5-زەرتتەۋ ماقالاسى
كەزدەسۋلەرگە كەلۋگە قوزعاۋ سالار قاسيەتتەر
«يەمىز كەلگەنشە، ونىڭ ٶلىمىن جاريالايسىڭدار» (قور. 1-ح. 11:26).
18-ٵن تۇلەمگە ريزاشىلىق
اڭداتپا *
1، 2. ا) ەحوبانىڭ نازارىنان نە تىس قالمايدى؟ (مۇقاباداعى سۋرەتتى قاراڭىز.) ٵ) بۇل ماقالا قانداي سۇراق توڭىرەگىندە ٶربيدى؟
جەردىڭ تۇكپىر-تۇكپىرىندە ەسكە الۋ كەشىنە جينالعان ميلليونداعان ادام ەحوبانىڭ نازارىنان تىس قالمايدى. ول اعىلىپ كەلىپ جاتقان كوپ ادامدى عانا ەمەس، اربىرەۋىن جەكە-جەكە بايقايدى. مىسالى، جىل سايىن ۇزبەي كەلىپ تۇراتىنداردى ول جازباي تانيدى. ارالارىندا كىمنىڭ اياۋسىز قۋعىنعا قاراماي كەلىپ جۇرگەنىن دە بىلەدى. باسقا كەزدەسۋلەرگە بارماسا دا، ەسكە الۋ كەشىنە بارۋدى پارىز سانايتىندار دا بار. جاي قىزىعۋشىلىقپەن ەسكە الۋ كەشىنە ٴبىرىنشى رەت كەلگەندەر دە ەحوبانىڭ نازارىندا.
2 ەسكە الۋ كەشىنە ادامداردىڭ كوپتەپ كەلگەنىنە ەحوبا ٴسوزسىز قۋانادى (لۇقا 22:19). دەسە دە ول ٷشىن ەڭ باستىسى — كەلۋشىلەردىڭ سانى ەمەس، ساپاسى، ولاردىڭ كەلۋدەگى نيەتتەرى. نەگە ٴبىز جىل سايىن ەسكە الۋ كەشىنە عانا ەمەس، ەحوبا ٶزىن سۇيەر جاندارعا دايىنداعان اپتا سايىنعى كەزدەسۋلەرگە دە بارۋىمىز كەرەك؟ بۇل ماقالادا وسى ٴبىر ماڭىزى زور سۇراقتىڭ جاۋابىن الاتىن بولامىز.
كۋاگەرلەر ەل مەن جەر بويىنشا ميلليونداعان ادامدى ەسكە الۋ كەشىندە قۋانا قارسى الادى (1، 2-ابزاستى قاراڭىز)
كىشىپەيىلدىلىك قوزعاۋ سالادى
3، 4. ا) كەزدەسۋلەرگە قانداي سەبەپپەن بارامىز؟ ٵ) كەزدەسۋلەرگە بارعانىمىز ٴبىز جايلى نەنى ايان ەتەدى؟ ب) قورىنتتىقتارعا 1-حات 11:23—26 تارماقتاردى ەسكەرسەك، نەگە ەسكە الۋ كەشىنەن قالماۋىمىز كەرەك؟
3 قاۋىم كەزدەسۋلەرىنە كەلۋىمىزدىڭ باستى سەبەبى — بۇل عيباداتىمىزدىڭ ٴبىر بولىگى. ەحوبادان ٴتالىم الۋدى قالاعانىمىز دا ٴبىر سەبەپ بولىپ تابىلادى. ادەتتە وركوكىرەك ادامدار بىردەڭە ۇيرەنۋىم كەرەك دەگەن ويدىڭ ٶزىن جانىنا جۋىتپايدى (جوح. 3-ح. 9). ال ٴبىز، كەرىسىنشە، ەحوبا مەن ونىڭ ۇيىمىنان ٴتالىم الۋعا اسىقپىز (يشايا 30:20؛ جوح. 6:45).
4 كەزدەسۋلەرگە بارعانىمىز كىشىپەيىل ەكەنىمىزدى، ياعني ۇيرەنۋگە اسىق، ىنتالى ەكەنىمىزدى بايقاتادى. يسانىڭ ٶلىمىن ەسكە الۋعا تەك مىندەتتى بولعاندىقتان عانا ەمەس، ونىڭ وسيەتىنە كىشىپەيىلدىلىكپەن باعىنعاندىقتان بارامىز. يسا: «مەنى ەسكە الۋ ٷشىن وسىلاي ىستەپ تۇرىڭدار»،— دەگەن ەدى (قورىنتتىقتارعا 1-حات 11:23—26 وقىڭىز). بۇل كەزدەسۋ بولاشاققا ٷمىتىمىزدى جالعاپ، ەحوبا ٴبىزدى قانشالىقتى سۇيەتىنىن ەسىمىزگە تاعى ٴبىر تۇسىرەدى. الايدا ەحوبا جىلىنا ٴبىر-اق رەت جىگەرلەنىپ، ٴبىر-اق رەت نىعايىپ قايتقانىمىز بىزگە جەتكىلىكسىز ەكەنىن بىلەدى. سوندىقتان دا ول اپتا سايىنعى كەزدەسۋلەردىڭ وتكەنىن قامداپ، سولارعا قاتىسۋعا شاقىرادى. بۇل جاعدايدا دا باعىنۋ ٷشىن بىزگە كىشىپەيىلدىلىك قاجەت. سول كەزدەسۋلەرگە دايىندالۋعا جانە بارۋعا ٴبىز اپتا سايىن بىرنەشە ساعات جۇمساپ ٴجۇرمىز.
5. نەگە كىشىپەيىل جاندار ەحوبانىڭ شاقىرۋىن قابىلدايدى؟
5 ەحوبا بارشا جاندى وزىنەن ٴتالىم الۋعا شاقىرۋدا، ٵرى بۇل شاقىرۋعا قۇلاق اسقان كىشىپەيىل جاندار جىل سايىن ارتىپ جاتىر (يشايا 50:4). ەسكە الۋ كەشى ۇناعاندىقتان، ولار وزگە دە كەزدەسۋلەرگە كەلە باستايدى (زاك. 8:20—23). ولارمەن بىرگە «كومەكشىمىز، قۇتقارۋشىمىز» ەحوبادان ٴتالىم الۋعا، ونىڭ جەتەگىندە جۇرۋگە قۋانىشتىمىز (ٴزاب. 40:17). راسىندا دا، ەحوبا مەن سۇيىكتى ۇلى يسادان ٴتالىم الۋعا تەڭ كەلەرلىك بىردە-ٴبىر ٸس جوق! (مات. 17:5؛ 18:20؛ 28:20).
6. ٴبىر كىسىگە ەسكە الۋ كەشىنە كەلۋگە كىشىپەيىلدىلىگى قالاي كومەكتەستى؟
6 جىل سايىن يسانىڭ ٶلىمىن ەسكە الۋ ٷشىن مۇمكىندىگىنشە كوپ ادامدى شاقىرۋعا تىرىسامىز. كوپتەگەن كىشىك جاندار كەلۋگە كەلىسىپ، مۇنىڭ يگىلىگىن كورەدى. سونىڭ دالەلى رەتىندە ٴبىر وقيعانى ايتا كەتەيىك. بىرنەشە جىل بۇرىن باۋىرلاسىمىز ٴبىر ەر كىسىنى ەسكە الۋ كەشىنە شاقىرادى. ٴبىراق ول كىسى كەلە المايتىنىن ايتادى. الايدا ونى ەسكە الۋ كەشىندە كورگەندە، باۋىرلاسىمىز اڭ-تاڭ بولادى. قوناق ەر كىسى قاۋىمنىڭ جىلى قارسى العانىنا قاتتى اسەرلەنگەنى سونشا — ول اپتا سايىنعى كەزدەسۋلەرگە كەلە باستايدى. سودان نە كەرەك، ول ٴبىر جىلدىڭ ىشىندە ٷش-اق كەزدەسۋدى جىبەرىپ العان ەكەن. كەلمەيمىن دەپ تۇرعان وعان كەلۋگە نە قوزعاۋ بولدى؟ مومىندىعى. وسى قاسيەتى وعان ويىن وزگەرتۋگە كومەكتەستى. شاقىرۋ قاعازىن بەرگەن باۋىرلاس: «ول وتە كىشىپەيىل ادام»،— دەدى. ەحوبانىڭ ٶزى بۇل كىسىنى جاقىنداتىپ تارتقانى ايدان انىق. ول — بۇگىندە شومىلدىرۋ راسىمىنەن وتكەن باۋىرلاسىمىز (سام. 2-ج. 22:28؛ جوح. 6:44).
7. كەزدەسۋلەردە بىلگەنىمىز بەن كيەلى كىتاپتان وقىعانىمىز بىزگە كىشىپەيىل بولۋعا قالاي كومەكتەسەدى؟
7 كەزدەسۋلەردە بىلگەندەرىمىز بەن كيەلى كىتاپتان وقىعاندارىمىز ٴبىزدى كىشىپەيىل بولۋعا ۇيرەتەدى. ەسكە الۋ كەشىنىڭ قارساڭىنداعى كەزدەسۋلەردە يسانىڭ ۇلگىسىنە جانە ٶمىرىن تولەم رەتىندە بەرگەندە تانىتقان كىشىپەيىلدىلىگىنە باسا نازار اۋدارىلادى. سونداي-اق سول كۇندەرى كيەلى كىتاپتان يسانىڭ ولىمىنە دەيىنگى ٵرى كەيىنگى وقيعالار جايلى وقيمىز. كەزدەسۋلەردە بىلگەنىمىز بەن كيەلى كىتاپتان وقىعان ۇزىندىلەر يسانىڭ ٴبىز ٷشىن بەرگەن قۇرباندىعىنا ريزاشىلىعىمىزدىڭ تامىرىن تەرەڭدەتەدى. وسىلايشا ونىڭ كىشىپەيىلدىلىگىنە ەلىكتەۋگە، قيىن كەزدە دە ەحوبانىڭ ەركىن ورىنداۋعا ىقىلاستى بولامىز (لۇقا 22:41، 42).
باتىلدىق قوزعاۋ سالادى
8. يسا قالاي باتىلدىق تانىتتى؟
8 ٴبىز يسانىڭ باتىلدىعىنا دا ەلىكتەگىمىز كەلەدى. ولىمىنىڭ الدىنداعى كۇندەرى ونىڭ تانىتقان باتىلدىعى جايلى ويلانىپ كورىڭىزشى. جاۋلارى ونى قورلاپ، ۇرىپ-سوعىپ، كەيىن ولىمگە كەسەتىنىن ول ٴبىلدى (مات. 20:17—19). سوندا دا يسا ولىممەن بەتپە-بەت كەلۋگە دايىن بولدى. گەتسيماني باعىندا ول قاسىنداعى ادال ەلشىلەرىنە: «تۇرىڭدار، كەتتىك! مىنە، ماعان وپاسىزدىق جاسايتىن ادام تاياپ قالدى»،— دەگەن (مات. 26:36، 46). قارۋلى توبىر ونى تۇتقىنداۋعا كەلگەندە، يسا العا شىعىپ، ىزدەپ جۇرگەن ادامدارى ٶزى ەكەنىن ايتادى. سوسىن ساربازدارعا ەلشىلەردى جىبەرە سالۋدى بۇيىرادى (جوح. 18:3—8). نە دەگەن باتىلدىق دەسەڭىزشى! بۇگىندە مايلانعان ماسىحشىلەر مەن باسقا قويلار دا يسانىڭ وسى باتىلدىعىن ۇلگى ەتىپ ٴجۇر. قالايشا؟
باتىلدىق تانىتىپ، كەزدەسۋلەرگە بارعانىڭىز باسقالارعا كۇش بەرەدى (9-ابزاستى قاراڭىز) *
9. ا) كەزدەسۋلەرگە بارۋ ٷشىن نەگە باتىلدىق قاجەت بولۋى مۇمكىن؟ ٵ) سەنىمى ٷشىن تۇرمەدە جاتقان باۋىرلاستارعا ٴبىزدىڭ ۇلگىمىز قالاي اسەر ەتۋى مۇمكىن؟
9 قيىن جاعدايلاردا دا جينالىستاردان قالماۋ ٷشىن باتىلدىق قاجەت. كەيبىر باۋىرلاستار قايعى جۇتىپ، كۇيزەلىپ نەمەسە دەنساۋلىعى سىر بەرىپ جۇرسە دە، كەزدەسۋلەردى قالدىرمايدى. ال وزگەلەرى بولسا ٷي ىشىندەگىلەردىڭ نەمەسە بيلىك يەلەرىنىڭ تاراپىنان قاتتى قارسىلىق كورىپ جۇرگەندەرىنە قاراماستان جينالىسقا كەلىپ ٴجۇر. ٴبىزدىڭ ۇلگىمىز سەنىمى ٷشىن تۇرمەدە وتىرعان باۋىرلاستارعا قالاي اسەر ەتەتىنى جايلى ويلاپ كورىڭىزشى (ەۆر. 13:3). قيىندىقتاردا قايىسپاي ەحوباعا قىزمەت ەتىپ جۇرگەنىمىزدى ەستىگەندە، ولاردىڭ سەنىمدەرى ۇشتالىپ، باتىلدىقتارى مەن مىنسىزدىكتەرى قاتايا تۇسەدى. ەلشى پاۋىل سوعان ۇقساس جاعدايدى باستان وتكەرگەن. ريمدە قاماۋدا بولعان كەزىندە ول باۋىرلاستاردىڭ قۇدايعا ادالدىقپەن قىزمەت ەتىپ جۇرگەندەرىن ەستىگەن سايىن قۋاناتىن (ٴفىلىپ. 1:3—5، 12—14). تۇرمەدەن شىققانعا دەيىن نەمەسە شىعا سالىسىمەن ول ەۆرەيلەرگە ارنالعان حاتىن جازدى. سول حاتتا پاۋىل ادال ماسىحشىلەردى ٴبىر-ٴبىرىن «ٵردايىم جاقسى كورۋگە» جانە بىرگە باس قوسۋدى ەشقاشان دوعارماۋعا ۇندەدى (ەۆر. 10:24، 25؛ 13:1).
10، 11. ا) ەسكە الۋ كەشىنە كىمدەردى شاقىرۋىمىز كەرەك؟ ٵ) ەفەستىكتەرگە 1:7 دە ەسكە الۋ كەشىنە شاقىرۋىمىزدىڭ قانداي سەبەبى جازىلعان؟
10 تۋىستارىمىزدى، ارىپتەستەرىمىز بەن كورشىلەرىمىزدى ەسكە الۋ كەشىنە شاقىرۋ دا باتىلدىقسىز بولمايدى. ٴبىز ولاردى نە ٷشىن شاقىرامىز؟ ەحوبا مەن يسانىڭ بىزگە جاساعان بار جاقسىلىعىنا ريزا بولعاندىقتان، ٴبىز باسقالاردى ەسكە الۋ كەشىنە شاقىرۋدان تارتىنعىمىز كەلمەيدى. ولار دا ەحوبانىڭ تولەم قۇرباندىعى ارقىلى كورسەتكەن «زور راقىمى» تۋرالى ٴبىلىپ، ونىڭ يگىلىگىن كورسە ەكەن دەيمىز (ەفەستىكتەرگە 1:7 وقىڭىز؛ ايان 22:17).
11 باتىلدىق تانىتىپ جينالىسقا كەلگەندە، قۇداي مەن ۇلىنىڭ كەرەمەت تۇردە تانىتقان كەلەسى قاسيەتىن دە تانىتامىز. قازىر سول جايىندا ٴسوز قوزعايىق.
سۇيىسپەنشىلىك قوزعاۋ سالادى
12. ا) قاۋىم كەزدەسۋلەرى ەحوبا مەن يساعا دەگەن سۇيىسپەنشىلىگىمىزدى قالاي وسىرەدى؟ ٵ) قورىنتتىقتارعا 2-حات 5:14، 15 ٴبىزدى نە ىستەۋگە تالپىندىرادى؟
12 كەزدەسۋلەرگە ەحوبا مەن يسانى جاقسى كورگەندىكتەن بارامىز. ول جەردەن ٴبىلىپ-تۇيگەندەرىمىز ولارعا دەگەن سۇيىسپەنشىلىگىمىزدى وسىرەدى. كەزدەسۋلەردە ەكەۋىنىڭ بىزگە جاساعان جاقسىلىقتارى جايلى ٴجيى ايتىلادى (ريم. 5:8). ال ەسكە الۋ كەشى ەحوبا مەن يسانىڭ ٴبىزدى، ٴتىپتى تولەمنىڭ باعاسىن ٵلى تۇسىنبەيتىندەردى دە قاتتى سۇيەتىنىن ەسىمىزگە سالادى. سودان جۇرەگىمىز ريزاشىلىققا تولىپ، ومىرىمىزدىڭ ٵربىر كۇنى يساعا ەلىكتەۋگە تالپىنامىز (قورىنتتىقتارعا 2-حات 5:14، 15 وقىڭىز). سونداي-اق تولەم بەرگەنى ٷشىن ەحوبانى ماداقتاعىمىز كەلەرى ٴسوزسىز. مۇنى ىستەۋدىڭ ٴبىر جولى — كەزدەسۋلەردە شىن جۇرەكتەن تۇسىنىكتەمە بەرۋ.
13. ەحوبا مەن يساعا دەگەن سۇيىسپەنشىلىگىمىز قانشالىقتى ەكەنىن قالاي كورسەتە الامىز؟ ٴتۇسىندىرىڭىز.
13 ەحوبا مەن ونىڭ ۇلىن قانشالىقتى سۇيەتىنىمىزدى ولار ٷشىن قۇرباندىقتارعا بارۋعا دايىن ەكەنىمىزبەن دە كورسەتەمىز. اسىرەسە كەزدەسۋلەرگە قاتىسۋ ٷشىن ٴتۇرلى قۇرباندىقتارعا بارۋ كەرەك بولىپ جاتادى. كوپ جاعدايدا ٴبىر كەزدەسۋىمىز جۇمىس كۇنىنىڭ سوڭىنا تۇسەدى. بۇل ۋاقىتتا ادەتتە كوبىمىزدىڭ ٵلىمىز قۇرىپ شارشاپ تۇرامىز. ال تاعى ٴبىر كەزدەسۋىمىز دەمالىس كۇندەرىنە تۇسەدى. ادەتتە جۇرت بۇل كەزدە دەمالىپ جاتادى. شارشاپ تۇرساق تا كەزدەسۋلەرگە بارعانىمىزدى ەحوبا بايقاي ما؟ ارينە! قۇرباندىعىمىز نەعۇرلىم ۇلكەن بولسا، ەحوبا وزىنە دەگەن سۇيىسپەنشىلىگىمىزدى سوعۇرلىم كوبىرەك باعالايدى (مار. 12:41—44).
14. جانكەشتى سۇيىسپەنشىلىك تانىتۋدا يسا قانداي ۇلگى قالدىردى؟
14 جانكەشتى سۇيىسپەنشىلىك تانىتۋدىڭ ۇلگىسىن يسا كورسەتكەن. ول شاكىرتتەرى ٷشىن جانىن بەرۋگە عانا ەمەس، ٴتىرى جۇرگەندەگى ٵر كۇنى ولاردىڭ مۇددەسىن وزىنىكىنەن جوعارى قويۋعا دايىن بولعان. مىسالى، ول شارشاپ-شالدىعىپ نە جانى كۇيزەلىپ تۇرعان كەزدە دە شاكىرتتەرىنىڭ جانىندا بولدى (لۇقا 22:39—46). يسا بىرەۋدەن بىردەڭە الۋدى ەمەس، كەرىسىنشە، بەرۋدى كوبىرەك ويلادى (مات. 20:28). ٴبىز دە ەحوبا مەن باۋىرلاستاردى وسىنشالىق جاقسى كورسەك، ەسكە الۋ كەشىنە دە، باسقا كەزدەسۋلەرگە دە قاتىسۋ ٷشىن بارىمىزدى سالامىز.
15. ٴبىز اسىرەسە كىمدەرگە كومەكتەسكىمىز كەلەدى؟
15 ٴبىز شىنايى ماسىحشىلەردەن قۇرالعان باۋىرلاستىقتىڭ مۇشەسىمىز. قاتارىمىزعا قوسىلسىن دەپ جاڭا ادامداردى شاقىرۋ ٷشىن دە كوپ ۋاقىت جۇمسايتىنىمىز راس. الايدا كومەگىمىزدى كوبىرەك قاجەت ەتەتىن ٴبىر توپ بار. بۇل — قاۋىمعا كەلمەي نە ۋاعىزداماي كەتكەن «سەنىمى ٴبىر باۋىرلاستارىمىز» (عال. 6:10). ولاردى كەزدەسۋلەرگە، اسىرەسە ەسكە الۋ كەشىنە كەلۋگە تالپىندىرساق، سۇيىسپەنشىلىگىمىزدىڭ راستىعىن دالەلدەيمىز. ولاردىڭ ٴبىرى ٴسۇيۋشى اكەمىز بەن باعۋشىمىزعا ورالىپ جاتسا، ەحوبا مەن يسا سياقتى ٴبىز دە شەكسىز قۋانامىز (مات. 18:14).
16. ا) ٴبىر-ٴبىرىمىزدى قالاي جىگەرلەندىرە الامىز جانە كەزدەسۋلەر بىزگە قالاي اسەر ەتەدى؟ ٵ) جوحان 3:16 داعى يسانىڭ سوزدەرىن نەگە اسىرەسە جىلدىڭ وسى ۋاقىتىندا ەسكە الۋىمىز كەرەك؟
16 كەلەر اپتالاردا 19 ٴساۋىر، جۇما كۇنى وتەتىن ەسكە الۋ كەشىنە مۇمكىندىگىنشە كوپ ادامدى شاقىرىڭىز (« ولاردى شاقىردىڭىز با؟» دەگەن قورشاۋدى قاراڭىز). ۇستىمىزدەگى جىلى ەحوبانىڭ دايىنداپ وتىرعان كەزدەسۋلەرىنىڭ ەشبىرىن قالدىرماي، ٴبىر-ٴبىرىمىزدى جىگەرلەندىرەيىك. وسى دۇنيەنىڭ سوڭى تاياپ كەلە جاتقاندىقتان، بىزگە كىشىپەيىل، باتىل ٵرى سۇيگىش بولۋعا قوزعاۋ سالاتىن كەزدەسۋلەر اۋاداي قاجەت (سال. 1-ح. 5:8—11). ەحوبا مەن يسانىڭ بىزگە دەگەن زور سۇيىسپەنشىلىگىن قانشالىقتى باعالايتىنىمىزدى كورسەتە بەرەيىك! (جوحان 3:16 وقىڭىز).
126-ٵن ساق ٴجۇرىپ، اياعىڭدى نىق باس
^ 5-ابزاس 2019-جىلدىڭ 19-ساۋىرىندە وتەتىن ەسكە الۋ كەشى جىلدىڭ ەڭ ماڭىزدى كەزدەسۋى بولماق. سول كەشكە بارۋعا بىزگە نە قوزعاۋ سالادى؟ ارينە، ەحوباعا ۇنامدى بولۋدى قالاعانىمىز. وسى ماقالادا ەسكە الۋ كەشىنە، سونداي-اق اپتا سايىنعى كەزدەسۋلەرگە بارۋعا قانداي قاسيەتتەر كومەكتەسەتىنىن قاراستىرامىز.
^ 52-ابزاس سۋرەتتەر سيپاتتاماسى: سەنىمى ٷشىن تۇرمەدە وتىرعان باۋىرلاس ۇيىنەن العان حاتتى وقىپ جىگەرلەنىپ وتىر. ونى ۇمىتپاعاندارىن ٵرى ازاماتتىق تولقۋعا قاراماستان وتباسىنىڭ ەحوباعا ادال ەكەنىن بىلگەندە، باۋىرلاسىمىز قۋانىپ قالدى.
