36-زەرتتەۋ ماقالاسى
ارماگەددوندى تاعاتسىزدانا كۇتەيىك!
«ولار ٴبارىن ارماگەددون دەپ اتالاتىن جەرگە جينادى» (ايان 16:16).
150-ٵن قۇتقارىلۋ ٷشىن قۇدايدى ىزدەيىك
اڭداتپا *
1، 2. ا) نەگە ارماگەددون جاقسى ناتيجە اكەلەتىن سوعىس بولماق؟ ٵ) وسى ماقالادا قانداي سۇراقتاردى قاراستىرامىز؟
كەيبىر ادامدار جەر بەتى يادرولىق سوعىستىڭ نەمەسە تابيعي اپاتتىڭ كەسىرىنەن جويىلادى دەپ ويلايدى. ٴبىراق كيەلى كىتاپتا ولاي دەپ جازىلماعان. كيەلى كىتاپ جاقىن ارادا جاقسى ناتيجە اكەلەتىن ٴبىر سوعىس بولادى دەپ ۇيرەتەدى (ايان 1:3). ول ارماگەددون دەپ اتالادى. بۇل سوعىس ادامزاتتى جويمايدى، قايتا، امان ساقتايدى.
2 كيەلى كىتاپتا ارماگەددون سوعىسى ادامزاتتى قالاي امان ساقتايتىنى جازىلعان: سول سوعىستا ادامنىڭ بيلىك ەتۋى توقتاتىلادى، سونداي-اق زۇلىمدار جويىلىپ، ادىلدەر امان قالادى، جەردى بۇلدىرگەندەر قۇرتىلادى (ايان 11:18). وسى شىندىقتاردى جاقسىراق ٴتۇسىنۋ ٷشىن كەلەسى 4 سۇراقتى قاراستىرايىق: ارماگەددون دەگەن نە؟ ارماگەددوننىڭ الدىندا قانداي وقيعالار بولماق؟ ارماگەددوننان امان قالعانداردىڭ اراسىندا بولۋ ٷشىن نە ىستەۋىمىز كەرەك؟ ارماگەددون جاقىنداعان ۋاقىتتا ٶمىر ٴسۇرىپ جاتقان بىزدەر قالاي ادال بولىپ قالا الامىز؟
ارماگەددون دەگەن نە؟
3. ا) ارماگەددون ٴسوزى نەنى بىلدىرەدى؟ ٵ) ايان 16:14، 16 نى ەسكەرسەك، نەگە ارماگەددون بەينەلى جەر دەپ ايتا الامىز؟
3 ايان 16:14، 16 وقىڭىز. كيەلى كىتاپتا «ارماگەددون» ٴسوزى ٴبىر-اق رەت كەزدەسەدى، بۇل ەۆرەيدىڭ «مەگيددو تاۋى» دەگەندى بىلدىرەتىن سوزدەن شىققان (ايان 16:16). ەجەلگى يسرايلدە مەگيددو دەگەن قالا بولعان (ەشۋا 17:11). ٴبىراق ارماگەددون دەگەنىمىز تۋرا ماعىناداعى جەرگە ەمەس، «جەرجۇزىنىڭ پاتشالارى» ەحوباعا قارسى شىعۋ ٷشىن جينالعان ۋاقىتقا نۇسقايدى (ايان 16:14). الايدا بۇل ماقالادا ٴبىز «ارماگەددون» دەگەن تىركەستى جەرجۇزىنىڭ پاتشالارى جينالعان سوڭ ىلە-شالا بولاتىن سوعىسقا نۇسقاۋ ٷشىن دە قولدانامىز. ارماگەددون دەگەن بەينەلى جەر ەكەنىن قايدان بىلە الامىز؟ بىرىنشىدەن، تۋرا ماعىناداعى مەگيددو دەگەن تاۋ جوق. ەكىنشىدەن، مەگيددونىڭ اينالاسى «جەرجۇزىنىڭ پاتشالارىن»، ولاردىڭ اسكەرى مەن قارۋ-جاراقتارىن سيدىراتىنداي سونشالىقتى ۇلكەن ەمەس. ۇشىنشىدەن، وسى ماقالادان كورەتىنىمىزدەي، ارماگەددون سوعىسى الەمنىڭ پاتشالارى جەردىڭ تۇكپىر-تۇكپىرىندە تۇرىپ جاتقان قۇدايدىڭ حالقىنا شابۋىل جاساعاندا باستالادى.
4. نەلىكتەن ەحوبا ٶزىنىڭ ۇلى شەشۋشى سوعىسىن مەگيددو دەگەن جەردىڭ اتىمەن اتادى؟
4 نەلىكتەن ەحوبا ٶزىنىڭ ۇلى شەشۋشى سوعىسىن مەگيددو دەگەن جەردىڭ اتىمەن اتادى؟ كيەلى كىتاپ جازىلعان زاماندا مەگيددو مەن ونىڭ جانىنداعى ەزرەحەل اڭعارىندا كوپتەگەن شايقاستار وتەتىن. كەيدە ەحوبا سول شايقاستاردا حالقىنىڭ جەڭىسكە جەتۋىنە تىكەلەي كومەكتەسىپ وتىرعان. مىسالى، ەحوبا «مەگيددو سۋلارى» ارقىلى باراققا سيسارا باستاعان قاناحاندىقتاردىڭ اسكەرىن جەڭۋگە كومەكتەستى. سول كەرەمەت جەڭىستى سيلاعانى ٷشىن باراق پەن دەبورا پايعامبار ەحوباعا ريزاشىلىعىن ٴبىلدىرىپ، بىلاي دەپ ٵن شىرقادى: «كوكتەن جۇلدىزدار سوعىستى سيساراعا قارسى... جاۋدى قيشوننىڭ سۋى... شايىپ كەتتى» (بي. 5:19—21).
5. ارماگەددون سوعىسى مەن باراق باستاعان سوعىستىڭ اراسىندا قانداي ايىرماشىلىق بولماق؟
5 باراق پەن دەبورا اندەرىن مىنا سوزدەرمەن تامامدادى: «ۋا، ەحوبا، جاۋلارىڭنىڭ ٴبارى جەر قۇشسىن! ال ٶزىڭدى سۇيەتىندەر شىققان كۇندەي جارقىراسىن!» (بي. 5:31). ارماگەددون سوعىسىندا دا قۇدايدىڭ جاۋلارى جويىلادى، ال ونى سۇيەتىندەر امان قالادى. ٴبىراق وسى ەكى سوعىستىڭ اراسىندا ٴبىر ماڭىزدى ايىرماشىلىق بار. قۇداي حالقى ارماگەددون كەزىندە سوعىسپايتىن بولادى، ولار ٴتىپتى قولىنا قارۋ دا المايدى! قۇدايدىڭ قىزمەتشىلەرى «دامىل تاۋىپ»، ەحوبا مەن ونىڭ كوكتەگى اسكەرىنە سەنىم ارتاتىندىقتان، «كۇشتى» بولادى (يشايا 30:15؛ ايان 19:11—15).
6. ارماگەددون سوعىسىندا ەحوبا جاۋلارىن قالاي ويسىراتۋى مۇمكىن؟
6 ارماگەددون كەزىندە قۇداي ٶزىنىڭ جاۋلارىن قالاي ويسىراتادى؟ ونى ٴتۇرلى جولدارمەن ىستەۋى مۇمكىن. مىسالى، جەرسىلكىنىسى، بۇرشاق جانە نايزاعاي ارقىلى (ٵيۇپ 38:22، 23؛ ەزەك. 38:19—22). سونداي-اق ەحوبا جاۋلارىن ٴبىر-بىرىمەن شايقاستىرىپ قويۋى مۇمكىن (شەج. 2-ج. 20:17، 22، 23). زۇلىمداردى پەرىشتەلەر ارقىلى جويۋى مۇمكىن (يشايا 37:36). قۇداي نەنى قولدانسا دا، بۇل سوعىستا تولىقتاي جەڭىسكە جەتەدى. ونىڭ بارلىق جاۋلارى جويىلادى. ال ٵدىل ادامدار امان قالادى (ناق. س. 3:25، 26).
ارماگەددوننىڭ الدىندا قانداي وقيعالار بولماق؟
7، 8. ا) سالونيكالىقتارعا 1-حات 5:1—6 تارماقتارعا ساي، الەمدىك كوشباسشىلار قانداي ەرەكشە حاباردى جاريالايدى؟ ٵ) نەگە بۇل حابار ەرەكشە قاۋىپتى بولماق؟
7 «بەيبىتشىلىك پەن قاۋىپسىزدىكتىڭ» جاريالانۋى «ەحوبانىڭ كۇنىنە» باستاما بەرەدى (سالونيكالىقتارعا 1-حات 5:1—6 وقىڭىز). سالونيكالىقتارعا 1-حات 5:2 دەگى «ەحوبانىڭ كۇنى» دەگەن «زور الاپاتقا» نۇسقايدى (ايان 7:14). سول الاپاتتىڭ كەلىپ قالعانىن قايدان بىلەمىز؟ كيەلى كىتاپتا الەمدىك كوشباسشىلاردىڭ «بەيبىتشىلىك پەن قاۋىپسىزدىكتى» جاريالايتىنى ايتىلعان. بۇل حاباردىڭ جاريالانۋى زور الاپاتتىڭ باستالاتىنىنىڭ بەلگىسى بولادى.
8 نەگە الەمدىك كوشباسشىلار بۇنى جاريالايدى؟ ٴبىز ونى ناقتى بىلمەيمىز. بۇعان ٴدىني كوشباسشىلار دا قاتىسا ما؟ ول دا مۇمكىن. ٴبىراق ٴبىر ناقتىسى — «بەيبىتشىلىك پەن قاۋىپسىزدىك» تۋرالى حابار جىنداردان كەلگەن وتىرىك حابار بولادى. بۇل وتىرىك حابار ەرەكشە قاۋىپتى، ويتكەنى ادامزات تاريحىندا بولماعان زور الاپات مىنە-مىنە باستالعالى تۇرعاندا، ادامداردىڭ بويىندا جالعان قاۋىپسىزدىك سەزىمىن تۋدىرادى. ٴيا، «جۇكتى ايەلدىڭ تولعاعى كەنەتتەن باستالاتىنى ىسپەتتى» جويىلاتىن كەز دە كەنەتتەن كەلەدى. ال ەحوبانىڭ ادال قىزمەتشىلەرىمەن نە بولماق؟ ەحوبانىڭ كۇنى اياقاستىنان باستالسا دا، ولار سوعان دايىن بولادى.
9. ەحوبا شايتاننىڭ دۇنيەسىن بىردەن جويا ما؟ ٴتۇسىندىرىڭىز.
9 ەحوبا شايتاننىڭ دۇنيەسىن نۇحتىڭ كۇنىندەگىدەي بىردەن جويىپ جىبەرمەيدى. بۇل جويىلۋ ەكى نەگىزگى ساتىدان تۇرادى: بىرىنشىدەن، ول ۇلى بابىلدى، ياعني دۇنيەجۇزىلىك جالعان دىندەر يمپەرياسىن جويادى. سوسىن ارماگەددون كەزىندە شايتاننىڭ قالعان دۇنيەسىن، سونداي-اق ونىڭ ساياسي، اسكەري جانە ساۋدا-ساتتىق جۇيەسىن جويادى. قازىر وسى ماڭىزدى ەكى وقيعانىڭ ەگجەي-تەگجەيىن قاراستىرىپ كورەيىك.
10. ايان 17:1، 6 مەن 18:24 تەگى سوزدەرگە ساي، ەحوبا نە سەبەپتى ۇلى بابىلدى جويادى؟
10 ۇلى جەزوكشەنىڭ جازالانۋى (ايان 17:1، 6؛ 18:24 وقىڭىز). ۇلى بابىل قۇدايدىڭ ەسىمىنە قارا داق ٴتۇسىردى. مىسالى، ول قۇداي جايلى تالاي وتىرىكتى تاراتتى. جەڭىل ٴجۇرىستى ايەل ۇقساپ، جالعان ٴدىن ادامي ۇكىمەتتەردى قولداۋىمەن ەحوباعا ادال بولمادى. ٶز وتارىنداعى ادامداردى قاناپ، اقشالارىن تارتىپ الدى. سونداي-اق تالاي ادامدى ٶلتىردى، كەيبىر قۇدايدىڭ قىزمەتشىلەرىنىڭ قانى دا سونىڭ موينىندا (ايان 19:2). ەحوبا ۇلى بابىلدى قالاي جويادى؟
11. «ون ٴمۇيىزدى ال قىزىل جىرتقىش» كىمدى بەينەلەيدى؟ قۇداي ونى ۇلى بابىلعا قارسى قالاي قولدانادى؟
11 ەحوبا «ون ٴمۇيىزدى ال قىزىل جىرتقىش» ارقىلى «ۇلى جەزوكشەنى» جوياتىن بولادى. جىرتقىش اڭ بىرىككەن ۇلتتار ۇيىمىن، ال ون ٴمۇيىز سول ۇيىمدى قولداپ جاتقان ۇكىمەتتەردى بەينەلەيدى. قۇداي بەلگىلەگەن ۋاقىتتا سول ۇكىمەتتەر ۇلى بابىلعا شابۋىل جاسايدى. ولار ونىڭ بايلىعىن تارتىپ الۋمەن ونى «تالان-تاراج ەتەدى»، ال ونىڭ قانداي زۇلىم ەكەنىن بارىنە كورسەتۋمەن ونى «جالاڭاشتايدى» (ايان 17:3، 16). ۇلى بابىلدىڭ جويىلۋى وتە تەز بولاتىندىقتان، «ٴبىر كۇننىڭ ىشىندە» بولعانداي كورىنەدى. جالعان ٴدىندى قولداپ كەلگەندەر ٷشىن توبەلەرىنە جاي تۇسكەندەي بولادى، ويتكەنى ۇلى جەزوكشە: «مەن تاقتا وتىرعان پاتشايىمدايمىن. مەن جەسىر ەمەسپىن، ەشقاشان قايعى-قاسىرەت شەكپەيمىن»،— دەپ بوسكەن ەدى (ايان 18:7، 8).
12. ەحوبا نە نارسەگە جول بەرمەيدى جانە نەگە؟
12 قۇداي سول حالىقتارعا ٶز قىزمەتشىلەرىن جويىپ جىبەرۋىنە جول بەرمەيدى. قۇداي حالقى ونىڭ ەسىمىن الىپ جۇرەدى جانە «ۇلى بابىلدان شىق» دەگەن وسيەتكە مويىنسۇنادى (ەل. ٸس. 15:16، 17؛ ايان 18:4). باسقالارعا دا شىعۋعا كومەكتەسۋ ٷشىن ايانباي ەڭبەكتەنەدى. سوندىقتان ولار ۇلى بابىلدىڭ «باسىنا تۇسەتىن پالەلەرگە دۋشار بولمايدى». دەسە دە ودان كەيىن بولاتىن وقيعالاردا تاباندى بولىپ قالۋ ٷشىن ولارعا ۇلكەن سەنىم كەرەك بولادى.
جەردىڭ قاي بۇرىشىندا تۇرسا دا، شابۋىل جاسالعاندا قۇداي حالقى وعان سەنىم ارتادى (13-ابزاستى قاراڭىز) *
13. ا) گوگ كىمدەردى بىلدىرەدى؟ ٵ) ەزەكيەل 38:2، 8، 9 عا ساي، گوگتىڭ قۇداي حالقىنا شابۋىلداۋىنا نە تۇرتكى بولادى؟
13 گوگتىڭ شابۋىلى (ەزەكيەل 38:2، 8، 9 وقىڭىز). ەحوبا جالعان دىندەردىڭ ٴبارىن جويعان سوڭ، جەر بەتىندە ٴبىر عانا ٴدىن بولادى. ٴيا، تەك ەحوبا كۋاگەرلەرى عانا قالادى. بۇل، ارينە، شايتاننىڭ اشۋىنا تيەدى. سول اشۋىن «تازا ەمەس» حابار ارقىلى، ياعني جىنداردىڭ ۇگىت-ناسيحاتى ارقىلى كورسەتىپ، وداقتاسقان حالىقتاردى ەحوبانىڭ قىزمەتشىلەرىنە شابۋىلداۋعا تۇرتكى جاسايدى (ايان 16:13، 14). بۇل وداقتاسقان حالىقتار «ماگوگ جەرىندەگى گوگ» دەپ اتالادى. حالىقتار ەحوبانىڭ حالقىنا شابۋىلداعاندا، ارماگەددون سوعىسى باستالادى (ايان 16:16).
14. گوگ نەنى تۇسىنەدى؟
14 گوگ «بىلەك كۇشىنە»، ياعني ٶز اسكەرىنە سەنەدى (شەج. 2-ج. 32:8). ال ٴبىز قۇدايىمىز ەحوباعا سەنەمىز. ٴبىراق حالىقتار ٷشىن بۇل اقىماقتىق بولىپ كورىنەدى. نەگە؟ ويتكەنى كەزىندە ۇلى بابىل مىقتى بولعان، ٴبىراق ونىڭ قۇدايلارى ونى «ون ٴمۇيىز بەن جىرتقىش اڭنان» قۇتقارا المادى (ايان 17:16). سوندىقتان گوگ ٴبىزدى وڭايلىقپەن قۇرتامىن دەپ ويلايدى. ول «جەردى جاۋىپ قالاتىن بۇلت سياقتى كەلىپ»، ەحوبانىڭ حالقىنا شابۋىلدايدى (ەزەك. 38:16). ٴبىراق كوپ ۇزاماي تۇزاققا ٴتۇسىپ قالعانىن تۇسىنەدى. قىزىل تەڭىزدەگى پەرعاۋىن سياقتى، گوگ تا قۇدايمەن شايقاسىپ جاتقانىن بىلەتىن بولادى (مۇس. 2-ج. 14:1—4؛ ەزەك. 38:3، 4، 18، 21—23).
15. يسا ارماگەددون سوعىسىندا نە ىستەيدى؟
15 ٴماسىح پەن ونىڭ كوكتەگى اسكەرى قۇداي حالقىن قورعاپ، گوگ پەن ونىڭ اسكەرىن تالقاندايدى (ايان 19:11، 14، 15). ال حالىقتاردى الداپ، قۇداي حالقىنا شابۋىل جاساۋعا تۇرتكى بولعان ەحوبانىڭ ەڭ باستى جاۋى شايتانمەن نە بولماق؟ يسا شايتان مەن جىنداردى «ٴتۇپسىز تۇڭعيىققا لاقتىرىپ»، 1000 جىلعا بۇعاۋلاپ تاستايدى (ايان 20:1—3).
ارماگەددون كەزىندە كىمدەر امان قالادى؟
16. ا) قۇدايدى بىلەتىنىمىزدى قالاي كورسەتەمىز؟ ٵ) قۇدايدى بىلەتىن ادامدارمەن ارماگەددوندا نە بولادى؟
16 شىندىققا كەشە كەلەيىك يا بۇرىننان جۇرەيىك، ارماگەددوننان امان قالۋ ٷشىن قۇدايدى بىلەتىنىمىزدى جانە «يەمىز يسا تۋرالى ىزگى حابارعا» مويىنسۇناتىنىمىزدى كورسەتۋمىز كەرەك (سال. 2-ح. 1:7—9). قۇدايدى ٴبىلۋ دەگەن — وعان نە ۇنايتىنىن، نە ۇنامايتىنىن جانە تالاپتارىن ٴبىلۋ دەگەن ٴسوز. سونداي-اق ونى سۇيسەك، مويىنسۇنساق جانە تەك وعان عيبادات ەتسەك، ونى بىلەتىنىمىزدى كورسەتەمىز (جوح. 1-ح. 2:3—5؛ 5:3). وسىنىڭ ٴبارىن ىستەسەك، قۇداي دا ٴبىزدى بىلەتىن بولادى. ال بۇل ەحوبانىڭ ماقۇلداۋىنا يە ەكەنىمىزدى بىلدىرەدى (قور. 1-ح. 8:3). مۇنداي ادامدار ارماگەددون سوعىسىندا امان قالادى!
17. «يەمىز يسا تۋرالى ىزگى حابارعا» مويىنسۇنۋ دەگەنگە نە جاتادى؟
17 «يەمىز يسا تۋرالى ىزگى حابارعا» يسا ۇيرەتكەن بارلىق شىندىقتار كىرەدى. ولاردى ٶز ومىرىمىزدە ورىنداعاندا، يسا تۋرالى ىزگى حابارعا مويىنسۇناتىنىمىزدى كورسەتەمىز. سونداي-اق پاتشالىقتىڭ مۇددەسىن ٴبىرىنشى ورىنعا قويۋ، قۇدايدىڭ ٵدىل تالاپتارىنا ساي ٶمىر ٴسۇرۋ جانە قۇداي پاتشالىعىن جاريالاۋ دا مويىنسۇنۋعا جاتادى (مات. 6:33؛ 24:14). ٴماسىحتىڭ مايلانعان باۋىرلارىنا ىزگى حاباردى ۋاعىزداۋ مەن شاكىرت دايىنداۋدا قولداۋ كورسەتۋ ارقىلى دا مويىنسۇناتىنىمىزدى پاش ەتەمىز (مات. 25:31—40).
18. قۇدايدىڭ مايلانعان قىزمەتشىلەرى «باسقا قويلاردىڭ» جاقسىلىعىن قالاي قايتارادى؟
18 كوپ ۇزاماي قۇدايدىڭ مايلانعان قىزمەتشىلەرى «باسقا قويلاردىڭ» كورسەتكەن جاقسىلىعىن قايتاراتىن بولادى (جوح. 10:16). قالاي؟ ارماگەددوننىڭ الدىندا جەردەگى 144000 نىڭ قالعانى كوكتە ولمەيتىن رۋحاني تۇلعالار رەتىندە قايتا ٴتىرىلىپ قويادى. سوندا 144000 نىڭ ٴبارى كوكتەگى اسكەردىڭ مۇشەسى بولىپ، گوگتى تالقاندايدى، ال قۇدايدىڭ حالقىن قورعايدى (ايان 2:26، 27؛ 7:9، 10). سول كەزدە ۇلى جاماعات ەحوبانىڭ مايلانعان قىزمەتشىلەرىنە كەزىندە قولداۋ كورسەتكەندەرىنە قۋاناتىن بولادى.
ٴبىز قالاي ادال بولىپ قالا الامىز؟
19، 20. قيىندىقتارىمىزعا قاراماستان ارماگەددون جاقىنداپ جاتقاندا، قالاي ٴبىز ادال بولىپ قالا الامىز؟
19 مىنا قيىن زاماندا ەحوبانىڭ قىزمەتشىلەرىنىڭ كوبى قيىندىقتارعا كەزىگىپ ٴجۇر. دەسە دە ٴبىز ولارعا قۋانىشپەن توزە الامىز (جاق. 1:2—4). وسى ورايدا ۇدايى ٵرى شىن جۇرەكتەن دۇعا ەتكەنىمىز بىزگە ۇلكەن كومەك بولا الادى (لۇقا 21:36). تەك دۇعامەن شەكتەلمەي، قۇداي ٴسوزىن دە كۇن سايىن زەرتتەپ، وي جۇگىرتكەنىمىز ٴجون. سونىمەن قاتار الدا بولاتىن پايعامبارلىقتار جايلى وقىپ، سول جونىندە ويلانعانىمىز ماڭىزدى (ٴزاب. 77:12). وسىلاردى ۇمىتپاي ىستەپ، قىزمەتىمىزگە دە بارىمىزدى سالساق، سەنىمىمىز وشپەيدى، ٷمىتىمىز ۇزىلمەيدى.
20 ۇلى بابىل كەلمەسكە كەتىپ، ارماگەددون اياقتالعاندا، قالاي قۋاناتىنىمىزدى ەلەستەتىپ كورىڭىزشى. ال قۇداي ەسىمى مەن ونىڭ بيلىك ەتۋ قۇقىعى قۇرمەتتەلىپ جاتقاندا، قۋانىشىمىز ەسەلەنە تۇسەتىنى ايتپاسا دا تۇسىنىكتى (ەزەك. 38:23). مىنە، سول سەبەپتەن قۇدايدى ٴبىلىپ، ۇلىنا مويىنسۇناتىندار جانە سوڭىنا دەيىن تاباندىلىق تانىتقاندار ارماگەددوندى تاعاتسىزدانا كۇتەدى! (مات. 24:13).
143-ٵن قىزمەت ەتەيىك، سەرگەك جۇرەيىك، كۇتەيىك
^ 5-ابزاس قۇداي حالقى ارماگەددوندى ۇزاق ۋاقىتتان بەرى كۇتىپ كەلەدى. بۇل ماقالادا كەلەسىدەي سۇراقتارعا توقتالامىز: ارماگەددون دەگەن نە؟ ارماگەددوننىڭ الدىندا قانداي وقيعالار بولماق؟ ارماگەددوننىڭ الدىندا ٶمىر ٴسۇرىپ جاتقان بىزدەر قالاي ادال بولىپ قالا الامىز؟
^ 71-ابزاس سۋرەت سيپاتتاماسى: «بەيبىتشىلىك پەن قاۋىپسىزدىك» جاريالانعاندا، ٴبىز قىزمەتىمىزدى جالعاستىرا بەرەمىز. جالعان دىندەر جويىلعاندا، زەرتتەۋىمىزدى دوعارمايمىز. ماگوگ جەرىندەگى گوگ بىزگە شابۋىلداعاندا، ەحوبانىڭ قورعايتىنىنا سەنىمىمىزدى جوعالتپايمىز.
^ 85-ابزاس سۋرەت سيپاتتاماسى: ساقشىلار قىزمەتكەرلەرى ٴماسىحشى وتباسىنىڭ ۇيىنە باسا-كوكتەپ كىرگەلى جاتىر. بۇل وتباسى يسا مەن پەرىشتەلەردىڭ ٴبارىن كورىپ تۇرعانىنا سەنىمدى.
