11-زەرتتەۋ ماقالاسى
ەحوبانىڭ داۋسىنا قۇلاق ٴتۇرىڭىز
«بۇل — مەنىڭ سۇيىكتى ۇلىم... ونى تىڭداڭدار!» (مات. 17:5).
89-ٵن قۇدايعا قۇلاق اسىپ، باتاعا كەنەل
اڭداتپا *
1، 2. ا) ەحوبا ادامدارمەن قالاي سويلەسكەن؟ ٵ) بۇل ماقالادا نە قاراستىرامىز؟
ەحوبا ادامدارمەن سويلەسكەندى جاقسى كورەدى. ەجەلدە ول پايعامبارلار، پەرىشتەلەر جانە ۇلى يسا ٴماسىح ارقىلى ٶز ويىن ٴبىلدىرىپ وتىرعان (اموس 3:7؛ عال. 3:19؛ ايان 1:1). ال بۇگىندە ول بىزبەن كيەلى كىتاپ ارقىلى سويلەسەدى. ەحوبا كيەلى كىتاپتى ونىڭ ويى مەن ارەكەت ەتۋ جولدارىن تۇسىنە الۋىمىز ٷشىن بەردى.
2 يسا جەردە بولعاندا، ەحوبا ٷش رەت كوكتەن سويلەگەن. قازىر ەحوبا سول جاعدايلاردا نە ايتقانىن، ايتقاندارىنان نە ۇيرەنەتىنىمىز بەن پايدالى تۇستارىن قاراستىرايىق.
«سەن مەنىڭ سۇيىكتى ۇلىمسىڭ»
3. مارقا 1:9—11 تارماقتاردان بىلگەنىمىزدەي، يسا شومىلدىرۋ راسىمىنەن وتكەن كەزدە ەحوبا نە دەدى؟ بۇل سوزدەردە قانداي ٷش شىندىق جاتىر؟
3 مارقا 1:9—11 (وقىڭىز) تارماقتاردا ەحوبا كوكتەن سويلەگەن ٴبىرىنشى جاعداي سيپاتتالادى. ول يساعا: «سەن مەنىڭ سۇيىكتى ۇلىمسىڭ. مەن ساعان ريزامىن!»— دەگەن. وسىلاي اكەلىك ماحابباتىن ٴبىلدىرىپ، وعان سەنىم ارتاتىنىن ايتقاندا، يسانىڭ جۇرەگى شاتتىققا تولدى. ەحوبانىڭ سوزدەرى يسا جايىندا ماڭىزدى ٷش شىندىقتى ايتادى. بىرىنشىدەن، يسا — ونىڭ ۇلى. ەكىنشىدەن، ەحوبا ۇلىن سۇيەدى. ۇشىنشىدەن، ەحوبا ۇلىنا ريزا. قازىر وسى ٷش جايتقا تەرەڭىرەك ۇڭىلەيىك.
4. شومىلدىرۋ راسىمىنەن وتكەندە، يسا قاي ماعىنادا قۇدايدىڭ ۇلى بولدى؟
4 «سەن مەنىڭ... ۇلىمسىڭ». بۇل سوزدەر ەحوبا مەن سۇيىكتى ۇلىنىڭ اراسىندا جاڭا قارىم-قاتىناس ورناعانىن بىلدىرەدى. يسا كوكتە بولعاندا-اق ونىڭ ۇلى ەدى عوي دەرسىز. ٴيا، ٴبىراق ول شومىلدىرۋ راسىمىنەن وتكەندە، جاڭا ماعىنادا قۇدايدىڭ ۇلى بولدى. ول كيەلى رۋحپەن مايلانىپ، كوككە ورالۋ، پاتشا ٵرى باس ٴدىني قىزمەتكەر بولۋ ۇمىتىنە يە بولدى (لۇقا 1:31—33؛ ەۆر. 1:8، 9؛ 2:17). سۋدان شىققان يساعا ەحوبانىڭ «سەن مەنىڭ ۇلىمسىڭ» دەگەنى سوندىقتان (لۇقا 3:22).
ٴبىز ماقتاۋ مەن جىگەرلى سوزدەردەن گۇلدەي جاينايمىز (5-ابزاستى قاراڭىز) *
5. سۇيىسپەنشىلىك كورسەتىپ، جىگەر بەرۋدە ەحوباعا قالاي ەلىكتەسەك بولادى؟
5 «سۇيىكتى ۇلىمسىڭ». سۇيىسپەنشىلىگى مەن ريزالىعىن بىلدىرگەن ەحوباعا ەلىكتەپ، ٴبىز دە وزگەلەرگە كۇش-جىگەر بەرۋدى كوزدەيمىز (جوح. 5:20). جاقىن ادامىمىز ٴبىزدى سۇيەتىنىن كورسەتىپ، جاقسى ىستەرىمىز ٷشىن ماقتاسا، كوڭىلىمىز ٶسىپ قالادى، سولاي ەمەس پە؟! قاۋىمداعى باۋىرلاستار مەن ۇيدەگى وتباسىمىز ٴبىزدىڭ سۇيىسپەنشىلىگىمىزگە، جىلى دا جىگەرلى سوزدەرىمىزگە ٴدال سولاي مۇقتاج. وزگەنى ماقتاعاندا، ونىڭ سەنىمىن قايراپ، ەحوباعا ادال قىزمەت ەتە بەرۋگە كۇش بەرەمىز. ماقتاۋ سوزدەرگە اسىرەسە بالالار ٴزارۋ. اتا-اناسى بالالارىن شىن جۇرەكتەن ماقتاپ، جىلى سەزىمدەرىن ٴبىلدىرىپ وتىرسا، ولار جادىراپ-جايناي تۇسەدى.
6. ٴبىز يسا ماسىحكە نە ٷشىن سەنىم ارتامىز؟
6 «مەن ساعان ريزامىن!» بۇل سوزدەردەن كورىنەتىندەي، ەحوبا يسانىڭ العان تاپسىرماسىن ادال اتقارىپ شىعاتىنىنا سەنىمدى بولعان. ەگەر ول ۇلىنا وسىلاي سەنىپ وتىرسا، ٴبىز دە وعان ەحوبانىڭ بارلىق ۋادەسىن ىسكە اسىرادى دەپ سەنە الامىز (قور. 2-ح. 1:20). يسانىڭ ۇلگىسى جايىندا ويلانساق، ودان ۇيرەنۋگە، ونىڭ ىزىمەن جۇرۋگە ودان سايىن اسىق بولامىز. ەحوبا يساعا قالاي سەنىمدى بولسا، قىزمەتشىلەرىنە دە سولاي سەنىمدى. ەحوبا ولاردىڭ ٵرى قاراي دا توپ رەتىندە ۇلىنان ۇيرەنە بەرەتىنىنە كۇماندانبايدى (پەت. 1-ح. 2:21).
«ونى تىڭداڭدار!»
7. ماتاي 17:1—5 تارماقتارعا ساي، ەحوبا قاي كەزدە كوكتەن سويلەدى جانە ول نە دەدى؟
7 ماتاي 17:1—5 وقىڭىز. ەحوبانىڭ كوكتەن ەكىنشى رەت سويلەگەن كەزى يسانىڭ «سىرت كورىنىسى وزگەرىسكە تۇسكەندە» بولدى. يسا پەتىر، جاقىپ پەن جوحاندى ەرتىپ، ٴبىر بيىك تاۋعا كوتەرىلدى. سول جەردە شاكىرتتەرى ٴبىر عاجايىپ كورىنىسكە كۋا بولدى. يسانىڭ ٴجۇزى كۇندەي جارقىراپ، كيىمى ساۋلە شاشتى. مۇسا مەن ٸلياس پايعامباردى بەينەلەگەن ەكى ادام يسامەن سويلەسىپ، ونىڭ جاقىندا ولەتىنى، سوسىن تىرىلەتىنى جايىندا ايتا باستادى. ٷش ەلشى بۇل كەرەمەت كورىنىستى ۇيقىلى-وياۋ كەزدەرىندە ەمەس، تولىق ويانعاننان كەيىن كوردى (لۇقا 9:29—32). سوسىن ولاردى ٴبىر نۇرلى بۇلت وراپ الدى دا، بۇلت اراسىنان ٴبىر داۋىس ەستىلدى. بۇل قۇدايدىڭ داۋسى ەدى! يسا شومىلدىرۋ راسىمىنەن وتكەن كەزدەگىدەي، بۇل جولى دا ەحوبا ۇلىنا ريزا ەكەنىن، ونى سۇيەتىنىن ٴبىلدىرىپ: «بۇل — مەنىڭ سۇيىكتى ۇلىم. مەن وعان ريزامىن!»— دەدى. سوسىن ارتىنان: «ونى تىڭداڭدار!»— دەپ قوستى.
8. تاۋداعى كورىنىستەن كەيىن يسا مەن شاكىرتتەرى قانداي اسەردە قالدى؟
8 بۇل كورىنىستەن يسانىڭ قۇداي پاتشالىعىنىڭ پاتشاسى بولعاندا قانداي ۇلىلىق پەن قۇدىرەتكە كەنەلەتىنى ايقىن بولدى. يسا كورگەنىنەن كۇش-جىگەر الىپ، الداعى اۋىر ازاپتار مەن اياۋسىز ولىمگە توتەپ بەرۋگە دايىن بولدى. تاۋداعى كورىنىس شاكىرتتەردىڭ دە سەنىمدەرىن نىعايتتى. مىنسىزدىكتەرى سىنعا الىناتىن ۋاقىتقا جانە ولاردى جىلدار بويى اۋىر ەڭبەك ەتۋگە دايار ەتتى. 30 جىلداي ۋاقىتتان كەيىن ەلشى پەتىر سول وقيعانى ٴسوز ەتىپ، سول كورگەنى كوكەيىندە ٵلى دە سايراپ تۇرعانىن ايتتى (پەت. 2-ح. 1:16—18).
9. يسا شاكىرتتەرىنە قانداي كەڭەستەر بەردى؟
9 «ونى تىڭداڭدار!» ەحوبا ۇلىن تىڭداعانىمىزدى جانە مويىنسۇنعانىمىزدى قالايتىنىن انىق ايتتى. يسا جەردە بولعاندا نە ايتقان؟ ول كادەگە جارايتىن كوپ نارسە ايتتى. مىسالى، شاكىرتتەرىنە ۋاعىزداۋدى مەيىرىممەن ۇيرەتتى، سەرگەك بولۋ كەرەكتىگىن قايتا-قايتا ەسكەرتتى (مات. 24:42؛ 28:19، 20). ولاردى «تار ەسىكتەن كىرۋگە بارىنشا تىرىسۋعا»، ەش بەرىلمەۋگە شاقىردى (لۇقا 13:24). سونىمەن قاتار ٴبىر-ٴبىرىن سۇيۋگە، بىرلىكتەرىن بۇزباۋعا جانە وسيەتتەرىن ورىنداۋ كەرەكتىگىنە باسا نازار اۋداردى (جوح. 15:10، 12، 13). بۇل وتە قاجەت كەڭەستەر ەدى! بۇل كەڭەستەر ماڭىزىن وسى كۇنگە دەيىن جوعالتقان جوق.
10، 11. يسانى تىڭدايتىنىمىزدى قالاي كورسەتەمىز؟
10 يسا: «شىندىقتى جاقتايتىن اركىم مەنىڭ داۋسىما قۇلاق سالادى»،— دەگەن (جوح. 18:37). مىسالى، «ٶزارا ٴتوزىمدى بولىپ، ٴبىر-ٴبىرىمىزدى كەڭپەيىلمەن كەشىرگەنىمىز» — ونىڭ داۋسىنا قۇلاق سالعانىمىز (قول. 3:13؛ لۇقا 17:3، 4). «ۋاقىت قولايلى نە قيىن بولسىن»، بارلىق كەزدە ىزگى حاباردى زور ىنتامەن ۋاعىزداعانىمىز دا ونىڭ داۋسىنا قۇلاق سالعانىمىزدى كورسەتەدى (ٴتىم. 2-ح. 4:2).
11 يسا: «قويلارىم داۋسىما قۇلاق سالادى»،— دەگەن (جوح. 10:27). ٸزباسارلارى ونى تىڭداپ قانا قويماي، ەستىگەندەرىنە ساي ارەكەت ەتەدى. ولار «كۇندەلىكتى تۇرمىس ۋايىمىن» ويلاپ الاڭدامايدى (لۇقا 21:34). كەرىسىنشە، ٴتىپتى قيىندىقپەن بەتپە-بەت كەلگەندە دە يسانىڭ وسيەتتەرىنە مويىنسۇنۋدى ومىرلەرىنىڭ تورىنە شىعارادى. كوپ باۋىرلاستار اۋىر سىناقتاردان ٶتىپ جاتىر. مىسالى، ولار قارسىلاستاردىڭ تاراپىنان ٴجابىر كورۋدە، جوقشىلىقتىڭ ازابىن تارتۋدا، تابيعي اپاتتىڭ سالدارىنان زارداپ شەگۋدە. قيىندىق قالاي قايىستىرماسىن، ولار ادالدىقتارىنان مىزعىماي تۇر. يسا ولاردى: «كىم مەنىڭ وسيەتتەرىمدى قابىلداپ، ورىنداسا، سونىڭ مەنى سۇيگەنى. ال مەنى سۇيگەندى اكەم سۇيەدى»،— دەپ سەندىرەدى (جوح. 14:21).
قىزمەتىمىز يسانىڭ داۋسىنا قۇلاق اسۋعا كومەكتەسەدى (12-ابزاستى قاراڭىز) *
12. يسانى تىڭدايتىنىمىزدى كورسەتۋدىڭ تاعى ٴبىر جولى قانداي؟
12 يسانى تىڭدايتىنىمىزدى كورسەتۋدىڭ تاعى ٴبىر جولى بار. بۇل — باسشىلىقتى قولعا الۋعا تاعايىندالعان ادامدارمەن قىزمەتتەسۋ (ەۆر. 13:7، 17). قۇدايدىڭ ۇيىمى سوڭعى جىلدارى كوپ وزگەرىستەر جاسادى. مىسالى، قىزمەتتە جاڭا قۇرالدار مەن جاڭا ادىستەر، اپتا ىشىندەگى كەزدەسۋىمىزدىڭ جاڭا فورماتى جانە پاتشالىق سارايلارىن سالۋ، جوندەۋ، كۇتىپ ۇستاۋ جۇمىستارىنداعى وزگەرىستەر. بۇل باسشىلىقتار ٴبىزدىڭ يگىلىگىمىز ٷشىن بەرىلەدى ٵرى قۇداي ۇيىمىنداعى سۇيىسپەنشىلىك پەن قامقورلىقتى پاش ەتەدى. ٴبىز بۇعان شەكسىز ريزامىز! ۇيىمنىڭ نۇسقاۋلارىنا ساي ٴجۇرىپ-تۇرعانىمىزدى ەحوبانىڭ جارىلقايتىنىنا سەنىمدى بولايىق.
13. يسانى تىڭداعانىمىزدىڭ بەرەرى نە؟
13 يسانىڭ عيبراتتى ٴتالىمىنىڭ بەرەرى مول. سوندىقتان ونى تىڭداۋدان ۇتپاساق، ەش ۇتىلمايمىز. مىسالى، ول تالىمىنىڭ سەرگىتەتىن كۇشى بار ەكەنىن ايتتى. شاكىرتتەرىنە ۋادە ەتىپ: «سوندا جاندارىڭ سەرگيدى. سەبەبى مويىنتۇرىعىم ىڭعايلى، جۇگىم جەڭىل»،— دەدى (مات. 11:28—30). يسانىڭ عۇمىرى مەن قىزمەتىن قامتيتىن ىنجىلدىڭ 4 كىتابى مەن تۇتاستاي قۇداي ٴسوزى ٴبىزدى راسىندا دا سەرگىتىپ، جاڭادان رۋحاني كۇش دارىتىپ، دانا قىلادى (ٴزاب. 19:7؛ 23:3). يسا ٴبىر سوزىندە بىلاي دەگەن بولاتىن: «قۇداي ٴسوزىن ەستىپ، ونى ورىندايتىندار باقىتتى!» (لۇقا 11:28).
ەحوبا ەسىمىن داڭقتايدى
14، 15. ا) جوحان 12:27، 28 گە ساي، ەحوبا كوكتەن سويلەگەن ٷشىنشى وقيعا قانداي؟ ٵ) نەگە ەحوبانىڭ سوزدەرى يسانى جۇباتىپ، كۇش بەردى؟
14 جوحان 12:27، 28 وقىڭىز. ٸنجىل جازۋشىسىنىڭ ٴبىرى جوحان ەحوبانىڭ كوكتەن ٷشىنشى رەت سويلەگەنىن جازىپ كەتكەن. ولىمىنە بىرنەشە كۇن قالعاندا، يسا سوڭعى قۇتقارىلۋ مەيرامىن تويلاۋ ٷشىن يەرۋساليمدە جۇرگەن. سوندا ول: «جانىم تولقىپ تۇر»،— دەدى دە، بىلاي دەپ دۇعا ەتتى: «اكە، ەسىمىڭدى داڭقتاي كور». سوندا كوكتەن اكەسىنىڭ: «مەن ونى داڭقتادىم، تاعى دا داڭقتايمىن»،— دەگەن داۋىسى ەستىلدى.
15 يسانىڭ تولقىپ تۇرعانىنا ٴبىر ۇلكەن سەبەپ بولدى: ول ەحوباعا ادال بولىپ قالۋ كەرەك ەدى. ونى قامشىنىڭ استىنا الىپ سابايتىنىن، جان بالاسى شىدامايتىن ازاپتى ٶلىم كۇتىپ تۇرعانىن بىلەتىن (مات. 26:38). ٴبىراق ول ٷشىن ەڭ ماڭىزدىسى اكەسىنىڭ ەسىمىن داڭقتاۋ ەدى. يسا ٴتىل تيگىزۋشى دەپ ايىپتالعاندىقتان، ٶلىمى قۇدايدىڭ اتىنا داق تۇسىرە مە دەپ قاتتى ۋايىمدادى. سوندىقتان ەحوبانىڭ سوزدەرى ونىڭ بويىنا سەنىمدىلىك قۇيعانى ٴسوزسىز. ەندى ول ەحوبانىڭ اتى داڭقتالاتىنىنا ەش كۇماندانبادى. اكەسىنىڭ سوزدەرى مازاسىز جانىن تىنىشتاندىرىپ، الداعى قيىندىققا توزۋگە كۇش-قۋات بەردى. بالكىم، سول كەزدە ەحوبانىڭ سوزدەرىن تۇسىنگەن جالعىز جان يسا عانا بولعان شىعار. دەسە دە ەحوبا بۇل سوزدەردى ٴبارىمىز ٷشىن جازىپ قالدىرۋدىڭ قامىن جاسادى (جوح. 12:29، 30).
ەحوبا ٶز ەسىمىن داڭقتاپ، حالقىن قۇتقارادى (16-ابزاستى قاراڭىز) *
16. قۇدايدىڭ ەسىمىنە كىر كەلەدى-اۋ دەپ قاي كەزدە ۋايىمداپ جاتامىز؟
16 يسا سياقتى ٴبىز دە ەحوبانىڭ اتىنا داق تۇسە مە دەپ ۋايىمداپ جاتامىز. بالكىم، يسانىڭ كۇيىن كەشىپ، ادىلەتسىزدىكتىڭ قۇربانى بولعان شىعارمىز. ٴبىزدى جاقتىرمايتىنداردىڭ ٴبىز تۋرالى جالعان اڭگىمەلەرىن ەستىپ، «ەحوبا مەن ۇيىمنىڭ اتىنا كىر كەلەتىن بولدى-اۋ» دەپ مازاسىزداناتىنىمىز تاعى بار. سوندايدا ەحوبانىڭ يساعا ايتقان سوزدەرى جانىمىزعا تىنىشتىق سيلايدى ەمەس پە؟! شەكتەن تىس ۋايىمعا بەرىلمەيىك. كيەلى كىتاپتا: «قۇدايدىڭ ادام اقىلىنان اسقان تىنىشتىعى جۇرەكتەرىڭ مەن وي-سانالارىڭدى ٴماسىح يسا ارقىلى ساقتايدى»،— دەگەن ۋادە جازىلعان (ٴفىلىپ. 4:6، 7). ەحوبا ٶز ەسىمىن ٵردايىم داڭقتاي بەرمەك. شايتان مەن وسى دۇنيەنىڭ كەسىرىنەن زيان كورگەن ادال قىزمەتشىلەرىن ەحوبا پاتشالىق ارقىلى تولىقتاي ايىقتىرادى (ٴزاب. 94:22، 23؛ يشايا 65:17).
ەحوبانىڭ داۋسىنا قۇلاعىڭىز تۇرىك ٴجۇرسىن
17. يشايا 30:21 دە ايتىلعانداي، ەحوبانىڭ داۋىسىن قالاي ەستيمىز؟
17 ەحوبا ٵلى دە ادامدارمەن سويلەسەدى (يشايا 30:21 وقىڭىز). ارينە، قۇداي بىزگە تىكەلەي كوكتەن ٷن قاتپايدى. دەسە دە نۇسقاۋلارىن جازباشا تۇردە كيەلى كىتاپ ارقىلى بەرىپ وتىر. بۇعان قوسا، ەحوبانىڭ كيەلى رۋحى «ادال باسقارۋشىعا» ٴبىزدى اس-سۋمەن قامتاماسىز ەتۋگە قوزعاۋ سالادى (لۇقا 12:42). بۇگىندە ٴبىز رۋحاني استى باسپا تۇرىندە، ونلاين تۇرىندە، كەرەك دەسەڭىز، اۋديو-ۆيدەو تۇرىندە مولىنان الىپ جاتىرمىز!
18. ەحوبانىڭ سوزدەرى سەنىمىڭىزدى قالاي ٶسىرىپ، باتىلدىعىڭىزدى قالاي قايرادى؟
18 ەحوبانىڭ ٶز ۇلىنا ايتقان سوزدەرىن ەشقاشان جادىمىزدان شىعارمايىق. قۇدايدىڭ كيەلى كىتاپتا جازىلعان بۇل سوزدەرى مىنا جايتتارعا سەنىمىمىزدى نىعايتسىن: بارلىق جاعداي ەحوبانىڭ ٴجىتى باقىلاۋىندا جانە ول شايتان مەن ونىڭ زالىم دۇنيەسى تيگىزگەن كەسىردى تولىقتاي جويادى. ەحوبانىڭ داۋسىنا قۇلاعىمىزدى ساق تۇرەيىك. سوندا بۇگىنگى دە، ەرتەڭگى دە قيىندىقتاردا قايىسپاي، تاباندى تۇرامىز. «قۇدايدىڭ ەركىن ورىنداپ، ونىڭ ۋادە ەتكەنىن يەمدەنۋ ٷشىن، تاباندى بولۋلارىڭ قاجەت»،— دەگەن كيەلى كىتاپتاعى سوزدەردى جەرگە تاستامايىق (ەۆر. 10:36).
4-ٵن «ەحوبا — مەنىڭ باعۋشىم»
^ 5-ابزاس يسا جەردە بولعاندا، ەحوبا ٷش جاعدايدا وعان كوكتەن ٴتىل قاتقان. سولاردىڭ بىرىندە ەحوبا يسانىڭ شاكىرتتەرىن ونى تىڭداۋعا شاقىردى. بۇگىندە ەحوبا جازباشا تۇردەگى ٴسوزى ارقىلى، ونىڭ ىشىنە يسانىڭ تالىمدەرى دە كىرەدى جانە ونىڭ ۇيىمى ارقىلى ٴتىل قاتادى. بۇل ماقالادان ەحوبا مەن يساعا قۇلاق اسقانىمىزدىڭ وزىمىزگە پايدالى ەكەنىن بىلەتىن بولامىز.
^ 52-ابزاس سۋرەتتەر سيپاتتاماسى: بايقامپاز اقساقال قىزمەت كومەكشىسىنىڭ پاتشالىق سارايىندا كومەكتەسىپ جاتقانىن، ادەبيەتتەردى تۇگەندەپ جاتقانىن كورىپ قالدى. سول ٷشىن ونى ماقتاپ جاتىر.
^ 54-ابزاس سۋرەت سيپاتتاماسى: سەررا-لەونەدەگى جۇپ ٴبىر بالىقشىعا قاۋىم كەزدەسۋىنە شاقىرۋ قاعازىن بەرىپ جاتىر.
^ 56-ابزاس سۋرەت سيپاتتاماسى: ىسىمىزگە تيىم سالىنعان جەردەگى كۋاگەرلەر ٴبىر ۇيدە جينالىپ وتىر. ساقتىق ٷشىن بارلىعى كۇندەلىكتى كيىممەن كەلگەن.
