4-زەرتتەۋ ماقالاسى
قاراپايىم كەشتىڭ يسا جايىندا ايتارى
«بۇل مەنىڭ دەنەمدى بىلدىرەدى... بۇل مەنىڭ قانىمدى — «كەلىسىم قانىن» — بىلدىرەدى» (مات. 26:26—28).
16-ٵن ەحوبانى پاتشالىعى ٷشىن ماداقتاڭدار!
اڭداتپا *
1، 2. ا) نەگە ەسكە الۋ كەشى قاراپايىم شارا بولماق ەدى؟ ٵ) يسانىڭ قاي قاسيەتتەرىنە نازار اۋدارامىز؟
جىل سايىنعى ەسكە الۋ كەشى قالاي وتەتىنىن ايتىپ بەرە الاسىز با؟ البەتتە. كەشتىڭ نەگىزگى تۇستارىن ايتىپ بەرۋ ٴبىز ٷشىن تۇك ەمەس. نەگە؟ ويتكەنى ولار وتە قاراپايىم. دەسە دە بۇل كەزدەسۋدىڭ ماڭىزى زور. وسى ورايدا بىرەۋلەردە: «وتە ماڭىزدى بولا تۇرا، بۇل كەش نەگە سونشا قاراپايىم وتەدى؟»— دەگەن سۇراق تۋار.
2 جەردە جۇرگەن كەزىندە يسا ماڭىزدى شىندىقتاردى قاراپايىم، انىق تا تۇسىنۋگە جەڭىل ەتىپ ۇيرەتۋىمەن تانىمال بولعان (مات. 7:28، 29). ٴدال سولاي ول ٶلىمىن دە ەسكە الۋدىڭ * قاراپايىم، سويتە تۇرا ٴماندى جولىن كورسەتكەن. قازىر وسى كەش تۋرالى، يسا ايتقان جانە ىستەگەن كەي نارسەلەر تۋرالى قاراستىرامىز. ونىڭ قانشالىقتى كىشىپەيىل، باتىل، ٴسۇيۋشى ەكەنىنە كەڭىرەك كوز تاستاپ، ونى قالاي جاقسىراق ۇلگى ەتە الاتىنىمىزدى دا بىلەمىز.
كىشىپەيىل يسا
ەسكە الۋ كەشىنىڭ رامىزدەرى — نان مەن شاراپ يسانىڭ ٴبىز ٷشىن ٶمىرىن قيعانىن جانە قازىر ونىڭ كوكتەگى پاتشامىز ەكەنىن ەسىمىزگە سالادى (3—5 ابزاستاردى قاراڭىز)
3. ماتاي 26:26—28 تارماقتاردا جازىلعانداي، يسا ەندىرگەن ەسكە الۋ كەشى قانشالىقتى قاراپايىم ەدى؟ نان مەن شاراپ نەنى بەينەلەيدى؟
3 ٶلىمىن ەسكە الۋ كەشىن يسا 11 ادال ەلشىسىنىڭ كوزىنشە ەندىردى. ول وسى كەشتى قۇتقارىلۋ مەيرامىنىڭ اسىنان قالعان نارسەلەرمەن-اق وتكىزدى (ماتاي 26:26—28 وقىڭىز). بۇلار داستارقاندا تۇرعان اشىماعان نان مەن شاراپ ەدى. بۇل ەكەۋى ەلشىلەر ٷشىن بەرگەلى جاتقان وزىنىڭ كەمەلدى ٴتانى مەن قانىن بەينەلەيتىنىن ايتتى. ولار وسى ٴبىر ماڭىزدى ٵرى جاڭا شارانىڭ نەگە بۇلاي قاراپايىم وتكەنىنە تاڭعالعان جوق. نەلىكتەن؟
4. يسا مارتاعا بەرگەن كەڭەسىن ٶزى قالاي قولداندى؟
4 وسىدان بىرنەشە اي بۇرىن، ياكي يسانىڭ قىزمەتىنىڭ ٷشىنشى جىلىندا بولعان ٴبىر جاعدايعا ورالايىق. يسا جاقىن دوستارى ەلازار، مارتا مەن ماريامنىڭ ۇيىندە ەدى. جايباراقات وتىرعان يسا ٴتالىم بەرە باستادى. مارتا ۇيدە بولعانمەن، سيلى قوناعىن كۇتەمىن دەپ مول داستارقان جايۋمەن الەك ەدى. مۇنى بايقاعان يسا ونىڭ كوڭىلىنە تيمەي، اقىرىن عانا تۇزەتىپ، كوپ تاماق دايىنداۋدىڭ قاجەتى جوق ەكەنىن ٴتۇسىندىردى (لۇقا 10:40—42). يسا ٶزى بەرگەن سول كەڭەستى ولەرىنەن بىرەر ساعات بۇرىن ٶزى قولداندى. ول ەسكە الۋ كەشىن قولدا بار قاراپايىم عانا اسپەن وتكىزدى. بۇدان يسا جايلى نە بىلۋگە بولادى؟
5. كەشتەگى استىڭ قاراپايىمدىلىعى يسا جايىندا نەنى ٴمالىم ەتەدى جانە فىلىپىلىكتەرگە 2:5—8 تارماقتار مۇنى قالاي راستايدى؟
5 يسانىڭ كىشىپەيىلدىلىگى سوزىنەن دە، ىسىنەن دە ەسىپ تۇراتىن. سوندىقتان جەردەگى ومىرىنىڭ سوڭعى ٴتۇنى ونىڭ نەگە زور كىشىپەيىلدىلىك تانىتقانى تۇسىنىكتى-اق (مات. 11:29). يسا ادامزات تاريحىنداعى ەڭ ۇلى قۇرباندىقتى بەرگەلى جاتقانىن جانە كەيىن ەحوبا ونى ٴتىرىلتىپ، كوكتە داڭقتى دارەجە سيلايتىنىن جاقسى ٴبىلدى. سويتسە دە ٶلىمىن كۇردەلى راسىمدەرمەن ەسكە الۋدى تالاپ ەتىپ، وزىنە تىم كوپ نازار اۋدارتپادى. ول شاكىرتتەرىنە قاراپايىم اسپەن ٶزىن جىل سايىن ەسكە الىپ تۇرۋدى عانا ايتتى (جوح. 13:15؛ قور. 1-ح. 11:23—25). وسى قاراپايىم عانا، دەسە دە لايىقتى استى تاڭداعانى يسانىڭ وركوكىرەك بولماعانىن كورسەتەدى. كوكتەگى پاتشامىزدىڭ تاماشا قاسيەتتەرىنىڭ ىشىندە كىشىپەيىلدىلىكتىڭ بار ەكەنىنە ٴبىز وتە قۋانىشتىمىز! (فىلىپىلىكتەرگە 2:5—8 وقىڭىز).
6. قيىندىققا كەزىككەندە، يسانىڭ كىشىپەيىلدىلىگىن قالاي ۇلگى ەتسەك بولادى؟
6 يسانىڭ كىشىپەيىلدىلىگىنە قالاي ەلىكتەي الامىز؟ ٴبىرىنشى كەزەكتە وزگەلەردىڭ مۇددەسىن ويلاۋ ارقىلى (ٴفىلىپ. 2:3، 4). يسانىڭ ولەر الدىنداعى تۇنىنە قايتا ورالايىقشى. سالدەن كەيىن جانى قينالىپ ولەتىنىن بىلسە دە، ول ارتىنان جوقتاپ، جىلاپ قالاتىن ادال ەلشىلەرى ٷشىن ۋايىم كەشتى. سوندىقتان ولارعا نۇسقاۋلار بەرىپ، بويلارىنا كۇش-جىگەر قۇيىپ، كوڭىلدەرىن ورنىقتىرىپ، سول ٴتۇنى قاستارىندا بولدى (جوح. 14:25—31). يسا وزىنەن گورى وزگەلەردىڭ جاعدايىن ويلادى. كىشىپەيىلدىلىكتىڭ بىرەگەي ۇلگىسى دەپ وسىنى ايت!
باتىل يسا
7. يەمىزدىڭ كەشكى اسىن ەنگىزگەننەن كەيىن يسا نە نارسەدە تاۋداي باتىلدىق تانىتتى؟
7 يەمىزدىڭ كەشكى اسىن ەنگىزگەننەن كەيىن يسا تاۋداي باتىلدىق تانىتتى. قالاي؟ ول اكەسىنىڭ وزىنە قاتىستى ەركىن ورىنداۋعا كەلىستى. بۇل ٷشىن «قۇدايدى قورلادى» دەگەن سۇمدىق ايىپپەن جازاعا كەسىلەتىنىن تۇسىنسە دە، ول دەگەنىنەن قايتپادى (مات. 26:65، 66؛ لۇقا 22:41، 42). ونىڭ كەمەلدى مىنسىزدىگىنەن اينىماعانى ەحوبانىڭ ەسىمىنە قۇرمەت اكەلىپ، بۇكىلالەمدىك بيلىگىن قولداپ، وكىنگەن جاندارعا ماڭگى ومىردىڭ ەسىگىن اشتى. بۇنىمەن قاتار ول ٸزباسارلارىن بولاشاقتا كەزىگەتىن جايتتارعا دايىندادى.
8. ا) يسا ادال ەلشىلەرىنە نە دەدى؟ ٵ) يسا ولگەننەن كەيىنگى جىلدارى شاكىرتتەرى قالاي ونىكىندەي باتىلدىق تانىتتى؟
8 يسانىڭ ٸشى ٴتۇرلى ۋايىمعا تولى بولعان شىعار. ٴبىراق ول ٴبارىن ىسىرىپ قويىپ، ادال ەلشىلەرىنە قاجەت بولاتىن جايتتارعا نازار اۋداردى. ياھۋدا شىعىپ كەتكەننەن كەيىن ەنگىزىلگەن قاراپايىم وسى كەش مايلاناتىن ٸزباسارلارىنا مىنا جايتتاردى ەسكە سالماق ەدى: يسا توككەن قاننىڭ ولار ٷشىن يگىلىكتى ەكەنىن جانە ولار جاڭا كەلىسىمنىڭ مۇشەسى ەكەنىن (قور. 1-ح. 10:16، 17). ادالدىق ساقتاۋعا، وزىمەن بىرگە كوكتە بولۋعا كومەكتەسۋ ٷشىن، يسا ولاردان ٶزى جانە ەحوبا نە تالاپ ەتەتىنىن ايتتى (جوح. 15:12—15). ولاردى الدا قۋعىن-سۇرگىن كۇتىپ تۇرعانىن دا ەسكەرتتى. سوسىن ٶز ۇلگىسىنە نۇسقاپ: «باتىل بولىڭدار!»— دەپ ولاردى قايراي ٴتۇستى (جوح. 16:1—4ا، 33). كوپ جىلدىڭ ٴجۇزى وتكەننەن كەيىن دە شاكىرتتەر يسانىڭ جانقيارلىعىن ۇلگى ەتىپ، ەرجۇرەكتىك تانىتىپ ٴجۇردى. قيىن شاقتاردا ٶز باستارىن قاتەرگە تىگە ٴجۇرىپ، ولار ٴبىر-بىرىنە سۇيەۋ بولدى (ەۆر. 10:33، 34).
9. يسانىڭ باتىلدىعىنا قالاي ەلىكتەي الامىز؟
9 بۇگىنگى كۇنى ٴبىز دە يسانىڭ باتىلدىعىن ۇلگى ەتەمىز. مىسالى، سەنىمدەرى ٷشىن قۋدالانىپ جۇرگەن باۋىرلاستارعا جاردەم بەرۋ ٷشىن باتىلدىق قاجەت. كەيدە باۋىرلاستار ادىلەتسىز تۇرمەگە جابىلۋى مۇمكىن. مۇنداي كەزدە ولار ٷشىن قولىمىزدان كەلگەننىڭ ٴبارىن جاساپ، دۇعا ايتايىق، ٴتىپتى ۇكىمەت پەن سوتتىڭ الدىندا ولاردى قورعاپ سويلەۋگە دە دايىن بولايىق (ٴفىلىپ. 1:14؛ ەۆر. 13:19). سونداي-اق ۇزبەي ۋاعىزداي بەرۋ ارقىلى دا باتىلدىق تانىتا الامىز (ەل. ٸس. 14:3). ادامدار قارسىلىق كورسەتسە دە، قۋدالاسا دا، ٴبىز يسا سياقتى پاتشالىق جايلى حاباردى ۋاعىزداي بەرۋگە بەلىمىزدى بەكەم بۋدىق. الايدا كەي كەزدەرى باتىلدىعىمىزدىڭ ورتايىپ قالعانىن بايقاۋىمىز مۇمكىن. مۇندايدا نە ىستەسەك بولادى؟
10. ەسكە الۋ كەشى قارساڭىنداعى اپتالاردا نە ىستەگەنىمىز ٴجون جانە نەلىكتەن؟
10 ٴماسىحتىڭ تولەم قۇرباندىعىنىڭ ارقاسىندا يە بولعان ٷمىتىمىز تۋرالى وي جۇگىرتۋ باتىلدىعىمىزدى قامشىلاي تۇسەدى (جوح. 3:16؛ ەفەس. 1:7). ەسكە الۋ كەشىنىڭ الدىنداعى اپتالاردا تولەمگە دەگەن ريزاشىلىعىمىزدى وسىرۋگە ەرەكشە مۇمكىندىك تۋادى. سول كەزدەرى ەسكە الۋ كەشىنىڭ قارساڭىنداعى كيەلى كىتاپ تارماقتارىن وقىپ، يسانىڭ ولىمىنە دەيىن ورىن العان وقيعالارعا رۋحاني تۇرعىدان قاراپ، وي جۇگىرتىڭىز. سوندا يەمىزدىڭ كەشكى اسىنا جينالعاندا، ونداعى رامىزدەردىڭ ماعىناسىن جانە ولاردىڭ تەڭدەسسىز قۇرباندىقتى بەينەلەيتىنىن تەرەڭىرەك تۇسىنەسىز. يسا مەن ەحوبانىڭ ىستەگەن جاقسىلىعىن باعالاساق، بىزگە جانە سۇيىكتى جاقىندارىمىزعا قانداي يگىلىك اكەلگەنىن تۇسىنسەك، ٷمىتىمىز جالىنداي ٴتۇسىپ، سوڭىنا دەيىن قازىقتاي بەرىك تۇرا الامىز (ەۆر. 12:3).
11، 12. جوعارىدا ٴبىز نە تۋرالى بىلدىك؟
11 جوعارىدا يەمىزدىڭ كەشكى اسى اسا باعالى تولەم قۇرباندىعىن ەسكە سالىپ قانا قويماي، يسانىڭ كىشىپەيىلدىلىك پەن باتىلدىق دەگەن كەرەمەت قاسيەتتەرى جايىندا سىر شەرتەتىنىن دە بىلدىك. ٴبىز ٷشىن «ٶتىنىش جاسايتىن» كوكتەگى باس ٴدىني قىزمەتكەرىمىزدىڭ وسى قاسيەتتەرىنەن ٵلى دە اينىماعانىنا وتە ريزامىز! (ەۆر. 7:24، 25). جۇرەكجاردى ريزاشىلىعىمىزدى بىلدىرگىمىز كەلسە، ونىڭ ٶلىمىن ٶزى بۇيىرعانداي ادال ەسكە الىپ تۇرۋىمىز كەرەك (لۇقا 22:19، 20). ٴبىز يسانى جىلدىڭ ەڭ ماڭىزدى كۇنى، ياعني 14 نيسانعا ساي كەلەتىن كۇنى ەسكە الامىز.
12 يەمىزدىڭ كەشكى اسىنىڭ قاراپايىمدىلىعى يسانىڭ تاعى ٴبىر قاسيەتىن پاش ەتەدى. جەردە ٶمىر سۇرگەن كەزىندە ونى وزگە جۇرتتان ەرەكشە ەتكەن دە وسى قاسيەتى ەدى. ول قانداي قاسيەت؟
ٴسۇيۋشى يسا
13. جوحان 15:9 بەن جوحاننىڭ 1-حاتى 4:8—10 ەحوبا مەن يسانىڭ تانىتقان سۇيىسپەنشىلىگىن قالاي سيپاتتايدى؟ وسى سۇيىسپەنشىلىكتىڭ يگىلىگىن كىمدەر كورەدى؟
13 يسا ەحوبانىڭ ادامدارعا دەگەن ىستىق سۇيىسپەنشىلىگىن ٵربىر ىسىمەن كەمەلدى تۇردە كورسەتتى (جوحان 15:9؛ جوحاننىڭ 1-حاتى 4:8—10 وقىڭىز). ال بۇدان دا ماڭىزدىسى — ول ٴبىز ٷشىن ٶز ٶمىرىن قيۋدى شىن جۇرەگىمەن قالادى. وسىنداي قۇرباندىققا بارعان ەحوبانىڭ دا، ۇلى يسانىڭ دا سۇيىسپەنشىلىگى مايلانعانداردىڭ نە «باسقا قويلاردىڭ» قاتارىنان بولايىق — بارىمىزگە يگىلىك اكەلەدى (جوح. 10:16؛ جوح. 1-ح. 2:2). ەسكە الۋ كەشىنىڭ رامىزدەرى تۋرالى دا ويلاپ كورەيىكشى. بۇلار يسانىڭ شاكىرتتەردى جاقسى كورەتىنىن ٵرى قامدارىن ويلايتىنىن كورسەتەدى. قالاي دەيسىز عوي؟
يسا ەسكە الۋ كەشىن قاراپايىم ەتىپ ەندىرۋىمەن سۇيىسپەنشىلىك تانىتتى. سونىڭ ارقاسىندا ونى عاسىرلار بويى ٵرتۇرلى جاعدايلاردا اتاپ ٶتۋ مۇمكىن بولدى. (14—16 ابزاستاردى قاراڭىز) *
14. يسا شاكىرتتەرىن جاقسى كورگەنىن قالاي كورسەتتى؟
14 كۇردەلى راسىمدەرمەن ەمەس، قاراپايىم اسپەن عانا كەش وتكىزۋدى تاپسىرعانىنان يسانىڭ مايلانعان ٸزباسارلارىنا دەگەن سۇيىسپەنشىلىگىن كورەمىز. ولار ەسكە الۋ كەشىن جىل سايىن، تۇرمەدە وتىرۋ سياقتى ٴتۇرلى جاعدايلارعا قاراماستان وتكىزۋلەرى كەرەك ەدى (ايان 2:10). بۇل ىزباسارلاردىڭ قولىنان كەلدى مە؟ ٴيا!
15، 16. كەيبىر باۋىرلاستار يەمىزدىڭ كەشكى اسىن قيىن جاعدايلاردا قالاي اتاپ وتكەن؟
15 كۇنى بۇگىنگە دەيىن يسانىڭ ٶلىمىن ەسكە الۋ ٷشىن شىنايى ماسىحشىلەر كوپ كۇش سالىپ كەلەدى. ولار يەمىزدىڭ كەشكى اسىنىڭ ٶتۋ ٴتارتىبىن ٴتىپتى قيىن جاعدايدا دا بارىنشا ۇستانۋعا تىرىسقان. سونىڭ بىرەر مىسالىنا كوڭىل بولەيىك. قىتايدا جالعىز ادامدىق كامەرادا وتىرعان حارولد كينگ باۋىرلاسقا بۇل كەشتى وتكىزۋ ٷشىن ٴبىراز تاپقىرلىق قاجەت بولدى. ول ەشكىمگە بايقاتپاي قولدا بارىمەن رامىزدەردى دايىندادى. ەسكە الۋ كەشى قاي كۇنگە تۇسەتىنىن شاماسى جەتكەنشە ەسەپتەپ شىعاردى. سول كۇن كەلىپ جەتكەندە، حارولد باۋىرلاس كامەرادا جالعىز ٶزى ٵن شىرقاپ، دۇعا ەتىپ، جازبالارعا نەگىزدەلگەن بايانداما ايتتى.
16 ال ەكىنشى دۇنيەجۇزىلىك سوعىس كەزىندە كونسلاگەرگە قامالعان ٴبىر توپ نازىك جاندى باۋىرلاسىمىزعا يەمىزدىڭ كەشكى اسىن وتكىزۋ ٷشىن ومىرلەرىن قاتەرگە تىگۋ كەرەك بولدى. ٴبىراق استىڭ قاراپايىم بولعانىنىڭ ارقاسىندا ولار جاسىرىن تۇردە بولسا دا كەشتى اتاپ ٶتتى. ولار بىلاي دەپ جازدى: «ٴبىز اق ماتا جايىلعان ورىندىقتى قورشاپ تۇردىق. ونىڭ ۇستىندە رامىزدەر تۇردى. ٴبىزدى بايقاپ قويماسىن دەپ جارىقتى قوسپادىق، مايشام جاقتىق... اكەمىزدىڭ كيەلى ەسىمىن اقتاۋ ٷشىن جانىمىزدى ايامايمىز دەگەن بەرىك انتىمىزدى تاعى دا قايتالاپ ايتتىق». سەنىمنىڭ نە دەگەن وزىق ۇلگىسى! وسىنداي قيىن جاعدايدا دا ەسكە الۋ كەشىن وتكىزۋدى مۇمكىن ەتكەنى ٷشىن سۇيىسپەنشىلىگى زور يساعا دان ريزامىز!
17. قانداي سۇراقتار جايلى ويلانعانىمىز دۇرىس؟
17 ەسكە الۋ كەشىنىڭ قارساڭىندا كەلەسىدەي سۇراقتار جايلى ويلانساق بولادى: «يسانىڭ سۇيىسپەنشىلىگىنە قالاي بارىنشا ەلىكتەي الامىن؟ ٶزىمنىڭ ەمەس، باۋىرلاستاردىڭ جاعدايىن كوبىرەك ويلايمىن با؟ ولاردان كوپ نارسە تالاپ ەتەمىن بە، الدە شامالارىن ەسكەرەمىن بە؟» ٵردايىم يساعا ەلىكتەپ، وزگەلەردىڭ سەزىمدەرىنە ورتاقتاس بولايىق (پەت. 1-ح. 3:8).
بۇل ويلار جادىمىزدا قالسىن
18، 19. ا) نە نارسەنىڭ ۇمىتىلمايتىنى ٴشۇباسىز؟ ٵ) ٴسىز نە ىستەۋگە بەل بۋدىڭىز؟
18 ٴبىز ەسكە الۋ كەشىن شەكسىز اتاپ وتە بەرمەيمىز. يسا زور الاپات كەزىندە «كەلىپ»، «تاڭداپ الىنعانداردى» كوككە جينايدى. سول كەزدەن باستاپ بۇل مەيرام تويلانبايتىن بولادى (قور. 1-ح. 11:26؛ مات. 24:31).
19 ەسكە الۋ كەشى دوعارىلعان كەزدە دە ەحوبانىڭ حالقى وسى قاراپايىم كەشتىڭ ارتىندا ەشكىم ەشقاشان تانىتپاعان زور كىشىپەيىلدىلىك، باتىلدىق پەن سۇيىسپەنشىلىك جاتقانىن ۇمىتپايتىنى ٴشۇباسىز. ولار جاڭا دۇنيەدە بۇل كەش تۋرالى بىلمەگەن ادامدارعا ايتىپ بەرىپ، ولاردى نىعايتادى. بۇل شارانىڭ پايداسىن قازىر كورگىمىز كەلسە، يسانىڭ كىشىپەيىلدىلىگىنە، باتىلدىعى مەن سۇيىسپەنشىلىگىنە ەلىكتەۋىمىز كەرەك. سوندا عانا ەحوبادان سي الاتىنىمىز حاق (پەت. 2-ح. 1:10، 11).
13-ٵن ٴماسىحتى ۇلگى تۇتايىق
^ 5-ابزاس جۋىردا يسا ٴماسىحتىڭ ٶلىمىن ەسكە الامىز. قاراپايىم وتەتىن بۇل كەزدەسۋ يسانىڭ كىشىپەيىلدىلىگى، باتىلدىعى مەن سۇيىسپەنشىلىگى تۋرالى سىر شەرتەدى. جاقۇتتاي بۇل قاسيەتتەردى ٴبىز دە قالاي تانىتا الاتىنىمىزدى وسى ماقالادان بىلەمىز.
^ 2-ابزاس ٴسوز ٴمانى: ەسكە الۋ دەگەنىمىز — قانداي دا ٴبىر وقيعانى نە كىسىنى ۇمىتپاۋ ٷشىن، وعان قۇرمەت كورسەتۋ ٷشىن جاسالاتىن ەرەكشە شارا.
^ 56-ابزاس سۋرەتتەر سيپاتتاماسى: ادال باۋىرلاستاردىڭ I عاسىرداعى، 1800-جىلداردىڭ اياعىنداعى، ناسيستىك كونسلاگەردەگى جانە بۇگىندە اشىق اسپان استىنداعى پاتشالىق سارايىندا (وڭتۇستىك امەريكا) ەسكە الۋ كەشىن تويلاپ جاتقانىنىڭ كورىنىستەرى.
