۇل — جاسىرىن ويلارىمىز، سەزىمدەر مەن نيەت-قالاۋلارىمىز. بۇل ٴبىزدىڭ سىرت كوزگە قانداي ەكەنىمىزدى ەمەس، ىشتەي قانداي ەكەنىمىزدى بىلدىرەدى.
5 ىشكى دۇنيەمىزدىڭ ساۋلىعىن ويلاۋ قانشالىقتى ماڭىزدى؟ مىسالى، دەنىمىز ساۋ بولۋ ٷشىن، دۇرىس تاماقتانىپ، دەنەنى شىنىقتىرىپ تۇرۋ قاجەت. سول سياقتى رۋحاني ساۋ بولۋ ٷشىن دە رۋحاني اس-سۋمەن دۇرىس تاماقتانىپ، ەحوباعا دەگەن سەنىمىمىزدى شىنىقتىرىپ تۇرۋ ماڭىزدى. مۇنداي شىنىقتىرۋعا وقىپ-بىلگەندەرىمىزدى ومىردە قولدانۋ جانە باسقالارعا سەنىمىمىز جايىندا ايتۋ كىرەدى (ريم. 10:8—10؛ جاق. 2:26). كەيدە سىرت كورىنىسىمىزگە قاراپ دەنىمىز ساۋ دەپ ويلايتىن شىعارمىز، ٴبىراق ىشىمىزدە ٴبىر ىندەت جاتۋى مۇمكىن. ٴدال سولاي تەوكراتيالىق ىستەرگە قاتىسىپ جۇرگەنىمىزگە قاراپ، سەنىمىمىز مىقتى دەپ ويلارمىز. ٴبىراق ىشىمىزدە جامان قالاۋلار ٶسىپ جاتقان بولۋى مۇمكىن (قور. 1-ح. 10:12؛ جاق. 1:14، 15). شايتان ٶز ويلارىن بىزگە جۇقتىرعىسى كەلەتىنىن ەستە ۇستايىق. ول مۇنى قالاي ىستەيدى؟ ودان قالاي ساقتانا الامىز؟
شايتان جۇرەگىمىزدى قالاي ۋلايدى؟
6. شايتاننىڭ ماقساتى قانداي جانە مۇنىسىن ىسكە اسىرۋ ٷشىن ول نە ىستەيدى؟
6 شايتان ٴبىزدىڭ ٶزى سياقتى بولعانىمىزدى، ياعني ەحوبانىڭ زاڭ-تالاپتارىنان اتتاپ، ٶز دەگەنىمىزبەن جۇرگەنىمىزدى قالايدى. ٴبىراق ول ٴبىزدى ٶزى سياقتى ويلاپ، ٶزى سياقتى ارەكەت ەتۋگە ماجبۇرلەي المايدى. سوندىقتان ٶز ىرقىنا كوندىرۋدىڭ ول باسقا امالدارىن تاپقان. مىسالى، ول ٴبىزدى ٶزى ۋلاعان ادامدارمەن قورشايدى (جوح. 1-ح. 5:19). جامان ورتا ويىمىز بەن ٴجۇرىس-تۇرىسىمىزدى لاستايتىنىن بىلسەك تە، شايتان ٴبىزدى سول ورتانى تاڭداپ، سولارمەن ۋاقىت وتكىزەدى دەپ كۇتەدى (قور. 1-ح. 15:33). سۇلەيمەن پاتشانىڭ جاعدايىندا ول وسى امالىن اسىرىپ كەتكەن. سۇلەيمەن جالعان تاڭىرگە تابىناتىن ايەلدەرگە ۇيلەندى. «ولار پاتشاعا قاتتى اسەر ەتىپ»، ەحوبادان بىرتە-بىرتە الشاقتاتتى (پات. 1-ج. 11:3، ٴسىلت.).
7. شايتان ٶز ويىن تاعى قالاي تاراتادى جانە نەگە بىزگە ساق بولۋ قاجەت؟
7 شايتان ٶز ويلارىن فيلمدەر، تەلەباعدارلامالار ارقىلى تاراتادى. ول اڭگىمەلەر مەن وقيعالاردىڭ كوڭىلىمىزدى كوتەرىپ قانا قويماي، نە ويلاپ، نە سەزىنىپ، نە ىستەۋ كەرەكتىگىنە ۇيرەتە الاتىنىن دا جاقسى بىلەدى. يسا وسىنداي جولمەن ٴتالىم بەرگەن. سولاردىڭ ٴبىر مىسالى — قايىرىمدى ساماريالىق تۋرالى، ۇيىنەن كەتىپ، مۇراسىن توگىپ-شاشقان ۇل تۋرالى استارلى اڭگىمەلەر (مات. 13:34؛ لۇقا 10:29—37؛ 15:11—32). الايدا شايتاننىڭ ويىن جۇقتىرعان ادامدار ٴبىزدى بۇزاتىن اڭگىمەلەر ايتۋى مۇمكىن. سوندىقتان بىزگە پاراساتتىلىق قاجەت. وي سانامىزدى ۋلاماي، كوڭىلىمىزدى كوتەرىپ، ٴبىلىمىمىزدى مولايتاتىن فيلمدەر مەن باعدارلامالار بار شىعار. ٴبىراق ساقتىقتا قورلىق جوق دەمەكشى، كوڭىل كوتەرۋ ٴتۇرىن تاڭداعاندا: «بۇل فيلم نەمەسە بۇل شوۋ-باعدارلاما تاندىك قالاۋىما بەرىلە سالۋعا ۇندەي مە؟»— دەپ ويلانايىق (عال. 5:19—21؛ ەفەس. 2:1—3). باعدارلاما شايتاننىڭ ويلارىن ناسيحاتتاپ جاتقانىن بايقاساڭىز، نە ىستەۋىڭىز كەرەك؟ ودان اسا قاۋىپتى جۇقپالى اۋرۋدان قاشقانداي قاشىڭىز!
شايتان جۇرەگىمىزدى ٶز ويىمەن ۋلاماۋ ٷشىن نە ىستەۋىمىز قاجەت؟ (7-ابزاستى قاراڭىز) *
8. اتا-اناسى بالالارىنا جۇرەكتەرىن قورعاۋعا قالاي كومەكتەسە الادى؟
8 شايتان بالالاردىڭ دا جۇرەگىن ۋلاعىسى كەلەتىندىكتەن، قىمباتتى اتا-انا، ولاردى كوزدىڭ قاراشىعىنداي قورعاڭىز. بۇل — سىزگە جۇكتەلگەن ەرەكشە جاۋاپكەرشىلىك. ماسەلەن، ٴسىز بالالارىڭىزدى اۋرۋ-سىرقاۋدان ساقتاۋ ٷشىن قولدان كەلگەننىڭ بارلىعىن جاسايسىز: ٷيىڭىزدى تازا ۇستايسىز، وزىڭىزدىڭ يا بالاڭىزدىڭ دەنساۋلىعىنا زيان كەلتىرۋى مۇمكىن كەز كەلگەن نارسەنى لاقتىرىپ تاستايسىز. سول سياقتى بالاڭىزدى شايتاننىڭ ويىمەن ۋلايتىن فيلمدەردەن، شوۋ-باعدارلامالار، ەلەكتروندى ويىندار مەن ۆەبسايتتاردان قورعاڭىز. ەحوبا بالاڭىزدىڭ رۋحاني دەنساۋلىعىن ٴسىزدىڭ قولىڭىزعا تاپسىردى (ناق. س. 1:8؛ ەفەس. 6:1، 4). سوندىقتان ۇيدە كيەلى كىتاپ پرينسيپتەرىنە نەگىزدەلگەن ەرەجەلەر ورناتۋدان قورىقپاڭىز. كىشكەنتاي بالالارىڭىزعا نەنى كورۋگە بولاتىنىن، نەنى بولمايتىنىن ايتىپ، نەگە ولاي شەشكەنىڭىزدى ٴتۇسىندىرىپ كەتىڭىز (مات. 5:37). ال وسە كەلە ولارعا جاقسى مەن جاماندى ەحوبانىڭ پرينسيپتەرى بويىنشا ايىرا الۋدى ۇيرەتىڭىز (ەۆر. 5:14). ارينە، بالالارىڭىز ٴسىزدىڭ ايتقاندارىڭىزدان كوپكە ۇيرەنەدى. الايدا ٴجۇرىس-تۇرىسىڭىز ولاردى ودان دا كوپ نارسەگە ۇيرەتە الادى (مۇس. 5-ج. 6:6، 7؛ ريم. 2:21).
9. شايتان قانداي ويدى كەڭ تاراتقان جانە ول نەسىمەن قاۋىپتى؟
9 شايتان تاعى ٴبىر تاسىلمەن جۇرەگىمىزدى ۋلاعىسى كەلەدى. ول ٴبىزدىڭ ەحوبانىڭ ويىنا ەمەس، ادامداردىڭ اقىلىنا سۇيەنىپ جۇرگەنىمىزدى قالايدى (قول. 2:8). مىسالى، «ادامنىڭ ومىردەگى ەڭ ٴبىرىنشى ماقساتى — بايۋ» دەگەن ويدى ول كەڭ تاراتقان. بۇل ويدىڭ جەتەگىندەگى ادامدار بايلىققا جەتۋى دە، جەتپەۋى دە مۇمكىن. الايدا ەكى جاعدايدا دا ولارعا قاۋىپ تونەدى. قالاي؟ كوپ اقشا تابۋ جولىندا ولار دەنساۋلىقتارىن سارپ ەتىپ، جاقىندارىمەن، ٴتىپتى قۇدايمەن قارىم-قاتىناستارىنان ايىرىلىپ جاتادى (ٴتىم. 1-ح. 6:10). كوكتەگى دانا اكەمىزدىڭ اقشاعا بايىپپەن قاراۋدى ۇيرەتىپ جاتقانىنا ٴبىز قانشالىقتى ريزامىز دەسەڭىزدەرشى! (ۋاع. 7:12؛ لۇقا 12:15).
جۇرەگىمىزدى قالاي ساقتاي الامىز؟
جۇرەگىڭىزدى جامان اسەردەن قورعاۋ ٷشىن، ەجەلدەگى كۇزەتشىلەر مەن قاقپا كۇزەتشىلەرى سياقتى سەرگەك بولىپ، دەرەۋ ارەكەت ەتىڭىز (10، 11-ابزاستى قاراڭىز) *
10، 11. ا) ٶزىمىزدى قورعاۋ ٷشىن نە ىستەۋىمىز كەرەك؟ ٵ) ەجەلدە كۇزەتشىلەردىڭ قىزمەتى قانداي بولعان جانە ار-ۇجدانىمىز كۇزەتشىگە قاي جاعىنان ۇقسايدى؟
10 جۇرەگىمىزدى ساقتاپ قالعىمىز كەلسە، قاۋىپتى بايقاي ٴبىلىپ، بىردەن ٶزىمىزدى قورعاۋىمىز كەرەك. بۇل ەجەلدەگى كۇزەتشىنىڭ قىزمەتىن ەسكە سالادى. سۇلەيمەن پاتشانىڭ كەزىندە كۇزەتشىلەر قالا قابىرعاسىنىڭ ۇستىندە تۇراتىن. قاۋىپ ٴتونىپ كەلە جاتقانىن بايقاي سالىسىمەن، ولار دابىل قاعاتىن. وسى بەينەنى ويدا ۇستاساق، شايتاننىڭ ويلارىمەن لاستانىپ قالماس ٷشىن نە ىستەۋ كەرەكتىگىن تۇسىنەمىز.
11 ەجەلدە كۇزەتشىلەر قاقپا كۇزەتشىلەرىمەن بىرلەسە قىزمەت ەتكەن (سام. 2-ج. 18:24—26). وسى ەكى توپ جاۋ كەلىپ قالعان كەزدىڭ بارىندە قاقپالاردىڭ جابىق بولۋىنا جاۋاپ بەرگەن (نەح. 7:1—3). كيەلى كىتاپپەن تاربيەلەنگەن ار-ۇجدانىمىز * ٴبىزدىڭ كۇزەتشىمىز سياقتى. شايتان جۇرەگىمىزگە باسا كوكتەپ كىرگىسى كەلگەندە، ياعني ويىمىز، سەزىمىمىز بەن ارمان-نيەتىمىزگە اسەر ەتكىسى كەلگەندە، ول دابىل قاعادى. ار-ۇجدانىمىز دابىل سوققان كەزدىڭ بارىندە وعان قۇلاق قويىپ، بەينەلى قاقپامىزدى تارس جابۋىمىز كەرەك.
12، 13. ٴبىز نە ىستەۋگە ازعىرىلۋىمىز مۇمكىن؟ سونداي كەزدە قالاي ارەكەت ەتكەنىمىز ٴجون؟
12 شايتاننىڭ ويىمەن ۋلانىپ قالۋدان قالاي ساقتانا الاتىنىمىزدى قاراستىرايىق. ەحوبا: «ارالارىڭدا ازعىندىق، ٵرقيلى ارام ىستەردىڭ... ٴتىپتى اتى دا اتالماسىن»،— دەپ ۇيرەتەدى (ەفەس. 5:3). ٴبىراق جۇمىستاعى ارىپتەستەر نەمەسە مەكتەپتەگى وقۋشىلار ازعىن تاقىرىپتا اڭگىمەلەر ايتا باستاسا نە ىستەيمىز؟ ٴبىز قۇدايعا «ۇنامسىز ٴجۇرىس-تۇرىستان جانە وسى دۇنيەلىك قۇمارلىقتاردان باس تارتۋىمىز» كەرەكتىگىن بىلەمىز (تيت. 2:12). سوندىقتان وسىنداي جاعدايدا «كۇزەتشىمىز» ار-ۇجدان دابىل قاعۋى مۇمكىن (ريم. 2:15). ٴبىراق وعان قۇلاق اسامىز با؟ سونداي كەزدە قۇرداستارىمىزدىڭ اڭگىمەسىن تىڭداۋعا، ولار كورسەتكەن سۋرەتتەردى كورۋگە ازعىرىلۋىمىز مۇمكىن. الايدا بۇل — قالانىڭ قاقپالارىن تارس جاباتىن، ياعني اڭگىمەنى باسقا جاققا بۇراتىن، ٴتىپتى سول جەردەن كەتىپ قالاتىن كەز.
13 قۇرداستارىمىزدىڭ قىسىمىنا بەرىلمەي، جامان نارسە جايلى ويلاماۋ ٷشىن، وعان بارماۋ ٷشىن وجەتتىلىك كەرەك. شايتاننىڭ ويىنا قارسى تۇرۋ ٷشىن تىرىسىپ جاتقانىمىزدى ەحوبا بايقايدى. ول بىزگە قاجەتتى كۇش پەن دانالىق بەرەدى (شەج. 2-ج. 16:9؛ يشايا 40:29؛ جاق. 1:5). جۇرەگىمىزدى ساقتاۋ ٷشىن تاعى نە ىستەسەك بولادى؟
سەرگەك بولىڭىز
14، 15. ا) جۇرەگىمىزدى نە نارسەگە اشۋىمىز كەرەك جانە مۇنى قالاي ىستەيمىز؟ ٵ) كيەلى كىتاپتى وقۋدىڭ بار پايداسىن كورۋگە ناقىل سوزدەر 4:20—22 قالاي كومەكتەسەدى؟ (« وي جۇگىرتۋدى ۇيرەنۋ» دەگەن قورشاۋدى قاراڭىز.)
14 جۇرەكتى جامان نارسەدەن ساقتاۋ جەتكىلىكسىز. وعان جاقسى نارسەنىڭ كىرۋىنە دە قام جاساۋ كەرەك. قابىرعامەن قورشالعان قالا تۋرالى مىسالعا ورالايىقشى. جاۋ باسا كوكتەپ كىرىپ كەتپەس ٷشىن، قاقپا كۇزەتشىسى قاقپالاردى جاۋىپ قويادى. ٴبىراق قاجەت كەزدە ولاردى اشىپ، قالاعا ازىق-تۇلىك سياقتى كەرەكتى زاتتاردى كىرگىزەدى. قاقپالار ەشقاشان اشىلماسا، قالا تۇرعىندارى اشتان قىرىلادى. سول سياقتى ٴبىز دە جۇرەگىمىزگە قۇدايدىڭ ويلارىن ٴجيى كىرگىزىپ وتىرۋىمىز قاجەت.
15 قۇدايدىڭ ويلارى كيەلى كىتاپتا جازىلعان. سوندىقتان كيەلى كىتاپتى وقىعان سايىن ونىڭ ويلارى وي-سانامىزعا، سەزىمىمىز بەن ٴجۇرىس-تۇرىسىمىزعا اسەر ەتەدى. كيەلى كىتاپتى وقۋدىڭ بار پايداسىن كورۋ ٷشىن نە ىستەي الامىز؟ بۇل رەتتە دۇعا ەتۋدىڭ ماڭىزى زور. ٴبىر ايەل باۋىرلاس بىلاي دەيدى: «كيەلى كىتاپتى وقۋدى باستاماس بۇرىن مەن دۇعا ەتىپ، ەحوبادان «سوزىڭدەگى كەرەمەت جايتتاردى انىق كورەيىنشى» دەپ سۇرايمىن» (ٴزاب. 119:18). سونىمەن قاتار وي جۇگىرتۋ دە ەستە بولسىن. ەگەر دۇعا ەتىپ، كيەلى كىتاپتى وقىپ، وي جۇگىرتەتىن بولساق، قۇدايدىڭ ٴسوزى «جۇرەگىمىزدىڭ تۇكپىرىنە» دەيىن جەتەدى. وسىلاي ەحوبانىڭ ويلارىنا ماحابباتىمىز اشىلادى (ناقىل سوزدەر 4:20—22 وقىڭىز؛ ٴزاب. 119:97).
16. كوبىمىز JW Broadcasting باعدارلاماسىنىڭ قانداي پايداسىن كورىپ ٴجۇرمىز؟
16 جۇرەككە قۇدايدىڭ ويلارىن كىرگىزۋدىڭ تاعى ٴبىر جولى — ®JW Broadcasting تەلەارناسىنداعى بەينەونىمدەردى كورۋ. ٴبىر ەرلى-زايىپتى بىلاي دەيدى: «ٵر ايدا شىعاتىن باعدارلاما دۇعامىزعا بەرىلگەن جاۋاپ بولدى. كوڭىلىمىز ٴتۇسىپ، جالعىزسىراعاندا، ولار ەڭسەمىزدى كوتەرىپ، ٴبىر مارقايتىپ تاستايدى! ونداعى اندەردىڭ ٷنى ۇيىمىزدەن ۇزىلگەن ەمەس. تاماق پىسىرگەندە، ٷي جيناعاندا، ٴتىپتى شاي ٸشىپ وتىرعاندا دا ولاردى قوسىپ قويامىز». راسىندا دا، بۇل باعدارلامالار جۇرەگىمىزدى ساقتاۋعا كوپ كومەكتەسىپ كەلەدى. جان-جاقتان انتالاپ جاتقان شايتاننىڭ ويلارىنان باس تارتۋعا، ەحوبا سياقتى ويلانۋعا ۇيرەتەدى.
17، 18. ا) پاتشالار 1-جازبا 8:61 گە ساي، ەحوبادان ۇيرەنگەنىمىزدى ىسكە اسىرساق، قانداي ناتيجەسىن كورەمىز؟ ٵ) ەزەكيا پاتشادان نە ۇيرەنەمىز؟ ب) ٴزابۇر 139:23، 24 تە جازىلعان ٴداۋىتتىڭ دۇعاسىنا ساي، نە جايىندا دۇعا ەتە الامىز؟
17 دۇرىس نارسەنى ىستەگەنىمىزدىڭ ناتيجەسىن كورگەن سايىن سەنىمىمىز قاتايا تۇسەدى (جاق. 1:2، 3). ەحوبا بىزگە ماقتان تۇتار بالالارى رەتىندە قاراعانىنا قۋانامىز. سودان وعان ۇنامدى بولۋعا دەگەن ىقىلاسىمىز ودان سايىن ارتادى (ناق. س. 27:11). الدىمىزدان شىققان ٵر سىناقتا قامقور اكەمىزگە جارىم جۇرەكپەن ەمەس، بار جۇرەگىمىزبەن قىزمەت ەتىپ جۇرگەنىمىزدى دالەلدەۋگە تىرىسامىز (ٴزاب. 119:113). ونى بار جۇرەكپەن، ونىڭ تالاپتارىنا مويىنسۇنۋعا جانە نيەتىن ورىنداۋعا نىق بەكىنگەن جۇرەكپەن سۇيەتىنىمىزدى كورسەتەمىز (پاتشالار 1-جازبا 8:61 وقىڭىز).
18 بىراق كەمەلسىز بولعاندىقتان، كەيدە ٴسۇرىنىپ قالۋىمىز مۇمكىن. وندايدا ەزەكيا پاتشانى ەسكە الايىق. ول دا قاتەلىك جاساعان. ٴبىراق وكىنىش ٴبىلدىرىپ، ەحوباعا «بار جۇرەگىمەن بەرىلە قىزمەت ەتتى» (يشايا 38:3—6؛ شەج. 2-ج. 29:1، 2؛ 32:25، 26). ولاي بولسا، شايتان ٶز ويىمەن ٴبىزدىڭ ويىمىزدى ۋلاعىسى كەلگەن كەزدىڭ بارىندە وعان قارسى تۇرايىق. «مويىنسۇنعىش جۇرەك» سۇراپ دۇعا ايتايىق (پات. 1-ج. 3:9؛ ٴزابۇر 139:23، 24 وقىڭىز). بارىنەن بۇرىن جۇرەگىمىزدى ساقتاساق، ەحوباعا ادال بولىپ قالامىز.
54-ٵن مىنە، جول!
^ 5-ابزاس ەحوباعا ادال بولىپ قالامىز با، الدە شايتاننىڭ الداۋىنا ەرىپ، قۇدايدان اجىراپ كەتەمىز بە؟ بۇل باسىمىزعا تۇسەتىن سىناقتىڭ اۋىر-جەڭىلدىگىنە ەمەس، جۇرەگىمىزدى قانشالىقتى ساقتاپ جۇرگەنىمىزگە بايلانىستى. «جۇرەك» دەپ نەنى ايتىپ وتىرمىز؟ شايتان ونى قالاي لاستاعىسى كەلەدى؟ جۇرەگىمىزدى قالاي ساقتاي الامىز؟ بۇل ماڭىزدى سۇراقتارعا وسى ماقالادا جاۋاپ الامىز.
^ 11-ابزاس ٴسوز ٴمانى: ەحوبا بىزگە ويىمىز، سەزىم مەن ٸس-ارەكەتىمىزدى تەكسەرىپ، ٶزىمىزدى سوتتاۋ قابىلەتىن بەرگەن. كيەلى كىتاپتا بۇل ار-ۇجدان دەپ اتالادى (ريم. 2:15؛ 9:1). كيەلى كىتاپپەن تاربيەلەنگەن ار-ۇجدان ەحوبانىڭ پرينسيپتەرىنە سۇيەنە وتىرىپ، ويىمىزعا، ٴسوزىمىز بەن ىسىمىزگە جاقسى نە جامان دەپ باعا بەرەدى.
^ 56-ابزاس سۋرەت سيپاتتاماسى: شومىلدىرۋ راسىمىنەن وتكەن ەر باۋىرلاس تەلەديدار قاراپ وتىرعاندا، ۇياتسىز بەينە شىعا كەلدى. ول ەندى نە ىستەيتىنىن شەشۋ كەرەك.
^ 58-ابزاس سۋرەت سيپاتتاماسى: كۇزەتشى قالاعا قاۋىپ ٴتونىپ كەلە جاتقانىن بايقاپ، تومەندەگى قاقپا كۇزەتشىلەرىنە حابار بەرۋدە. ولار بىردەن قاقپالاردى جاۋىپ، ىشىنەن قۇلىپتاپ جاتىر.
