16-زەرتتەۋ ماقالاسى
ٶلىم تۋرالى شىندىقتى بەكەم ۇستانىڭىز
«شىنايى حاباردى جالعان حاباردان وسىلاي اجىراتامىز» (جوح. 1-ح. 4:6).
73-ٵن باتىلدىق دارىتا كور
اڭداتپا *
بىرەۋ قايتىس بولعاندا، قۇدايعا ۇنامسىز ادەت-عۇرىپتارعا قاتىسقاننان گورى تۋىستارىڭىزدى جۇباتىڭىز (1، 2-ابزاستى قاراڭىز) *
1، 2. ا) شايتان ادامداردى قالاي الداپ ٴجۇر؟ ٵ) وسى ماقالادا نە قاراستىرامىز؟
«وتىرىكتىڭ اكەسى» شايتان ادامزات تاريحىنىڭ باستاماسىنان بەرى ادامداردى الداپ كەلەدى (جوح. 8:44). ول تاراتقان وتىرىكتەردىڭ كەيبىرى ٶلىم جانە ولىمنەن كەيىنگى ٶمىر جايىنداعى جالعان ىلىمدەر. قازىرگى ادەت-عۇرىپتار مەن ىرىم-تىيىمداردىڭ كوبىسى وسى ىلىمدەردەن باستاۋ العان. سوندىقتان كۋاگەرلەردىڭ وتباسىندا نە اعايىن-تۋىستارىنىڭ اراسىندا بىرەۋ قايتىس بولىپ جاتسا، باۋىرلاستارعا «سەنىم ٷشىن ايانباي كۇرەسۋگە» تۋرا كەلەدى (ياھد. 3).
2 وسىنداي سىناققا كەزىگىپ جاتساڭىز، جازبالارداعى ٶلىم تۋرالى شىندىقتى بەكەم ۇستانۋعا سىزگە نە كومەك بولادى؟ (ەفەس. 6:11). جاقىنىنان ايىرىلعان باۋىرلاسىڭىزعا قۇدايعا ۇنامسىز ادەت-عۇرىپقا ارالاسۋعا قىسپاق كورسەتىلسە، ونى قالاي جۇباتىپ، قالاي نىعايتا الاسىز؟ بۇل ماقالادا وسى جاعدايلارعا قاتىستى ەحوبانىڭ بەرگەن نۇسقاۋلارى قاراستىرىلادى. ٴبىراق اڭگىمەنى كيەلى كىتاپتاعى ٶلىم تۋرالى شىندىقتان باستايىق.
مارقۇمدار جايىندا شىندىق
3. العاشقى وتىرىك نە نارسەگە اكەپ سوقتى؟
3 و باستا قۇداي ادامداردى ٶلۋ ٷشىن ەمەس، ماڭگى ٶمىر ٴسۇرۋ ٷشىن جاراتقان بولاتىن. ومىرلەرى ماڭگى جالعاسۋ ٷشىن، ادام مەن حاۋا ەحوبانىڭ قاراپايىم بۇيرىعىن ورىنداۋلارى كەرەك ەدى. ەحوبا: «جاقسىلىق پەن جاماندىقتى تانىتاتىن اعاشتىڭ جەمىسىن جەمە! ويتكەنى ودان جەگەن كۇنى ولەسىڭ»،— دەدى (مۇس. 1-ج. 2:16، 17). ٴبىراق اراعا شايتان ٴتۇستى. ول جىلان ارقىلى حاۋاعا: «جوق، ولمەيسىڭدەر»،— دەدى. وكىنىشكە قاراي، حاۋا شايتاننىڭ وتىرىگىنە يلانىپ، جەمىستى الىپ جەدى. سونان سوڭ كۇيەۋى دە جەدى (مۇس. 1-ج. 3:4، 6). ناتيجەسىندە كۇنا مەن ٶلىم ادامزاتقا سور بولىپ جابىستى (ريم. 5:12).
4، 5. شايتان ادامداردى تاعى قالاي الداپ كەلەدى؟
4 ەحوبا ايتقانداي-اق، ادام مەن حاۋا ٶلدى. الايدا شايتاننىڭ وتىرىگى تاعى باسقا وتىرىكتەرگە ۇلاستى. سولاردىڭ ٴبىرى — ولگەن ادامنىڭ رۋحى ٶمىر سۇرە بەرەدى دەگەن ٸلىم. وسى ىلىمگە ۇقساس وتىرىكتەرگە سەنىپ جۇرگەن ادامدار قانشاما! (ٴتىم. 1-ح. 4:1).
5 بۇل وتىرىكتەردىڭ قۇرىعىنا ولار قالاي ٸلىنىپ ٴجۇر؟ شايتان بويىمىزداعى تابيعي قالاۋدى، ياعني ولگىمىز كەلمەيتىنىن جاقسى بىلەدى. ويتكەنى ٴبىز ماڭگى جاساۋ ٷشىن جارالعانبىز (ۋاع. 3:11). ٴبىز ٶلىمدى ٴتىپتى جاۋ سانايمىز (قور. 1-ح. 15:26). سوندىقتان شايتان ادامداردى ايلاسىنا وڭاي تۇسىرەدى.
6، 7. ا) شايتان مارقۇمدار تۋرالى شىندىقتى جاسىرا الدى ما؟ ٴتۇسىندىرىڭىز. ٵ) كيەلى كىتاپتاعى شىندىق ٴبىزدى قانداي قورقىنىشتان ارىلتتى؟
6 شايتان قانداي ايلا-امالعا كوشپەسىن، ٶلىم تۋرالى شىندىقتىڭ شىراعىن سوندىرە المادى. كوپ ادام كيەلى كىتاپتان مارقۇمداردىڭ جاعدايى مەن ولار ٷشىن قانداي ٷمىت بار ەكەنى جايىندا ٴبىلىپ، باسقالارعا دا ايتىپ ٴجۇر (ۋاع. 9:5، 10؛ ەل. ٸس. 24:15). بۇل شىندىق جانىمىزعا جۇبانىش سيلاپ، قورقىنىش پەن بەلگىسىزدىك سەزىمىنەن ارىلتتى. مىسالى، ٴبىز ولگەن ادامداردان قورىقپايمىز، بولماسا مارقۇم تۋىستارىمىز ازاپ شەگەدى دەپ ۋايىمدامايمىز. ولاردىڭ ومىردەن عايىپ بولعانىن، ەشكىمگە ەش نارسە ىستەي المايتىنىن ناقتى بىلەمىز. ويتكەنى ولگەن ادامنىڭ كۇيى تەرەڭ ۇيقىدا جاتقان ادامنىڭ كۇيىنە ۇقسايدى (جوح. 11:11—14). مارقۇمدار جايىندا بىزگە تاعى ٴبىر نارسە بەلگىلى: ولار ۋاقىتتى سەزبەيدى. ٴتىپتى عاسىرلار بۇرىن ولگەن ادامنىڭ وزىنە جاڭا دۇنيەدە تىرىلگەندە، قاس قاعىم ٴسات وتكەندەي بولادى.
7 مارقۇمداردىڭ جاعدايى تۋرالى شىندىقتىڭ انىق تا قاراپايىم، قيسىندى ەكەنىمەن ٴبارىمىز كەلىسەمىز. شىندىق پەن شايتاننىڭ ميعا سيمايتىن وتىرىكتەرىنىڭ ايىرماشىلىعى راسىمەن دە جەر مەن كوكتەي! ٴبىر جامانى، شايتاننىڭ جالعان ىلىمدەرى ادامداردى شاتاستىرىپ قانا قويماي، جاراتۋشى قۇدايىمىزدى قارالايدى. مۇنى جاقسىراق ٴتۇسىنۋ ٷشىن مىنا سۇراقتارعا توقتالىپ وتەمىز: قالايشا شايتاننىڭ وتىرىگى ەحوبانى قورلايدى، ٴماسىحتىڭ تولەم قۇرباندىعىن قاجەتسىز ەتىپ كورسەتەدى جانە ادامزاتتىڭ قاسىرەتىنە قاسىرەت قوسادى؟
وتىرىكتىڭ تيگىزگەن كەساپاتى
8. ەرەميا 19:5 تەن كورەتىنىمىزدەي، شايتاننىڭ ٶلىم جايلى وتىرىكتەرى ەحوبانى قالاي قارالايدى؟
8 شايتاننىڭ ٶلىم تۋرالى وتىرىكتەرى ەحوبانى قارالايدى. سول وتىرىكتەرگە ولگەن ادام توزاق وتىندا جانادى دەگەن ٸلىم دە كىرەدى. مۇنداي ىلىمدەر قۇدايدى قورلايدى. ويتكەنى ادامدى توزاقتا ازاپتاۋ سىندى قاتىگەزدىك تۇلا بويى سۇيىسپەنشىلىككە تولى قۇدايعا ەمەس، شايتانعا ٴتان (جوح. 1-ح. 4:8). قۇدايدىڭ وسىلاي قارالانىپ جاتقانى سىزگە اۋىر تيەتىن شىعار. ەحوبا قۇداي قاتىگەزدىكتىڭ بارلىق ٴتۇرىن جەك كورەتىندىكتەن، بۇل وعان ودان دا اۋىر تيەتىنى ٴسوزسىز! (ەرەميا 19:5 وقىڭىز).
9. شايتاننىڭ وتىرىگى جوحان 3:16 مەن 15:13 تە ايتىلعان ٴماسىحتىڭ تولەم قۇرباندىعى جايلى ىلىمگە قالاي اسەر ەتەدى؟
9 شايتاننىڭ ٶلىم جايلى وتىرىكتەرى ٴماسىحتىڭ تولەم قۇرباندىعىن قاجەتسىز ەتىپ كورسەتەدى (مات. 20:28). شايتاننىڭ تاعى ٴبىر وتىرىگى — ادامنىڭ ولمەس جانى بار دەگەن نانىم. بۇل راس بولسا، ادام ماڭگى ٶمىر سۇرەدى دەگەن ٴسوز. دەمەك، ماڭگى ومىرگە جول اشۋ ٷشىن ٴماسىح ٶز ٶمىرىن بوسقا قيعانى. الايدا مىنانى ۇمىتپاڭىز: ٴماسىحتىڭ قۇرباندىعى — ادامزات وتباسىنا كورسەتىلگەن سۇيىسپەنشىلىكتىڭ ەڭ وزىق كورىنىسى (جوحان 3:16؛ 15:13 وقىڭىز). قۇنىنىڭ ولشەۋى جوق وسى سيدى اياقاستى ەتەتىن جالعان ىلىمدەر ەحوبا مەن يسانىڭ سەزىمىن قاتتى جارالايدى!
10. شايتاننىڭ ٶلىم تۋرالى وتىرىكتەرى قالايشا قاسىرەتكە قاسىرەت قوسۋدا؟
10 شايتاننىڭ وتىرىكتەرى ادامزاتتىڭ قاسىرەتىنە قاسىرەت قوسۋدا. نارەستەسىنەن ايىرىلىپ، قان جىلاپ وتىرعان اتا-اناعا جۇرت «قۇدايعا پەرىشتە كەرەك بولعان عوي» دەپ جاتادى. بۇل اتا-انانىڭ قايعىسىن جەڭىلدەتپەي، كەرىسىنشە، ودان بەتەر اۋىرلاتادى، سولاي ەمەس پە؟! ال توزاق وتى تۋرالى جالعان ٸلىم بولسا كەزىندە نەبىر جاۋىز ارەكەتتەرگە تۇرتكى بولدى. مىسالى، شىركەۋ ىلىمدەرىنە قارسى شىققانداردى شىركەۋ قىزمەتشىلەرى باعاناعا بايلاپ، وتقا ورتەگەن. يسپان ينكۆيزيسياسى تۋرالى ٴبىر ەڭبەككە ساي، وسىنداي جاۋىزدىققا بارعاندار بىلاي دەپ سەنگەن ەكەن: «دىنبۇزارلار» وسىلاي «توزاق وتىنىڭ ٴدامىن تاتىپ كورسە»، ولەر الدىندا كۇنالارىنا وكىنىپ، توزاقتان امان قالا الادى. كوپ ەلدە ادامدار مارقۇم اتا-بابالارىنا تابىنادى، ولاردان جەلەپ-جەبەپ ٴجۇرۋىن سۇرايدى. ارۋاق ۇرادى دەپ قورىققاندىقتان ٶلىپ كەتكەن اتا-باباسىن ريزا قىلۋ ٷشىن بارىن سالادى. ٴيا، شايتاننىڭ وتىرىگىنەن شىققان ىلىمدەر ەشكىمگە دە جۇبانىش اكەپ جاتقان جوق. كەرىسىنشە، ادامداردى توزدىرىپ، ۋايىم مەن قورقىنىشتىڭ قۇلدىعىنا ٴتۇسىرىپ وتىر.
شىندىقتىڭ شىراعىن بۇركەمەيىك
11. تۋىستارىمىز بەن دوستارىمىز قۇداي سوزىنە قايشى ارەكەت ەتۋگە قالاي يتەرمەلەۋى مۇمكىن؟
11 ەحوبانى جانە ونىڭ ٴسوزىن جاقسى كورگەنىمىز وعان مويىنسۇنۋعا كۇش بەرەدى. اسىرەسە تۋىستارىمىز بەن دوس-جاراندارىمىز، نيەتتەرى تازا بولسا دا، جازبالار قۇپتامايتىن جورالعىلارعا قاتىسۋعا يتەرمەلەسە. ولار «مارقۇمعا دەگەن قۇرمەتىڭ قايدا» دەپ شىمبايىمىزعا باتاتىن سوزدەر ايتار. ٴتىپتى «تىرىلەرگە كەسىرىڭ تيەتىن بولدى» دەر. وسىندايدا شىندىقتى بەكەم ۇستانۋعا نە كومەكتەسەدى؟ بۇل ورايدا كيەلى كىتاپتىڭ كەلەسى پرينسيپتەرىنە قۇلاق اسقانىمىز ٴجون.
12. ادامنىڭ قايتىس بولۋىمەن بايلانىستى قانداي ىلىمدەر مەن سالت-جورالار جازبالارعا قايشى؟
12 جازبالار قۇپتامايتىن ىلىمدەر مەن سالت-جورالاردان «بولەك تۇرۋعا» نىق بەكىنىڭىز (قور. 2-ح. 6:17). كاريب حالقىندا ادام ولگەن سوڭ ونىڭ ارۋاعى اينالانى شارلاپ، كەزىندە وزىنە جاماندىق جاساعان ادامداردان كەك الادى دەگەن سەنىم بار. ٴبىر ەڭبەكتە ولگەن ادامنىڭ ارۋاعى ٴتىپتى كۇللى ايماقتىڭ حالقىنا دا زيان كەلتىرە الاتىنى جازىلىپتى. ال افريكادا كىسى ولگەن ۇيدىڭ ادامدارى ۇيدەگى اينالاردىڭ بەتىن جاۋىپ، مارقۇمنىڭ سۋرەتتەرىن تەرىس قاراتىپ قويادى ەكەن. سەبەبى نەدە دەيسىز عوي؟ ولار ولگەن ادام ٶز بەينەسىن كورمەۋى كەرەك دەپ سەنەدى. ەحوبانىڭ قىزمەتشىسى بولعاندىقتان، ٴبىز شايتاننىڭ وتىرىگىن قولداپ-قولپاشتايتىن مۇنداي نانىم-سەنىمدەرگە يلانبايمىز دا، سالت-جورالارىنا ارالاسپايمىز دا! (قور. 1-ح. 10:21، 22).
كيەلى كىتاپقا نەگىزدەلگەن ادەبيەتتەردى مۇقيات زەرتتەپ، كۋاگەر ەمەس تۋىستارىڭىزبەن اشىق سويلەسسەڭىز، كوپ قيىندىقتىڭ الدىن الاسىز (13، 14-ابزاستى قاراڭىز) *
13. قانداي دا ٴبىر سالت-جورانىڭ قۇدايعا ۇنايتىنىن نە ۇنامايتىنىن بىلمەسەڭىز، جاقىپ 1:5 كە ساي، نە ىستەگەنىڭىز ٴجون؟
13 قانداي دا ٴبىر سالت-جورانىڭ نە راسىمنىڭ ەحوباعا ۇنايتىن-ۇنامايتىنىن بىلمەسەڭىز شە؟ وندايدا ەحوباعا سەنىممەن دۇعا ايتىپ، ودان دانالىق سۇراڭىز (جاقىپ 1:5 وقىڭىز). ادەبيەتتەرىمىزدى اقتارىپ، ىزدەنىس جۇرگىزىڭىز. قاجەت بولسا، قاۋىمىڭىزداعى اقساقالدارمەن اقىلداسىڭىز. ولار قاتىسۋعا بولادى-بولمايدى دەپ كەسىپ ايتپاعانمەن، جاعدايعا تۋرا كەلەتىن پرينسيپتەردى كورسەتىپ بەرۋى مۇمكىن. مۇنداي پرينسيپتەردىڭ كەيبىرى وسى ماقالادا دا كەلتىرىلدى. وسى قادامداردى جاساساڭىز، ٴتۇيسىنۋ قابىلەتىڭىزدى ماشىقتاندىراسىز. ال ٴتۇيسىنۋ قابىلەتىنىڭ ارقاسىندا جامان مەن جاقسىنى تاپ باسىپ ايىرا الاتىن بولاسىز (ەۆر. 5:14).
14. باسقالاردى سۇرىندىرمەۋ ٷشىن نە ىستەسەك بولادى؟
14 «ٴبارىن قۇدايدى دارىپتەۋ ٷشىن ىستەڭدەر!.. قاۋىمداعىلاردىڭ سۇرىنۋىنە سەبەپ بولماڭدار» (قور. 1-ح. 10:31، 32). قانداي دا ٴبىر سالت-جوراعا قاتىسۋ-قاتىسپاۋدى شەشەر الدىن شەشىمىمىز وزگەلەردىڭ، اسىرەسە باۋىرلاستارىمىزدىڭ ار-ۇجدانىنا قالاي اسەر ەتەتىنى جايلى ويلانعانىمىز جاقسى. سەبەبى ٴبىز ەشكىمدى سۇرىندىرگىمىز كەلمەيدى! (مار. 9:42 ٴسىلت.). سەنۋشى ەمەس ادامداردى دا تەككە رەنجىتە بەرگىمىز كەلمەيدى. ولارمەن ۇرسىسىپ نەمەسە ادەت-عۇرىپتارىن كۇلكى ەتپەگەنىمىز ٴجون. سۇيىسپەنشىلىگىمىز ولارعا ىزەتپەن سويلەۋگە قوزعاۋ بولسىن. ويتكەنى بۇل ەحوباعا داڭق اكەلەدى. سۇيىسپەنشىلىكتىڭ كۇشىنە كۇمانىڭىز بولماسىن! سەزىمىن ەسكەرىپ، قۇرمەتپەن سويلەسەك، قاتۋلانىپ تۇرعان ادامنىڭ ٶزى ٴجىبىپ كەتۋى مۇمكىن.
15، 16. ا) نەلىكتەن باسقالارعا سەنىمىمىز جايىندا ايتىپ قويعانىمىز ابزال؟ مىسال كەلتىرىڭىز. ٵ) پاۋىلدىڭ ريمدىكتەرگە 1:16 دا ايتقان سوزدەرىنىڭ بىزگە قانداي قاتىسى بار؟
15 اعايىن-تۋىستارىڭىزعا ەحوبا كۋاگەرى ەكەنىڭىزدى ايتىپ قويىڭىز (يشايا 43:10). ەحوبا قۇدايعا سەنەتىنىڭىزدى تۋىستارىڭىز بەن كورشى-قولاڭعا ايتىپ قويساڭىز، ابىر-سابىر ۋاقىتتا وزىڭىزگە جەڭىل بولادى. موزامبيكتە تۇراتىن فرانسيسكو بىلاي دەپ جازدى: «ايەلىم كارولينا ەكەۋمىز شىندىقتى بىلگەن سوڭ، تۋىستارىمىزعا بۇدان بىلاي ولگەندەرگە سيىنبايتىنىمىزدى ايتتىق. بۇل شەشىمىمىزدىڭ بەرىكتىگى كارولينانىڭ اپكەسى قايتىس بولعاندا سىنعا الىندى. جەرگىلىكتى ٴراسىم بويىنشا، مارقۇمدى جۋىندىرىپ، كەيىن سول سۋ توگىلگەن جەردە ەت جاقىن تۋىسى ٷش كۇن تۇنەۋى قاجەت. مۇنىڭ ٴبارى ولگەن كىسىنىڭ رۋحىن ريزا قىلۋ ٷشىن جاسالىنادى. ٴبىزدىڭ جاعدايدا تۋىستار بۇل مىندەتتى كارولينا اتقارادى دەپ كۇتتى».
16 فرانسيسكو مەن كارولينا نە ىستەدى ەكەن؟ فرانسيسكو بىلاي دەيدى: «ەحوبانى سۇيگەندىكتەن ٵرى وعان ۇنامدى بولعىمىز كەلگەندىكتەن، ٴبىز بۇدان باس تارتتىق. الايدا شەشىمىمىز كارولينانىڭ تۋىستارىنا ۇناي قويمادى. ولار اشۋ شاقىرىپ، ولگەن ادامعا دەگەن سي-قۇرمەتتەن ادا ەكەنىمىزدى ايتىپ جازعىردى. ەندى بىزبەن بەت كورىسپەي كەتەتىندەرىن، ەشقانداي كومەك كورسەتپەيتىندەرىن ايتتى. ٶز سەنىمىمىزدى بۇرىنىراقتا ايتىپ تۇسىندىرگەندىكتەن، ابىر-سابىردا ولارعا جاۋاپ قايتارىپ اۋرە بولىپ جاتپادىق. كەي اعايىندارىمىز: «بۇلار ٶز ۇستانىمدارى جايىندا باياعىدا ايتىپ ەسكەرتىپ ەدى عوي!»— دەپ ٴبىزدى قورعاشتادى. سودان ارادا ٴبىراز ۋاقىت ٶتىپ، تۋىستارىمىزدىڭ اشۋى باسىلدى. كەيىن ولارمەن تاتۋلاسىپ كەتتىك. كەيبىرى ٴتىپتى ۇيىمىزگە كەلىپ، جازبالارعا نەگىزدەلگەن ادەبيەتتەر الىپ كەتتى». ولاي بولسا، ٶلىم تۋرالى شىندىقتى بىلەتىنىمىزگە ەشقاشان ۇيالمايىق، قايتا ونى قىزعىشتاي قورعايىق! (ريمدىكتەرگە 1:16 وقىڭىز).
جوقتاعانداردى جۇباتىپ، دەمەۋ بولىڭىز
ناعىز دوس سۇيىكتى ادامىنان ايىرىلعان جاندى جۇباتادى ٵرى دەمەيدى (17—19 ابزاستاردى قاراڭىز) *
17. جاقىنىن جوعالتقان باۋىرلاسىمىزدى جۇباتۋعا نە كومەك بولادى؟
17 باۋىرلاسىمىز جاقىنىن جوعالتقاندا، ناعىز دوسى، قيىن شاقتا ارقا سۇيەر باۋىرى بولا بىلگەنىمىز دۇرىس (ناق. س. 17:17). اسىرەسە وعان جازبالارعا قايشى كەلەتىن راسىمگە قاتىسۋعا قىسىم جاسالىپ جاتسا، وسىلاي ەتكەنىمىز ماڭىزدى. قازىر باۋىرلاسىمىزدى جۇباتۋعا كومەك بولاتىن كيەلى كىتاپتاعى ەكى پرينسيپكە نازار اۋدارايىق.
18. يسا نەگە كوزىنە جاس الدى؟ ونىڭ ۇلگىسىنەن نە ۇيرەنەمىز؟
18 «قايعىرعانداردىڭ قايعىسىنا ورتاق بولىڭدار» (ريم. 12:15). قايعىدان كوكىرەگى قارس ايىرىلعان ادامدى جۇباتۋعا ٴسوز تاپپاي قينالاتىن كەزدەرىمىز بولادى. ٴبىراق كەيدە ونى سوزىمىزدەن گورى كوز جاسىمىز جاقسىراق جۇباتۋى مۇمكىن. يسانىڭ دوسى ەلازار قايتىس بولعان كەزدە، اپكەلەرى ٴماريام مەن مارتا جانە دوستارى ونى جوقتاپ قايعىردى. ٴتورت كۇننەن سوڭ يسا كەلدى. ەلازاردى تىرىلتكەلى جاتسا دا، ول «كوزىنە جاس الدى» (جوح. 11:17، 33—35). ونىڭ كوز جاسى ەلازاردىڭ جاقىندارىنا دەگەن سۇيىسپەنشىلىگىن كورسەتىپ، مارتا مەن ٴماريامعا جۇبانىش بولدى. سونداي-اق ونىڭ كوز جاسى وسى ساتتە ەحوبانىڭ دا نە سەزىنىپ جاتقانىن كورسەتتى. سول سەكىلدى باۋىرلاسىمىز ٴبىزدىڭ سۇيىسپەنشىلىگىمىز بەن قامقورلىعىمىزدى كورگەندە، ٶزىنىڭ جالعىز ەمەس، قامقور دا جاناشىر دوستارىمەن بىرگە ەكەنىن سەزىنەدى.
19. ۋاعىزداۋشى 3:7 گە ساي، قايعىرىپ جۇرگەن باۋىرلاستى قالاي جۇباتا الامىز؟
19 ۇندەمەيتىن ۋاقىت پەن سويلەيتىن ۋاقىت بار (ۋاع. 3:7). قايعىدان ەزىلگەن باۋىرلاستىڭ قۇلاعان كوڭىلىن ورنىقتىرۋدىڭ تاعى ٴبىر جولى — ونى مۇقيات تىڭداۋ. ول ىشىندەگى مۇڭ-قايعىسىن توگىپ-توگىپ الار، ٴتىپتى «اشىنا سويلەر» (ٵيۇپ 6:2، 3). مۇندايدا كوڭىلىڭىزگە قاياۋ الماڭىز. ويتكەنى جىعىلعانعا جۇدىرىق بولىپ، وعان كۋاگەر ەمەس تۋىستارى قىسىم كورسەتىپ جاتقان شىعار. سوندىقتان ونىمەن بىرگە قۇدايعا دۇعا ايتىڭىز. «دۇعالاردى تىڭدايتىن» ەحوبادان كۇش بەرۋىن، وي-سانانى ورنىقتىرۋىن جالىنىپ سۇراڭىز (ٴزاب. 65:2). مۇمكىندىك بولسا، ونىمەن بىرگە كيەلى كىتاپتى وقىڭىز. يا بولماسا ادەبيەتتەرىمىزدەن جاعدايعا ساي كەلەتىن ماقالانى، كوڭىلگە مەدەت بولاتىن ٶمىربايان وقىساڭىزدار بولادى.
20. كەلەسى ماقالا نە جايىندا؟
20 بىزگە مارقۇمدار تۋرالى شىندىق تا، قابىردەگىلەردى كەرەمەت بولاشاق كۇتىپ تۇرعانى دا ٴمالىم (جوح. 5:28، 29). بۇعان ٴبىز وتە ريزامىز! ولاي بولسا، سوزىمىزدەن دە، ىسىمىزدەن دە جازبالارداعى شىندىقتى بەكەم ۇستاناتىنىمىز كورىنىپ تۇرسىن. وسى شىندىقتى مۇمكىندىك تۋعان كەزدىڭ بارىندە ادامدارعا ايتىپ جۇرەيىك. كەلەسى ماقالادا شايتاننىڭ شىندىقتى جاسىرۋ ٷشىن قولداناتىن باسقا ٴبىر ايلاسى قاراستىرىلادى. بۇل — سپيريتيزم. سول ماقالادا جىن-پەرىلەردىڭ قۇرىعىنا اينالعان راسىمدەر مەن ويىن-ساۋىق تۇرلەرىنەن نەگە اۋلاق بولۋىمىز كەرەكتىگى تالقىلانادى.
24-ٵن ەحوبانىڭ تاۋىنا كەلىڭدەر!
^ 5-ابزاس شايتان مەن ونىڭ جىن-پەرىلەرى ادامداردى ولگەندەردىڭ كۇيى تۋرالى وتىرىككە سەندىرىپ ٴجۇر. بۇل وتىرىكتىڭ كەسىرىنەن جازبالارعا قايشى كەلەتىن كوپتەگەن ادەت-عۇرىپتار پايدا بولدى. بىرەۋلەر ٴسىزدى سول عۇرىپتارعا قاتىسۋعا ماجبۇرلەسە، وسى ماقالاداعى كەڭەستەردىڭ ارقاسىندا ەحوباعا ادالدىق ساقتاي الاسىز.
^ 55-ابزاس سۋرەت سيپاتتاماسى: جاقىنىنان ايىرىلعان ايەلدى كۋاگەر تۋىستارى جۇباتىپ جاتىر.
^ 57-ابزاس سۋرەت سيپاتتاماسى: جەرلەۋ ٴراسىمى جايلى ىزدەنگەن سوڭ، باۋىرلاسىمىز تۋىستارىنا ٶز نانىمدارىن ىزەتتىلىكپەن ٴتۇسىندىرىپ جاتىر.
^ 59-ابزاس سۋرەت سيپاتتاماسى: اقساقالدار جاقىن ادامىنان ايىرىلعان باۋىرلاستى جۇباتىپ، جىگەرلەندىرىپ جاتىر.
